Dengue midoble ang pagsaka karong tuiga

By: Juju S. Manubag

CEBU CITY, July 18 (PIA) – Midoble ang pagsaka sa mga kaso sa dengue nga natala sa Cebu City Medical Center (CCMC) sa milabay’ng semestre karong tuiga.

Ang tala sa tambalanan nagpakita nga kapin sa 300 ka mga kaso sa dengue ug duha ang namatay sumala sa taho sa unang unom ka bulan karong tuiga kung itandi kini sa kapin sa gatos ug tulo ang namatay sa miaging tuig sa sama gihapon’g mga bulan.

Dunay daghang mga kaso karong tuiga apan gamay ra ang namatay tungod sa sakit nga dengue, sumala sa hepe sa Cebu City Medical Center nga si Dr. Eduardo Sedoripa.

“Ang lakaw kay nagpakita lang nga agresibo ug maayo ang pagdumala sa dengue ug ang mga tawo mabinantayon na ug mangayo dayon ug dihadihang pahiling sa lawas”, dugang ni Sedoripa. 

Dili sama sa niaging tuig, ang CCMC kay mas andam sa pag-address sa sitwasyon sa dengue sa dakbayan, sumala sa hepe sa tambalanan.

“Ang pasyente sa dengue nanginahanglan ug pag-ilis sa ‘fluids’ nga nawala. Mao nang among gina-andam ang dextrose”, si Sedoripa nagkanayon.

Ang CCMC dunay mga reserbang dextrose nga ang katipik gipundohan sa P5 milyones nga emerhensiya nga pundo nga aprubado gipaluwat sa Konseho sa dakbayan niadtong miaging tuig nga pagkatap sa sakit nga dengue sumala ni Dr. Myrna God.

Sa maong kantidad, P2 milyones niini gihatag sa CCMC, samtang ang P3 milyones gibahin sa City Health Office (CHO) ug sa Department of Social Welfare and Services (DSWS).

Ang tambalanan nga gidumala sa kagamhanang lokal sa Sugbo naka-atender na ug sobra 65,000 ka mga pasyente gikan sa Enero hangtod sa Hunyo 2011.

Kapin 58,000 mga ‘outpatients’ ug dul-an sa 7,000 ra ang nasulod sa tambalanan kon na-admit.

Siyento porsiyento sa pasyente nga nagpatambal gihatagan sa eksaktong serbisyo nga gipangayo, sumala sa taho sa CCMC.

Sa 65,000 kapin nga mga pasyente nga gidala sa tambalanan, 347 niini dunay kalabutan sa dengue nga kaso.

Si Sedoripa  misulti nga ang nagdumala sa CCMC naningkamot sa pag-usbaw sa ilang serbisyo diha sa tanan nga departamento.

Adunay lima ka buok nga mga halogen gooseneck lamps nga gigamit sa pediatric intensive care yunit ug neonatal care special care yunit.

Bag-o nga x-ray nga makina ang nadugang sa nag-inusara nga x-ray sa radiology departament.

Ang tambalan mitukod ug endoscopy yunit aron makatabang sa pagdiparal sa dunay gastrointestinal disorder.

Aduna’y mga bag-o na mga cardiac ug suction nga mga ekipo nga magamit sa mga pasyente nga mahiagom sa cardiac arrest ug respiratory disorder. (PIA-Cebu/mbcn/JSM)