PNoy misubo sa 200-megawatt coal plant sa Naga

By Eli C. Dalumpines

CEBU CITY, June 27 (PIA) – Pormal nang sugdan sa Korean Electric Power Corp. (KEPCO) ang operasyon niini human subhi ni Presidente Benigno S. Aquino III ang maong planta nga naa nahimutang sa Dakbayan sa Naga, lalawigan sa Sugbo.

Si Presidente Aquino, sa iyang pakigpulong atol sa inagurasyon sa nahisgutang planta, nagkanayon nga niining pagbukas sa 200-megawatt coal-fired power plant sa KEPCO matagbo na ang panginahanglan sa kuryente sa lalawigan diin kasamtangang nakasinati ug paglambo sa ekonomiya.

Matud sa Presidente, ang KEPCO ang nag-supply sa 11 porsyento nga kapasidad sa enerhiya nga gikinahanglan sa nasud pinaagi sa mga planta nga gipadagan niini sa pipila ka mga dapit.

Niining pagbukas sa maong planta, dugang pa niya, makatagamtam na ang Sugbo ug ubang dapit sa rehiyon ug igong supply sa kuryente sa barato nga presyo, dungan kini sa pagkahimugso sa Wholesale Electricity Spot Market dinhi sa Kabisay-an.

Kini tungod kay ang KEPCO mobaligya man lang sa iyang kuryente sa P3.80 kada kilowatt/hour kung itandi sa P4.67 nga presyo kada kilowatt/hour sa National Power Corporation (NPC), suma pa sa presidente.

Gipasalig hinoon ni Presidente Aquino nga padayon niyang iduso ang pag-promote sa renewable energy dinhi sa nasud subay sa National Renewable Energy Program.

Apan iyang gitataw nga samtang naghuwat pa ang nasud ug pipila ka tuig alang sa katumanan niini, kinahanglan unang mogamit ug laing tinubdan sa enerhiya aron pagtubag sa kakuwang sa supply sa kuryente.

Siguraduhon lang, matud pa niya, nga masunod sa nahisgutang kumpanya ang mga rekisitos saClean Air Act aron di kini makamugna ug kadaot sa kalikupan. (PIA-Cebu/ECD)

==========

Ang gipahigayon nga PhilHealth Sabado nakakuha

ug 224 ka bag-ong miyembro dinhi sa Central Visayas

ni Juju S. Manubag

CEBU CITY, Hunyo 27 (PIA) – Dos siyentos baynte kwatro (224) ang nahimo nga mga bag-ong natala nga miyembro tibuok Tunga-tungang Kabisay-an sa gipahigayong Philhealth Sabado niadtong Hunyo 25.

Mao kini ang gipahibalo ni Janet Advincula ang Field Officer sa Philippine Health Insurance Corporation (PHIC)-7 sa usa ka pahinabi sa Philippine Information Agency-Cebu.

Si Advincula miingon nga ang tala nga 224 ka bag-ong nahisakop sa Philhealth suma-tutal na kini sa tanang gipahigayon nga pagpang-rehistro sa ilang buhatan nga gihimo sa Zapatera Elementary School, Cebu Tehnical University (CTU), E-mall diri sa dakbayan sa Sugbo ug sa field offices nila sa Tagbilarn City, Talibon, Bohol, Dumaguete City ug Bais City Negros Oriental.

Midugang ug ingon si Advincula nga ang ilang gipunting nga moparehistro niadtong Sabado kay ang mga ginikanan sa nagtungha sa Zapatera Elementary School nga dili pa nasakop sa Philhealth ug kadtong mga anaa ang kinabuhi ug panginabuhian nagtuyok duol sa gihisgutang tunghaan.

Matod usab ni Advincula nga malampuson ang gipahigayon nilang Philhealth Sabado tungod nakapanghatag sila ug impormasyon ug pahibalo sa mga niadto nga nanginahanglan sa ilang serbisyo ug sa buot sa magpasakop sa Philhealth labi pa sa presensiya sa tanang ahensiya sa gobyerno sama sa DOH, DSWD, DILG, PIA, DepEd ug miembro sa media nga nakigtambayayong sa ilang kalihokan.

Gikalipay gayod sa kadaghanan sa nagparehistro kay naatol ug adlaw nga Sabado nga walay trabaho ug walay klase ug ang mga kabataan nila ang nabilin sa ilang panimalay.

Gipahibalo ni Advincula nga nakakolekta sila ug baynte nuybe mil kinyentos pesos (P29,500) diri lamang sa Sugbo ug kapin sa kwarenta mil ka pesos (P40,000 plus) sa tibuok rehiyon sa Central Visayas alang sa tigutlo ka bulan nga pasiunang bayad nga tres siyentos pesos (P300) nga insurance premium.

Sa laing pakighinabi kang Karisma Agraviador ang Public Relations Officer (PRO) sa PHIC, siya nagkanayon nga upat (4) ka hugpong nga orientation seminar ang ilang napahigayon niadtong Sabado nga gitambongan sa gatos kapin nga nagpasakop sa Philhealth.

Sa pagpanapos ni Advincula nga ang tanang 224 nga bag-ong nasakop sa Philhealth nakadawat usab sa ilang Philhealth ID. (PIA7-Cebu/JSM)

==========

DTI ug mga partners niini gikatakdang mopahigayon sa “One Country, One Voice trade policy consultation dinhi sa Sugbu

CEBU CITY, June 27 (PIA) --- Ang mga buhatan sa Department of Trade and Industry (DTI), Bureau of Customs (BOC), Tariff Commission (TC) ug laing pang mga pribadong sektor gikatakdang mopahigayon ug mga programang gitawag ug “One Country, One Voice (OCOV) Trade Policy Consultation Program ug “Doing Business in Free Trade Areas (DBFTA) Part II – A sectoral Approach” karong umaabot nga Hunyo 29 sa Cebu Parklane International Hotel.

Kining maong programa nga OCOV Trade Policy Consultation Approach gipangulohan sa DTI- International Trade Group kung diin tumong niini ang pagtukod ug mabansayon ug epektibong pamaagi sa pag-agni sa publiko sa pakighilabot sa mga kalihokan kabahin sa mga policy formulations and negotiations sa nasud.

Matud ni DTI-7 Provincial Director Nelia Navarro, kining maong programa nga trade consultation sa ilang buhatan gipahigayon isip tubag sa daghang hangyo ug panawagan kalabot sa detalyadong diskusyon sa isyu kabahin sa kaayuhang mahatag sa mga trade agreement ngadto sa sektor sa pangnegosyo ug ekonomiya sa nasud.

Ang DBFTA Part II mohatag usab ug diskusyon kalabot sa mga oportunidad sa merkado ngadto sa mga free trade areas alang sa mga industriya sama sa pagkaon,gift decors and houseware(GDH), garments ug lain-laing mga serbisyo.

Aduna usab mga session kalabot sa pagpanguha ug taripa, rules of origin ug mga customs procedure.

Alang niining importanteng kalihokan, makigtambayayong ang DTI uban sa mga publiko ug pribadong sektor alang sa paghatag ug higayon sa mga negosyante lakip na ang mga kawani niini sa paghibalo sa mga gikinahanglang impormasyon pinaagi sa paglangkob sa nagkadaiyang learning sessions nga ipahigayon sa FTAs.

Ang mga nahisgutang Info Session ipahigayon nga libre ug sa laing pang dugang pangutana ug impormasyon mamahimong tawagon si Ms. Tessie Emphasis pinaagi niining maong mga numero: 253-2631 loc. 18 o 412-1863. (PIA-7/mbcn/Maryknoll B. Lague )