650 ka mga lumolupyo sa Ronda apil sa pagpananom ug kahoy alang sa NGP

CEBU, July 26 (PIA) – Kapin sa 650 ka mga lumulupyo nga naggikan sa Ronda, Cebu ang maisog nga miatubang sa bugnawng hangin sa sayong kabuntagon human sila milangkob sa usa ka fun run ug pagpananom ug mga native tree species atol sa gipahigayon Run 2 Plant GREENIN Philippines isip kabahin sa suporta sa National Greening Program sa kagamhanan sa nasud.

Lakip sa mga aktibong misporta sa maong kalihokan mao ang mayor sa lungsod sa Ronda nga si Mariano Blanci III uban ang iyang mga opisyales ug kawani, mga magtutudlo, ginikanan, tinun-an ug mga volunteer professionals nga mitunga suot ang ilang mga green t-shirts.

Nagsugod ang kalihokan sa alas singko sa buntag ug malampusong nakatanom ug mokabat sa 3,200 ka mga native tree species ug fruit tree seedlings didto sa barangay Butong.

Matud sa agricultural officer sa lungsod Lilibeth Montano, buot sa lokal nga kagmhanan ang magpatuman pa ug serye sa susamang proyekto sa tumong nga pagkab-ot sa luwas ug limpyo nga kalikopan alang sa musunod nga mga henerasyon.

Gidugang ni Montano nga padayong nakigtambayayong ang ilang lungsod ngadto sa Ramon Aboitiz Foundation Inc. (RAFI), Department of Environment and Natural Resources ug lakip na sa Cebu Provincial Government alang sa hiniusang kampanya sa pagpananom ug kahoy sa lain-laing lugar sa probinsya sa Sugbu.

Gisaad sa kagamhanan nga aduna silay mga programa aron sa pagsiguro sa maayong pagtubo sa mga gipangtanom nga mga tree seedlings sa ilang lugar.

Padayon usab matud pa ang ilang suporta ngadto sa kagmahanan sa probinsya kabahin sa pagpaningkamot sa pagpromot sa programang solid waste management system.(PIA-7/mbcn/Maryknoll B. Lague)

==========

KALAHI-CIDSS nga programa ibalik pag-implementar sa Bohol ug Siquijor

CEBU CITY, July 26 (PIA) – Ang Department of Social Welfare and Development (DSWD), KALAHI-CIDSS milunsad sa programang “Makasamang Tugon” sa probinsya sa Bohol ug Siquijor niadtong Hulyo 14 ug 15. Ang susamang programa usa ka pamaagi sa gobyerno aron mapakunhod ang kakabos sa nasud pinaagi sa Kapit Bisig Laban sa Kahirapan- Comprehensive and Integrated Delivery of Social Serices (KALAHI-CIDSS) nga proyekto sa DSWD.

Ang maong kalihokan sa paglunsad sa managsamang proyekto sa Bohol ug Siquijor parehong mipahigayon sa Awarding of Notice to Procees ug sa Commitment Signing Ceremony.

Kining “Awarding of Notice to Proceed” maoy mag-aghat sa mga munisipalidad sa dinaliang pagpatuman sa proseso sa KALAHI-CIDSS human ang makompleto sa mga miyembro ang mga pagbansay-bansay nga angyan nilang again.

Ang “Commitment Signing Ceremony” sa laing bahin, maoy magmando sa mga opisyales sa probinsya ug munisipyo sa pagpirma isip pagpamatuod sa hugot nga pagsuporta sa programa hangtod pakompleto kini sa buwan sa Hunyo sunod tuig.

Ang KALAHI-CIDSS unang gilunsad sa DSWD niadtong tuig 2003 ug nakahatag ug lain-laing programa ngadto na sa 4, 583 nga mga barangay gikan sa 200 ka mga lungsod tibuok nasud.

Ang gobernador sa probinsya sa Bohol Edgardo Chatto uban ang mga municipal mayor, bise mayor, mga representante gikan sa 12 ka mga munisipyo sa Bohol ug duha gikan sa Siquijor ang mipaabot sa ilang pagpasalamat ug suporta pinaagi sa pagtunga sa maong kalihokan nga gipahigayon sa Talibon Cultural Center sa Bohol ug Capitol Square sa probinsya sa Siquijor.

Sa iyang mensahe, gipakpakan usab sa gobernador ang DSWD sa ilang pagpaningkamot sa pagpatunga sa tanang kapitan sa barangay atol sa kalihokan ug miaghat sa panagtambayayong sa matag usa ka habig aron makab-ot ang tumong sa paghatag ug dugang pang proyekto alang sa kaayuhan sa mga kabos nga mga Pilipino.(PIA-7/mbcn/Maryknoll B. Lague)

==========

100 nga tinun-an sa Don Bosco adunay educ’l assistance gikan sa usa ka NGO

CEBU, July 26 (PIA) – Ang Ramon Aboitiz Foundation, Inc. (RAFI) andam mohatag ug higayon sa pagtungha ngadto sa 100 ka mga vocational technical students sa Don Bosco Training and Youth Center – Pasil ug mitagana ug mokabat sa P1.4 ka milyon nga kantidad alang niining programa.

Human milagda sa usa ka memorandum of agreement tali sa Don Bosco Training and Youth Center-Pasil, ang RAFI mohatag ug usa ka tuig nga libreng training sa 10 ka mga mapiling tinun-an matag tuig sulod sa lima ka mga tuig s akantidad nga P22, 565 matag tinun-an.

Ang RAFI andam usab moabaga sa bayranan sa unom ka buwan nga training sa 10 ka mga tinun-an sa garment technology matag tuig sulod sa lima ka tuig sa kantidad nga P6,700 matag tinun-an.

Matud sa Don Bosco administrator Fr. Abundio Bacatan, kining maong assistance gikan sa RAFI maghatag ug dakong tabang dili lamang ngadto sag a mapiling tinun-an lakip na sa kinatibuk-ang komunidad.

Ang Don Bosco Training and Youth Center-Pasil usa ka buhatan nga adunay tumong sa pagbansay-bansay ug pagtudlo ug lain-laing technical skills ngadto sa mga kabatan-onan nga naggikan sa mga kasikbit nga barangay sa Pasil.

Pinaagi sa mga grants, sponsorship ug mga donations gikan sa lain-laing buhatan ug indibidwal, ang center nakatabang na sa kapin 1,500 ka mga indibidwal ug kapin sa 500 ka mga pamilya sa mga komunidad.(PIA-7/mbcn/Maryknoll B. Lague)

'Tax holiday' alang sa mga investor  sa nasud—BOI

QUEZON CITY, July 26(PIA) – Isip kabahin sa pagpakita ug suporta ngadto sa mga negosyante, and administrasyon ni Presidente Benigno Aquino III nakahukom sa paghatag ug income tax holidays sulod sa walo ka mga tuig, kini base sa pamahayag sa usa ka investment official niadtong Huwebes.

Atol sa Communication and News Exchange (CNEX) Forum kagahapong adlawa, ang Trade Secretary for Inductry and Investments Cristino Panlilio namahayag nga usa s amga nag-unang hukom sa Board of Investments  (BOI) mao ang paghatag ug tax holidays sa mga mapiling kompanya sulod sa upat, unom hangtod sa walo ka tuig.

Matud ni Panlilio, tumong niini ao ang pag-aghat sa mga potential foreign ug domestic investors sa pag-invest sa highly competitive nga ekonomiya sa nasud.

Pinaagi niining maong incentive, nag-unang tumong sa administrasyon ang pag-aghat sa mga Overseas Filipino workers (OFWs) sa pagpatukod ug negosyo dinhi sa nasud imbis didto sa laing mga nasud.

Ubos sa maong pamaagi, matag income tax return (ITR) claim gikinahanglang adunay certificate of income tax holiday entitlement gikan sa buhatan sa BOI aron makapahimulos sa maong incentive.(PIA-7/mbcn/Maryknoll B. Lague)

===========

DOST, CTU mipahigayon sa  Farmer’s Field Day dinhi sa Sugbu

CEBU CITY, July 26(PIA) --- Ang Department of Science and Technology (DOST) uban sa pakigtambayayong sa Cebu Technological University ug uban pang mga ahensya sa gobyerno ug pribado mipahigayon sa labing unang Farmer’s Field Day dinhi sa Sugbu niadtong Hulyo 18 didto sa barangay Caurasan lungsod sa Carmen.

Mokabat sa 90 ka mga partisipante ang mitambong sa maong kalihokan nga naglangkob sa mga lokal nga ahensya sa gobyerno, mga kawani, magtutudlo ug tinun-an sa CTU ug ang mga mag-uuma nga maoy nag-unang benepisyaryo sa maong proyekto.

Ang maong kalihokan kabahin sa programa sa DOST-Philippine Council for Agriculture, Forestryang Natural Resources Research and Development (PCARRD) nga adunay tumong sa pag-aghat sa mga yanong mag-uuma sa paggamit sa tanang anaa nga mga gamit sama sa libreng farm lands, baratong lisoo ug fertilizers alang sa pagpausbaw sa ilang produksyon.

Kapin sa 40 ka mga mag-uuma uban ang ilang mga pamilya ang mitunga sa kalihokan ug nakahimo pagbenepisyo lain-laing serbisyo nga gitagana alang sa maong kalihokan.

Ang nag-unang bahin sa maong kalihokan mao ang pagpresentar sa mga Abaca intercropped products uban ang lain pang mga produkto nga root crops sama sa kamote ug gabi.

Ang programang STBF on Abaca Intercropping unang pormal nga gilunsad niadtong Sityembre 1, 2009 pinaagi sa pagpananom sa mga abaca seedlings nga kasmtangan nang makita sa usa ka ektryang luna sa Barangay Caurasan.

Kining maong proyrkto agi sa tabang gikan sa mga technical experts gikan sa FIDA-7 ug uban sa tabang sa mga Magsasaka Siyentista Tirso Andales ug mga miyembro sa NAMACO sa pagmintinar sa kalimpyo sa kanindot sa mga tanom.

Lain pang mga ahensya nga kabahin sa maong kalihokan nagkangkob sa Central Visayas Consortion for Integrated Regional Research ug Development and Municipality of Carmen lakip na usab ang mga LGU gikan sa mga lungsod sa Danao, Borbon, Sugod ug Catmon.(PIA-7/mbcn/Maryknoll B. Lague)