PB niaprobar sa unang pagbasa sa anti-drug abuse commission

CEBU, June 15 (PIA)---Ang Provincial Board sa niaging adlaw niaprobar sa unang pagbasa sa giduso ng ordinansa nga magmugna sa Cebu Provincial Anti Drug Commission.

Ang mga nagco-sponsor sa gisugyot nga ordinansa, sila si Board Members Jose Ribomapil Holganza, Jr. ug Thadeo Ouano nibarog nga sponsor sanglit wala ang proponent niini sa sesyon kagahapon nga si Board Member Carmen Remedios Durano-Meca.

Si Meca usab ang chairperson sa komitiba sa PB sa makadaot nga ilegal nga droga ug ang pagpugong niini.

Ang  Philippine Councilors League--sa Cebu chapter nga gipangulohan ni Meca sa mga tigpapatigayon ug mga partners niini sa workshop sa niaging buwan nakahimo ug usa ka rekomendasyon nga motukod ug permanente nga komitibo nga mosustento sa tanang programa ug proyekto sa probinsya kabahin sa anti-drug abuse.

Gitataw nga adunay kakinahanglanon nga modebelop ug  Task Force on Anti-Drug and Substance Abuse aron pagpahait sa ilang pagtutok sa maong isyu ug pagpakusog sa koordinasyon batok sa mga institusyon, indibidwal ug mga law enforcement nga mga ahensya.

Ang komisyon pagalangkoban sa buhatan sa gobernador, komitiba sa PB sa anti-drug and substance abuse; kabatan-onan ug sports development; mga barangay; Philippine Drug Enforcement Agency 7, Cebu Provincial Police Office, Department of the Interior and Local Government, Department of Education, Department of Social Welfare and Development; Bureau of Jail Management and Penology; Provincial Prosecutor’s Office; Provincial Legal Office; Provincial Health Office ug mga representante sa pribadong sektor.

Gisugyot usab ang paggahin ug P2M isip pasiunang pundo alang sa mga operasyon ug programa sa komisyon. (PIA 7mbcn/Angie P. Amodia)

=========

Balaodnon nga magdili sa AFP, PNP officers nga matudlo sa mga posisyon sa kagamhanan

CENTRAL VISAYAS, June 15 (PIA)---Si Representante Luzviminda Ilagan ug Emmi de Jesus sa party-list nga Gabriela nisang-at ug balaodnon nga magdili sa mga aktibo o retiradong mga military o mga opiayales nga pulis nga matudlo sa mga sensitibo nga posisyon sa kagamhanan.

Sa pagsang-at sa Bill 4566, ang duha nagkanayon nga ang militarization sa pangagamhanan nagsugod niadtong si kanhi President Ferdinand Marcos nitudlo ug mga military sa mga sibilyan nga posisyon.

Sila niingon nga ang nagsunod nga mga administrasyon nagpadayon sa maong binuhatan aron masiguro ang kamatinud-anono sa mga military.

Ang balaodnon magdili sa tanang retirado ug aktibong mga military o pulis ug mga lowerr-level nga personnel nga matudlo isip secretary, undersecretary, ug pangulo o miyembro sa governing bodies nga gipanag-iya sa kagamhanan o mga korporasyon nga gikontrol sa kagamhanan.

Hinuon, ang balaodnon dili magdili sa mga aktibo o retiradong mga personnel sa Armed Forces of the Philippines ug sa Philippine National Police officers sa pagdagan sa bisan unsa nga posisyon atol sa eleksyon. (PIA 7/mbcn/Angie P. Amodia)

=========

Mayor sa lungsod sa Larena nidawat sa hagit ni P-noy

LARENA, Siquijor, June 15 (PIA)---Si Gold L. Calibo, ang mayor sa lungsod sa Larena sa probinsya sa Siquijor nidawat sa hagit ni Presidente Benigno S. Aquino III sa iyang panawagan sa tanang konstituwente sa pagpabilin isip usa ka pamilya nga magtinabangay alang sa kaayohan sa tanan.

Ang Mayor nagkanayon nga ang mga Pilipino karon nag-atubang ug laing hagit—ang pakigbatok sa kalisod, inhustisya ug korupsyon, pagpreserba sa kalikopan ug sa epekto sa climate change, ug ang pag-amuma sa ilang mga kabataan sa maayo nga dalan batok sa mga modernong impluwensya.

“Kon ang atong kigulangan nakig-away batok sa mga banyaga ug mga laing nasyon nga midominar kanato, kita karon nag-atubang ug lahi nga hagit nga mao ang away batok sa kalisod, batok sa inhustisya, korupsyon ug uban pa. Nakigbisog kita sa hagit sa pagreserbar sa atong palibot ug kalikupan tungod sa epekto sa Climate Change, ug nakigbisog usab  kita sa hagit sa pagpatubo ug pagdala sa atong kabataan ngadto sa matarong nga dalan taliwala sa mga modernong impluwensya,” si Mayor Calibo niingon.

Si Calibo nibutyag nga adunay pipila ka mga hagit nga atong giatubang karon nga kinahanglan tubagon dili lang sa kagamhanan kon di lakip sa mga pribadong sektor partikular na sa pamilya.

Kini iyang giingon atol sa iyang pagtaho sa mga proyekto sa lokal nga pangagamhanan sa Larena nga motubag sa pipila ka nag-unang isyu lungsod.

Kini mao ang rehabilitasyon sa water system sa lungsod.

“Karon nga nasugdan na ang proyekto, atong panghinauton nga ang supply sa tubig magmakanunayon na.”

Sumala ni Calibo nga ang lokal nga pangagamhanan nitabang usab sa pagbutang sa potable water supply system ug nakakuha ug pumdo gikan sa Department of Health, (DOH), Department of the Interior and Local Government (DILG), and the National Anti-Poverty Commission (NAPC) alang sa rehabilitasyon ug pagpahalapad sa suplay sa tubig sa siyam ka barangay sa Larena. (PIA 7/mbcn/Angie P. Amodia)

=========

DepEd nangandam alang sa nationwide fun run alang sa ika-150 nga kasumaran sa pagkatawo ni Rizal

CENTRAL VISAYAS, June 15 (PIA)---Ang preparsyon sa kinatibuk-ang fun run sa Department of Education krong Hunyo 19 alang sa selebrasyon sa ika-150 nga adlaw sa pagkatawo ni Dr. Jose Rizal andam na.

Imbes nga mobayad alang sa rehistrasyon, ang mga mosalmot sa fun run gi-awhag sa pagdala ug donasyon o mopirma ug pledge form nga magsuporta sa mga tunghaan sa kung unsa ang ilang matampo aron pauswagan ang standard sa edukasyon sa publikong tunghaan.

Ang mga mosalmot adunay kapilian nga usa, duha, tulo ka kilometro nga dagan o lakaw.

Ang DepEd, pinaagi sa  Adopt-a-School Program (ASP), magtukod ug usa ka booth alang sa modawat sa mga donasyon ug sa mga pledge form. Kini pagahimoon usab sa tanang  sa regional ug division offices sa tibuok nasud.

Ang donasyon mamahimo nga mga suplay pang-eskwela (lapis, ball pens, papel, notebooks, pangkolor, chalk o uban pa); mga mwebles alang sa lawak-tunghaan (lingkuranan, lamisa, kabinet, uban pa); mga ekipo (fax machine, computers, printers, electric fans, uban pa); mga lawak tunghaan o mga ekipo sa shop (alang sa Industrial Arts, Home Economics, Agri-Fishing, ug uban pa).

Ang mga panumpa mahimo nga boluntaryo nga pagahtaag ug serbisyo isip resource person sa usa ka subject; tutorial assistance; tabang sa mga magtutudlo sa paghimo ug visual aid; maintenance sa tunghaan ug pag-ayo niini.

Ang fun run pasiugdahan sa tanang DepEd Division Offices (DOs) sa tibuok nasud. (PIA 7/mbcn/Angie P. Amodia)

=========

Suroy-suroy sa Sugbo nagdala ug kaayohan sa kalungsoran

ASTURIAS, Cebu, June 15 (PIA) ---  Matud pa sa Asturias Mayor, Alan Adlawan daku kaayo ang natabang sa programang suroy-suroy sa Sugbo alang sa pag-usab ug pagpa-usbaw sa imahe sa Asturias ug sa ubang kalungsoran dinhi sa Sugbo.

Ang mayor miingon, ang Asturias adunay natural attraction sama sa Lake Buswang nga mamahimong usa ka tourist destination sa dihang gisugdan ang suroy-suroy sa Midwest Cebu kaniadtong 2006.

Sa miaging Hunyo 12, usa ka bus nga mga bisita/turista and miadto sa Asturias.   Kini giabi-abi dayon sa usa ka rondalla samtang ang mga bisita nagkaon sa ilang paniudto nga adunay tema nga barbecue lunch.

Si Adlawan miingon nga ang Asturias mihatag ug importansya sa eco-tourism nga mao’y ilang unahon pag develop alang sa mga turista.

Ang suroy-suroy niadtong Hunyo 12 nagsugod sa Balamban diin gitabo ang mga turista sa usa ka cultural presentation. 

Didto sa Balamban ang mga turista gidalitan sa ilang specialty nga Balamban Liempo (roasted pork belly). 

Pagkahuman, gidala sila nagadto sa Tsuneishi Heavy Equipment Industries nga usa na usab ka attraction sa Balamban.

Sa hapon ang suroy-suroy caravan mipadayon sa Asturias kung diin ang mga turista mihalad ug mga pungpong nga bulak didto sa monumento ni Jose Rizal nga anaa mahimutang sa plaza aron pagsaulong sa ika 180^th anibersaryo sa pagkatawo sa atong national hero.

Pagkahuman sa Asturias, ang suroy-suroy nipadayon ngadto sa Tuburan.  Ang mga bisita-turista gipa merienda ug pastillas ug banana chips nga mao usab ang specialty sa maong lungsod.

Ang ubang mga bisita miadto ug naligo sa fresh water spring sa Molobolo – kini usab ang nag unang attraction sa Tuburan.

Ang suroy-suroy Midwest caravan natapos sa usa ka paglantaw sa pagsalop sa adlaw nga ilang gisud-ong diha sa Maravilla beach sa lungsod sa Tabuelan. (PIA-7/mbcn/Leandria P. Pagunsan)

==========

DOST- 7 miawhag sa mga inbentor sa pagsalmot sa RICE

By: Juju S. Manubag

CEBU CITY, Hunyo 15(PIA) -- Ang Department of Science and Technology-7 (DOST-7) miawhag sa mga mga inbentor, creative researchers, makers ug designers sa mga pribado ug publiko nga sektor sa rehiyon sa pagsalmot sa ilang inbento sa Regional Invention Contest and Exhibition (RICE) nga himoon sa Ayala Activity Center, dakbayan sa Sugbo sa Agosto 17-19, 2011.

Mao kini ang gipahibalo sa DOST-7 Coordinator nga si Josie Elli sa usa ka pakighinabi sa Philippine Information Agency (PIA)- Cebu.

Ang invention contest magsilbi nga qualifying round para sa National Invention Contest sumala sa seksyon 4 sa Akta Republica Numero 7459 naila nga “Inventors and Invention Incentives Act of thePhilippines”.

Ang contest dunay 6 ka matang diin ang mosalmot magtakosay: Invention Category (Tuklas Award); Utility Model Category; Industrial Design Category; Creative Research Category (Likha Award}; Student Research Category (Sibol Award) alang sa hayskol ug Student Research Category (Sibol Award) alang sa kolehiyo. 

Matag regional qualifier sa kada kategorya makadawat ug ganti nga kwarta ug recognition certificate. Siya usab ang representante sa Tunga-tungang Kabisay-an didto sa National Invention Contest sa Hulyo 2012.

Ang mga entry forms anaa sa DOST-7 nga nahimutang sa Sudlon, Lahug, Cebu City ug mahimo usab nga i-download sa ilang website nga www.ro7.dost.gov.ph.

Ang deadline sa pagsumite sa mga entries kay sa Hulyo 29, 2011.

Alang sa dugang kasayuran sa lagda ug sukaranan sa contest, mahimong manawag sa mga numero sa telepono nga 414-7477/ 2559931/ 2549269 ug pangitaon si Jose Elli o Samuel Parcon. (PIA7 Cebu/JSM)