Probinsiya sa Sugbo magpadayon sa pagpakiglambigit sa Tsina

 CEBU, June 22 (PIA) --- Ang probinsiya sa Sugbo magpadayon sa iyang pagpakiglambigit sa Tsina bisan pa man sa mga pagpanawagan sa pagboykot sa ilang mga produkto, matud pa ni gobernador Gwen Garcia.

Imbes nga motuman sa panawagan sa usa usab ka gobernandor nga i-boykot ang mga inangkat gikan sa Tsina, si Garcia miingon nga ang gobierno gikinahanglang makig-hinabi sa pangagamhanan sa Tsina aron maresulba ang mga isyus sa Spratly Islands.

Atong mahinumduman nga si Albay gobernandor Joey Salceda sa kasamtangan nanawagan nga i-boykot ang tanang produkto sa Tsina sa tungod sa mga reports nga ang mga barko niini misulod sa gikagubtan karon nga Isla sa Spratly.

Si Garcia miingon nga ang probinsiya sa Sugbo adunay maayo kaayong relasyon sa Tsina ug ang Tsina usab  nakahatag ug daghang tabang ngadto sa mga nagkalain-laing mga industria dinhi sa probinsiya.

Ang gobernador miingon nga ang probinsiya sa Sugbo adunay mga nabalay nga mga relasyon sa upat ka mga probinsiya didto sa Tsina.

« Ug among napamatud-an ang kalig-on sa among panaghigala-ay sa Tsina, » si Garcia miingon ngadto sa mga reporters.

Si Garcia nagtu-o nga ang panag-away kabahin sa Spratlys maresolbar kini sa diplomatikanhong pamaagi tungod kay adunay mga « rules of engagement » nga angayang pagasundon ug adunay mga paagi kun unsaon ang mga leder sa duha ka mga nasud molingkud aron sa pagsabot-sabot kung unsa’y angayan’g buhaton.

« Apil kita sa usa ka komunidad sa mga nasud ug angayan lang nga mangita kita sa mga maayo ug malinawon nga mga pamaagi nga angayang madawat sa duha ka nasud, » matud pa ni Garcia.(PIA-7/mbcn/Hazel F. Gloria)

=========

Sugbo, miselebrar sa pagsaulog sa ASEAN Dengue Day By: Juju S. Manubag CEBU CITY, June 21 (PIA) --- Ang Sugbo miselebrar sa bag-ong gipahigayon nga Asean Dengue Day sa tibuok nasod dungan sa trayntay siete (37) nga mga nasod sa Asya Pacifico nga didto himoa sa Plaza Sugbo sa dakbayan. Mao kini ang gipahibalo sa Assistant City Epidemiologist nga si Durinda Macasocol sa Cebu City Epidemiology Surveillance and Statistics Unit sa CHD-7 sa usa ka pakighinabi sa Philippine Information Agency (PIA)-Cebu City. Matod ni Macasocol nga selebrasyon gitambungan sa kadagkoan sa gigantihan sa Department of Health (DOH)-7, Cebu City Health Department ug ubang sangay nga buhatan sa ahensiya sa panglawas. Gipahibalo usab ni Macasocol nga atol sa selebrasyon, gitagaan ang barangay sa Guadalupe, Mabolo ug Capitol ug ganti isip mananaog tungod miubos na ilang pwesto karon sa kinadaghanang natala sa kasong dengue. Matod ni Macasocol ang barangay Guadalupe, Mabolo ug Capitol sulod sa 8 ka tuig, kanunay sila nga anaa sa kinatas-ang pwesto nga may kinadaghanangg natala nga mga kaso sa dengue. Ang barangay Guadalupe sulod sa 8 ka tuig kanunay anaa sa primerong pwesto dungag ni Macasocol apan karon anaa na sa ika-10 nga pwesto sa awahing 2 ka semana ug sa bag-ong tala anaa na kini sa ika-8 nga pwesto. Ang barangay Mabolo ug Capitol mao usab, ingon ni Macasocol nga sulod sa 8 ka tuig ang duha ka barangay pirmeng anaa sa Top 5 apan sa bag-ong talang gipagawas, ika-12 na ang Mabolo ug ika-13 na ang Capitol. Nagpasabot lang nga gipahingusgan sa 3 ka barangay ang pagkamabinantayon, pagpanglimpiyo ug uban pa nga paagi nga mapuksa ang sakit uban sa pagtambayayong sa mga kadagkoan sa barangay, siyudad ug ahensiya sa panglawas, si Macasocol misulti. Ang 3 ka barangay gitagaan ug ‘certificate of recognition’ ug ganting kwarta gikan kang DOH-7 Director Susana Madarietta, si Macasocol mipahibalo. Ang barangay Guadalupe gigantihan ug baynte mil pesos (P20,000), samtang ang barangay Mabolo gitagaan ug kinse mil pesos (P15,000) ug diyes mil pesos (P10,000) alang sa barangay Capitol, dungag ni Macasocol. Sa mao usab nga selebrasyon sa Asean Dengue Day, ang lokal nga pangagamhan sa Sugbo mipadangat ug baynte singko (25) nga mga impregnated mosquito nets alang sa Cebu City Medical Center (CCMC) ug laing usa ka gatos (100) para sa otsenty kwatro (84) nga health centers sa dakbayan, panapos ni Macasocol. (PIA7-Cebu/JSM)