Mga pribado ug publikong buhatan nagtambayayong sa pagpatuman ug proyekto sa Barangay Alambijud, Argao

CEBU CITY, August 5 (PIA) --- Ang Department of Agrarian Reform (DAR) uban sa pakigtambayayong sa Julie’s Franchise Corporation (JFC), the Society of the Divine Word (SVD) of the University of San Carlos, lokal nga kagamhanan sa Barangay Alambijud ug sa Parents Teachers Association (PTA) sa Alambijud Elementary School mipahigayon sa usa ka public-private partnership pinaagi sa pagpatuman sa Community-Based School Development Project didto mismo sa ilang barangay.

Tumong sa maong proyekto mao ang paghatag ug oportunidad sa mga lokal nga komunidad sa pagpatuman ug mga proyekto nga maghatag ug tubag sa mga nag-unang panginahanglan sa barangay.

Niadtong Hulyo 16, 2011, ang mga opisyales ug kawani sa Julie’s Franchise Corporation (JFC) mipang-apod-apod sa daghang mga school supplies, t-shirts, lunch box, ug snacks ngadto sa 276 ka mga tinun-an sa Alambijud Elementary School isip kabahin sa ilang suporta ug pakigtambayayong sa pagpatuman sa programa.

Mokabat sa 80% niining mga tinun-an naggikan sa mga kabos nga mga pamilya sa pag-uuma nga lakip sa mga benepisyaryo sa agrarian reform program.

Ang JFC, uban sa Society of the Divine Word of the University of San Carlos pinaagi kang Fr. Ulrich Schlecht,  maoy nag-unang mga pribadong patigayon nga milangkob sa kampanya kalabot sa pagpausbaw sa edukasyon sa kabukirang bahin sa Sugbu uban sa pakigtambayayong sa Department of Agrarian Reform pinaagi sa pagpaningkamot ni Marian Lourdes Mariano.

Ang JFC, mihatag usab ug kantidad nga P650T ngadto sa  Alambijud Elementary School aron sa paghatag ug igong suplay sa tubig alang sa tunghaan.

Tungod kay walay suplay sa tubig ang tunghaan, kadaghanan sa mga tinun-an ang mogahin sa ilang unang oras sa klase matag adlaw aron sa pagsag-ob ug tubig sa labing duol ng atinubdan kung diin mokabat sa dul-an usa ka oras nga lakaw ang gilay-on.

Ang maong proyekto dili lamang makabenepisyo sa mga tinun-an ug magtutudlo kundili lakip na sa mga silingang mag-uuma.

Ang SVD sa unibersidad sa San Carlos sa laing bahin, mitabang sa proyekto pinaagi sa paghatag ug higayon sa mga tinun-an sa pagpalit sa mga gmit sa tunghaan sa tunga lamang sa orihinal nga presyo niini.

Ang kita sa maong proyekto gigahin alang sa lain pang mga proyekto alang sa tunghaan ug uban pang mga pasilidad niini. (PIA-7/mbcn/Maryknoll B. Lague)

===========

Public hearing alang sa usbaw sa suhulan ipahigayon
Ni Eli C. Dalumpines

CEBU CITY, August 5 (PIA) – Ipahigayon sa Regional Tripartite Wages and Productivity Board (RTWPB) sa Tunga-Tungang Kabisay-an ang public hearing aron pagtuki sa mga petisyon sa usbaw sa suhulan karong Agosto 19. 

Matud ni Atty. Ernesto Carreon, representante sa sektor sa mamumuo sa RTWPB, nga nagkahiusa ang mga miyemro sa board nga anhi na lang ipahigayon sa Sugbo ang public hearing sa nahisgutang petsa.

Mopada na lang unya ug mga representante ang mga lalawigan sa Bohol, Negros Oriental ug Siquijor aron motambong sa hiniusang meeting, suma ni Carreon.

Kun kahinumduman, mi-deklarar ang RTWPB duha na ka semana ang nakalabay nga duna gyu’y “supervening condition” dinhi sa rehiyon ug gi-uyunan kini sa National Wages and Productivity Commission (NWPC).

Subay niini, sugdan na ug tuki sa board ang mga petisyon nga gisang-at sa mga pundok sa mamumuo dinhi sa rehiyon.

Lakip sa misang-at ug petisyon sa RTWPB ang Asssociated Labor Unions-Trade Union Congress of the Philippines (ALU-TUCP) nga nangayo ug P100 across-the-board nga usbaw sa suhulan ug ang Alliance of Progressive Labor (APL) nga nangayo ug P120 nga across-the-board nga usbaw.

Mipadayag ug pag-uyon ang mga opisyal sa Cebu Chamber of Commerce and Industry (CCCI), sa sayo pa, nga dunay ihatag nga usbaw sa suhulan sa mga mamumuo apan daku ra kaayo ang gipangayo sa nahisgutang mga pundok. (PIA-Cebu/ECD)