Kapin gatos ka mga mag-uuma naka-angkon ug yuta
By Eli C. Dalumpines

CEBU CITY, July 20 (PIA) – Naka-angkon na gyud ug yutang umhanan ang 136 ka mga mag-uuma sa Brgy. Anopog sa lungsod sa Pinamungajan, lalawigan sa Sugbo, human sila mahatagi bag-uhay pa lang ug Certificate of Land Ownership Awards (CLOA) sa Department of Agrarian Reform (DAR).

Matud ni Provincial Agrarian Reform Officer (PARO) Paulino Tudlasan, ang CLOA milangkob sa duolan 153 ka ektaryang luna nga kabahin sa Felix Barbara Estate sa Brgy. Anopog sa nahisgutang lungsod nga na-foreclose sa Philippine National Bank (PNB). 

Midugang hinoon siya nga duna usa’y kabahin niining maong luna nga gipanag-iya sa gobyerno ug gipa-ubos sa Comprehensive Agrarian Reform Program (CARP).

Atol sa gipahigayon nga awarding ceremony, giaghat ni Tudlasan ang mga benepisyaryo niini nga programa nga maningkamot pag-ayo aron mahimo nga produktibo ang ilang mga umhanan.

Mipahinumdum usab siya sa mga mag-uuma sa ilang responsibilidad pagbayad sa hulugan sa ilang mga luna sa Land Bank of the Philippines (LBP) ug ingon man ang pagbayad ug buhis alang niini.

Mitambong sa gipahigayon nga awarding ceremony ang mga opisyal sa lungsod pinangunahan ni Vice Mayor Maria Honeylette Yapha Lingad uban sa mga myiemro sa Sanggunian.

Sa sayo pa, ang Brgy. Anopog gi-deklarar isip Agrarian Reform Community (ARC) sa DAR. (PIA-Cebu/ECD)

===========

Igsoon ni PNoy mitunol sa 10 ka lawak-tunghaan ngadto sa DepEd
By Eli C. Dalumpines

CEBU CITY, July 20 (PIA) – Pormal nga gitunol sa igsoon ni Presidente Noynoy Aquino nga si Pinky Aquino-Abellada ang 10 ka mga lawak tunghaan sa mga opisyal sa Department of Education (DepEd) sa mga lungsod sa Pinamungajan ug Minglanilla kagahapon..

Ang maong proyekto gipasi-ugdahan sa Aklat, Gabay, Aruga Tungo sa Pag-angat, at Pag-asa (AGAPP), usa ka grupo nga pinanguluhan ni Abellada kansang tumong mao ang pagtabang sa mga tunghaan nga naa mahimutang sa kabus nga mga dapit sa nasud.

Kini maoy ika-tulo na ka hugna sa pagpanghatag ug mga lawak tunghaan sa grupo dinhi sa lalawigan sa Sugbo.

Kung kahinumduman, mihatag ang grupo ug mga lawak-tunghaan, mga lingkuranan ug mga libro sa Labogon Elementary School sa Dakbayan sa Mandaue, Cambanay Elementary School sa Dakbayan sa Danao ug sa Camp Lapu-Lapu Elementary School dinhi sa Dakbayan sa Sugbo sa milabay’ng Septembre.

Sa miagi’ng Enero niining tuiga, mi-anhi usab si Abellada aron pagtunol sa duha ka lawak-tunghaan didto sa Jaclupan Elementary School sa Dakbayan sa Talisay.

Ang nahisgutang mga tunghaan duna na’y kaugalingong library, mga lamesa ug mga lingkuranan, lakip na ang lawak kaligu-anan.

Matud sa representante sa AGAPP dinhi sa Sugbo, Gabriel L. Cruz, kini nga lakang nagpamatuod nga seryoso ang maong grupo sa ilang adbokasiya. (PIA-Cebu/ECD)

===========

Senado nag-aghat sa publiko sa pagtambong sa ipahigayong paglusad sa global assessment report sa DRR

MANILA, July 19 (PIA) --- Luyo sa pakigtambayayong sa United Nations International Strategy for Disaster Reduction (UNISDR) and senado sa Pilipinas nag-aghat sa publiko sa pagtambong sa ipahigayong paglunsad sa Global Assessment Report on Disaster Reduction (GAR-11): Revealing Risk, Redifining Development, karong Hulyo 26 sa alas 10:00 hangtod alas 11:00 sa buntag didto sa opisina ni Sen. Padilla sa buhatan sa senado sa kauluhan.

Atol sa maong kalihokan ipresentar ang mga key findings base sa mga reports sa mga kasamtangang programa nga gipatuman dinhi sa nasud ug magpahigayon ug  usa ka diskusyon kalabot sa mga implikasyon niini sa estado sa nasud.

Human sa ipahigayong State of the Nation Address sa presidente, ang maong kalihokan magsilbi usab isip usa ka tigum aron sa pagsukod sa kaepektibo sa pagpatuman sa mga programa sa administrasyon kalabot  sa disaster prevention, mitigation ug preparedness measures.

Sa internasyunal nga bahin niining kalihokan, si United Nations Secretary Ban Ki-moon milunsad sa GAR-11 atol sa ikatulong sisyon sa Global Platform on Disaster Risk Reduction niadtong Msyo 10, 2011 didto sa Geneva, Switzerland.

Ang senado sa Pilipinas naglaom nga ang maong kalihokan maghatod ug dugang kaalam ngadto sa mga political ud business leaders sa nasud kalabot sa disaster risk ug mag-aghat kini kanila sa pagpatuman ug mas hugot nga programa ug kampanya pagpromot sa disaster risk reduction sa mga lokal ug nasyunal nga kagamhanan sa nasud.(PIA-7/mbcn/Maryknoll B. Lague)

==========

LTO nag-aghat sa transport sector sa pagclaim sa ilang pantawid pasada cards 

CEBU CITY, July 19 (PIA) --- Usa ka opisyal gikan sa buhatan sa Department of Energy (DOE) ang miaghat sa mga miyembro sa sektor sa transportasyon sa pagkuha na sa ilang mga pantawid pasada cards bisan pa man sa inanayng pag-ubos sa presyo sa lana dinhi sa nasud.

Gibutyag usab sa departamento nga bisan si kinsang miyembro sa pamilya sa driver mamahimo nang mo-claim sa mga pantawid pasada cards dala ang mga gikinahanglang requirements nga mao ang dricer’s license, franchise number ug vehicle registration.

Kini aron dili na kinahanglang mopahuway sa pagdrive ang driver aron lamang mokuha sa maong card, matud pa ni Ahmed Quizon, ang regional director sa Land Transportation Franchise and Regulatory Board dinhi sa Central Visayas.

Matag pantawid pasada cards adunay P1,050 nga kantidad isip sabsidiya sa mga drivers ug mamahimong ma-avail sa 47 ka mga gasoline stations dinhi sa Sugbu.

Ang LTO nagsugod sa pagpang-apod-apod sa mga cards niadtong imaging buwan g sa pagkakaron aduna lamang 2,155 ka mga cards ang nakuha gikan sa kinatibuk-ang 10, 831.(PIA-7/mbcn/Maryknoll B. Lague)

==========

DSWD-7 magpahigayon ug usa ka anti-child pornography forum dinhi sa Sugbu

CEBU CITY, July 19 (PIA) --- Ang Department of Social Welfare and Development (DSWD) magpahigayon ug usa ka forum kalabot sa RA 9775 o mas giila nga Anti-Child Pornography Act of 2009 ugmang adlawa, Miyerkules Hulyo 20 sa Hotel Pier Cuatro sa siyudad sa Sugbu isip askyon sa nagkadaghang media reports sa mga kaso sa child pornography dinhi sa Sugbu.

Nagbaniog sa mga mantalaan ug balita sa telebisyon ang kalabot sa mga bag-ong kaso sa gidudahang sexual exploitation sa mga kabataan-onan kung diin gipahigayon kini pinaagi sa pagkuha ug mga larawan, films, videos ug mas naila karong – cybersex nga pinaagi sa interne tug gamit ang webcam.

Sa sayong bahin niining buwan, usa ka bana ug asawa ang nasikop sa National Bureau of Investigation (NBI) sa lungsod sa Cordova Cebu tungod sa pagsugo sa ilang lima ka mga anak ug usa ka pag-umangkon sa pagbuhat ug mga law-ay nga butang atubangan sa camera alang sa ilang mga kliyente.

Matud sa taho ang mga online clients pabayron ug $25 matag tan-aw sa ilang mga bata nga naghubo atubangan sa webcam.

Ang manag-asawa puros walay trabaho ug nagsalig lamang sa maong illegal nga operasyon.

Ang mga batang biktima kasamtangang anaa karon sa buhatan sa DSWD-7 ug gipaubos sa lain-laing mga kalihokan.(PIA-7/mbcn/Maryknoll Lague)