Koleksyon sa BIR sa unang bahin karong tuiga mi-sobra sa target
By Eli C. Dalumpines

CEBU CITY, August 4 (PIA) -- Mi-sobra sa target ang koleksyon sa buhis sa mga probinsya sa Sugbo ug Bohol sa unang bahin niining tuiga, suma sa mga opisyal sa Bureau of Internal Revenue (BIR) 13.

Si Zenaida Pancito, hepe sa Collection Division sa Revenue District 13 sa BIR nga naglangkob niining duha ka mga lalawigan, mipahibawo atol sa PIA Kapihan kagahapon nga mitala ug P6.15 bilyones ang ilang na-kolekta nga buhis gikan sa Enero hangtud Hunyo niining tuiga.

Kini, suma ni Pancito, sobra ug 1.21 porsyento sa gihatag kanila nga target sa ilang uluhang buhatan nga P6.08 bilyones alang sa maong panahon ug tino nga mas taas kini itandi sa ilang na-kolekta sa samang panahon sa milabay’ng tuig nga duna la’y P5.15 bilyones.

Matud ni Pancito, ang pinakadaku nga bahin niining kinatibuk-ang kantidad nagagikan sa income tax sa mga ordinaryong emplyado diin mitampo kini ug 67 porsyento sa koleksyon. 

Samtang ang nalikom gikan buhis sa mga professionals, sama sa mga abogado ug doctor, mitampo lang ug .01 porsyento, o P54 milyones, sa kinatibuk-ang koleksyon, dugang pa niya. 

Ang distrito nga nakatampo ug daku sa buhis sa unang bahin niining tuiga mao ang Cebu North District diin duna kini P2.36 bilyones nga koleksyon, suma pa sa opisyal. Gisundan kini sa Dakbayan sa Mandaue nga dunay P2.01 bilyones.

Sa samang kalambu-an, gipasalamatan sa hepe sa Taxpayers Assistance Unit sa BIR nga si Isabelo Suelto ang suporta sa media nga daku ug natampo pag-aghat sa katawhan nga mobayad sa tukmang buhis. (PIA-Cebu/ECD)

============

Mga opisyal sa Sugbo supak sa suspension sa Trans-Asia
By Eli C. Dalumpines

CEBU CITY, August 4 (PIA) – Mipadayag ug pagsupak ang duha ka mga taas nga opisyal sa Sugbo sa gipakanaug nga kamandu-an sa Maritime Industry Authority (MARINA) pagpahunong sa operasyon sa Trans-Asia Shipping Lines samtang ipailawom ang mga barko niini sa inspection.

Si Gobernador Gwen Garcia sa lalawigan sa Sugbo, sa pakighinabi sa media, nagkanayon nga wa mosubay sa due process ang suspension order nga gipakanaug sa MARINA batok sa Trans-Asia human malunod ang usa sa mga barko niini sa milabay’ng Domingo.

Matud ni Garcia, di lang maka-apekto sa ekonomiya sa Sugbo ug sa mga silingang lalawigan ang pag-suspenso sa Trans-Asia kundili ngadto usab sa mga emplyado niini.

Angay usab nga ikunsidirar sa MARINA, suma pa sa gobernador, ang mga pasahero nga manguli ngadto sa ilang tagsa-tagsa ka mga dapit nga matanggong dinhi sa Sugbo tungod kay wa sila’y masakyan.

Si Cebu City Mayor Michael Rama, sa iyang bahin, nagkanayon nga di maayo nga dunganon pagpahunong ang mga barko sa Trans-Asia tungod kay mo-resulta man kini sa pagkabalda sa transportasyon.

Matud sa mayor nga di angay nga apilon pag-suspenso ang ubang mga barko sa maong kumpanya nga ningsubay sa international safety standard.

Samtang si Chester Cokaliong, kanhi presidente sa Visayan Association of Ferryboat and Coastwise Service Operators ug tag-iya sa Cokaliong Shipping Lines, sa pakighinabi sa media, mitawag sa kamandu-an nga di makiangayon.

Kinahanglan unta nga tagsa-tagsahon pag-audit sa MARINA ang mga barko sa Trans-Asia ug di kini dunganon pag-suspenso aron di mabalda ang mga byahe ngadto sa nagkalain-laing rota sa mga silingang lalawigan.

Matud ni Cokaliong, mokabat sa P20 milyones matag adlaw ang masinating alkansi sa kumpanya kung dunganon pagpahunong ang operasyon sa mga barko niini.(PIA-Cebu/ECD)

=========

Siyam ka mga Siquijor exhibitors milangkob sa reg’l product showcase

SIQUIJOR, Aug 3 (PIA)— Dul-an sa siyam ka mga lokal nga exhibitors gikan sa probinsya sa Siquijor ang milangkob sa gipahigayong  Sandugo Regional Product Showcase sa Department of Trade and Industry (DTI-7) bag-o lang didto sa Island City Mall, siyudad sa Tagbilaran. Ang mga exhibitors naglangkob sa probinsyal nga kagamhanan sa Siquijor nga mipakita sa tourism program sa ilang probinsya, Vanz’ Banana Crisps;Ever’s Specialties alang sa ilang mga peanut products; Licoan Rural Improvement Club (RIC) sa ilang mga coconut pastries; ;  Cang-allas RIC sa ilang banana catsup; Basac RIC sa squash noodles; Danmild Personal Care sa mga personal care products; CJL Salabat ug Multi-Purpose Coop sa ilang mga Alamang Products. Matud sa DTI-7, the maong kalihokan buot maghatag ug dakong oportunidad sa mga lokal nga mga exhibitors gikan sa lain-laing probinsya sa pagpaila ug pagpakita sa ilang mga produkto ngadto sa publiko. Ang maong tinuig nga trade fair, matud sa DTI, nahimo nang kabahin sa marketing calendar alang sa mga exporters, torista, konsumidor, negosyante ug mga balikbayan. (PIA-7/mbcn/Maryknoll B. Lague)

===========

NegOr gikatakdang mopahigayon sa 7^th Philippine Bird Festival

DUMAGUETE CITY, Aug 3 (PIA) --- Ang dakbayan sa Dumaguete gikatakdang mopahigayon sa ikapito ka tuig nga selebrasyon sa Philippine Bird Festival, ang giila isip nag-unang kalihokan alang sa kalikopan sa tibuok nasud, karong umaabot nga Setyembre 23 hangtod 24, 2011.

Lakip sa kalihokan mao ang usa ka exhibit labot ang lain-laing langyaw nga exhibitors gikan sa mga nasud sa Taipei, Thailand, Malaysia, Japan ug Singapore kung diin ilang ipakita sa publiko ang lain-laing klase sa mga langgam sa ilang mga dapit.

 Aduna usab nga mga lokal nga partisipante gikan sa mga pribadong organisasyon nga naghatag ug pagtagad sa mga mananap sa kalikopan ang gikatakdang mopaambit sa ilang mga proyekto ug pagpaningkamot alang sa kaayuhan sa mga kahayopan sa nasud.

Usa ka Bird Quest Quiz Show ug bird watching tours usab ang gitakda alang sa mga batan-ong partisipante sa kalihokan.

Atol sa gipahigayon nga paglunsad niadtong Agosto 1, 2011 didto sa buhatan sa Robinson’s Pace Atrium, siyudad sa Dumaguete, gibutyag nga ang Siliman University's Center for Tropical Conservation Studies (CENTROP) andam mowagtang sa ilang entrance fee sulod sa usa ka semana alang ngadto sa mga tinun-an sa public school nga moduaw sa ilang tunghaan.

Kini isip kabahin sa pagpakita ug suporta sa maong tinuig nga kalihokan.

Ang duha ka adlaw nga selebrasyon naglangkob usab sa serye nga mga bird watching lectures ug usa ka conservation forum nga buot mohatag ug impormasyon kalabot sa kasamtangang estado sa mga proyekto sa NegOr sa pagprotihir sa kalikopan ug mga kahayopan sa probinsya.

Kining tinuig nga selebrasyon gipahigayon pinaagi sa Wild Bird of the Philippines (WBCP) tibuok nasud aron pagkuha sa atensyon sa mga pampubliko ug pribadong organisasyon sa pakigtambayayong sa mga programa kalabot sa pagprotihir dili lamang sa mga hayopan lakip na usab ang ilang mga pinuy-anan.

Lakip sa mihatag sa ilang suporta alang karong tuig nga selebrasyon mao ang Silliman University lakip na usab ang mga lokal nga kagamhanan sa Dumagete ug Negros Oriental.(PIA-7/mbcn/Maryknoll B. Lague)