Kampanya batok sa internet pornography hingusgan pa 
By Eli C. Dalumpines

CEBU CITY, July 15 (PIA) – Misaad ang kagamhanan sa lalawigan sa Sugbo nga ila pang hingusgan ang kampanya batok sa internet pornography labi na kadtong naggamit ug kabataan. 

Si Bise Gobernador Agnes Magpale, atol sa pakighinabi sa radyo karong buntag, nagkanayon nga ila gyu’ng ipadayon ang paggukod niadtong tigpasiugda niini nga buhat labi na kadtong namiktima ug mga kabataan nga mopakita sa ilang lawas atubangan sa internet camera.

Apan giangkon ni Magpale nga nabalaka na sila niini nga suliran tungod kay naa na man kini buhata sa mga pribadong balay ug dili na sa mga internet café.

Nagpasalamat hinoon siya sa katawhan nga mipakita na ug pagpakabana bahin sa maong suliran hinungdan nga mosumbong na sila sa kapulisan kung duna sila’y mamatikdang kadudahan sa ilang mga dapit sama sa nahitabo sa Cordova nga nasikop kagahapon.

Si Magpale, diin mao ang kasamtangang presidente sa Provincial Women’s Commission, mipahibalo nga duna usab sila’y nadawat nga taho gikan sa mga barangay kapitan sa Dakbayan sa Talisay nga duna’y susama niini nga suliran apan padayon pa nila kining gi-establisar.

Matud ni Magpale, gikinahanglan niini nga kampanya ang pagtudlo sa values education ngadto sa mga kabataan tungod kay iyang namatikdan nga wala makita sa mga biktima ang kadautan sa maong buhat. (PIA-Cebu/ECD)