136 ka mga mag-uuma aduna nay ilang kaugalingong luna gikan sa DAR

CEBU CITY, July 5 (PIA) --- Ang Department of Agrarian Reform (DAR) dinhi sa probinsya sa Sugbu mipang-apod-apod sa mga Certificates of Land Ownership Awards (CLOAs) ngadto sa 136 ka mga benepisyaryo nga miyembro sa Felix Barba Estate Landholdings nga mokabat sa 152.7404 ka ektarya nga luna nga nahimutang sa Anoong, Pinamungahan sa siyudad sa Sugbu niadtong Hunyo 21,2011.

 Ang maong mga luna gipanag-iya sa Philippine National Bank (PNB) ug Government Owned lands (GOL) ubos sa Comprehensive Agrarian Reform Program (CARP).

Gipahigayon ang pagpang-apod-apod pinaagi sa hamubo nga program didto sa Barangay Anopog Stage Hall.

Ang DAR 7 Cebu Province OIC Provincial Agrarian Reform Officer (PARO) Paulino R. Tudlasan Jr., mao ang nangulo sa kalihokan uban sa presensya sa abogado sa  bise mayor sa Pinamungajan Maria Honeylette Yapha Lingad ug mga miyembero sa Sangguniang Bayan nga sila sa Francisco Billiones, Bonifacio Alquiza, Barangay Kapitan sa Anopog Wenceslao Gentapa, Chief Agrarian Reform for Admin Dr. Andrea Paciana S. Labra u gang ang OIC Municipal Agrarian Reform Officer (MARO) sa Pinamungajan Jaynes James Abarrientos.

Atol sa kalihokan, si Tudlasan mipahimangno ngadto sa mga mag-uuma sa maghimo sa ilang mga luna nga produktibo.

Giaghat usab niya ang mga bag-ong nanag-iya sa mga yuta sa pagpahugot sa pagtinabangay sa usag-usa aron sa mas daghan nga produksyon sa umaabot ilabi na nga ang ilang barangay giila karon isip Agrarian Reform Community o (ARC).

Ang maong pagpang-apod apod sa mga CLOAs subay sa mando sa kauluhan sa pagpanghatag ug mga luna ngadto sa mga yanong mag-uuma sa tumong nga mapausbaw ang ilang lebel sa pagpanginabuhi lakip na usab ang pagpausbaw sa produskyon sa pagkaon dinhi sa nasud.(PIA-7/mbcn/Maryknoll B. Lague)

===========

Mandatory expenses sa mga tunghaan dili ipa-abaga sa mga ginikanan, gi-klaro sa DepEd By Eli C. Dalumpines CEBU CITY, July 5 (PIA) -- Subling gi-klaro sa Department of Education (DepEd) nga di gyud sila mohatag ug pagtugot nga ang mga ginikanan maoy pa-abagahon sa mga mandatory nga galastuhan sa mga tunghaan. Si Dr. Arden Monisit, Division Superintendent sa DepEd sa Lalawigan sa Sugbo, sa pakighinabi kagahapon, nagkanayon nga dunay gigahin nga pundo ang buhatan alang sa mga bayranan sa mga tunghaan sama sa kuryente ug tubig, lakip usab ang suhulan sa mga gwardya. Matud ni Monisit nga iya nang gipahibawo ang mga opisyal sa mga tunghaan sa lalawigan bahin niini nga kamanduan sa pagpahigayon nila ug executive conference sa wa pa magsugod ang klase. Suma pa niya nga dunay gi-alokar nga pundo alang sa monthly and other operating expenses (MOOE) ang matag tunghaan ug anhi dinhi kuhaa ang pangbayad sa mga galastuhan sa mga tunghaan. Kini nga pahayag maoy tubag sa opisyal sa mga reklamo nga gipadangat sa mga ginikanan nga dunay pay mga tunghaan nga nanukot kanila alang niini nga mga galastuhan. Gipasalig sa opisyal nga mopadala gyud dayon siya ug tawo nga mo-imbestigar niadtong mga tunghaan nga giingong padayon gihapon pagpanukot ug kontribusyon bisan kung gipa-agi kini sa Parent-Teachers Association (PTA). (PIA-Cebu/ECD)

==========

DENR mihimo na’g lakang pagpalambo sa renewable energy
By Eli C. Dalumpines

CEBU CITY, July 5 (PIA) -- Mihimo na’g mga pagtuon ang Department of Environment and Natural Resources (DENR), uban sa pakigtambayayong sa pribadong sektor, kung unsaon nga mapalambo ang paggamit sa renewable energy dinhi sa nasud.

Mao kini ang pamahayag ni Albert Magalang, hepe sa Climate Change Office sa DENR atol sa pakighinabi sa Radyo ng Bayan sa programa niini nga Talking Points karong buntag.

Matud ni Magalang nga subay kini sa kampanya sa gobyerno nga mapaubsan ang pagbuga ug greenhouse gases nga maoy gitumbok nga hinungdan sa pag-usab-usab sa panahon o climate change.

Kini nga mga greenhouse gases, nagkanayon si Magalang, nagagikan sa mga binugang aso sa mga sakyanan ug sa mga planta ug ingon man sa mga inalisngaw nga methane gas sa mga open dumpsites.

Ang climate change, suma pa niya, napamatud-an na pinaagi sa atong nasinati nga kusog nga mga bagyo, grabeng pag-uwan ug hilabihang kainit sa panahon. Kasagaran nga makasinati niini nga mga epekto, matud pa niya, kadtong mga archipelagic nga mga nasud sama sa Pilipinas.

Iyang hinoong giangkon nga dili pa daku ang atong natampo bahin niini nga kampanya apan iyang gitataw nga subay niini nga tumong ang pagpalambo sa nasud sa renewable energy.

Mipahibawo si Magalang nga daku kaayo’g potential ang nasud sa renewable energy sources, labi na sa geothermal, apan nagpabiling hagit ang pag-ugmad sa maong tinubdan sa enerhiya.

Samtang iyang gipasabot nga duna na’y mga local nga mga pangagamhanan nga mipakita ug maayo nga pagdumala pinaagi sa pagsagop sa proper waste management ug pollution control. (PIA-Cebu/ECD)