LTO-7 mipasalig sa mga PUJ drivers makuhang Pantawid Pasada Cards may pundon na

CEBU CITY, July 21 (PIA) – Ang Land Transportation Office (LTO-7) sa rehiyon 7 mipasalig na nga ang Pantawid Pasada (PP) Cards aduna nay pundo nga P1,050.

   

Ang buhaton sa mga operators mao lang sa pagkuha niini sa buhatan sa Land Transportation Office (LTO)–7 o sa bisan asang distritong buhataan niini sa probinsiya.

Mao kini ang giluwat ni LTO-7 Regional Director Raul Aguilos sa bag-ong gipahigayon nga press conference diin iyang gi-aghat ang mga jeepney operators nga wala pa makakuha sa mga PP Cards nga pahimuslan ang higayon sa hinabang nga gihatag sa kagamhanan alang sa mga gasolina o krudo sa pasaherong sakyanan sa dili pa mosaka ang presyo.

“Nananawagan ko sa mga jeepney operators na pahimuslan ang paggamit sa hinabang sa kagamhanan sa pagpalit ug gasolina o krudo sa mga pasaherong sakyanan hilabi pa ang presyo sa lana ron nagpadayon nga dili lig-on. Kuhaa na ang inyong mga Pantawid Pasada Cards kay may lista na usab kami sa mga gasolinahan nga modawat sa Smart Cards karon,” si Aguilos mitino. 

Si Aguilos mitag-an nga ang hinungdan sa hinay nga dagan sa pag-apod-apod sa Pantawid Pasada cards tungod sa 2 ka dakong hinungdan: una, ang mga drayber magpaabot pa ug dugay nga mga adlaw yuna ang Smart Cards mapundohan; ug ang ikaduha, ang mga drayber wala makahibalo ug asa ipalit ang PP Cards kay walay tala kung asa nga gasolinahan kini mapalit.

Si Aguilos misulti nga sa 11,965 ka mga PP cards alang sa Tunga-tungang Kabisay-an, 20 porsiyento pa lang ang nakuha sukad-sukad. Sa onse mil kapin, ang Sugbo ang may kinadaghanan nga 10,831 ka mga cards apan 2,155 cards pa lang ang nakuha, mga 19 porsiyento.

Sa 588 PP Cards nga para sa dakbayan sa Tagbilaran, Bohol, 4 pa ang nakuha samtang usa (1) lang ka operator ang mikuha sa 418 ka mga card sa dakbayan sa Dumaguete, Negros Oriental. 

Ang siyudad sa Bais sa Negros Oriental, adunay 103 cards nga gigahin apan 8 lang ang nakuha pa samtang ang dakbayan sa Bayawan diin may 25 nga cards, 13 usab ang nakakuha na sa ilang PP cards, asoy ni Aguilos.

Ang hepe sa LTO-7 misulti nga mihatag sila ug mga alawans aron masiguro nga tanan PP Cards mahurot ug apod-apod.

“Gitugotan na namo ron nga ang ‘immediate family member’ sa operator mahimo nang mokuha sa Pantawid Pasada Card, o kaha ang mga drayber mismo mahimo nang makakuha sa cards basta lang makadala sa mga kinahanglan nga mga dokumento,” pagmatino ni Aguilos.

Aguilos miingon nga ang gikinahanglan sa pagkuha sa Pantawid Pasada Cards mao ang kopya sa official receipt (O.R.) ug sertipiko sa rehistro sa LTO (orihinal ug kopya), sertipiko sa prangkisa gikan sa Land Transportation Franchising and Regulatory Board (LTFRB) (orihinal ug kopya) ug lehitimo nga ID card. (PIA 7-Cebu/mbcn/JSM)

===========

IPHO mosusi sa ubang mga tinubdan sa tubig sa Alegria
By Eli C. Dalumpines

CEBU CITY, July 21 (PIA) – Susihon sa Integrated Provincial Health Office (IPHO) dinhi sa Sugbo ang uban pang mga tinubdan sa tubig sa Alegria aron malikayan pa ang pagkatap sa gikatahapang typhoid outbreak sa maong lungsod nga mibiktima na ug kapin gatos.

Si Dr. Cristina Giango, Provincial Health Officer sa lalawigan, atol sa pakighinabi kagahapon, nagkanayon nga posibleng gikan sa kontaminadong tinubdan sa tubig ang kagaw nga mibiktima sa 103 ka mga lumolupyo sa mga barangay sa Madridejos ug Valencia sa nahisgutang lungsod.

Matud ni Giango, mikuha na sila ug sample sa mga tinubdan sa tubig sa apektadong mga barangay aron masuta kung duna ba kini naka-kontaminar nga salmonella nga mao’y hinungdan sa typhoid.

Iya hinoong gitataw nga mokabat pa ug tulo ka adlaw usa mogawas ang resulta sa water sampling.

Ug samtang di pa nila makita ang resulta niini di pa sila makatino kung typhoid outbreat ba gyud ang nahitabo didto sa maong lungsod.

Sa pagka-karon ila unang gipahimangnu-an ang mga lumolupyo sa mga apektadong mga barangay nga pabukalon una ang ilang tubig usa nila kini imnon aron makalikay sa sakit, suma ni Giango.

Siya usab nagkanayon nga naghatag na sila ug antibiotic aron mapugngan ang pag-grabe sa sakit niadtong nakasinati ug taas nga hilanat.

Samtang mipahibawo si Elizabeth Tabasa, officer-in-charge sa Department of Health (DOH) dinhi sa rehiyon, nga pito sa 16 ka mga biktima nga gikuhaan ug blood samples ang nag-positibo sa typhoid.

Hinoon huwaton pa sa ilang buhatan ang resulta sa water sampling usa sila mo-isyu ug opisyal nga pamahayag kung typhoid outbreak ba gyud kini o dili. (PIA-Cebu/ECD)

===========

‘Saudization’ di angay’ng ika-balaka, matud sa DOLE
By Eli C. Dalumpines

CEBUCITY, July 21 (PIA) – Di angay’ng ika-balaka sa mga mamumuo nga tua sa Saudi Arabiaang lakang sa maong nasud pagpatuman sa “Saudization,” matud sa opisyal sa Department of Labor and Employment (DOLE) dinhi sa Tunga-Tungang Kabisay-an.

Gi-klaro ni DOLE-7 Director Exequiel Sarcauga, atol sa usa ka media forum kagahapon, nga ang maong lakang wa magkahulugan nga ibanan ang gidaghanon sa mga Overseas Filipino Workers nga tua sa nahisgutang nasud.

Matud ni Sarcauga, ang nahisgutang palisiya gitumong aron mahatagan ug trabaho ang mga lumolupyo sa Saudi   Arabia didto sa ilang nasud apan iyang gitataw nga limitado lang kini matag kumpanya.

Pananglitan sa mga dagkung kumpanya nga mi-empleyo ug 500 pataas, duna la’y gigahin nga 30 porsyento alang sa mga Saudi nationals, pahayag sa opisyal.

Mipahibawo si Sarcauga nga wa pa sila’y nadawat nga nga mga reklamo gikan sa mga OFWs o ba kaha sa ilang mga kabanay sukad i-implementar ang maong programa sa milabay’ng Hunyo 11, niining tuiga.

Iya hinoong gipasalig nga duna’y daghang trabaho dinhi sa rehiyon nga kasudlan niadtong ma-apektuhan gyud sa palisiya.

Sa samang kalambuan, gipasalig usab ni Director Wilfreda Misterio sa Overseas Workers Welfare Administration (OWWA) sa Rehiyon 7 nga motabang ang iyang buhatan pagpangita ug kumpanyang kabalhinan sa mga trabahanteng ma-apektuhan sa “Saudization.”

Samtang, mipahibawo ang Philippine Overseas Employment Administration (POEA) sa Tunga-Tungang Kabisay-an nga misaka ang gidaghanon sa mga trabahanteng gi-deploy sa maong nasud sa Hunyo karong tuiga kung itandi sa samang buwan sa milabay’ng tuig.

Matud sa POEA, mikabat sa 13,765 ka mga OFWs ang gipadala sa rehiyon ngadto sa Saudi Arabia sa milabay’ng buwan, 75 porsyento niini nagagikan dinhi sa Sugbo. (PIA-Cebu/ECD)