Suspension order sa Trans-Asia 5 gilibkas na
Ni Eli C. Dalumpines

CEBU CITY , August 6 (PIA) – Mahimo nang makalawig ang Trans-Asia 5, usa sa mga barko sa Trans-Asia ShippingLines, human libkasa sa Maritime Industry Authority 
(MARINA) ang suspension order niini.

Kini maoy gi-kumpirmar ni Julian Sy, Jr. representante ug tigpamaba sa Trans-Asia atol sa pakighinabi sa radyo karong hapon.

Si Sy nagkanayun nga gikalipay ug daku sa tigduma sa Trans Asia ang pagkumpirmar ni MARINA Administrator Emerson Lorenzo sa rekomendasyon paglibkas sa suspension order sa nahisgutang barko.

Matud ni Sy, daku-daku gyud ang ilang alkanse sa pag suspenso sa ilang operasyon tungod kay gawas nga wa sila’y kita, nagpadayon pa man usab sila’g sweldo sa ilang kapin 400 ka mga trabahante.

Kumpyansa hinoon silang daan, matud pa niya, nga maka-pasar sila sa gipahigayong inspeksyon tungod kay kumpleto man ang ilang mga ekipo ug ningsubay man sila sa gilatid nga safety standard.

Subay niini, iyang gipaniguro sa mga sumasakay nga luwas nga sakyan ang ilang mga barko. Isip pagpamatu-od niini ang ilang pagpasar sa inspeksyon sa MARINA.

Gikatakdang molawig ang Trans-Asia 5 paingon sa Cagayan de Oro karong gabii, suma pa ni Sy. (PIA-Cebu/ECD)

===========

Balaud nga magpanalipud sa Pulis batok sa mga sindikato sa druga

gikinahanglan, matud sa kanhi opisyal sa drugs board

Ni Eli C. Dalumpines

CEBU CITY, August 6 (PIA) – Kinahanglan duna’y pamaagi sa balaud nga mapanalipdan ang mga pulis batok sa pagpanghasi sa mga sindikato sa druga, suma ni kanhi Dangerous Drugs Board (DDB) Chairman Clarence Paul Oaminal.

Si Oaminal, sa pakighinabi sa radyo karong buntag, nagkanayun nga naglaraw siya pag-hangyo sa Korte Suprema nga maghimo ug Rules of Court aron gamiton nga latid pag-evaluate kung angayan ba gyu’ng trataron ang mga kasong isang-at sa mga sindikato sa druga batok sa pulis.

Niining paagiha, matud ni Oaminal, dunay sagang ang pulis gikan sa pagpanghasi sa mga sindikato sa druga nga ilang naligsan samtang sila nagpatuman sa balaud.

Mipadayag si Oaminal sa iyang obserbasyon nga ning-minos ang mga kasong gisang-at sa kapolisan kalabut sa ginadiling druga karong tuiga.

Kini, suma pa niya, timailhan nga nagpanagana na ang kapulisan sa ilang kampanya pagsumpo sa ginadiling druga tungod niini nga suliran. 

Lain pang suliran nga gi-atubang sa pulis, siya nagkanayun, ang ka-kuwang ug pundo nga ilang magamit sa ilang operasyon. Kini tungod kay wa ma’y gigahin ang buhatan alang niini.

Tungod niini, siya naglaraw paghimo’g lakang aron mahatagan ug gahin sa pamunu-an sa ahensya ang maong kampanya aron epektibo ang ilang anti-illegal drug operations.

Matud ni Oaminal, pabiling nanguna ang kapulisan sa kampanya batok sa ginadiling druga tungod kay wa may igong tawo and Philippine Drug Enforcement Agency (PDEA), ang ahensya nga gisangunan niini.

Ang maong mga lakang, suma pa niya, makahatag ug morale sa kapulisan nga mobuhat sa ilang trabaho tungod kay duna na man unya sila’y suporta. (PIA-Cebu/ECD)