Bagyo nga mosulod sa nasud gamay na lang, matud sa PAGASA
By Eli C. Dalumpines

CEBU CITY, July 5 (PIA) – Gamay na lang ang mga bagyo nga mosulod sa nasud karon 
kun itandi sa ninglabay’ng pipila ka tuig apan mas kusog na ang dala nga hangin niini. 

Kini suma sa pamahayag ni Engr. Oscar Tabada, Chief Meteorological Officer sa PAGASA-Mactan atol sa pagbukas sa kasaulugan sa Disaster Consciousness Month.

Matud ni Tabada, mao kini nabantayan sa Philippine Meteorological Society nga nagsunod sa mga tropical cyclone kun bagyo nga motadlas sa Philippine Area of Responsibilty (PAR).

Nagkanayon si Tabada nga mikunhod sa makatunga ang mga bagyo nga ningsulod sa nasud gikan sa average niini nga mga 20 ka bagyo kada tuig apan mas kusog na kini itandi sa mga bagyo kaniadto.

Kini nagbutang sa nasud sa dakung ka-kuyaw tungod kay timailhan man kini nga duna nay kakuwang sa tubig, matud pa niya.

Tungod niini, kinahanglan nga mag-andam ang katawhan sa mas daghang insidente sa El Nino nga gilaumang masinatian sa nasud.

Apan mipasalig ang opisyal nga duna na hinoo’y bag-ong mga kahimanan ang ahensya aron mapahibawo ug sayo ang katawhan kung duna may mga kalamidad nga moabot sa nasud sama sa bagyo. (PIA-Cebu/ECD)

==========

Kongreso miaprubar sa P5M alang  niining emergency hospital

CEBU CITY, July 4 (PIA) --- Ang Guba Emergency Hospital sa Barangay Guba siyudad sa Sugbo magsugod na sa dili madugay ang operasyon niini uyon sa P14-million nga pundo aron pagpausab sa maong ospital ug pagpaayo sa mga pasilidad. Apan sa dili pa kini ablihan, ang ospital gikinahanglan usa mokuha ug mga doktor ug mga nurse ug midwives ug mupalit usab ug mga medisina ug uban pang mga suplay.                   Sa nahitabong regular nga panag-abot sa miaging Miyerkules, ang Kongreso sa siyudad miaprubar sa hangyo ni Mayor Michael Rama niining paggahin ug P5 million alang sa daling pagpaayo sa pasilidad sa nahisgutang ospital. Si Konsehal Alvin Arcilla miingon sa iyang resolusyon nga ang maong pagpabag-o ug pagpatarung sa trabaho niining Guba Emergency Hospital duol na sa katapusang gutlo niini ug ang regular nga operasyon niini inig kumpleto sa maong trabaho gikinahanglan gayud. Sa panahong maablihan na ang maong ospital, muserbisyo kini sa mga residente sa mga barangay sa distrito sa norte. (PIA-7/mbcn/Ailene G. Limutan)

=========

Mas grabeng uwan matagamtaman sa Sugbo karong semanahuna

CEBU CITY, July 4 (PIA) --- Usa ka Inter-tropical Convergence Zone (ITCZ) ang gituohang maghatag ug mas grabeng uwan sa Sugbo karong semanahuna, kini matud sa opisina sa state weather bureau sa Pagasa sa Mactan.

Si Pagasa weather analyst Armand Dunadanag miingon nga nakakuha sila ug 10.4 mm nga mga uwan sulod sa usa ka oras sa adlawng Biyernes sa gabii diin ilang gikonsidera nga grabe.

Matud sa istandard sa Pagasa, kapin sa 7.5 mm nga uwan sulod sa usa ka oras ang gikonsidera na nga bug-at samtang ang 2.5 hangtud sa 7.5 mm nga uwan igo-igo ra. Ubos sa 2.5 mm usab sulod sa usa ka oras ang gikonsiderang ubos.

Si Dunadan miingon nga ang mga residente duol sa mga dagat ug kato usab mga lugar nga kuyaw ang baha gikinahanglang magbantay sa pagsaka sa lebel sa tubig ug sa lihok usab sa yuta.

Ang balita sa Pagasa mipakita nga ang Visayas ug Mindanao makatagamtam ug mas dag-um nga mga panganud nga giubanan ug uwan ug mga kidlat. (PIA-7/mbcn/Ailene G. Limutan)

===========

Senador nanawagan sa daling aksyon sa kagamhanan batok sa desisyon sa Saudi sa pagban sa mga domestic helpers gikan sa nasud

CEBU CITY, July 5 (PIA) --- Kinahanglang paningkamotan sa kagamhanan sa Pilipinas ang pagpatuman sa libre ug daling pagpalangyaw sa mga trabahante sa nasud ngadto sa Saudi Arabia human ang maong nasud mipagawas ug desisyon kalabot sa mas hugot nga sistema sa pagdawat ug mga domestic helpers gikan sa Pilipinas tungod sa wala pagkasinabtanay tali sa mga kondisyon sa panweldohan, kini base sa pamahayag ni Senador Chiz Escudero.

Ang bag-ong palisiya nga naglangkob sa mga katabang o helper gikan sa nasud sa Indonesia, dili lamang matud pa makaapekto sa mga bag-ong tigpanarbaho kundili lakip na usab sa mga nag-una nang trabahante sa lain-laing buhatan sa Saudi Arabia.

“Ang gobiyerno uban sa mga susamang mga nasud maninguha sa pagduso sa free trade alang sa mga serbisyo ug dili lang usab mga produkto kung diin apil kini sa General Agreement on Trade in Services (GATS),” matud pa ni Escudero.

Ang GATS gipasiugdahan sa World Trade Organization (WTO) sa tumong nga maghatag kini ug patas nga serbisyo sa isig ka nasud ug lakip na usab ang pag-angkon ug patas nga ginansya sa matag usa.

Sigun sa senador, ang maong lakang sa Saudi Arabia usa ka paagi sa nasud sa pagpatuman sa “nationalization” o mas giila sa tawag nga “Saudization”, kung diin tumong niini ang paggamit ug pagdebelop sa nasud sa ilang kaugalingong mga trabahante. 

Si Escudero, nga aktibong naningkamot nga mapatuman niining comprehensive labor exprt policy mipaabot sa iyang panawagan ngadto sa mga buhatan sa Department of Labor and Employment (DOLE) ug sa Philippine Overseas Employment Administration (POEA) sa daling aksyon niining maong problema aron usab sa paglikay sa pagkawagtang sa mga oportunidad sa panarbaho gawas sa nasud.

 Base sa natala sa POEA, 44 porsyento sa mga Overseas Filipino Workers nga nanarbaho sa Middle East didto padulong sa Saudi Arabia, nga maoy naghimo s amaong nasud isip nag-unang destinasyon sa kadaghanan sa mga domestic workers ug natala isip ikatulo sa labing dakong gigikanan  sa mga OFW remittances.(PIA-7/mbcn/Maryknoll B. Lague)

===========

NNC ug mga Health workers nagmaya sa magpasar sa Mandatory Child Immunization Act sa kongreso

CEBU CITY, July 5 (PIA) --- Ang National Nutrition Council (NNC) u gang Federation of Barangay Health Wprkers dinhi sa Central Visayas midayeg sa pagpasar sa balaodnon nga “Mandatory Infant and Children Health Immunization Act of 2011” sa kongreso bag-ohay lang.

Matud ni NNC director Parolita Mission, dako ug ikatabang ang maong balaodnon aron sa mas hugot nga proteksyo sa mga kabataan sa nasud.

“Tungod kay mandatory man, positive kayo and impact niini sa kampanya sa nutrisyon.  Kay kung ang bata pirmeng masakit man gud, nagtima-ilhan kana nga kulang kaayo sa nutrisyon ang bata.”dugang pa ni Mission.

Ang mandatory infant and children immunization ubos niining maong balaod maghatag sa mga kabataan ug seguridad lakip na usab ang seguradong proteksyon batok sa mga sakit-sakit sama sa measles, diptheria, tetanus, pertussis, polio ug laing pang mga sakit nga mamahimong likayan pinaagi sa pagbakuna.

Si Senadora Loren Legarda, usa sa mga mipasiugda niining “Mandatory Infant and Children Health Immunization Act of 2011” miingon nga kining maong kalamboan usa na lamang ka lakang aron mamahimong balaod human misumiti ang Senate Committee on Health and Demography sa Bicameral Conference Committee report nga misupak sa laing bersyon sa maong balaodnon.

Gibutyag ni Legarda nga kining maong kalamboan usa ka dakong lakang sa pagpausbaw sa dagan sa serbisyo sa pagprotehir sa kalawasan sa kabatan-onan dinhi sa nasud.

Base sa maong balaodnon, ang mga kabatan-onan ubos sa edad singko anyos kinahanglang hatagan ug libreng bakuna gikan sa lain-laing ospital sa gobyerno o dili ba helath center alang sa mga musunod nga mga mamahimong likayan nga sakit: tuberculosis, diphtheria, tetanus ug pertussis; poliomyelitis; measles; mumps; rubella o germa measles; hepatitis B; H. Influenza type B (HIB) ug lain pang mga sakit nga giila sa Department of Health (DOH).(PIA-7/mbcn/Maryknoll B. Lague)

==========

Symposium kalabot sa agrarian reform law gipahigayon alang sa mga tinun-an sa mga unibersidad sa Dumaguete

DUMAGUETE CITY, July 3 (PIA) --- Kapin sa 100 ka mga estudyante gikan sa Siliman University (SU) nga angtungha sa kursong law ug business andministration mihugop aron sa pag-apil sa diskusyon kalabot sa agrarian reform law dinhi sa nasud.

Ang symposium gipahigayon niadtong Hunyo 21, 2011 didto sa SU Multipurpose Hall sa siyudad sa Dumaguete ug gipangandaman sa Provincial Agrarian Reform Office Office of the Department of Agrarian Reform (DAR) uban sa pakigtambayayong ni Dr. Jovito Salonga gikan sa buhatan sa Center for Law and Development.

Atol sa maong forum, si Atty. Louie Naranjo, and nagsilbing kasamtanangang DAR provincial office attorney ug chief of legal assistance division mihatag ug presentasyon kalabot sa RA 9700 o mas naila isip “An Act Strengthening the Comprehensive Agrarian Reform Program (CARP)”.

Matud sa DAR Information Officer Aileen Alaban, kining maong kalihokan una pa lamang sa gitakdang serye nga mga kalihokan sa ilang buhatan nga ipahigayon sa lain-laing lugar sa siyudad sa Dumaguete isip kabahin sa hugot nga kamanya kalabot sa CARPER Law.

Gidugang ni Alaban nga buot usab sa ilang buhatan nga mopahigayon sa samang forum uban ang ga tinun-an sa Negros Oriental State University ug Foundation Universoty karong buwana.(PIA-7/mbcn/Maryknoll B. Lague)