MGB mipahimangno sa mga LGU

By: Juju S. Manubag

CEBU CITY, July 18 (PIA) – Ang Mines and Geosciences Bureau (MGB) sa Central Visayas mipahimangno sa mga lokal nga pangagamhanang dinhi sa rehiyon sa pagrebiyu sa ilang mga ‘geohazard maps’ aron makunhuran ang mga risgo sa mga sakuna nga dala sa pag sige'g ulan ug sa kabalhinan sa panahon.   

Si MGB-7 Director Loreto Alburo nagpadala niining maong pahimangno human ang Philippine Atmospheric, Geophysical and Astronomical Services Administration (PAGASA) mipahibalo nga daghan pa'ng umaabot nga mga ulan aabot nga mga adlaw.

 Si Graciano Yumol ang Supervising Science Undersecretary sa PAGASA misulti nga ang La Nina usa ka panahon sa sagunson nga pag-ulan, nga niadto pa unta'ng Hunyo matapos apan ang nahabiling epekto niini mao ang daghan pa'ng  pag-ulan sa umaabot nga mga adlaw.

“Nakabuhat na mi sa kinahanglang oryentasyon sa mga opisyales sa mga kagamhanang lokal. Usa lang ka butang ang among gihangyo nila nga bisitahon pag-usab ang ilang geohazard map, tagaan ug atensiyon ang mga lugar nga gideklarar na nga mabahaan ug mag-landslide, ug i-consider nila ni sa ilang plano batok sa mga katalagman'g umaabot”, si Alburo miingon.

Si Alburo nagkanayon nga sa ilang ‘assessment’, dunay lima (5) ka mga barangay sa siyudad sa Sugbo nga daling mabahaan: ang Kasambagan, Kinasang-an, Labangon, Mabolo ug ang Bonbon.

Sa Mandaue City, pito (7) ka mga barangay ang dali usab nga mabahaan: Subangdaku, Mantuyong, Umapad, Opao, Alang-alang, Guizo ug ang Paknaan.

Adunay 19 ka mga barangay sa siyudad sa Sugbo nga makuyaw sa pagdahili sa yuta.  Mao kini ang Lusaran, Binaliw, Guba, Budlaan, Malubog, Buot-Taup, Busay, Sirao, Taptap, Tagbao, Tabunan, Pung-ol Sibugay, Sudlon II, Sudlon I, Sinsin, Buhisan, Pamutan, Sapangdaku ug Adlaon.

Aduna'y unom (6)  ka mga barangay sa dakbayan sa Naga, 11 ka mga barangay sa Balamban, lima (5) sa Toledo City, 12  Catmon ug ang tanang bukirang barangay sa Talisay City makuyaw sa magdahili nga mga kayuta-an.

Ang ubang pang mga lugar nga gikinahanglan'g mangandam sa 'landslides' mao ang Barangay Doldol, Purok 3 sa Dumanjug ug Barangay Cansalonoy sa Ronda. (PIA-Cebu/mbcn/JSM)

===========

PNoy miaghat sa pagpangampanya sa Palawan underground river nga ma-apil sa N7WN

by: Juju S. Manubag

CEBU CITY, July 18 (PIA) –  Si P-Noy miaghat sa mga Sugbuanon sa pagpaluyo sa kampanya sa nasod nga madeklarar ang Puerto Princesa Underground River (PPUR) nga mahi-apil sa ‘New Seven Wonders of Nature’ (N7WN). 

Ang President mismo ang nag-una sa kampanya pinaagi sa pagdeklarar niini nga ‘National and International Promotion Campaign for the PPUR’ nga usa sa New Seven Wonders of Nature (N7WN) ubos sa Proclamation-182. 

Basi sa natala sa N7WN website, ang PPUR anaa na sa nag-unang 5 ka pwesto sa pagpangita sa N7WN niadtong Mayo 26, 2011. 

Ang Proclamation 182 gihimo aron mapukaw ang sentido sa patriyotismo ug nasudnong garbo sa 30 milyones ka mga Filipino nga tig-gamit sa internet ug 77M nga Filipino mobile subscribers nga madasig sila sa pagsuporta sa kampanya. 

Niining paagiha, ang nasud sigurado na nga ang PPUR masangyaw nga usa sa N7WN. 

Opisyal madeklarar ang new 7 Wonders of Nature karong Nobyembre 11, 2011. 

Ang PPUR-N7WN Campaign Task Force, diin ang Philippine Information Agency usa sa mga sakop,  nakahimo na ug agresibong pagpangampanya  sa pag-agni sa katawhan sa pagbotar ug pagsuporta sa matag Pilipino nga magpaluyo niini nga kalihokan.

Miingon ang task force nga nagkinahanglan sa daghang boto ug suporta sa mao ngakampanya pinaagi sa pabotar pina-agi sa text ug internet. (PIA-Cebu/mbcn/JSM)

==========

DOE-7 nagplano sa pagpalambo sa renewable energy sources dinhi sa Visayas

By: Juju  S. Manubag

CEBU CITY, 18 July (PIA) — Ang Department of Energy -Visayas Field Office dinhi sa Sugbo nakadawat ug duha ka proyekto ubos niining gitawag nga Renewable Energy nga alang sa "Wind Energy Sources" didto sa Argao ug Toledo City.

Mao kini ang gipahibalo ni Atty Maria Cerezo, ang assistant director sa DOE Renewable Energy Management Bureau sa bag-ohay'ng gipahigayon nga Kapihan sa PIA dinhi sa Sugbo.

Matod pa ni Cerezo nga sa pagkakaron ang iyang buhatan maoy naggunit niini'ng mga tanyag tungod kay ila pa'ng sukdon ug estudyuhan ang mga aplikasyon.

Sumala ni Cerezo, ila pang duki-dukion ang mga aspetong legal, technical ug pinansiyal nga mga rekisito niini.

Kung adunay kuwang sa mga rekisito, 30 ka adlaw  ang ihatag ngadto sa imbestor nga matuman kini o ma-disqualify kini kung dili ni makatuman sa mga gikinahanglan nga mga dokumento, si Cerezo mipahibalo.

Basi sa datos sa DOE sa tuig 2010, ang nasud adunay kapasidad sa renewable energy nga mga 5,400 megawatts (MW) sa kintibuk-an diin ang kinabag-an niini nagagikan sa geothermal, biomass, solar, wind ug hydro power, si Cerezo miingon.

“Ilawom sa programa sa renewable energy ,nagplano ang DOE nga pik-on sa makatulo ang kinatibuk-an nga kapasidad sa nasud karon.   inig abot sa 2030 aduna na unta kita'y 15,300 MW,” dugang pa ni Cerezo.

Si Eduardo Amante, ang hepe sa energy resource development and utilization division sa DOE-VFO miingon  usab nga adunay duha (2) ka mga solar power ang pagatukoron sa Badian nga mo-prodyus ug 750 kilowatts.

Ang isla sa Bantayan aduna'y mahimo nga biomass energy nga makuha gikan sa mga iti sa manok ug tae sa baboy.   Apan duha (2) ka kilowatts ra kini, paigo lang sa panginahanglanon sa mga tag-iya sa mga poultry ug piggery farms sa isla, ni Amante pa.

Ang kagamhanang lokal sa Ginatilan nagplano usab sa pag-ugmad sa mga lugar nga makuhaan ug renewable energy ug sa pagka-karon nagtigom pa sila ug mga datos aron ma-aprubahan ang kasayon sa proyekto.

Aduna usab potensyal nga solar power nga nakita sa isla sa Camotes ug sa Mactan Ecozone, matud pa sa DOE.

Si Cerezo nagkanayon nga sa niaging tuig lang nagsugod sa pag-implementar sa 5-ka-tuig nga proyekto nga ipa-usbaw ang renewable energy ug giapil niini ang pag-ugmad sa ocean energy gikan sa 2015 ngadto na sa 2030.

Sa pagpanapos si Ceerezo, siya nag-ingon  nga ilang gilantaw ang potensyal sa renewable energy nga mga lugar sa Visayas ug duna silay agresibo nga plano sa usa ka nilangkub nga impormasyon ug edukasyon nga kampanya alang sa mga hingtungdan ug posibleng mga tigpamuhunan sa renewable energy sector. (PIA-Cebu/mbcn/JSM)

==========

DOH-7 mihatag ug P6M nga hinabang sa CCMC

By: Juju S. Manubag

CEBU CITY, July 18 (PIA) --- Ang Department of Health (DOH) mihatag ug hinabang nga P6M ngadto sa Cebu City Medical Center (CCMC) alang sa pagpa-bag-o sa pasilidad sa laboratoryo niini aron makahatag kini sa maayong serbisyo ngadto sa mga kabus nga magpakonsulta sa ospital matag adlaw.   

Si DOH-7 Regional Director Dr. Susana Madarietta sa bag-ohay pa lamang, maoy mitunol sa hinabang ngadto kang Cebu City Mayor Michael Rama didto sa City Hall. 

Ang kwarta gamiton sa pagpalit ug bag-ong ekipo sa Chemistry laboratory ug hematology analyzers, matod pa sa DOH. 

“Ang mga serbisyo sa laboratoryo sa CCMC mo-usbaw na unya inig mapalit na ang mga bag-ong ekipo,” matod pa sa  hepe sa CCMC nga si  Dr. Eduardo Sedoripa. 

Ang CCMC angay ra unta nga modawat ug mga pasyente nga lumolopyo sa siyudad sa Sugbo apan ang tambalanan dunay palisiya nga dawaton ang tanan'g pasyente nga modangop diha nila bisan pa ug dili taga dakbayanto sa Sugbo. 

“Duna kamiy palisiya nga walay balibaran nga pasyente kung modangop sa among tambalanan nga magpahiling,” nagkanayon ang hepe sa departamento sa mga bata sa CCMC nga si Dr. Lee James Maratas. 

“Imadyina na lang unsa na unya kadaghan sa mga pasyente ang moadto sa CCMC kung puro na bag-o ang among mga ekipo,” si Maratas mitino.(PIA-Cebu/mbcn/jsm)