Ombudsman-Visayas misaysay nga taas-taas na ang ilang listahan 
sa mga na-konbektong mga opisyal sa gobyerno
By Eli C. Dalumpines

CEBU CITY, July 6(PIA) – Taas-taas na ang listahan sa buhatan sa Ombudsman-Visayas sa mga na-konbektong mga opisyal sa gobyerno, suma sa pamahayag ni Assistant Ombudsman for the Visayas Virginia Palanca Santiago.

Si Assistant Ombudsman Santiago, atol sa pakighinabi sa radyo kaganinang buntag, nagkanayon nga daghan na ang ilang na-konbektong mga opisyal dinhi sa rehiyon bisan kung wa kaayo kini ma-baniog sa media. 

Iya hinoong gi-klaro nga kadto lang ubos-ubos ug posisyon sa mayor ang ilang gihuptan nga kaso tungod kay ang Sandiganbayan na man ang mohupot sa mga kaso sa mga high-ranking nga mga opisyales gikan sa mayor pataas.

Apan iyang gipahibawo nga duha sa mga kaso batok sa mga mayor dinhi sa Sugbo sama nila ni kanhi Compostela Mayor Gilbert Wagas ug Santa Fe Mayor Roger Ilustrisimo nga ilang giduso ngadto sa Sandiganbayan nahukman nang sad-an sa korte.

Subay niini, iyang gi-aghat ang publiko nga di magpanuko pagduol sa ilang buhatan kun duna kini nakita nga pag-abuso sa mga opisyal sa gobyerno aron malimpyohan ang nasud sa mga hiwi ug abusadong mga opisyal.

Iyang gipasalig nga duna sila’y igong mga tawo nga mopahigayon ug imbestigasyon sa mga kaso batok sa mga abusadong mga opisyal nga isang-at sa ilang buhatan.

Nangayo hinoon siya’g dugang pasensya sa publiko kung dugay usahay modagan ang imbestigasyon tungod kay duna may mga sitwasyon nga malisod ang pagpangoykoy ug ebidensya.

Apan matud niya nga andam sila kanunay nga modawat ug mga reklamo gikan sa katawhan tungod kay mao man kana’y nalatid sa ilang trabaho. (PIA-Cebu/ECD)