Malaumon nga maka-umol ug plano pag-minos sa epekto sa climate change
By Eli C. Dalumpines

CEBU CITY, June 29 (PIA) -- Malaumon ang Department of Environment and Natural Resources (DENR) sa Rehiyon 7 nga maka-umol ug epektibo nga plano pagpa-minos sa epekto sa climate change.

Si Albert Magalang, hepe sa Climate Change Office sa Environmental Management Bureau sa DENR, atol sa ikaduhang Environmental Congress nga gipahigayon dinhi sa Sugbo sugod kagahapon, nagkanayon nga, sama sa ubang suliran, duna usa’y kasulbaran ang climate change.

Iya hinoong gi-angkon nga malisod kini sa mga pobreng nasud sa kalibutan sama sa Pilipinas diin kuwang pa kita’g kasinatian ug kasamtangan pa usab kitang nagtimbang-timbang sa paggamit sa atong mga bahandi sa kinaiyahan alang sa atong paglambo ug sa samang higayon sa pagpanalipod niini.

Subay niini, iyang giaghat ang mga nanambong sa maong panagtigom nga magbaton ug pasensya ug focus sa ilang panagbaylo-ay ug mga huna-huna aron pag-umol ug plano.

Kini tungod kay, matud pa niya, ang ilang makab-ot niini nga panagtigom mao ma’y mo-determinar sa mga panghitabo unya sa umaabot nga katuigan.

Samtang ang president sa Pollution Control Association of the Philippines (PCAPI) dinhi sa rehiyon nga si Edmond Dantes Ouano nanawagan sa mga pangulo sa mga industriya nga moapil niini nga panagtigum aron motabang pagpangitag solusyon sa climate change. (PIA-Cebu/ECD)

=========

PNP dunay igong tawo nga motubag panahon sa kalamidad

By Eli C. Dalumpines

CEBU CITY, June 29 (PIA) -- Gipasalig sa kapulisan sa Tunga-Tungang Kabisay-an nga duna silay igong mga tawo nga motubag sa panginahanglan sa katawhan kung may mo-igo nga kalamidad sa bisan diing dapit dinhi sa rehiyon.

Matud ni P/CSupt. Samuel Yordan, Deputy Director for Administration sa Police Regional Office 7, sa gipahigayon nga media forum karong buntag, duna silay mga personnel sa matag probinsya sa rehiyon nga andam nga mo-responde kun ugaling dunay motumaw nga kalamidad.

Gani, dugang pa niya, ila na man kining gihimo sa dugay nang panahon tungod kay,  sa sagad nga mahitabo, ang polis man ang una gyung motubag sa susama niini nga mga sitwasyon.

Apan iyang gi-angkon nga nagkinahanglan pa ug dugang ekipo ug pagbansay-bansay ang kapulisan alang niini. Iya hinoong gitataw nga duna silay kapabilidad pagdumala ug disaster response.

Nanghinaot si Yordan nga mapun-an ang kakulangan sa ekipo ug uban pang mga gamit sa mga lokal nga mga pangagamhanan.

Sa samang kalambo-an, ang Operations Officer sa Office of the Civil Defense (OCD) sa Rehiyon 7 nga si Neil Sanchez nagkanayon nga mihatag na sila ug pagpasida-an sa kapulisan ug kasundaluhan sa rehiyon sa mga dapit nga angay bantayan diin sagad nga makasinati ug pagbaha.

Kini naglangkob sa nagkalain-laing mga suba dinhi sa rehiyon, lakip niini ang Mahiga Creek dinhi sa Dakbayan sa Sugbo ug Butuanon River sa Dakbayan sa Mandaue,  diin dunay natala nga mga pagbaha sa milabay’ng pipila ka tuig.

Suma usab ni Sanchez, mopahigayon sila ug pagbansay-bansay sa kapulisan bahin sa high angle rescue pagsangkap kanila sa higayon sa kalamidad. (PIA-Cebu/ ECD)

==========

Fuel Subsidy alang sa mga tricycle drivers sa siyudad sa Sugbu andam na sa pagpang-apod-apodDENR-7

CEBU CITY, June 29 (PIA) --- Mokabat sa 259 ka mga tricycle operators dinhi sa Sugbu ang mamahimo nang makapahimulos sa ilang fuel subsidy ubos sa “Pantawid Pasada Program sa kagamhanan didto sa buhatan sa Cebu City Hall human giturn over sa Department of Interior and Local Government(DILG) ang tseke ngadto sa lokal nga kagamhanan sa siyudad kagahapon adlawa.

Ang mayor sa siyudad sa Sugbu Micheal Rama mismo ang midawat sa tseke nga nagkantidad ug P38,850 gikan sa DILG director Patricio Gabuya.

Human sa turn-over, daling gimandoan sa mayor ang mga kawani sa treasurer’s office sa pagsugod sa pagpang-apod apod sa mga subsidiya nga nagkantidad ug P150 matag usa.

Ang P38,850 kabahin sa P3.4 ka milyon nga kantidad nga gigahin isip fuel subsidy sa tanang  tricycle franchise sa tibuok rehiyon 7.

Matud ni Ely Espina gikan sa Cebu City public information office, ang subsidiya mamahimo nang ipanghatag human makapresenta ang mga operators ug usa ka valid identification card (ID) ug orihinal nga kopya sa franchise sa ilang tricycle unit.(PIA-7/mbcn/Maryknoll B. Lague)

==========

POPCOM mipirma ug kasabutan alang sa mga benepisyaryo sa Pantawid Pamilya

CEBU CITY. June 29 (PIA) --- Usa ka memorandum of agreement (MOA) ang gipirmahan tali sa Commission on Population (PopCom) ug Department of Social Welfare and Development (DSWD) niadtong Biyernes alang sa pagpahigayon ug serye nga mga Family Development Sessions (FDS) ngadto sa mga benepisyaryo sa Pantawid Pamilya Program.

Ubos sa kasabotan, ang PopCom mopahigayon sa lain-laing sisyon ug pagbansaybansay kalabot sa dakong papel niini sa pagpausbaw sa responsible parenthood sa mga managtiayon dinhi sa tibuok nasud.

Matud sa PopCom Regional Director Atty. Bruce Ragas, kining maong kalihokan dako ug ikatabang sa Module 5 nga bahin sa Pantawid Pamilya Program kung diin maghatag kini ug dakong epekto sa social development aspect sa mga benipisyaryo ug makahatag ug dugang impormasyon kalabot sa importansya sa responsible parenthood isip lakip sa mga basehan sa pagplano sa pamilya.

Tumong sa FDS ang paghatag ug kaalam sa mga benepisyaryo ilabi sa sa pagpausbaw sa maayong pamatasan sa mga miyembro aron makatukod kini ug maayong relasyon sulod sa ilang tagsa tagsa ka mga pamilya ug uban pang mga gikinahanglang hisgutanan.

Kining maong panagtambayayong sa duha ka mga buhatan giila isip dakong suporta ngadto sa panawagan sa nasyunal nga kagamhanan sa pagpatuman ug lain-laing paagi sa pagpakunhod sa kaso sa kawad-on sa nasud lakip na usab sa pagpausbaw sa kampanya kalabot sa social protection.(PIA-7/mbcn/Maryknoll B. Lague)

=========

Environmental Congress gipahigayon dinhi sa Sugbo

By Eli C. Dalumpines

CEBU CITY, June 29 (PIA) – Gipahigayon sa Department of Environment and Natural Resources (DENR) ang ikaduhang Environmental Congress dinhi sa Sugbo sugod kagahapon isip tipik sa kasaulugan sa Environment Month matag Hunyo.

Matud ni Allan Arranguez, Director sa Environmental Management Bureau sa DENR-7, ang maong kalihukan gitumong alang sa pag-umol ug epektibong lakang aron mahibawo ang katawhan kung unsaon nila pagpauyon-uyon sa pagbag-o sa panahon.

Ang 2011 Congress maglangkob sa mga presentasyon gikan sa grupo sa mga eksperto nga dunay igo nga kasinatian sa mga isyu may kalabutan sa pagpanalipod sa kalikupan.

Mokabat sa 300 ka mga tawo nga nagagikan sa nagkalain-laing sektor, lakip na ang media ug academe, ang nanambong sa duha ka adlaw nga panagtigum.

Si DENR Secretary Ramon Paje, diin maoy usa sa mga pinasidunggang dinapit, walamakatambong atol sa maong panagtigum apan mipadala hinoon sa iyang mensahe alang sa mga partisipante. (PIA-Cebu/ECD)