Mactan-Cebu Airport napili isip labing luwas sa nasud

CEBU CITY, Aug 1(PIA) -- Ang Mactan Cebu  International Airport  (MCIA) maoy giila isip labing luwas sa nasud base sa mga gipatuman nga seguridad atol sa adlaw-adlaw niining operasyon.

Matud sa MCIA manager engineer Nigel Paul Villaret, ang certification nga gihatag atol sa gipahigayon awarding of the Aerodrome certificate kagahapong adlawa gi-isyu gikan sa buhatan sa Civil Aviation Authority of the Philippines (CAAP).

Ang MCIA giila usab isip ikaduhang labing dakong airport dinhi sa nasud nagsunod sa NAIA nga anaa nahimutang sa kaulohan.

Si CAAP Director General Ramon S. Gutierrez ang nagunay pagtunol sa maong certification ngadto kang Villarete.

Matud sa CAAP,giila sa ilang buhatan ang pagbaton sa airport ug mga safety manuals, safety drills ug emergency response team isip nag-unang hinungdan s apagkapili niini kaorng tuiga.

Humans a pagdawat sa maong award, gisaad ni Villarete nga paningkamotan pa sa MCIA ang pagbaton ug susamang mga kalihokan nga amghatod ug dugang seguridad alang sa ilang mga kliyente.

Nagtuo usab ang mga kawani niini nga ang pagkapili sa MCIA isip labing luwas nga airport maghatod ug dakong tabang alang sa turismo sa Sugbu.(PIA-7/mbcn/Maryknoll B. Lague)

===========

Publiko giaghat sa pagbantay sa mga mapahimuslanong kriminal atol sa panahon sa ting-uwan

CEBU CITY, Aug 1 (PIA) -- Usa ka dakong opisyal sa gobyerno ang mipahimangno ngadto sa publiko sa pagbaton ug mas hugot nga pagbantay batok sa mga mapahimoslanong katawhan atol sa mga dagkong pag-uwan. 

Si Lapulapu City Police Director S/Supt. Anthony Obenza mihatag niini nga pahimangno human sa daghang mga taho nga miabot sa ilang buhatan nga kasagarang molihok ang mga criminal atol sa panahon sa ting-uwan tungod kay dili kini daling masakpan tungod sa kusog nga bunok sa uwan.

Matud ni Obenza, gikinahanglang alerto ang mga tagbalay atol sa panahon sa ting-uwan tungos kay maghatag kini og higayon sa mga kawatan sa paghimo ug mga krimen.

Dili lamang sa mga kabalayan, gipahimangnoan usab sa opisyal ang mga establisyemento nga maoy sarang biktima sa pagpanglungkab atol niining mga panahona.

Bag- lang ang opisina sa Cebu City Councilor Alvin Dizon nga nahimutang sa ikatulong ang-ang sa Legislative Building gisulod ug mga kawatan kung diin nadala ang gipanag-iya niining laptop.

Sa tunga-tunga sa bahin sa Hunyo lain usab nga kaso sa pagpanglungkab ang nahitabo didto sa buhatan sa Cebu City post office ug mokabat sa kantidad nga P 6,000 ang nakuha sa mga kawatan.

Si Cebu City Police Director S/Supt. Melvin Ramon Buenafe sa laing bahin, nanawagan sa mga nagpanag-iya ug mga sakyanan sa dili pagbilin ug mga importanteng butang sulod sa ilang mga sakyanan aron sa paglikay nga mabiktima sa mga “Bukas Kotse” gang.

Gibutyag ni Buenafe nga gikinahanglan nga alerto ang publiko sa pagbantay sa ilang mga butang aron dili kini maghatag ug oportunidad sa mga kawatan. Gidugang usab sa opisyal nga gikinahanglang responsible ang usa ka indibidwal sa pag-amping sa iyang mga importanteng kabtangan kung dili niini buot mawagtangan.(PIA-7/mbcn/Maryknoll B. Lague)

=========

Mga tinubdan sa tubig sa Alegria duna nay mga mechanical chlorinators
By Eli C. Dalumpines

CEBU CITY , August 2 (PIA) – Human mobuto ang typhoid outbreak kapin usa ka semana na ang nakalabay, ang mga opisyal sa lungsod sa Alegria mi-installar na ug mga mechanical chlorinators sa mga tunubdan sa tubig niini aron masiguro nga di na mausab pa ang maong hitabo.

Matud ni Alegria Mayor Emelita Guisadio atol sa pagbisita sa mga miyemro sa Cebu Association of City and Municipal Information Officers (CAOCAMPIO) kaniadtong Biernes, mga napu (10) ka mga mechanical chlorinators ang gitaod na sa ilang mga tinubdan sa tubig.

Ang maong mga chlorinators, suma pa ni Guisadio, gikan sa Gobernador sa Sugbo Gwen Garcia diin maoy mitunol niini atol sa iyang pagbisita sa ilang lungsod dihang nahitabo ang outbreak.

Kun kahinumduman, mikabat ug 142 ang gikatahong nakasinati ug simtomas sa typhoid fever sa duha ka barangay sa maong lungsod kapin semana na ang nakalabay diin duha niini ang nakalas, basi sa taho sa Department of Health (DOH).

Gitumbok sa mga health officials ang mga tinubdan sa tubig sa nahisgutang mga barangay ang hinungdan sa outbreak.

Mipadayag hinoon ang mayor sa iyang pagduda nga tinuyo ang maong hitabo ug dunay nagpaluyo niini tungod sa nadawat niyang bahad gikan sa ka-atbang sa pulitika sa ilang lungsod.

Apan matud ni Guisadio, ila nang gi-sirhan ang palibot sa mga spring boxes diin mi-supply ug mga tubig ilimnon sa mga nasakupang mga barangay sa Alegria aron ma-siguro nga walay di awtorisadong mga tawo ang maka-duol niini.

Kini aron masiguro nga luwas ang tubig nga imnon labi na sa mga bukirang mga barangay sa lungsod, nagkanayon ang mayor. (PIA-Cebu/ECD)