PIA-7 ug CLEANSE milagda ug kasabotan alang kampanya batok sa VAW-C

CEBU CITY. July 14 (PIA) --- Ang buhatan sa Philippine Information Agency dinhi sa rehiyon (PIA-7) uban sa Share-A-Child Movement, Inc. (SACMI) ug Association of Government Information Officers (AGIO) bag-o lang milagda ug kasabotan alang sa pagpatuman sa programang Communities Learning to Stop Abuse and Nurture Social Empowerment (CLEANSE) isip kabahin sa pagpaningkamot sa pagpromot sa kampanya batok "Violence Against Women and Children" (VAW-C) lakip na usab ang Anti-Trafficking –pornography Cybersex ug Pedophilia.

Gipasiugdahan ang programang CLEANSE aron sa pagpausbaw sa mga programa ug kampanya sa pakigbatok sa pagpanapat ug pagpanglupig lakip na usab ang uban pang mga isyu nga may labot ang mga kabayen-an, kabatan-onan ang pamilya.

Ang maong kasabotan ipatuman pinaagi sa usa ka multi-media campaign kung diin ipakatap ang mga isyung kinahanglan mahibaw-an sa publiko pinaagi sa radyo, newspapers, telebisyon ug nagkalain-laing mga internet blogs.

Matud ni SACMI Executive Director Atty. Nina Valenzona, adunay dakong panginahanglan sa pagpatuman ug mga kampanya nga magpromot ug kaalam sa mga Pilipino kalabot sa isyu isip kabahin sa mga pamaagi sa pagpakunhod sa nagkadaghang mga kaso niini dinhi sa nasud.

Nagtuo ang tulo ka mga buhatan nga dako ug ikatabang ang trimedia sa paghatod ug epektibong mga mensahe ngadto sa publiko. 

Usa sa mga milagda sa maong kasabotan mao ang Share a Child Movement Inc. , usa ka pribadong organisasyon nga nagbase dinhi sa Sugbu. Buot sa SACMI nga maghatag ug dugang oportunidad samga kabatan-onan ug saktong pormal nga edukasyon ilabi na kadtong mga nagkinahanglan ug mas dakong atensyon.

Ang nahitabong MOA signing gipangulohan nila ni Atty. Nina Valenzona ang Executive Director sa SACMI, RD Minerva Newman sa PIA-7 ug Eddie Llamedo presidente sa AGIO atol sa gipahigayong panagtigum didto sa buhatan sa PIA-7.(PIA-7/mbcn/Maryknoll B. Lague)

==========

SCCII misuporta sa greening Siquijor project

LARENA, Siquijor, July 14 (PIA) --- Isip pagpakita sa ilang pagsuporta sa greening program sa kagamhanan, ang Siquijor Chamber of Commerce ans Industry, Inc. (SCCII) mipili sa 14 ka ektarya nga libreng luna didto sa Sitio Cantiwan, Larena, siquijor alang sa ilang ipananom nga nagkalain-laing tree seedlings.

Matud pa ni SCCII President Robert Pajermo, ang ilang buhatan uban ang mga lokal nga opisyales sa Department of Environment and Natural Resources (DENR) milagda ug usa ka kasabutan alang sa unang unom ka tuig nga kontrata apan mamahimong buhatan ug extension ngadto sa 25 ka tuig.

Gibutyag ni Pajermo nga ang ilang buhatan buot motanom ug mga lain-laing kahoy sa lain-laing lugar sa Siquijor kung diin butangan kini ug mga pangalan aron mas daling mahibaw-an sa mga mosunod nga henerasyon.

“Daghan na sa atong mga kabataan wala makaila sa klase sa mga kahoy nga anaa sa atong Isla. Buot namong silang i-edukar aron nga pinaagi niining among proyekto, ang mga kabataan ugma damlag makaila gihapon sa nagkalain-laing klase ug makaamgo kanunay sa kamahinungdanon niini," dugang pa ni Pajermo.

Kining maong proyekto matud ni Pajermo nagsubay sa National Greening Program sa kagamahan (NGP) nga adunay tumong sa pagsulbad sa mga problema kalabot sa kawad-on, kakuwang sa pagkaon, pagprotihir sa kalikopan ug pagpakunhod sa risgo sa climate change.

Lakip sa mga tumong niining programa mao ang paghatag sa mga mosunod nga henerasyon ug limpyo nga kalikopan nga maghatag ug limpyong hangin alang usab sa himsog ug maayong panglawas.

 Ang NGP g]ilunsad pinaagi sa Executive Order 26 nga giisyu sa Presidente sa nasud Benigno Aquino III alang sa pagpananom ug mga kahoy sa 1.5 ka milyon nga ektarya nga luna sa nasud ug kampanya batok sa climate change.(PIA-7/mbcn/Maryknoll B. Lague)

===========

DSWD7 molunsad sa KALAHI-CIDSS sa Siquijor

SIQUIJOR, July 14 (PIA) --- Ang Department of Social Welfare and Development Region 7 molunsad sa programang Kapit Bisig Laban sa Kahirapan-Comprehensive and Integrated Delivery of Social Services (KALAHI-CIDSS) sa duha ka mga napiling munisipalidad sa probinsya sa Siquijor.

Subay niining maong programa sa kagamhanan, ilunsad usab ang proyekto nga gitawag ug ‘Makamasang Tugon’ ugmang adlawa Huly 15 sa alas 9 sa buntag didto sa Capitol Square Siquijor, Siquijor.

Matud sa Regional Director sa DSWD Ma. Evelyn Macapobre, duha ka mga munisipalidad gikan sa Siquijor ang makadawat ug mga pondo alang sa maong proyekto.

          

Ang KALAHI-CIDSS o mas naila isip (KC) Program, usa ka development program alang sa mga komunidad nga adunay tumong sa pagplano ug pagpatuman ug lain-laing mga proyekto sa pagpakunhod sa nagkagrabeng kaso sa kawad-on sa nasud pinaagi sa pagpausbaw sa panginabuhi ug pagpanarbaho.

Ang Makasamang Tugon usab o Community-Driven Development Local Planning Process-Harmonization Initiative adunay tahas sa pagpatuman sa malungtarong resulta sa mga programa nga ipatuman sa maong mga lungsod.

Buot sa DSWD nga mas hatagan ug dakong pagtagad alang sa maong programa ang mga giilang mga kabos nga munisipalidad didto sa probinsya sa Siquijor.

            

Gawas sa mga munisipalidad sa Enrique Villanueva ug Siquijor, ang mga minisipalidad sa Bohol sama sa Danao, Bien Unido, Buenavista, Getafe, Talibon, Ubay, San Miguel, Carmen, Pilar, Mabini, Carlos P. Garcia ug Trinidad mga benipisyaryo usab sa samang proyekto.

Sa kinatibuk-ang Central Visayas, ang KALAHI-CIDSS gipatuman sa 349 ka mga barangay ug 12 ka mga munisipalidad sa Bohol ug gisugdan ug duha s munisipalidad sa Siquijor.

Base sa report sa DSWD, mokabat na sa 80,000 ka mga panimalay ang nakabenipisyo sa 252 ka mga gipatuman nga subprojects sa programa sama sa pagpatukod ug mga tunghaan, day care centers, kadalanan ug uban pa. Gibana-banang P350 ka milyon ang kinatibuk-ang kantidad nga gitagana alang sa maong mga programa.(PIA-7/mbcn/Maryknoll B. Lague)

===========

Siyudad sa Mandaue todo suporta sa ‘breastfeeding’

By: Juju S. Manubag

CEBU CITY, July14 (PIA) --- Mga opisyales sa siyudad sa Mandaue, mga tigpapatigayon ug uban pang mga grupo nga nag-abag sa nutrisyon mipakita sa ilang todo suporta sa “Breastfeeding.”

Sila mipirma sa kasabotan isip pagpatumanan sa Akta Republika-10028 o Expanded Breastfeeding Promotion Act sa 2009 nga mohatag sa usa ka luna sa mga trabahoan alang sa mga inahan nga nagapasuso sa ilang mga anak.

Mao kini ang gipahibalo ni Dr. Parolita Mission, regional director sa National Nutrition Council (NNC)-7 sa gipahigayon nga Kapihan sa PIA sa bag-ohay pa lamang.

Dugang ni Mission nga gihimo ang pagpinirmahay ni Mandaue Mayor Jonas Cortes, Eric Ng presidente sa Mandaue Chamber of Commerce (MCCI) ug sa Executive Director sa NNC nga si Maria Bernardita Flores, atol sa paglunsad sa “Bulan sa Nutrisyon” nga saulogon matag Hulyo sa tuig didto sa SM City Cebu.

Sa maong adlaw, usa sa mga kalihokan nga gipahigayon sa SM City Cebu mao ang ‘Breastfeeding Photo Exhibit’.

Segun sa tala sa World Health Organization (WHO), ang Pilipinas usa sa 42 ka mga nasod nga nahi-apil sa pag-ihap sa 90 porsiyento nga kamatayon sa mga batang nag-edad ubos sa 5 ka tuig.

Sa 2001, kapin 80 mil ka mga batang Pilipino ang namatay sa dili pa moabot sa ika-5 ka adlawng natawhan.  Saysentaty singko porsiyento niining mga bataa nagpanuigon ug ubos sa 6 ka bulan.

Matod pa sa WHO, ang ekslusibo nga pagsuso sa inahan sa iyang anak sulod sa 6 ka bulan makasanta sa 13 porsiyento sa 10.6 milyones nga kamatayon sa mga bata nga nag-edad ug 5 ka tuig ug paubos.

Ang WHO mitataw nga ang mga bata nga wala gipatotoy sa gatas sa inahan sa unang 6 ka bulan niini 25 ka pilo lagmit mamatay kung itandi sa gipatotoy nga iklusibo sa gatas sa inahan sulod sa 6 ka bulan.

Ang pagbutang ug luna nga kapatotoyan sa ilang anak o kaha pundohanan sa gatas sa inahan diha sa mga edispisyo ug trabahoan, usa kini ka lakang nga kakunhuran ug malikayan ang pag-absent sa mga empleyado gawas nga makamugna kini ug himsog nga mga bata ug inahan, matod pa. (PIA-Cebu/mbcn/JSM)

===========

Konseho: Rama makapirma ug ‘scholarship deals’

CEBU CITY, July14 (PIA) --- Ang Mayor sa siyudad sa Cebu nga si Michael Rama gitugotan sa konseho sa pagsulod sa panagsabot tali sa TESDA ug sa 13 ka mga unibersidad ug kolehiyo sa siyudad alang sa programang iskolarsip sa kagamhanang lokal.

Si Konsehal Jose Daluz ang tsirman sa komite sa badyet ug finance sa konseho miingon nga ang siyudad adunay gigahin nga P100M karong tuiga alang sa iskolarship sa mga kabataang kabus aron nagtino nga maka-eskuyla sila sa  kolehiyo nga libre.

Bisan pa nagsugod na ang klase ug ang mga iskolar gipangdawat na sa mga tunghaan, ang siyudad walay memorandum of agreement (MOA) ngadto sa mga partisipanteng tunghaan nga mahimong lehitimo ang  panagtambayayong sa duruha.

Ubos sa programa, ang kagamhanang lokal manghatag ug P20 mil ngadto sa mga iskolar niini nga nasakop sa 4 nagdto sa 5 ka tuig nga mga kurso isip tabang pinansyal.

Ang pinansyal nga hinabang ihatag sa makaduha sa tag diyes mil pesos (P10,000) kada semester ug mahimong gastohon alang sa matrikula ug sa uban pang nagkalain-laing bayranan.

Ang mga unibersidad ug kolehiyo nga mi-apil sa scholarship program gikinahanglang moduso sa ngadto sa siyudad sa mga bayranan sa mga iskolar makaduha sa usa ka semester.

Si Rama misulti sa iyang ‘State of the City Address’ (SOCA) bag-ohay pa lamang nga ang edukasyon. usa sa mga nag-una nga prayoridad sa iyang administrasyon.

Gani mokabat na sa dul-an sa 6,000 ka na mga iskolar ang City’s Scholarship Program sa kagamhanan.(PIA-Cebu/mbcn/JSM)