Kapin sa 100T ka mga seedlings malampusong gitanom atol sa Run 2 Plant 3 GREENIN Philippines dinhi sa Sugbu

CEBU CITY, July 3 (PIA) --- Ang Run 2 Plant 4 GREENIN Philippines nga gilunsad iadtong Hunyo 25 didto sa barangay Jaclupan siyudad sa Talisay nakaaghat ug mokabat sa  20,000 ka mga partisipante gikan sa 48 ka mga munisipalidad ug siyudad dinhi sa Sugbu ug malampusong nakapananom ug 100T ka mga native tree seedlings sa lain-laing lugar dinhi sa probinsya.

Ang sentro sa kalihokan dinhi sa Central Visayas gipahigayon didto sa siyudad sa Talisay apan kapin sa 1000 pa ka mga local government units (LGUs) sa rehiyon ang dungan nga mipahigayon sa susamang kalihokan sa ilang mga lokalidad.

Kasagaran sa mga nilangkob sa kalihokan milabaw sa gitakda nga gidaghanon sa mga natanom nga seedlings sama sa lungsod sa Tuburan nga maoy giila isip pinakadakong naabag kung diin matag usa sa 54 ka  mga barangay nakapananom ug kapin sa 1,716 seelings sa usa ka ektarya nga luna.

Ang siyudad sa Talisay milapas usab sa gitakda nga partisipante tungod kay ,ikabat sa 8,000 ka mga runners ug planters ang mihugop sukwahi sa gituohang 4,000 lamang ka mga partisipante.

Ang pagpananom mikabat lamang ug pipila ka mga oras kung diin ang RAFI miandam ug tagduha ka mga seedling matad indibidwal.

Ang Run 2 Plant 4 GREENIN Philippines usa ka proyekto nga gipaluyohan sa Ramon Aboitiz Foundation Inc., (RAFI) isip paghatga ug suporta sa National Greening Program sa kagamhanan sa nasud.

Gipili sa RAFI ang siyudad sa Sugbu kung diin gipahigayon ang unang yugto sa programa apan gikatakdang aduna pay mga mosunod nga mga yugto niini sa lain-laing rehiyon sa nasud.

Alang sa Sugbu, ang RAFI, DENR ug kagamhanan sa Talisay misaad nga atimanon ang matag seedling nga gitanom aron gyud kini mabuhi ug makatabang sa pagprotehir sa kalikopan batok sa lain-laing kalamidad sama sa baha, pagdahili sa yuta ug uban pa.(PIA-7/mbcn/Maryknoll B. Lague)

=========

Pantawid Pamilya sa CV mipakita sa ilang hugot nga suporta kalabot sa greening program sa kagamhanan

CEBU CITY, July 3 (PIA) --- Ang National Greening Program sa kagamhanan nanukad na sa lain-laing lugar sa Central Visayas human ang malampusong paglunsad niini niadtong Hunyo 25 didto sa Barangay Jacupan siyudad sa Talisay kung diin mikabat sa 20,000 ang mihugop nga mga partisipante nga naglangkob sa mga Pantawid Pamilya beneficiaries dinhi sa rehiyon.

Ang mga Chief Executives sa Central Visayas nga naglangkob nila ni Rep. Eddie Gullas, Gobernadora probinsya sa Sugbu Gwendolyn Garcia, Gobernador Roel Degamo sa Negros Oriental ug lain pang mga lokal nga opisyales sa Sugbu ang nangulo sa gipahigayon nga paglusad lakip na usab ang pagpirma sa Memorandum of Agreement tali sa lain-laing ahensya nga misuporta sa NGP.

Usa sa mga mipirma sa MOA mao ang Department of Social Welfare and Development (DSWD) mga gipanguluhan ni Regional Director Ma. Evelyn Macapobre kung diin misaad sa hugot nga suporta sa tanang mga benepisyaryo sa Pantawid Pamilya ngadto sa greening program sa kagamhanan.

Human sa pagpirma sa maong memorandum, ang tanang Pantawid Pamilya beneficiaries sa Sugbu mipahigayon sa ilang kaugalingong run-to-plant program isip pagsuporta usab sa E-GWEN program nga adunay tumong sa pagpananom ug mokabat sa 100,000 ka mga antive tree species sa 56 ka ektarya nga libreng luna sa 51 ka mga lungsod ug siyudad sa Sugbu.

Sa laing bahin, ang DSWD 7  kasamtangan nang nakig-alayon sa buhatan sa DENR ug DA sa paghatag niini sa gikinahanglang tabang sa proyekto kalabot sa vegetable gardening, timber and fruit planting, solid and liquid waste management lakip na usab ang mga recycling ug decomposing projects nga mamahimong ipatuman sa mga kabalayan ug komunidad kung diin nahimutang ang mga benepisyaryo sa Pantawid Pamilya.(PIA-7/mbcn/Maryknoll B. Lague)

=========

Silliman University kasamtangang nagpaubos ug service learning program sa walo ka mga tinun-an gikan sa laing nasud

DUMAGUETE CITY, July 3 (PIA) --- Ang Silliman University sa siyudad sa Dumaguete, Negros Oriental kasamtangang mipahigayon sa usa ka buwan sa service learning program sa walo ka mga tinun-ana gikan sa nasud sa Japan ug Korea.

Ang maong  mga tinun-an gikan sa duha ka mga unibersidad nga ginganlan ug International Christian University (ICU) sa Japan ug Seoul Women’s University (SWU) sa Korea.

Ubos sa pagdumala sa Service Learning Center sa SU nga gipanguluhan ni Prof. Emeryencia Ligutom, ang programa nagsugod niadtong Hunyo 28 ug matapos karong Hulyo 26, kini matud pa ni Mark Garcia SU Director sa Office of Information and Publications.

Lakip sa tumong sa programa mao ang ipahiagom sa walo ka mga tinun-an ang pakig-alayon sa mga komunidad sa nasud ug paghibalo sa pamaagi sa panginabuhi sa mga Pilipino.

Ang mga tinun-an gikan sa ICU mao sila si Ryoko Higuchi, Natsumi Iigo, Mariko Kitahama, ug Aya Kojima samtang gikan sa SWU sila si Ji Hye Lee, Eun Young Choi, Lee Su Hyun ug Son-Ah Young. 

Ang mga tinun-an usab paga-gradohan pinaagi sa ilang adlaw-adlaw nga journal ug serye nga mga sesyon.(PIA-7/mbcn/Maryknoll B. Lague)

=========

CSC gipalapdan ang coverage sa S&T eligibility sa nasud

CEBU, July 3 (PIA) --- Sigun sa pangagamhanan sa Pilipinas, nagkinahanglan karon ang gobiyerno ug mga gradwado sa science ug technology alang sa pagserbisyo publiko.

Mao kini nga ang Civil Service Commission sa pakigtambayayong sa Department of Science and Technology (DOST) gipalapdan ang coverage sa eligibility nga naglangkub sa Scientific ug Technological Specialists (STS).

Kining STS nga elibility alang sa mga appointments nga anaa sa “First-and second level” nga mga posisyon sa gobiyerno nga dili covered sa Bar ug board exams.

Kini nga mga eligibility nag langkub sa mga kurso nga astronomy (astrophysics), biological sciences sama sa (biology, botany, ecology, marine biology, microbiology, molecular biology and biotecnology, physical anthropology, zoology).

Mga goelogical sciences sama sa (archaeology, geophysics, paleontology, seismology); meterology, oceanography, physics/applied physics, engineering sciences nga mosulad niining mga fields (biological, ceramic, computer, food, geothermal, industrial, nuclear, manufacturing, materials, mechatronics, petroleum, railway ug textile).

Uban usab niini ang mathematics ug information and communication technology sama sa (applied mathematics, computer science, information technology, pure mathematics, ug statistics), ug ang environmental science ug food science.

Kadtong mga interesado nga mag-aplay mamahimo nga mo-log on sa www.csc.gov.ph. (PIA-7/mbcn/hfg)

=========

Mga tinun-an sa pre-school sa Siqiojor nakadawat ug mga pahalipay

 SIQUIJOR, July 3 (PIA) --- Kapin sa 20 ka mga tinun-an sa pre-school gikan sa lain-laing barangay sa probinsya sa Siquijor nakadawat ug libreng mga school supplies gikan sa Splendours Society, usa ka grupo nga gilangkoban sa mga magtutudlo sa probinsya.

Ang maong grupo nanghatag ug lain-laing mga gamit sa tunghaan gikan sa lain-laing sponsors ug donors sa probinsya.

Matag usa sa mga tinun-an nakadawat ug papel, lapis, tahal, eraser, crayons, notebooks lakip na usab ang libreng snacks atol sa pagpanghatag.

Matud ni Barangay Captain Clebern Paglinawan, uban sa mga tinun-an nga midawat sa mga pahalipay mao ang ilang mga ginikanan ug mga magtutudlo.

Mipasalamat usab ang kapitan sa nagkadaghang sponsor ug suporta nga naangkon sa organisasyon ug nag-aghat ug dugang pang tabang aron as daghan pa unyang mga kabatan-onan nga matabangan.(PIA-7/mbcn/Maryknoll B. Lague)

=========

NGO sa Siquijor mipahigayon ug community based rehab training sa mga ginikanan sa mga batang adunay espesyal nga panginahanglan

SIQUIJOR CITY, July 2 (PIA) --- Ang “Gihiusang Ginikanan na May Kapansanang Anak”(GUGMA), usa ka organisasyon nga nagbase sa probinsya sa Siquijor bag-ohay lang mipahigayon ug usa ka community-based rehabilitation training ngadto sa 27 ka mga ginikanan sa mga kabatan-onan nga adunay especial nga panginahanglan nga kasamtangang nagtungha sa SPED class sa San Juan Elementary School.

Tumong sa maong pagbansay-bansay mao ang pagpausbaw sa abilidad ug kaalam sa mga ginikanan sa pag-atiman sa ilang mga anak ug pagtudlo kanila sa mga basic rehabilitation ug therapy nga mamahimong ipahigayon sa pinuy-anan  sama sa physical therapy (PT).

Ang Department of Social Welfare and Development (DSWD), Local Government Unit (LGU) sa San Juan, u gang Liliane Foundation Philippines ang mipahigayon sa duh aka adlaw nga training didto sa buhatan sa Department of Education (DepEd) Family Retreat House nga nahimutang sa Barangay Solangon , San Juan.

Ang Regional Director sa Liliane Foundation Tess de la Cruz maoy nagsilbing speaker ug lead trainer sa maong kalihokan.

Matud ni de la Cruz, kining maong kalihokan lakip sa mga outreach activities nga gipahigayon sa ilang organosasyon sa lain-laing suok sa nasud.

Laing gihatagan ug pagtagad sa ilang grupo mao ang paghatag ug suporta sa mga panginahanglan sa mga kabatan-onan nga nga miyembro sa GUGMA organization sa probinsya sama sa pagpanghatag ug tabang medical, rehabilitation ug education.

Sa pagkakaron, ang GUGMA gipanguluhan ni Joselito Maghanoy ug adunay 92 ka mga miyembro niini sa tibuokmprobinsya.

=========

BFAR migahin ug pundo alang sa proyekto nga seaweed culture sa Siquijor

SIQUIJOR, July 2 (PIA) --- Ang Bureau of Fisheries and Aquatic Resources (BFAR) migahin ug pondo alang sa pagpatuman sa Seaweed (Gozo) Culture Project alang sa duha ka asosasyon sa probinsya sa Siquijor nga  mao ang Marine Management Council (MMC) ug Caticugan Fisherfolks Association (CATIFA).

Base sa report sa BFAR, ang maong proyekto mikabat sa kantidad nga P177,829 ug  gipatuman pinaagi sa pakigtambayayong sa Office of the Provincial Agricuturist nga gipanguluhan ni Engr, Chito Trangia nga mao usab ang nagsilbing program coordinator uban si Chuchie Cherry Camo ang Seaweeds Commodity Coordinator sa programa.

Si Provincial Fishery Officer Warren Inao mao ang gitakda isip overall supervisor sa maong kalihokan.

Ang kagamhanan sa probinsya ug munisipyo mipaabot usab sa ilang pagsuporta minaagi sa paghatag ug mga input assistance sama sa pump boaot, pisi, tarpaulins, mga kawayan, plywood ug laing pang gamit alang sa pagsiguro nga magmalampuson ang maong proyekto.

Tumong sa proyekto matud ni Inao mao ang paggamit sa potential area alang sa pagpadaghan sa mga seaweeds sa probinsya ug lakip na usab ang pagpausbaw sa mga kinitaan sa mga mananagat pinaagi sa pagpausbaw sa produksyon niini.

90 ka adlaw human sa adlaw nga gisugdan ang maong kalihukan, ang duha ka asosasyon nakaani ug moakabat sa tulo ka metric tons kung diin ila kining gibaligya dinhi sa Sugbu sa presyo nga P50.00 matag kilo ang mga binuwad o dried ug P15.00 matag kilo ang lab-as o fresh.(PIA-7/mbcn/Maryknoll B. Lague )

=========

Pagpangita ug “Ulirang Nakatatanda 2011”, pagasugdan na

 

CEBU CITY, July 1 (PIA) --- Ang Department of Social Welfare and Development (DSWD) uban sa pakigtamabayayong sa Coalition of Services of the Elderly, Inc (COSE) milunsad sa search for “Ulirang Nakatatanda 2011” isip kabahin sa selebrasyon sa Older Persons Week karong umaabot nga unang semana sa buwan sa Oktobre.

Aron mamahimong nominee, kinahanglan kining mag edad ug 60 pataas, wala pa nakadawat ug bisan unsang award, dili inila, mitagana sa ilang kinabuhi aron pagsilbi sa uban ug kinahanglang i-nominate pinaagi sa usa ka organisasyon kung diin sila miyembro ug dili sa ilang mga pamilya ug parente.

Ang mga mapili magikan sa lainlaing sektor sama sa urban poor, mag-uuma, indigenous communities ug lakip na ang naggikan sa mga religious grops sa nasud.

Sa Oktubre 2, 2011, ang COSE muhatag ug award ngadto sa 10 ka mga napiling outstanding older person gikan sa lain-laing lugar sa nasud.

Kini matud pa aron hatagan ug pag-ila ang mga importanteng kontribyusyon ug serbisyo nga nahatag sa mga katiguwangan sa atong katilingban.

Ang mga nominasyon mamahimong ipadala pinaagi sa e-mail (cose@cosephil.org) o postal service ngadto sa Coalition of Services of the Elderly, Inc nga nahimutang sa Mezzanine Floor, Mariwasa Bldg., 717 Aurora Blvd., Quezon City.

Ang deadline sa nomination karong umaabot nga Agosto 15, 2011.(PIA-7/mbcn/Maryknoll B. Lague )

=========

Cash Pay-outs alang sa mga benepisyaryo sa duha ka dagkong programa sa Dumaguete gipahigayon niadtong Hunyo 29

CEBU CITY, July 1 (PIA) --- Ang mga napiling senior citizens, mag-uuma ug mananagat sa siyudad sa Dumaguete nakadawat na sa ilang mga cash assistance gikan sa nasyunal nga kagamhanan pinaagi sa buhatan sa Department of Social Welfare and Development (DSWD) niadotng Hunyo 29.

Ang mga kawani sa DSWD mismo maoy mitunol sa mga cash grants ngadto sa mga napiling benepisyaryo sa  Rice Subsidy Program ug Social Pension for Indigent Senior Citizens nga susamang gipatuman sa DSWD pinaagi sa mando sa nasyunal nga kagamhanan.

Sa kinatibuk-ang 82 ka mga cash subsidy beneficiaries nga mitunga atol sa gipahigayon nga twin pay-outs didto sa Women’s Center sa Brgy. Tinago siyudad sa Dumaguete, 27 niini ang mga senior cictizens ug 55 ang mga mag-uuma ug mananagat.

Tanan nga mga benepisyaryo giila sa DSWD nga balido base sa una nang gipahigayon nga National Household Targeting System.

Matag usa sa napiling senior citizen nga nag-edad ug 77 pataas nakaangkon ug tag P1,500 isip ilang suhol gikan niadtong buwan sa Enero hangtod sa Marso  samtang gibutyag ni DSWD Officer nga kasamtangan pang nagproseso ang ilang buhatan ang kantidad nga gitagana alang sa buwan sa Abril hangtod Hunyo.

Ang P500 nga kantidad matag bulan nga gihatag ngadto sa mga senior citizen nagsubay sa Republic Act 9994 o mas naila nga Expanded Senior Citizen Act of 2009.

Sa samang bahin, ang mga benepisyaryo sa Rice Subsidy Program nakadawat ug P2,937 isip one time cash subsidy nga gitagana alang sa mga yanong mag-uuma ug mananagat sa nasud.

Atol sa gipahigayon nga pamahayag sa Mayor sa Dumaguete Manuel Sagarbarria, siya mipasalamat ug midayeg sa presidente sa nasud Benigno S. Aquino III sa pagpahigayon niining maong mga programa aron sa paghatag ug tabang ug ayuda ngadto sa mga naglisod nga sektor sa nasud.(PIA-7/mbcn/Maryknoll B. Lague  

=========

Bagsakan’ Center sa NegOr, ablihan na

CEBU CITY, July 1 (PIA) --- Ang ‘Bagsakan Center alang sa mga organic farm products gikan sa mga mag-uuma sa probinsya sa Negros Oriental gikatakda nang ablihan sa umaabot nga ipahigayon sa siyudad sa Dumaguete isip kabahin sa pagpaningkamot sa kagamhanan sa probinsya sa pagpromot sa mga programa kalabot sa organic farming.

Matud sa Capitol Information Officer Adrian Sedillo, kasamtangan nang gipahigayon ang renovation sa gikatakdang ‘Bagsakan’ center nga nahimutang taliwala sa Tabo sa PAO area ug Hall of Justice subay sa E.J Blanco Drive sa Barangay Piapi sa siyudad sa Dumaguete.

Adunay kantidad nga P500,000 nga gitagana ang probinsya alang sa maong renovation.

Matud pa, tumong sa bagsakan center ang pagpamaligya ug mga puro ug organic nga mga produkto gikan mismo sa mga umahan sa probinsya aron usab sa paghatag ug pilianan sa mga konsumidor tali sa paggamit ug organic ug inorganic nga mga produkto nga gibaligya usab sa Tabo sa PAO kilid sa gikatakdang ablihan nga Bagsakan Center.

Ang Tabo sa PAO gitukod sa kagamhanan niadtong tuig 2000 isip lokal nga bersyon sa dagkong merkado alang sa mga mag-uuma kung diin naghatag kini kanila ug pwesto aron sa pagpamaligya sa ilang mga produkto sa ubos nga presyo ug laktod ngadto sa mga yanong konsumidor.(PIA-7mbcn/Maryknoll B. Lague)

==========

DSWD magselebrar sa NDPR Week karong Hulyo 17-23

CEBU CITY, July 1, (PIA) --- Ang Department of Social Welfare and Development(DSWD) sa rehiyon 7 uban sa lain pang mga ahensya gikatakdang mopahogayon ug usa ka semanang selebrasyon alang sa ika-33 nga National Disability Prevention and Rehabilitation (NDPR) karong Hulyo 17 ngatod Hulyo 23, 2011 nga adunay tema nga “Making the Rights for Filipinos with Disabilities.”

Tumong niining maong kalihokan mao ang pagpausbaw sa kahibalo sa katawhan kalabot sa mga isyu nga nagpalibot sa mga Persons with Disabilities (PWD) ug pag-aghapagpausbaw sa kahibalo sa katawhan kalabot sa mga isyu nga nagpalibot sa mga Persons with Disabilities (PWD) ug pag-aghat sa mga ahensya publiko ug pribado sa pagpatuman ug mga programa nga maghatag ug tabang ngadto sa mga PWD isip miyembro usab sa katilingban.

Buot usab sa DSWD nga aghaton ang publiko sa paghatag ug aktibong pagsuporta sa pagpausbaw sa panginabuhi ug sosyal nga kondisyon sa mga PWD pinaagi sa pagsabot sa ilang lain-laing isyu ugpanginahanglan.

Ang lain-laing kalihokan kalabot sa maong selebrasyon dinhi sa tibuok rehiyon kasamtangan pang giandam sa mga opisyales apan una nang gikompirmar sa Probinsya sa Sugbu nga sa unang higayon sila mopahigayon usab ug ilang kaugalingong selebrasyon sa NDPR Week nga pagasugdan pinaagi sa usa ka parada nga adunay lokal nga tema nga “Katungod sa Pagpakabuhi, Katungod sa Kinabuhi.”(PIA-7/mbcn/Maryknoll B. Lague)

==========

Rehiyon 7 andam motubag sa mga kalamidad, pasalig sa mga awtoridad 
By Eli C. Dalumpines

CEBU CITY, July 2 (PIA) – Gipasalig sa mga awtoridad sa Tunga-Tungang Kabisay-an, atol sa media forum nga gipahigayon kagahapon sa pagbukas sa kasaulugan sa Disaster Consciousness Month, nga andam ang rehiyon nga motubag sa mga kalamidad kun ugaling mo-igo kini.

Matud ni C/Supt. Samuel Yordan, Deputy Director for Administration sa Police Regional Office 7, dunay kapin 7,000 ka mga police personnel dinhi sa rehiyon nga mahimong gamiton pag-responde sa bisan unsang matang sa kalamidad nga moabot.

Gitataw usab ni Yordan nga bisan kung ilang gitagana ang ilang mga ekipo alang sa pagpatunhay sa kalinaw apan mahimo nila kining gamiton alang sa pagtubag sa mga kalamidad.

Iya hinoong gi-angkon nga dyutay ra sa iyang mga tawo ang dunay specialized training alang niini apan iyang gipasalig nga dunay igong katakos ang kapulisan nga mopahigayon ug disaster response.

Samtang si Capt. Anelito D. Gabisan sa Philippine Coastguard mipahibawo nga duna na sila’y natukod nga team nga motubag sa mga disgrasya sa kadagatan. Wa pa’y labot niini ang mga coastguard auxiliaries ug mga civilian volunteers nga andam nga mo-ayuda kanila kung gikinahanglan, matud pa niya.

Sa sayo pa, mipahibawo usab ang rehiyunal nga buhatan sa Department of Social Welfare and Development (DSWD) nga duna sila’y gi-andam nga pundo nga magamit kun ugaling dunay kalamidad nga moabot dinhi sa rehiyon.

Mipasalig usab ang nahisgutang buhatan nga duna sila’y mga teams nga andam mopahigayon ug stress debriefing sa mga biktima sa kalamidad. (PIA-Cebu/ECD)