DOLE motanyag og proramang livelihood sa mga OFW’s

nga ma-apektuhan sa krisis sa Estados Unidos

CEBU  CITY, Agosto 9 (PIA) -- Ang Department of Labor and Employment (DOLE) walay nalantawan nga aduna unya’y pagpanaktak sa mga Filipino Workers nga atua sa Estados Unidos bisan pa man sa nasinating krisis sa ekonomiya sa nahisgutang nasud.

Si Labor Secretary Rosalinda Baldoz nagkanayon nga ang kondisyon sa ekonomiya sa Estados Unidos gamay lamang unya og mamahimomg epekto sa mga Pilipino nga atua didto manrabaho.

Apan gipasalig ni Baldoz nga andam ang gobyerno sa Pilipinas sa pagtabang  sa mga Filipino Workers nga mapugos unya sa pagpauli sa nasud kun ugaling magpadayon ug osamot ang nasinating ekonomikanhong krisis sa nahisgutang nasud.

Dugang pa ni Baldoz  nga ila unya kining gamiton nga oportunidad aron pagkumbinser sa mga apektadong Pilipino nga sa ilang pagbalik sa nasud angay nga pahimuslan ang  mga programang livelihood ug  entrepreneurial nga itanyag sa gobyerno, aron mamahimo na unya silang mga negosyante.

Gisiguro  ni Baldoz nga ang  DOLE andam usab sa pag-abag sa mga OFW’s kun ugaling nagtinguha silang mobalhin pagtrabaho isip OFW sa mga nasud nga taas ang ekonomiya sama sa Singapore, Taiwan, South Korea, Hongkong ug Australia. (PIA-Cebu/Amor Saludar)

===========

Kompanya  sa lana magtukod og labing  unang sangang estasyon dinhi sa Sugbo CEBU CITY, Agosto 9 (PIA) – Laing kompanya sa lana gikatakdang motukod sa ilang labing unang sangang estasyon sa Visayas, particular na dinhi sa Sugbu. Ang Eastern Petroleum Corporation motukod og sangang estasyon dinhi sa Sugbu sulod karong tuiga. Matud pa ni Fernando Martinez, Chief Executive Officer sa Eastern Petroleum kini tungod kay  ang Sugbu usa sa pinakadakong konsumidor sa produktong petrolyo gawas sa Metro Manila. Sa gipahigayon nga courtesy call tali ni Gobernadora Gwen Garcia didto sa Kapitolyo niadtong niaging Biyernes,  si Martinez nagkanayon nga ang presyo sa mga produktong petrolyo sa Sugbu ning-ubos na kompara sa presyo niini sa Manila. Kahinumdoman nga niadtong miaging tuig si Gov. Garcia nipasaka og kaso sa tulo ka mga dagkong kompanya sa lana dinhi sa Sugbu gumikan sa pagpasaka niini sa presyo sa  ilang mga produkto, mas taas itandi sa Metro Manila. Laing nakitang rason sa pagkunhod sa presyo sa petrolyo dinhi sa probinsya  mao ang pagbutho sa mga independenteng kompanya sama sa Sea Oil ug Flying V. Ang maong pamahayag ni Martinez giuyonan usab sa Gobernadora  ug siya nagkanayon nga gumikan unya sa nagkadaghang  independenteng kompanya sa lana sa Sugbu dili na unya makontrolar sa mga dagkong kompanya ang presyo sa mga produktong petrolyo sa probinsya. (PIA-Cebu/Amor Saludar)

============

Rama nagplanong usbawan ang ayudang pinansiyal sa mga senior citizens sa siyudad

Ni:Amor Saludar

CEBU CITY, Agosto 8 (PIA) -  Nagplano si Cebu City Mayor Michael Rama sa pagpausbaw sa financial assistance sa mga senior citizens og tag P1,000.00 matag usa.

Ang maong lakang gihangop sa kadaghanan naglakip na sa kanhi mga kaalyado ug karon nahimo nang kritiko sa Mayor sama nila ni Kongresista Tomas Omena ug Bise Mayor sa siyudad Joy Augustus Young.

Gilakip ni Rama sa iyang gipasar nga Supplemental Budget No.2 ang kantidad nga P45,000.00 alang niining maong katuyoan.

Sa higayon nga maaprobahan na unya kini sa konseho sa siyudad sa Sugbo, madawat unya sa mga senior citizens ang usbaw nga P1,000.00 sa ilang incentives tapos niining tuiga dungan sa ilang P2,000.00 nga Christmas gift.

Ang mga senior citizens sa siyudad nagdawatan og tag P4,000.00 kada tuig isip P2,000.00 nga birthday gift ug laing P2,000.00 nga Christmas gift.

Ug karong umaaabot Disyembre ning tuiga, kung magmalampuson ang maong lakang ni Rama, aduna na unya’y usbaw nga P1,000.00 ang tinuig nga salaping madawat sa mga

senior citizens gikan sa gobyerno sa siyudad.

Sumala pa ni Guillermo Casinillo, Head of the Office of the Senior Citizens Affairs, nga ang maong usbaw dako unya nga abag alang sa medisina ug pagkaon sa mga senior citizens sa siyudad.

Karong adlawa gikatakdang isumiter na ngadto sa konseho sa siyudad sa Sugbo ang planong pagpausbaw sa incentives sa mga senior citizens sa Sugbo.  (PIA-Cebu/Amor Love Saludar)

=========

Upat ka mga barko sa Trans-Asia gitugutan nang makalawig
Ni Eli C. Dalumpines

CEBU CITY, Agosto 8, (PIA) – Gitugutan na sa Maritime Industry Authority (MARINA) dinhi sa Tunga-Tungang nga makalawig ang upat ka mga barko sa Trans-Asia Shipping Lines human kini mopasar sa audit.Kini ang gibutyag sa tigpamaba sa MARINA-7, Atty. Jose Cabatingan, sa pakikhinabi sa media karong buntag. 

Matud ni Cabatingan, gilibkas na sa ilang buhatan ang suspension order sa MV Trans-Asia 5, MV Trans-Asia 3, MV Trans-Asia 2 ug MV Asia-Indonesia ug mahimo na kining makalawig.

Apan tulo pa ka mga barko sa maong kumpanya ang ipa-ilawom sa verification inspection, apil na niini ang MV Asia-China nga gikatakdang susihon sa MARINA karong adlawa.

Samtang ang MV Asia-Pacific ug ang usa ka cargo vessel niini miagi na sa re-inspection apan wa pa kini tuguti nga makalawig tungod kay duna pa man kini kinahanglan nga i-comply.

Suma pa ni Cabatingan, mopadala pa sila ug notice of deficiencies ngadto sa Trans-Asia aron tumanon ang gipangayo nga mga rekisitos sa ilang buhatan.

Kun kahinumduman, gi-suspenso sa MARINA ang mga barko sa Trans-Asia human malunod ang usa sa mga barko niini, ang MV Asia-Malaysia kaniadtong Hulyo 31 didto sa kadagatan sa Ajuy,Iloilo. (PIA-Cebu/ECD)

==========

Independent players naninguha nga mo-ubos ang presyo sa lana
Ni Eli C. Dalumpines

CEBU CITY, Agosto 8 (PIA) – Mipasalig ang Independent Philippine Petroleum Corporation Association (IIPCA) kang Gobernador Gwen Garcia nga ang ilang presyo sa lana dinhi sa Sugbo sama na o di ba kaha mas ubos pa itandi sa kauluhan.

Kini suma kang Fernando Martinez, chairman ug chief executive officer sa Eastern Petroleum Group ug kasamtangang chairman sa IPPCA, atol sa iyang pagtambong sa 442nd founding anniversary sa lalawigan sa Sugbo sa milabay’ng Sabado.

Matud ni Martinez, ang pagsulod sa independent oil players dinhi sa Sugbo nakapahunhod sa presyo sa lana diin pareho na kini, o di ba kaha mas ubos pa ug 50 centavos, itandi sa Manila.

Siya nagkanayun nga di molabaw sa P1.50 ang magasto sa pagdala sa lana paingon nganhi sa Sugbo.

Suma pa niya nga angayan nga makapahimos ug mas reasonable nga presyo sa lana ang mga Sugbu-anon sama sa tuyo sa oil deregulation law ug nga wa na’y luna ang monopoliya sa presyo sa lana.

Ang maong balita gikalipay sa gobernador diin, sa sayo, pa misang-at ug reklamo sa Department of Justice (DOJ) tungod sa ka-taas sa presyo sa lana sa tulo ka mga dagkung kumpanya nga nag-operate dinhi sa Sugbo. (PIA-Cebu/ECD)

==========

Gatos kapin ang motambong sa OFW reintegration program seminar

Ni Juju S. Manubag-Empuerto

CEBU CITY, Agosto 7 (PIA) -- Kapin sa usa ka gatos nga mga OFWs sa Central Visayas ang gikatakdang motambong sa ipahigayon nga  usa ka OFW Reintegration Program seminar karong Agosto 18 diha sa buhatan sa Overseas Workers Welfare Administration (OWWA).

    

Sa pakighinabi sa Philippine Information Agency-Cebu, si  supervising admin officer sa OWWA nga si Rey Jacalan miingon nga ang maong gidaghanon nanubra na sa gitino nila nga 100 ka mga OFWs kay mao ra ni paigo sa ilang lugar, ug dili na sila modawat pa ug dugang nga mga moparehistro.  

Si jacalan mipahibalo nga patawagon lamang kadtong buot moapil sa tunga nga adlaw nga pagbansay-bansay sa dili pa matapos ang Agosto aron malista sila sa sunod bulan nga skedyul. 

Sumala ni Jacalan, ang labing unang rekisito nga makaapil sa seminar mao kadtong mga Overseas Filipino Workers (OFW) nga miyembro sa OWWA. 

Mahimong ang OFW mismo o kaha ang benepisaryo niini ang motambong sa maong pagbansay-bansay, dugang ni Jacalan.

Ang ikaduhang rekisito matod pa ni Jacalan nga ang sudlan nga negosyo maayo ug kitaon.

Ang uban pa nga mga rekisito ngadto na sa seminar mahibaw-an kon unsaon nga makabaton ug puhunan pinaagi sa maong programa, si Jacalan mipasabot.

Gipahibalo usab sa Information Officer sa OWWA nga si Rudylin Gimena nga sa niadtong makahuman na sa Orientation Seminar sa OFW Reintegration Program karong Agost 18, mosunod dayon ang laing pagbansay-bansay nga mao ang ‘Enterprise Development Training’.

Ang giingong training ipahigayon kini sa Department of Trade & Industry (DTI)-7, diin dinhing dapita dalhon na ang mga gikinahanglang rekisito aron makapahimulos na sa pautang sa kagamhan, si  Gemina miingon. 

Si OWWA -7 Regional Director Wilfreda Misterio mipahibalo usab sa usa ka Kapihan sa PIA nga ang OFW Reintegration Program naghatag ug pautang alang sa panginabuhian dili lamang ngadto sa nawad-an ug trabaho nga OFWs, apan hasta usab kadtong dili na buot mobalik ug trabaho sa gawas ug magsugod sa ilang kaugalingong negosyo dinhi sa nasud.

Matud pa ni Misterio duna'y duha ka klaseng pautang nga mahimong kapahimuslan sa mga OFWs. Ang una pinaagi sa Visayas Cooperative Fund sa kaso sa Sugbo diin ang OFWs maka-utang sa kina-ubsang kantidad nga P50T ug ang kinadak-ang kantidad nga P200T. 

Ang laing pasilidad sa loan diin di pa dugay gilunsad mao ang OFW Reintegration Program diin makahulam ang OFW ug P300T ngadto sa P2M.   Kini nga programaha gitambayayongan sa Land Bank of the Philippines (LBP) ug Development Bank of the Philippines (DBP), matud pa ni Misterio.

Si Misterio midugang usab ug pahibalo nga gi-lunsad na sa OWWA ang ‘Balik Pinay! Balik Hanap Buhay!’ program diin manghatag sila ug nagkalain-laing kahanas nga pagbansay-bansay ngadto sa mga babayeng OFWs nga magamit nila sa ilang pagpangita ug trabaho sa gawas sa nasud o pahimuslan ang ilang nahibaw-an sa pagpangita ug panginabuhian dinhi sulod sa atong nasud.

Niadtong Agosto 5 gipahigayon sa Harolds Hotel ang Culminating Ceremony sa 17 ka mga benipisaryo sa proyekto nga mga babayeng OFW nga nabalik sa Sugbo gikan sa nagkagubot nga mga nasud sa Middle East.

Ang 17 nakahuman sa kwarenta oras nga pagbansay-bansay sa Thai Body and Foot Massage nga gidumala sa Nuat Thai Training Center sa Sugbo,  gikan July18-29. 

“Nakadawat sila ug libreng ‘starter kits’ nga mahimong gamiton kini sa bag-o nilang naantigohan ug mokita na sila ug kwarta”, sumala pa Rudylin Gimena, ang information officer sa OWWA. (PIA-Cebu/mbc/jsme)