DeEd gipinahan ang mga pribadong tunghaan

By: Juju S. Manubag

CEBU CITY, July 11 (PIA) ---  Ang Department of Education (DepEd-7) dinhi sa Central Visayas gipinahan ang mga pribadong mga tunghaan sa rehiyon sa dili pagdawat sa mga magtutudlo nga walay lisensiya.

Si Recaredo Borgonia, ang regional director sa DepEd-7 miingon nga ang mga pribadong tunghaan angay nga mosunod sa balaod sa propesyonalismo kay makahimo ang DepEd sa pagpakanselar sa lisensiya sa bisan unsa nga tunghaan.

Dugang ni Borgonia nga ang balaod sa propesyonalismo nagmando nga walay gitugotan nga magtutodlo nga motudlo nga wala kini’y lisensiya.

Ang rason usahay nganong dili mokuha ang mga pribadong tunghaan ug lisensiyado nga magtutudlo tungod kay madak-an sila sa gasto, si Borgonia nagkanayon.

Si Arturo Tangal, presidente sa Cebu City Private Schools Administration Association mi-admitar nga adunay pipila ka mga tunghaan nga midawat ug dili lisensiyado nga magtutudlo sa kondisyon nga pasaron niini ang pasulit sulod sa usa ka tuig.

Subo nga gipahibalo ni Tangal nga sa pagkuha nila ug magtutudlo dili lang ang publikong tunghaan ang ilang igka kumpetensiya kay anaa usab ang mga call centers.

“Malisod nga makakuha mi ug maayong mga magtutudlo tungod sa kadako sa mga sweldo nga ginatanyag sa mga publikong tunghaan ug call centers”, sumala ni Tangal.

Gipunting usab ni Tangal nga gisiguro sa mga pribadong tunghaan nga makakuha ug maayong magtutudlo tungod ilang ipa-agi ang mga aplikante ug ‘teaching demonstrations’.

Ang hepe sa DepEd-7 Quality Assurance ug Accountability Division nga si Marcial Degamo miingon nga ang mga magtutudlo nga walay lisensiya dili angayan nga ibutang nga ‘formal instructors’ apan ‘tutors’ ra ang itawag kanila.

Si Degamo midugang nga angay unahon sa pagkuha sa mga pribadong tunghaan ang mga lisensiyado nga magtutudlo kay sa walay lisensiya tungod kadtong mga walay sarang nga may lisensiya mo-usbaw pinaagi sa pagbansaybansay. (PIA-Cebu/mbcn/JSM)

==========

LTO nakapang-apod-apod na ug 3T ka Pantawid Pasada cards

By: Juju S. Manubag

CEBU CITY, July 11 (PIA) -- Ang Land Transportation Office (LTO-7) nakapang-apod-apod na ug tres mil ka mga Pantawid Pasada cards ngadto sa mga draybers ug operators sa mga public utility jeeps (PUJ) dinhi sa Central Visayas.

 Apan matod pa gamay ra kini kung ikatandi sa gidaghanon sa mga gipunting nga mga benepisyaryo, sigun sa LTO.

Si LTO-7 regional director Raul Aguilos miingon nga dul-an sa dose mil ang ipang-apod-apod ngadto sa mga draybers ug operators diri sa rehiyon diin ang 60 porsiyento ania sa Sugbo.

Matod ni Aguilos nga giduso na sa nagkalainlaing LTO district offices sa Sugbo ang nahibiling cards nga wala pa gipangkuha sa mga draybers ug operators.

Gisugdan sa LTO-7 ang pang-apod-apod sa mga cards sa milabay’ng duha ka semana didto sa SM bay terminal.

Si Aguilos midugang nga mahimo ra nga kuhaon sa mga draybers ang mga cards apan magdala kini ug authorization gikan sa mga operators.

Inig makuha na nila ang cards, mohulat una sili ug duha ka semana aron masudlan sa P1,050 nga pundo ang mga cards.

Ang P1,050 nga pundo gamiton sa mga draybers sa jeep alang lamang sa pagpalit ug krudo o gasoline sa mga Caltex nga gasolinahan nga aduna’y marka’ng “Pantawid Pasada Cards Accepted Here”. (PIA-Cebu/JSM)

==========

Krimen kalabot sa mga batan-on sa siyudad sa Mandaue mikunhod

By : Juju S. Manubag

CEBU CITY, July 11 (PIA) – Ang mga krimen nga gikalambigitan sa mga batan-on didto sa siyudad sa Mandaue mikunhod human ipatuman ang curfew nga ordinansa sa siyudad.

Ang Hepe sa Mandaue City Police Office nga si Sr/Supt Noel Gillamac miingon nga kasagaran sa  mga krimen’g nahitabo niadtong miaging tuig sa siyudad sa Mandaue may kalambigitan ang mga batan-on.

« Tungod sa gipatuman nga ordinansa nga aduna nay curfew ang mga batan-on mahadlok na sila  nga mogawas sa ilang mga panimalay ilabina kung mag-alas 10 na sa gabii, » matud pa ni Gillamac.

Ang curfew naglangkob sa tibuok hurisdiksyon sa siyudad nga adunay mga 27 ka mga barangays.

Ang curfew ipatuman sa mga kabata-an nga nag-edad ug disiotso (18) ug paubos nga sila dili na tugotan  sa pagsuroy-suroy sugod alas 10 sa gabii hangtod sa alas 4 sa buntag, gawas lang kung may kuyog kining hamtong ug edad, si Gillamac mipasabot.

Ang mga pulis, barangay tanod, ug ang City Social Welfare Services (CSWS) maoy gitugutan sa pagpatuman sa mao’ng ordinansa.

Pinaagi niini, aduna na lay 11 ka mga insidente sa krimen nga naglambigit sa mga batan-on ang natala didto sa Women and Children Protection Desk (WCPD) sa siyudad sa Mandaue sa miaging 6 ka bulan karong tuiga.

Sa miaging tuig, 110 ka mga insidente sa krimen ang narekord ug 49 niini ang giduso sa CSWS, samtang 32 ang gipasakaan ug kaso ug 23 ang wala pa mahusay.

Ang WCPD niadtong 2009, mitala ug 65 ka mga kaso sa krimen diin mga batan-on ang nahilambigit.

Baynte kwatro (24) niini giduso sa CSWS samtang 27 ang nahusay ug 14 ang gipasakaan ug kaso sa korte. (PIA-Cebu/mbcn/JSM)

========= 

Mga drayber mag-uniporme na sa uma-abot nga mga adlaw 

By: Juju S. Manubag

CEBU CITY, July 11 (PIA) – Sa mga uma-abot nga mga adlaw, tanang draybers sa public utility vehicles (PUV) mag-uniporme na sigun sa gitaho ni Ahmed Cuizon ang regional director sa Land Transportation and Franchising Board (LTFRB-7) dinhi sa Central Visayas.

Si Cuizon miingon nga nakadawat siya ug bag-ong memorandum nga aprubado sa LTFRB tsirman nga si Nelson Laluces mahitungod sa pag-ilis sa kolor ug sa pagpasul-ob ug uniporme sa tanang draybers sa mga sakyanang pampasahero-an.

Sumala ni Cuizon light blue nga polo shirt O T-shirt nga may kwelyo ang gihugon-hugon nga uniporme sa mga draybers sa jeep.

Samtang ang uniporme sa mga draybers sa bus,  mao lang gihapon, puti nga polo shirt o T-shirt nga adunay kwelyo.

Ang mga drayber sa taxi nga kasamtangan nagsul-ob ug puti nga polo shirt, mosul-ob na ug pula nga uniporme, matud pa ni Cuizon.

Samtang ang mga drayber sa mga shuttle service, school service ug tourist transport service magsul-ob na ug yellow nga polo shirt.

Matod pa ni Cuizon, ang LTFRB-Manila mi-apil sa mga drayber sa cargo trucks-for-hire sa pagpasul-ob ug maroon nga uniporme ug green alang sa mga drayber sa van-for-hire.

Midugang ug pahibalo si Cuizon nga walay labot ang mga drayber sa mga PUJ.

Ang ubang mga drayber gikinahanglan nga ang ilang uniporme adunay pangalan ug logo sa kumpanya ug sa tanang higayon magsul-ob ug taas nga karsones ug sapatos inig mag-drive na sa ilang mga sakyanan.

Kung ang kumpaniya adunay kaugalingong uniporme, gikinahanglan nga mangayo una sila ug pagtugot gikan sa LTFRB, si Cuizon nagkanayon.

Ang kadtong madakpan nga wala magsul-ob ug uniporme silotan ug P148 basi sa bayranan nga gilagda sa Land Transportation Office. (PIA-Cebu/mbcn/JSM)

============ 

LTO nakapang-apod-apod na ug 3T ka Pantawid Pasada cards 

By: Juju S. Manubag

CEBU CITY, July 11 (PIA) -- Ang Land Transportation Office (LTO-7) nakapang-apod-apod na ug tres mil ka mga Pantawid Pasada cards ngadto sa mga draybers ug operators sa mga public utility jeeps (PUJ) dinhi sa Central Visayas.

 Apan matod pa gamay ra kini kung ikatandi sa gidaghanon sa mga gipunting nga mga benepisyaryo, sigun sa LTO.

Si LTO-7 regional director Raul Aguilos miingon nga dul-an sa dose mil ang ipang-apod-apod ngadto sa mga draybers ug operators diri sa rehiyon diin ang 60 porsiyento ania sa Sugbo.

Matod ni Aguilos nga giduso na sa nagkalainlaing LTO district offices sa Sugbo ang nahibiling cards nga wala pa gipangkuha sa mga draybers ug operators.

Gisugdan sa LTO-7 ang pang-apod-apod sa mga cards sa milabay’ng duha ka semana didto sa SM bay terminal.

Si Aguilos midugang nga mahimo ra nga kuhaon sa mga draybers ang mga cards apan magdala kini ug authorization gikan sa mga operators.

Inig makuha na nila ang cards, mohulat una sili ug duha ka semana aron masudlan sa P1,050 nga pundo ang mga cards.

Ang P1,050 nga pundo gamiton sa mga draybers sa jeep alang lamang sa pagpalit ug krudo o gasoline sa mga Caltex nga gasolinahan nga aduna’y marka’ng “Pantawid Pasada Cards Accepted Here”. (PIA-Cebu/JSM)

==========

Nutri-fit walk-for-a-cause alang sa mga tinun-an sa pre-schoolers nga adunay ubos nga timbang, ipahigayon

DUMAGUETE CITY, July 12 (PIA) – Ang kagamhanan sa siyudad sa Dumaguete magpahigayon sa Nutri-fit walf-for-a-cause karong Dominggo alang ngadto sa liboan ka mga tinun-an sa pre-school nga naggikan sa ilang kinatibuk-ang dakbayan. Ang maong kalihokan kabahin sa pagselebrar sa Nutrition Month karong buwana kung diin naghatag kini ug dakong pagtagad sa paghatag ug importansya sa breastfeesing ngadto sa mga bag-ong panganak.

Ang walk-for-a-cause nakapangulekta na ug mokabat sa P40,000 nga kantidad karong semana. Ang maong kantidad nga gituohang mosaka pa ngadto sa P120,000 maoy gitagana alang sa ipahigayong halapad nga feeding program ug lain-laing nutrition education nga kalihokan didto sa buhatan sa City Nutrition Office (CNO).

Ang mga benepisyaryo sa maong feeding program naglangkob sa mg underweight ug maplnourished nga mga tinun-an sa pre-school nga naggikan sa mga kabos nga barangay sa siyudad.

Ang tema ss Nutrition Month karong tuiga mao ang  “Isulong ang Breastfeeding- Tama, Sapat at Eksklusibo!”. Tumong niini ang magseguro sa malampusong kampanya sa breastfeeding ug pag-aghat sa tanang sektor sa pagpatuman ug mga programa ug kalihokan sa pagpromot sa breastfeeding tibuok nasud, kini matud pa ni Loerdes Taburasa, ang City Nutrition Action Officer.(PIA-7/mbcn/Maryknoll B. Lague)

========== 

Mga barangay opisyals sa Siqiujor nagbansay-bansay alang sa kalinaw

CEBU CITY, July 12 (PIA) --- Traynta'y sais (36) ka mga opisyales nga naggikan sa 14 ka mga barangay sa Siquijor ang mitambong sa usa ka Barnangay Peacekeeping Action Team (BPAT)seminar nga gipahigayon sa Philippine National Police bag-ohay lang.

Matud ni Police Provincial Director Sr. Supt. Ernesto Fuentes, ang BPAT usa ka seminar nga gipahogayon sa PNP alang sa padayong kampanya kalabot sa kahapsay sa probinsya.

Tumong sa maong seminar ang ipahibalo sa mga opisyales ang saktong pagpanguha ug mga impormasyon alang sa paghimo ug mga intelligence report kalabot sa mga panghitabo nga kagubot ug krimen sa ilang tagsa tagsa ka mga komunidad.

Buot sa opisyal sa PNP nga mopahigayon pa ug laing serye sa mga seminar ang ilang buhatan sa lain pang mga barangay sa probinsya aron usab pag-aghat sa katawhan sa  pag-apil sa lain-laing kalihokan kalabot sa pagmintinar sa kalinaw sa ilang tagsa-tagsa ka mga lugar.

Atol sa seminar, gipaambit ni invited speaker, Rowena Maputi ang iyang kaalam ug kaagi isip administrador sa Philippine Red Cross, Siquijor Sub-Chapter.

  

Lakip sa gipaambot ni Maputi mao ang mga angayang buhaton atol sa mga dili matag-ang panghitabo sama sa kalit nga pagbaha, paglunop ug pagdahili sa yuta.

Aduna usab siyay gipaambit nga mga practical tips aron sa malampusong pagpabilin sa kahapsay ug kalinaw sa matag komunidad. 

Matag usa sa mga partisipante giaghat sa pagpangulo sa pagmintinar sa kahapsay ug kalinaw sa ilang lugar dili lamang alang sa kaayuhan sa ilang kaugalingon lakip na sa ilang mga pamilya ug kasilinganan.(PIA-7/mbcn/Maryknoll B. Lague)

     

==========

Mga negosyante nidayeg sa nakab-ot nga kalampusan ni PNoy

CEBU CITY , July 11 (PIA) --- Ang Makati Business Club nagtuo nga angay makadawat ang presidente sa nasud Benigno Aquino III ug pagdayeg human sa dili makawang nga kontribyusyon niini sa inanayng paglambo sa ekonomiya sa nasud sa atong panahon karon.

Atol sa usa ka press statement, ang Makati business group midayeg kang Aquino ug sa iyang administrasyon sa malampusong pag-isyu ug mga long term peso-dominated global bonds.

Matud sa MBC ang mga proyekto sa administasyon kalabot sa pagpaunhod sa utang sa nasud ug lain pang isyu sa ekonomiya dili angayang baliwalaon tungod kay dako kini ug ikatabang sa ekonomiya sa nasud.

Gidugang sa MBC nga human sa malampusong usa ka tuig sa pagdumala sa nasud, ang ilang grupo nagtuo nga aduna pay mas dagkong plano ang administrasyon ni Aquino alang sa kaayuhan sa nasud atol sa ikaduhang tuig sa pwesto.

Nanghinaot usab ang grupo nga unta ipatuman na sa administrasyon ang mga dagkong proyekto niini sama sa Pantawid Pamilyang Pilipino Program, kasamok kalabot sa isyu sa NAIA 3, u gang pagpasar sa Freedom of Information Bill.(PIA-7mbcn/Maryknoll B. Lague) 

===========

NYC nagsugod na sa pagdawat ug mga entries alang sa Rizal You Tube Tilt

CENTRAL VISAYAS, July 11 (PIA) --- Ang National Youth Commission (NYC) dinhi sa kabisay-an nagsugod na sa pagpanawat sa mga entry alang sa Idol Kos i Rizal You Tube Video Contest.

Kining base sa gipagawas nga press release sa NYC ngadto sa Philippine Information Agency (PIA). “We should bring Rizal to where young people are, let us bring Rizal online,” maud pa sa maong press release.

Mtaud sa NYC-Visayas Area cluster head, Rhenelyn Queen Dadulo, ang maong contest bout miaghat sa mga kabatan-onan sa paghibalo sa mga nabuhat sa nasudnong bayani sa Pilipinas ug pakigbahin niini sa lain pang mga kabatan-onan dinha sa internet.

Ang maong contest abli sa mga kabatan-onan nga anaa sa edad nga 15 hangtod 30 ka tuig sa paghimo ug usa ka mubong video presentation alang sa Youtube nga motubag sa pangutana nga “Bakit idol ko si Rizal?” isip kabahin sa selebrasyon sa National Hero’s 150^th birth anniversary.

Matag video entry gikinahanglang dili mokapin sa 15o ka segundo. Ang NYC nag-aghat sa mga kabatan-onan sa pagpakita sa ilang mga talento. Ang mga entry mamahimo sa lain-laing format, genre ug style.

Ang National Historical Commision of the Philippines (NHCP) andam motagana ug premyo alang sa mga dumadaog nga pillion pinaagi sa mga ekspertong artists ug film makers sa nasud. 

Aduna usab mga online poll alang sa mga sikat nga mga video entry ug ang mga mapili sa publiko makadawat usab ug dugang nga mga espesyal nga mga premyo. 

Ang deadline sa pagsumitir sa mga entries karong umaabot nga Agosto 19, 2011. Ang mga application forms ug dugang mga detlaye kabahin sa maong contest makita sa NYC website, www.nyc.gov.ph. (PIA-7/mbcn/Maryknoll B. Lague) 

===========

Nasudnong panagtigum sa mga mag-uuma ipahigayon
By Eli C. Dalumpines

CEBUCITY, July 12 (PIA) – Ipahigayon sa mga mag-uuma sa nasud ang ilang sa ika-siyam nga National Vegetable Congress karong Agosto 3-5 adto sa Dakbayan saDumaguete.

Mao kini ang gipahibawo ni Florida Ibanez, presidente sa Integrated Upland Farming Development Council sa Rehiyon 7 sa pakighinabi sa radyo karong buntag.

Dungan niini, giaghat ni Ibanez ang mga mag-uuma sa rehiyon nga motambong sa maong panagtigum aron makig-bayloay ug ideya sa ubang mga mag-uuma sa nasud ug makig-angbitay sa teknolohiya sa panguma.

Matud niya mahinungdanon kaayo nga mahibawo sila sa mga pamaagi nga gisagop sa mga mag-uuma sa ubang rehiyon aron nga mas molambo pa ang industriya.

Usa sa mga hisgutan sa maong panagtigum, suma pa ni Ibanez, mao ang pagpangandam sa mga mag-uuma sa pagbukas unya sa nasud sa General Agreement on Tariff and Trade (GATT) karong 2014.

Mibati ug kahadlok ang mga mag-uuma sa pagsulod unya sa mga produktong agrikultural sa ubang mga nasud nga mas barato ang presyo tungod kay wala na man kini tariff suma sa gilatid sa kasabutan.

Tungod niini, giaghat ni Ibanez ang mga mag-uuma nga paninguhaong maayo ang kalidad sa ilang mga produkto ug luwas kini’ng kan-on aron nga maka-kompetensya sila sa mga imported nga mga produkto. (PIA-Cebu/ECD)

==========

Mga mag-uuma giaghat nga kontrolahon ang pagpananom ug mga utanon
By Eli C. Dalumpines

CEBUCITY, July 12 (PIA) – Giaghat sa pangulo sa Integrated Upland Vegetable Farming Development Council ang mga mag-uuma sa Tunga-Tungang Kabisay-an nga kontrolahon ang pagpananom ug mga utanon aron sigurado sila nga mokita.

Si Florida Ibanez, presidente sa maong pundok, atol sa pakighinabi sa radyo karong buntag, nagkanayon nga kuwang sa panaghiusa ang mga mag-uuma sa rehiyon sa ilang pagpananom mao nga dunay sobra nga supply sa usalang ka matang sa utanon diha sa atong ka-merkaduhan.

Kini, matud pa ni Ibanez, mo-resulta sa pagbarato sa presyo sa mga utanon tungod kay di man balanse ang production niini.

Misugyot si Ibanez nga kinahanglan nga magsabot ang mgamag-uuma kung unsa nga klase sa  utanon ug unsa ang gidaghanon niini ang ilang itanom sa matag dapit ug panahon aron nga balanse ang supply sa utanon sa merkado ug sa ingonsigurado 
gyud nga mokita sila. 

Suma pa niya, mao kini ang gihimo sa mga mag-uuma saMindanao diin gi-kontrolar pag-ayo ang produksyon.

Iya usab nga giaghat ang mga mag-uuma nga mosagop sa bag-ong pamaaagi sa panguma ug sa teknolohiya nga gitanyag sa gobyerno aron nga motaas ang ilang ani.

Nanawagan usab si Ibanez sa mga ahensya sa gobyerno nga hatagan ug prioridad ang pag-ayo sa mga farm-to-marketroads aron matabangan ang mga mag-uuma nga madala ang ilang mga produkto sa mga ka-merkaduhan sa mga dakbayan. (PIA Cebu/ECD)

===========

Mga magtutudlo gipahimangnu-an nga magbaton ug pailob By Eli C. Dalumpines CEBU CITY, July 11 (PIA) – Mipahimangno ang opisyal sa Department of Education (DepEd) dinhi sa lalawigan sa Sugbo ngadto sa mga magtutudlo nga magbaton ug pailob ug likayan ang pagpanakit sa ilang mga estudyante. Si Dr. Arden Monisit, Division Superintendent sa DepEd dinhi sa lalawigan sa Sugbo, sa pakighinabi sa radyo karong buntag, nagkanayon nga trabaho sa mga magtutudlo ang pag-amoma sa mga kabataan sulod sa eskwelahan isip ikaduhang mga ginikanan mao nga kinahanglan nga duna sila’y pasensya. Kini nga pahimangno gihimo sa opisyal human malambigit ang usa ka magtutudlo sa Manggako Elementary School sa lungsod sa Ginatilan, habagatang Sugbo, sa milabay’ng semana nga gikatahong namuspos ug silhig sa usa ka 6-anyos nga tinun-an nga mi-resulta sa pagkagisi sa ulo niini. Mipadala na ug team si Monisit sa milabay’ng Sabado aron pag-imbestigar bahin sa maong hitabo apan matud sa opisyal nga wa pa makabalik ang grupo gikan sa ilang pagpangduki-duki. Ang maong hitabo nakapasuko pag-ayo kang Gobernador Gwen Garcia diin mimando nga silotan ang maong magtutudlo. Sa sayo pa, si DepEd-7 Regional Director Ricaredo Borgonia namahayag nga di niya tugotan ang maong hitabo nga mausab tungod kay supak man kini sa lagda sa ilang ahensya. Apan maghuwat hinoon siya sa kumpletong resulta sa imbestigasyon usa mohimo ug lakang batok sa nahisgutang magtutudlo, matud ni Borgonia. (PIA-Cebu/ECD)

===========

Hiniusang lakang kinahanglan sa pagsulbad sa child pornography, matud sa DSWD
By Eli C. Dalumpines

CEBU CITY, July 11 (PIA) – Gikinahanglan pag-ayo ang usa ka hiniusang lakang sa mga ahensya sa kagamhanan aron masulbad ang suliran sa child pornography sa nasud.  

Kini ang pamahayag ni Edna Regodo, Social Welfare Officer (SWO) II sa Department of Social Welfare and Development (DSWD) dinhi sa Rehiyon 7 atol sa pakighinabi sa radyo karong buntag.

Matud ni Regodo nga daku kaayo’g ikatabang ang ilang kampanya pag-edukar sa publiko mahitungod sa isyu sa child pornography aron makat-on pagpakabana ang katawhan ug mosumbong sa otoridad kung duna sila’y namatikdan nga nagbuhat ug ingon niini sa ilang dapit.

Apan mahinungdanon usab, suma pa niya, nga hingusgan sa mga tinugyanan sa balaod ang pagpaniid ug pagpanggukod niadtong mga tawo nga nagpaluyo ug responsible sa maong buhat.

Gitataw ni Regodo nga daku kini nga suliran sa mga urban poor communities dinhi sa Sugbo diin dunay access sa internet sama sa nahitabo sa lungsod sa Cordova nga nasikop di pa lang dugay.

Iya hinoong giangkon nga naglisod sila ug ang kapolisan pagtino kung asa gyung mga lugara ang daghang naghimo niini tungod kay naa na man kini ipahigayon sulod sa mga panimalay ug dili na sa mga internet café. 

Suma pa niya, kinahanglan hinoon nga tudluan ang mga bata sa values education ug hatagan ug pakabuhian ang mga pamilya nga naglisod aron dili sila madani sa mga haylo niadtong gusto mo-biktima kanila. (PIA-Cebu, ECD)