Programa sa DOH pag professionalise sa mga embalmer ug masahista gihingusgan

Ni: Amor Saludar

CEBU CITY, Agosto 17 (PIA) -- Gihingusgan karon sa Department of Health (DOH) ang ilang kampanya sa pagsiguro nga aduna gayo’y ensaktong kahibalo sa pagbuhat sa ilang trabaho ang mga masahista ug  embalmer dinhi sa  rehiyon, subay sa Health and Sanitary Code ug Caring of  Dead Persons and Disposal sa DOH.

Atol sa gipahigayon nga AGIO forum sa DOH kaganinang buntag, gibutyag  ni Eng.Evangeline Canoneo Environmental and Occupational Health Coordinator sa DOH 7 nga gikinahanglan makabaton og Certificate of Training isip lisensya ang mga embalmer ug masahista aron pag siguro nga aduna silay igong katakos sa maong propesyon.

Dugang  pa niya nga usa kini sa mga rekisito nga ginakinahanglan  DOH una pa sila mo issue ug sanitary permit ngadto sa mga massage centers ug funeral parlor dinhi sa rehiyon.

           

Gipahibalo ni Canoneo nga sa sunod tuig hugtan na unya nila ang kamandoan nga ang matag massage center ug funeral parlor gikinahanglan nang magbaton og sanitary permit diin subay unya niini mga lisensyado na nga mga masahista ug mga embalsamador ang moserbisyo sa publiko.

           

Subay niini usa ka institusyon ang mingsuporta ning maong programa sa DOH pinaagi sa paghatag ug insaktong pagbansay bansay aron sama sa ubang propesyon makabaton usab ug lisensya ug  matawag nga propesyonal ang mga embalmer nga nag alagad sa mga funeral parlor.

           

Laing usa usab ka institusyon ang nihatag sa ilang suporta sa programa sa DOH pinaagi sa paghatag ug training ngadto sa mga masahista aron sila makaangkon og lisensya ug matawag nga propesyonal ug mahatagan ug kasiguroan ang publiko nga mamahimomg luwas tungod kay usa sa ilang gitagaan ug igong atensyon ang paghatag ug kahibalo sa mga masahista sa pag ila sa parte sa lawas sa tawo nga angayang dapatan sa masahe

Giklaro sa mga kadagkuan sa maong institusyon nga ang mga kurikulum nga mandato sa DOH maoy ilang gisunod base sa bag-ong Implementing Rules and Regulations ug sa Caring of Dead Persons and Diposal ug Sanitation Code of DOH.

Sa nasayran  ang DOH usab ang maghatag og Licensure Exam sa mga trainees ingon man mo issue og certificate  ngadto sa mga mopasar.

Gitataw ni Canoneo nga tungod unya niini masiguro ang kaluwasan sa publiko ingon man mahatagan og dungog ang mga masahista ug embalsamador. (PIA- Cebu/AS)