Sugbo, ilusad ug ASEAN City of Culture

By: Juju S.Manubag

CEBU CITY , July 13 (PIA) – Opisyal nga ilusad sa ASEAN Ministers of Culture and the Arts ang Dakbayan sa Sugbo nga ASEAN City of Culture karong Biyernes, Hulyo 15 sa alas 12 sa hapon ngadto sa Radisson Blu Hotel.

Mao kini ang gipahibalo ni Cebu City Mayor Michael Rama sa usa ka gipahigayong press conference didto sa Casa Gorordo Museum sa bag-o pa lang.

Matod ni Rama nga naghatag ang maong pagtudlo sa ASEAN Ministers Responsible for Culture and Arts Plus 3 (AMCA+3) sa dakbayan ug “sense of pride” tungod pirmero kining gitugyan sa ASEAN ang giingon nga pasidungog nga ang Sugbo ang una nga tig’abiabi sa maong programa.

Sumala pa ni Rama nga malipayon siya nga anaa ang ASEAN nga mobutang kanato sa mapa.

Usa kini nga hagit sa dakbayan nga ipalambo pa pag-ayo ang arte ug kultura niini. Dili kini masayon tungod ang ‘culture of excellence’ dili usa ra ka butang o maangkon sa usa ka tao lang apan kalampusan kini sa tibuok dakbayan, dungag ni Rama.

Nasorpresa gayud si Rama sa dihang gipahibalo siya niadtong Marso sa pagpili sa Sugbo.

Matod ni ni Rama pa, “This honor will carry with us forever.” (PIA7-Cebu/JSM)