Mga LGU sa Valencia gikatakdang mangulo sa pagpananom ug kahoy sa 170 ka ektarya nga luna

DUMAGUETE CITY, July 15 (PIA) --- Ang lokal nga kagamhanan sa Valencia gikatakdang mangulo sa usa ka Community-Based tree planting activity ugmang adlawa sa lain-laing luna sa lungsod ug lakip na usab ang mga silingang lungsod niini.

Mokabat sa 600 ka mga indibidwal ug 3,000 ka mga fruit trees ang ipananom didto sa Sitio Marulay sa Barangay Lunga, usa ka watershed site, Barangay Apolong, ug Barangay Sagbang. 

Ang maong kalihokan gikatakdang apilan sa mga civic groups, business organizations, mga tunghaan, publiko ug pribadong ahensya sa dakbayan sa Dumaguete kung diin usa ka hamubong programa nga ipahigayon sa plaza ang moabli sa kalihokan Matud ni Valencia Mayor Enrique Gonzalez, ang iyang lokal nga administrasyon buot magpatuman ug serye nga mga halapad nga tree planting activity aron usab pag-aghat sa laing mga lungsod ug grupo sa pagpatuman ug susamang kalihokan. Gibutyag sa mayor nga mokabat na sa 170 ka ektarya nga luna ang natamnan pinaagi sa pagpaningkamot sa kagamahan sa Valencia ubos sa programang Watershed Reforestation and Restoration project sa 11 ka mga barangay sulod na sa upat ka mga tuig. Ang maong kalihokan kabahin usab sa pagsuporta sa National Greening Program ni Presidente Aquino ubos sa Executive Order N. 26 s.2011. Giaghat usab sa mayor ang lain pang mga lokal nga grupo ug buhatan sa Dumaguete sa pakigtambayayong sa ilang lungsod pinaagi sa pag-apil karong Hulyo 16, 2011.(PIA-7/mbcn/Maryknoll B. Lague)

==========

DENR-7 mipahimangno sa publiko kalabot sa illegal nga pagpanakop ug tuko

CEBU CITY, July 15 (PIA) --- And Department of Environment and Natural Resources (DENR-7) mipahimangno sa publiko sa paglikay sa illegal nga pagpanakop ug pagpamaligya sa mga tuko. Walay basehan ang gipakatap nga impormasyon kalabot sa kaayuhang mahatag niini sa sakit nga HIV/AIDS o bisan unsa pang mga kakulian. Matud pa ni DENR-7 regional executive director Maximo Dichoso, nga ang mga tuko o geckos giprotektahan sa balaod ubos sa Republic Act (RA) No. 9147 o mas naila isip Philippine Wildlife Resources Conversation and Protection Act. Base sa maong balaod, ang illegal nga pagpanakop ug pagpamaligya sa mga tuko nga walay igong permit gikan sa Protected Areas and Wildlife Bureau(PAWB) mamahimong mapriso ug makahatag ug danyos ilabi na kung ang pagpanakop miagi sa dili hustong paagi. Ang masakpan sa maong kaso posibleng mapriso sulod sa duha hangtod upat ka tuig ug kinahanglan mohatag sa danyos nga P300,000.  Kining maong pahimangno sa DENR naggikan sa nagkaanam pagtaas sa kaso sa pagpanakop sa mga tuko dili lamang dinhi sa nasud lakip na sa ubang nasud sa Asya. Matud pa ang tuko mamahimong motambal sa sakit nga cancer, AIDS, asthma, tuberculosis ug uban pa. Tungod kay walay ebidensya nga mamahimong mopaluyo sa maong impormasyon, gimanduan sa DENR ang lain-laing mga buhatan ug publiko sa pagbantay ug pagreport sa mga makit-ang nanakop ug nagbaligya niini.  Sigun sa report gikan sa PAWB, adunay 34 ka mga klase sa tuko ang makita dinhi sa nasud kung diin 26 ang aduna nay ubos nga populasyon. Sa Mactan airport, ang Wildlife Section nakadakop na ug mokabat sa 15 ka mga ulo sa tuko nga gikatakda untang dalhon sa laing nasud nga walay igong permit gikan sa DENR. (PIA-7/mbcn/Maryknoll B. Lague)