Influenza A (H1N1) virus gikonsidera isip seasonal flu nga lakip sa binepisyo sa PhilHealth

CEBU, June 14 (PIA)---Sugod sa Hulyo 11 niining tuiga, ang pagkaconfine sa ospital tungod sa  Influenza A (H1N1) virus bayran isip Case Type A base sa PhilHealth’s in-patient benefit schedule imbes nga benefit package.

Atol sa pagkatap sa  H1N1 virus niadtong 2009, ang PhilHealth nihatag ug benefit package nga gitagana alang sa mga nataptan niini aron pagpakunhod sa gasto sa maong pagpatambal.

Ang ospital nga benepisyo sa mga miyembro sa PhilHealth o kadtong mga qualified dependents gitakda sa P75,000 ug P150,000 alang sa mga kwalipikado nga health care workers kinsa nihatag sa ilang serbisyo sa  Department of Health (DOH)-retained hospital alang sa mga kaso sa H1N1 ug nakakuha sa maong sakit atol sa ilang paghimo sa ilang mga tahas o pag-atiman sa mga pasyente nga adunay H1N1 nga sertipikado sa DOH.

Hinuon, ang  World Health Organization bag-ohay lang nianunsyo nga ang H1N1 virus nibakhin na ngadto sa post-pandemic phase.
Kini nagpasabot nga ang maong virus nahimo na nga sama sa regular seasonal flu viruses.

Kini nagtukmod sa PhilHealth nga ikonsidera ang Influenza A (H1N1) nga mabayran isip Case Type A ubos sa fee-for-service kind nga sakop sa benepisyo.

Ang mga pasyente nga naconfine sa tertiary level hospital nga adunay balatian nga nga nasakop sa Case Type A adunay maximum nga P500 matag adlaw alang sa kwartp ug board charges ug maximum nga P4200 alang sa mga tambal alang sa tibuok panahon nga anaa siya sa hospital. 

It will also have a coverage of P3,200 for X-ray, laboratory and supplies; and coverage for the doctors’ professional fees. (PIA-7 with reports from PhilHealth PRO)

Aduna usab kini P3,200 alang sa X-ray, laboratory ug mg suplay; ug coverage alang sa  doctors’ professional fees. (PIA 7/mbcn/Angie P. Amodia)

===========

Japanese firm nananom ug mangroves sa Olango isip tubag sa DENR

CEBU CITY, June 14 (PIA)---Isip tubag sa awhag sa Department of Environment and Natural Resources (DENR) sa mga lain-laing organisasyon sa paghatag sa ilang tampo sa pagpreserba sa kalikopan, usa ka Japanese firm nga nag-oprerate sulod sa Mactan Export sa Lapu-Lapu ang nitanom ug sobra sa 100,000 nga liso sa mangrove didto sa isla sa Olango.

Ang pagpananom sa liso sa mangrove kabahin sa padayong pasalig sa Kanepackage Philippines, Inc. sa pagkonserba sa kalikopan sa walo ka ektarya sa sityo Asinan sa barangay Sabang.

Matud ni Rodney Maguyon, plant supervisor sa Kanepackage Philippines (Cebu Office), nga  representante gikan sa Kanepackage Thailand , Kanepackage Vietnam, Kanepackage China, Kanepackage Japan, ug Kanepackage Philippines ang nisalmot sa pagpananom.

Kanepackage Japan (KPJP), nga giamahanan ni Mr. Sakutaro Kanehira niadtong 1976, nipasalig nga motanom ug lima ka milyon nga liso sa mangrove sa maong isla.

Kini usa ka lakang sa kompaniya sa pakigbatok sa climate change. (PIA 7/mbcn/Angie P. Amodia)

============

Enero ngadto sa Mayo nga gasto sa mga ahensya niabot ug P402.8 billion

CENTRAL VISAYAS, June 14 (PIA)---Ang Department of Budget and Management kaganina nianunsyo nga ang gasto sa tanang departamento ug ahensya kutod niadtong Mayo 31 ni kantidad ngadto sa P402.8B, matud pa sa mga bank reports.

Ang maong kantidad—diin nagrepresenta sa negotiated ug encashed nga mga tseke atol sa maong panahon, diin wala naglakip sa interest payments, net lending ug ubang non-NCA disbursements—mobalor ug 32.6% sa P1.237-trillion nga Notices of Cash Allocation (NCA) disbursement nga programa alang sa tuig 2011.

Si Budget and Management Secretary Florencio B. Abad nagkanayon nga ang maong kantidad 8.7 porsyento lamang nga ubos itandi sa P441.3-billion negotiated checks atol sa samang panahon sa niaging tuig.

Ang mga nag-unang gastador sa maong mga panahon mao ang Departments of Education (DepEd), National Defense (DND), Interior and Local Government (DILG), Public Works and Highways (DPWH), Health (DoH), Agriculture (DA), Social Welfare and Development (DSWD), ug Transportation and Communications (DOTC).

Ang mga ahensya kinsa nilambo ang year-on-year disbursement performance atol sa maong panahon mao ang DSWD (74.7 percent), DoH (14.7 percent) and DND (9.9 percent) ug DepEd (0.9 percent). Si Abad nibutyag nga ang pagpatuman sa conditional cash transfer program sa DSWD paspas kaysa sa giplanohan.

Siya nidugang nga si Secretary Dinky Soliman nitaho kanila nga 1.47M nga mga panimalay nga benepisyaryo o 63 porsyento sa ilang target ang nagsugod na ug dawat sa ilang cash subsudies sa katapusan sa buwan sa Mayo.

Sa kinatibuk-ang P1.711-trillion disbursement program alang sa tuig 2011, P1.237 trillion nagrepresenta sa NCA disbursements samtang P474 billion ang non-NCA disbursements. (PIA 7/mbcn/Angie P. Amodia)

==========

SSS mipagawas ug bag-ong lagda sa pagbayad

sa kontributions ug loans para karong bulan

By: Juju S.Manubag

CEBU CITY, June 14 (PIA)--- Ang Social Security System (SSS) mipagawas ug bag-ong lagda kabahin sa tagal sa pagbayad sa tampo ug utang sa mga agalon, empleyado sa kaugalingon ug kinabubut-ong pagsakop sa SSS aron malikayan ang tag-as nga linya matag abot sa tagal sa pagbayad.

Mao kini ang gipahibalo sa hepe sa Operation Acctg Section (OAS) sa SSS-Cebu nga si Janice Caballes sa usa ka pakighinabi niini sa Philippine Information Agency (PIA) –Cebu.

Matod ni Caballes nga ang bag-ong inusab sa tagal sa pagbayad sa tampo ug utang ipatuman lamang ngadto sa mga ‘over-the-counter’ nga pagbayad sa branch tellers sa SSS, mga bangko, Bayad Centers ug SM Business Centers sa ikadapat nga bulan sa Hunyo 2011 sa kaso nga binulan nga pagbayad o sa ikadapat nga tagutlo nga bulan nga motapos sa Hunyo 30, 2011. 

Midugang ug ingon si Caballes nga ang bag-ong tagal sa pagbayad sa tampo ug utang maga-basi sa ikapulo nga numero sa trese ka numero sa agalon ug sa awahing numero sa napulo ka numero sa SSS sa household employers, self-employed workers ug sa voluntary members.

Segun sa SSS Circular numero 2001-003 nga kung ang ikapulo nga numero sa  regular employers o ang SS nga numero sahousehold employers, self-employed ug voluntary members kay "1" o "2," ang pagbayad sa amot o contributions ug utang mahulog sa ikapulo o sa dili pa sa ikapulo adlaw human sa ikadapat nga bulan o quarter.

Ang tagal ngadto na ika-kinse kaadlaw sa sunod nga bulan alang sa numerong "3" ug "4;" sa ika-baynte nga adlaw alang sa numerong "5" ug "6;" ika-25 ka adlaw sa numerong "7" ug "8;" ug sa awahing adlaw sa sunod nga bulan alang sa numerong "9" ug "0."

Ang tagal sa pagbayad alang sa mga overseas Filipino workers (OFWs)  ug pagbayad pinaagi sa Auto-Debit Arrangements (ADA) ug BancNet Online pinaagi sa bangko maoy wala maapekotohi sa bag-ong gipagawas nga lagda sa SSS, sumala ni Caballes.

Ang mga OFWs nga nagkinabubut-ong nagpasakop sa SSS mahimo ra mobayad sa ilang contributions sa Enero hangtod Septembre sa o sa dili pa ang Disyembre 31 sa samang tuig samtang ang para sa Oktubre hangtod Disyembre nga amot nila dawaton hantod sa Enero 31 sa sunod nga tuig, sumala pa. (PIA-Cebu/jsm)

=========

DOH nagselebrar sa World Blood Donor Day karong adlawa

 

CEBU CITY, June 14  (PIA) --- Subay sa selebrasyon sa World Blood Donor Day karong adlawa, Hunyo 14, ang Department of Health (DOH-7) nag-aghat sa publiko sa pagdonar ug dugo ug paglakip sa lain-laing mga kalihokan nga ipahigayon karong adlawa.

Atol sa AGIO Forum niadtong Hunyo 6, si Dr=. Sophia Mancao, ang nangulo sa National Voluntary Blood Services Program (NVBSP), namahayag nga adunay daghang kalihokan kalabot sa blood donation ang gipahigayon sa DOH dinhi sa Central uban sa  aktibong partisipasyon sa Philippine Red Cross ug Local Government Units sa rehiyon 7.

Gidugang ni Mancao nga aduna usab ipahigayon nga discussion kalabot sa kasamtangang paggamit sa mga gidonar nga mga dugo ug uban pang mga isyu kalabot niini nga ipahigayon ngadto sa Alona White Beach Resort sa Panglao Bohol.

Matud ni Mancao, ang pagselebrar sa World Blood Donor Day usa ka labing importanteng kalihokan sa nasud sama sa Pilipinas nga adunay dakong kakuwang sa suplay sa dugo.

Ang City Health Department (CHD) sa laing bahin miaghat sa publiko ilabi na kadtong mga himsog ug panglawas sa regular nga pagdonar ug dugo alang sa kaayohan sa kaugalingong panglawas lakip na ang panghinaot sa pagluwas sa kinabuhi sa uban.

Kining usa ka adlaw nga selebrasyon bout moila ug mopasalamat sa mga blood donors nga boluntaryong mihatag sa ilang dugo, pagtukod ug lapad nga kahibalo sa katawhan kalabot sa kaayohan sa pagdonar ug dugo  ug pag-aghat usab sa uban sa katawhan aron mamahimong regular nga blood donor.

Ang WBDD usa ka tinuig nga kalibutanhong selebrasyon nga nanghinaot sa pagpakita nga ang boluntaryong paghatag sa dugo usa ka basehan alang sa luwas nga suplay sa dugo nga mamahimong maghatag ug seguridad sa pasyente batok sa mga gikahadlokang impeksiyon sama sa HIV ug Hepatitis virus. (PIA-7/mbcn/Maryknoll B. Lague )

==========

Triennial Awards finalists ipaila-ila karong Miyerkules

CEBU CITY, June 14 (PIA) --- Ang Ramon Aboitiz Foundation, Inc. Triennial Awards alang sa kabisay-an ug Mindanao andam na sa paghatag sa mga awards ngadto sa nag-unang lima(5) ka mga finalists alang sa kategorya nga indibidwal ug institusyon karong Hunyo 15 sa ala una y medya sa hapon nga ipahigayon sa Eduardo Aboitiz Development Studies Center, Lopez Jaena St., sa siyudad sa Sugbu.

Gilunsad sa RAFI ang Triennial Awards alang sa Kabisay-an ug Mindanao niadtong tuig 1996 aron sa paghatag ug rekognasyon sa mga indibiwal ug institusyon nga mitugyan sa ilang serbisyo alang sa pagpromot ug tawhanon, patas ug luwas nga  katilingban.

Ang maong mga awards ihatag ngadto sa mga babaye ug lalake nga mipaambit sa ilang kakugi alang sa pagpa-usbaw sa panginabuhi sa mga yano nga katawhan ug nagpakita ug mga maayong pamatasan isip ehemplo sama kang Don Ramon Aboitiz ug Don Eduardo Aboitiz.

Ang RAFI Triennial Awards ipahigayon matag tulo ka tuig ug ihatag sa duha ka mga kategorya nga naglangkob sa Ramon Aboitiz Award for Exemplary Individual ug Eduardo Aboitiz Award for Outstanding Institution.

Human sa hataas nga proseso nga naglangkob sa nomination, screening, profiling, field validation ug assessment,ang multi sectoral search committee nga naglangkob sa mga lider gikan sa publiko ug pribadong sector nga gipangulahan sa University of the Philippines in the Visayas Tacloban College Dean Margarita dela Cruz nipili sa lima ka mga finalist alang sa duha ka mga kategorya.

Ang kalihokan karong Hunyo 15 ipahigayon aron sa pormal nga pagpaila sa mga finalist lakip na usab ang pagpaila sa ilang mga proyekto ug mga natabang sa katawhan ug sa iya-iyang mga komunidad.(PIA-7/mbcn/Maryknoll B. Lague)

=========

DA miduso sa mga lagutmon isip alternatibong kan-onon

SIQUIJOR, June 13 (PIA)--- "Panamum kamo sa mga lagutmon aron makaon kini nga pangpuli sa bugas," (Produce root crops and eat them as alternative to rice).

Kini matod sa Department of Agriculture – Agricultural Training Institute (DA-ATI) atol gipahigayong seminar alang sa mga mag-uuma ug mga agricultural extension workers didto sa Provincial Agriculturist Office (PAO) Conference Hall sa Larena, Siquijor

Ang seminar gisalmotan sa 30 ka mga mag-uuma ug agricultural extension workers nga gitawag ug “Appreciation Course on Alternative Staple Food Production.”

Ang mga pananom sama sa kamoteng kahoy, gabi, ubi, kamote, ug mga lumad nga mga pananom sama sa palaw, kolot, apale, saksak ang gipaila-ila ngadto sa mga sumasalmot ug gipromot isip maayo nga alternatibo nga mga kan-ono kon ang humay dili available.

Kini gawas sa saging ug mais nga pagkakan-onon sa pipila ka mga panimalay.

Ang mga espeker sa maong kalihokan mao silang Ma. Gracia Soliva-Pungay ug Dr. Roberto Castro sa ATI 7, Gay Therese Bucol ug Narciso Omandam sa PLGU ug Fedelita Dagumo ug Martina Inapan nga mga farmer-experts sa pagdumala ug mga pananom. 

Si Pungay, Project Officer of Rootcrops of DA-ATI 7, nagkanayon nga ang DA mimugna ug Philippine Food Staples Self-Sufficiency Roadmap (FSSR) nga nagtinguha sa pagkab-ot sa self-sufficiency sa humay sa nasud sa tuig 2013.

Kini tungod sa pagsaka sa demand sa humay dili lang sa Central Visayas apan lakip na sa tibook nasud, kini sigon niya.

Matod pa ni Pungay nga base sa FSSR, usa sa mga stratehiya aron makab-ot ang self- sufficiency mao ang pagmintinir ug per capita sa pagkonsumo sa humay nga mao ang 120 ka kilo sa kada tuig nga mamahimong makab-ot pinaagi sa pagpromot sa mga nagkalain-laing mga kan-onon aron mapasaka ang produksiyon dili humay nga mga kan-onon ngadto sa 3.5 ka porsyento kada tuig.

Dugang pa niya nga ang pagdasig sa produksiyon sa alternatibong kan-onon sama sa puti nga mais, kamote, kamoteng kahoy ug ubang mga lagutmon makapasaka sa suplay sa merkado nga moresulta sa pagpaubos sa mga presyo niini.

Sigon pa niya nga ang produksiyon sa mga lagutmon nagpabiling anaa sa ubos tungod pipila sa mga mag-uuma ug tigprodyus ug mga lagutmon kuwang sa mga abilidad ug alamag sa pag-prodyus sa kalidad ug luwas nga mga lagutmon gamit ang mga molungtod nga mga pamaagi. 

Ang DA-ATI miingon nga ang lagutmon sayon ra nga giprodyus sa bisan asa nga lugar bisan pa man walay igong patubigan.

Ang mga lagutmon usab sagana sa beta carotene, inolin, minerals ug mga micro-nutrients. (PIA-7/mbcn/Chrisley Ann C. Hinayas)

============

Bag-ong solar power plant itukod sa Pinas pinaagi sa PPP

CEBU CITY, June 13 (PIA)--- Ang First Philippine Electric Corporation (First Philec) motukod ug wafer slicing plant nga makahimo sa pagprodyus ug 400 megawatts nga solar wafers kada tuig, kini sa pakigtambayayong kauban ang Korean company nga Nexolon Corporation.

Ang First Philec usab nakig-alayon sa Congressional Commission on Science Technology and Engineering (COMSTE) sa pagpalambo sa renewable energy systems sama sa labing una nga solar testing facility sa nasud nga anaa mahimutang sa First Philippine Industrial Park sa Tanuan sa Batangas.

Si Senador Edgardo Angara, kinsa usab ang COMSTE chair miingon nga ang pakigtambayayong sa gobyerno ug sa industriya mamahimong malampuson sa samang pamaagi sa padayong investments pinaagi sa Public Private Partnerships (PPP's) nga makapasaka sa innovation ilabi na sa science and technology.

Sa usa ka news release miingon si Angara nga ang gobyerno miawhag sa mga lokal ug mga langyaw nga mga tiggama sa pagpuhunan sa industriya sa renewable energy pinaagi sa pagmugna ug mga polisiya, imprastraktura ug pagsuporta kabahin niini.

Gipunting usab ni Angara nga ang SunPower, usa sa mga labing dako nga solar manufacturers sa kalibotan, adunay duha ka mga solar wafer fabrication plants sa nasud bisan pa man 'bata' pa ang solar industry sa nasud.

Matod ni Angara nga ang solar cell manufacturing facility nga gitukod sa First Philec maoy nag-una sa pagpangusog sa industriya sa solar power aron makamugna ug dugang nga mga trabaho sa nasud.

 

Dugang pa ni Angara nga ang potensiyal sa industriya sa renewable energy momugna ug mga trabaho ug makapahalapad sa mga negosyo ug kini makatabang usab aron dili na magdepende ug makaminos sa gasto-an ang nasud sa pagpalit ug krudo gawas sa nasud. (PIA-7/mbcn/Chrisley Ann C. Hinayas)

===========

PhilHealth mo-cover sa Influenza A (H1N1) nga usa na lamang ka seasonal flu

CEBU CITY, June 13 (PIA)--- Sugod Hulyo 11 karong tuiga, ang mga na-ospital tungod sa Influenza A (H1N1) virus lakip na sa mabayran isip Case Type A, kini base sa in-patient benefit schedule sa PhilHealth imbes nga usa ka benefit package.

Atol sa pagkatap sa H1N1 virus  niadtong tuig 2009, ang PhilHealth migama ugbenefit package alang sa mga nataptan niini aron maminusan ang mga gastosan sa pangmedikal ug pagtambal niini.

Ang benepisyo sa pang-ospital alang sa mga membro sa PhilHealth ug mga kwalipikadong mga benepisyaryo gikatakdang makawadat ug P75 ka mil ug P150 mil alang sa mga kwalipikadong health care workers  nga mihatag sa ilang serbisyo saDepartment of Health (DOH)-retained hospital alang sa mga kaso sa H1N1 nga mga pasyente o kadtong nakakuha sa sakit samtang nagtuman sa ilang katungdanan o nag-amuma sa pasyente nga adunay H1N1 nga sertipikado sa DOH.

Bag-ohay lang, ang World Health Organization mianunsiyo nga ang H1N1 virus anaa na sa post-pandemic phase- kini nagpasabot nga ang virus anaa na sa susamang kahimtang sa regular nga mga seasonal flu viruses.

Kini ang nakapadasig sa PhilHealth sa pagkonsiderar sa Influenza A (H1N1) nga i-lakip sa Case Type A ubos sa free-for-service nga benepisyo.

Ang pasyente nga giadmitar sa tertiary level nga mga ospital ug adunay sakit ngagiila nga Case Type A makadawat ug maximum nga coverage nga P500 kada adlaw alang sa kwarto ug board charges; maximum nga P4,200 alang sa tambal sa  panahon nga kini naospital; P3,200 sa X-ray, laboratory, and supplies; ug lakip na usab ang bayad sa doktor. (PIA-7/mbcn/Chrisley Ann C. Hinayas)

=========

DOE molunsad karon sa National Renewable Energy Program

 

CEBU CITY, June 13 (PIA)--- Ang Department of Energy (DOE) andam na sa engrande nilang paglunsad karon sa labing una nga National Renewable Energy Program (NREP) buyon sa tinguha niini sa pagkab-ot ug self-sufficiency ug seguridad sa enerhiya.

Si President Benigno S. Aquino III gikatakdang modawat sa labing una nga gipublikar nga kopya sa National Renewable Energy Program.

Siya usab gihangyo sa paghatag ug mensahe atol sa kalihokan kon diin ipahigayon kini sa Shangri-La Hotel sa Makati.

Ang paglunsad sa programa subay sa Republic Act 9513 o the Renewable Energy(RE) Act, kon diin nagmando kini sa pagpalambo ug paggamit sa tinubdan sa renewable energy sa nasud.

Ang NREP subay sa energy reform agenda sa ahensiya nga nagtinguha sa paghatag ug sustainable energy plan, sa pagpahalapad sa potensiyal sa RE nga gibana-banang kapin sa 200,000 MW ug pagbaton ug mga opurtunidad sa enerhiya nga makakuha ug mga benepisyo sa taas nga panahon. 

Kini usab nagtukod ug framework alang sa mga giplanong mga polisiya alang sa pagdasig sa renewable energy gikan sa adlaw, tubig, dagat, hangin, biomass ug geothermal power.

Gidahuman usab nga ang RE moila isip lakip sa long-term nga stratehiya nga lakip alang sa paglambo sa nasud ug pagpakunhod sa kawad-on.

Gidahuman nga dul-an sa 400 ka mga RE advocates, lakip na ang membro sa Diplomatic Corps, magbabalaod, mga non-government organizations, mga tigpalambo sa RE, mga hingtungdan sa sektor sa enerhiya, mga lider sa mga komunidad ug mga membro sa research and scientific communities ang mosalmot sa paglunsad sa programa. (PIA-7/mbcn/Chrisley Ann C. Hinayas)

=========

Senado sutaon ang tinood nga hinungdan sa fishkill sa Taal Lake

CEBU CITY, June 13 (PIA)--- Si Senador Loren Legarda nangita ug imbestigasyon sa Senado kabahin sa tinuod nga hinungdan sa bag-ohay lang nga dakong fishkill sa Taal Lake.

Si Legarda misang-at sa Senate Resolution 498 nga nagmando sa Senate Committees on Agriculture and Food, Environment and Natural Resources, ug Climate Change sa pagpahigayon ug pakisusi sa maong isyu tungod sa 700 metric tons nga mga bangus ug tilapia nga nagkantidad ug dul-an sa Php57.226 ka milyon, ang nangamatay sa nagkalain-laing mga hawla sa isda nga nagpalibot sa Taal Lake sukad niadtong Mayo 26.

Explikar pa niya nga ang mga konsumidor ug mga mananagat apektado sa panghitabo.

Ang natahong fishkill miapektar sa 27 porsyento sa suplay sa isda sa Metro Manila ug siguradong moapektar usab sa kadaghanan sa mga mananagat nga anaa nagpuyo sa mga komunidad duol sa Taal Lake kinsa ang panginabuhian nagdepende sa pagpanagat.

Matod sa Department of Environment and Natural Resources (DENR) ug Bureau of Fisheries and Aquatic Resources (BFAR) nga ang hinungdan sa fishkill mao ang pagbalhin sa hinay hangtod sa kusog nga uwan nga nihimo sa ilawom nga bahin sa tubig sa Taal Lake nga mobugnaw ug mo-dense.

Human, niinit ang ilawom nga bahin  sa tubig nga maoy nipasaka sa mga hugaw niini ngadto sa taas nga bahin sa tubig nga miresulta sa pagkuha sa suplay sa 'oxygen' sa mga isda. 

Matod usab sa BFAR nga ang hinungdan sa bag-ohay lang nga fishkill sa Kakiputan Channel ug Anda, mga lungsod sa Pangasinan mao pag-usab-usab sa temperatura.

Sigon sa Senador nga ang kalit nga pag-ubos sa temperatura ug kusog nga mga uwan nga miresulta sa pag-usab sa panahon nga gidala sa climate change.

Dugang niya nga adunay mga taho ngdto sa BFAr nga ang run-off gikan sa Baleter River paingon ngadto sa Taal Lake adunay pag-usab sa kolor ug adunay mga hugaw sa hayop. 

  

Panapos pa ni Legarda nga kinahangalng sutaan ang mga nagkalain-laing mga hinungdan sa grabe nga fishkill aron maprotektahan ang ecosystem, ang panginabuhian sa mga komunidad nga anaa nagpalibot sa lanaw ug ang mga konsumidor usab. (PIA-7/mbcn/Chrisley Ann C. Hinayas)

=========

Tres mil ka mga Pinoys gipanglantawan’g nakakuha ug bag-ong trabaho human sa gilusad nga job fair niadtong Independence Day

CENTRAL VISAYAS, June 13 (PIA) --- Mga tres mil ka mga walay trabaho’ng Pinoys ang gipanglantawan’g nakakuha ug bag-ong mga trabaho nga resulta sa gilusad nga Jobs Fair sa Department of Labor and Employment (DOLE)  dungan sa pag-selebrar sa Independence Day niadtong Domingo didto sa Rizal Park sa Manila.          

Sa unas ka interbiyu sa radio ug TV, and assistant regional director sa DOLE-NCR, Benjo Binavidez  nagkanayon nga aduna silal’y na-monitor nga mga 5 ngadto sa 10 ka porsiyento sa mga aplikante sa trabaho niadtong Domingo nga nadawat diha-diha dayon o “hired-on- the spot” (HOTS).

Matad pa ni Binavidez nga ang Job Fair sa Luneta niadtong Domingo nga gi-timing sa selebrasyon sa Independence Day mao’y  partisipasyon sa DOLE sa kinatibuk-an’g actibidades sa  tibuok nasud.

Ang mga trabaho nga gipanghagad niadtong Job Fair nag-apil sa mga accountants, account executives, architects, bookkeepers, brand specialists, call center agents, cashiers, copy writers, cooks, drivers ug mga encoders.

Aduna usa’y gipanghagad nga mga electricians, engineers, foreman, forklift operators, HR managers, HR staff, interior designers, massage therapists, mekaniko,  mga medical reps, pharmacists, managers sa mga restaurants, surveyors ug mga systems administrators.

Uban usab ang mga bakanteng trabaho nga mga waiters, web developers, IT staff, training managers, mga researchers, secretaries, tellers, utility workers, welders ug daghan pa.

Si Benavidez miingon nga niadtong Mayo 1 nga Jobs Fair, aduna’y nadawat diha-diha dayon (hired-on-the spot) nga mga 7,169 nga aplikante sa sobra nga mga 70 mil ka mga nangita’g trabaho niadtong adlawa.

Sa layo pa ang Job fair, ang DOLE mi-agni sa publiko sa pagpa-rehistro online sa job portal nga Phil-JobNet aron mahatagan ang mga empleyado sa DOLE sa pag-ases sa mga aplikante. (PIA-7/mbcn/hfg) 

=========

Libreng cervical cancer screening sa VSMMC hangtod Hunyo 15 nalang By: Juju S. Manubag CEBU CITY, June 13 (PIA) --- An libreng cervical cancer screening sa Vicente Sotto Memorial Medical Center (VSMMC) nga nimarka sa pagsaulog sa bulan sa Mayo nga bulang alang sa Cervical Cancer Awareness nga nahuman na unta niadtong Mayo 31 pero gilugwayan ni karon nga hangtod Hunyo 15. Gipahibalo kini sa hepe sa Department of Health (DOH)-7’s Non-Communicable Disease Sectionnga si Dr. Juditha Tawatao sa Philippine Information Agency (PIA)-Cebu. Si Tawatao miingon nga nakadawat siya ug memorandum sa DOH Central Office kabahin sa lugway nga gihatag alang sa libreng screening alang sa cervical cancer nga kutob rong Miyerkoles. “Usa kini nga maayong balita alang niadtong mga babaye nga wala pa nakapahimulos sa librengcervical cancer screening sa niaging bulan,” matod ni Tawatao. Ang libreng cervical cancer screening ginapahigayon kada adlaw sa Cervical Cancer Prevention(CECAP) nga gambalay sa VSMMC matag alas 8 sa buntag hangtod sa alas 5 sa hapon gikan Lunes hangtod Biernes. Ang hepe sa departamento sa OB Gyne sa VSMMC nga si Dr. Belinda Pañares, misulti sa makadaghan nga ang sakit nga cervical cancer peligroso alang niadtong nag-edad ug traynta ngadto sa kwarentay singko nga mga babaye nga aktibo sa paghilawas, modugo human sa paghilawas, dugay mahuman ang pagregla, may kunggo sa kinatawo ug gawasan ug bahong hinugas sa isda ang bisong. Ang mga babaye nga nanganak sa edad ug trese hangtod disinuybe ka tuig, adunay lima o labaw pa nga kinadaghanon sa anak, adunay kandaiya lang nga hilwason o kaha ang kapikas may kandaiyang kahilwason, may kaagi sa sexually-transmitted disease (STD), manigarilyo, nagagamit ug pildoras para pugong nga mamabdos sulod sa 5 o kapin ka tuig, ug may HIV, si Pañares midugang ug ingon. Ang sakit nga cervical cancer maoy ikaduha nga sagad nga sa kit sa kababaen-an sunod sa cancer sa totoy. Adunay klase sa Human Papillomavirus (HPV) nga kung ipasulod pinaagi sa pakighilawas maoy hinungdan sa cervical cancer, matod pa. “Ang cervical cancer mamaayo pa ug mahiling ni sa sayo pa. Ang cervical cancer nga anaa pa sa sayo nga angang kay walay mabati o makita nga talimad-on nga anaa siya niining sakita. Anha na mahibaw-an ug naa ni sa ulahi nga angang nga ni Pañares pa makaguol kaayo tungod mao kiniy nahitabo sa iyang klinika. Kadaghanan sa moadto niya nga magpahiling kay otsento prosiyento kay anaa na ulahing angang sa sakit,” si Pañares mipasayod. Ni Pañares pa, ang pagpanambal sa sakit nga cervical cancer nga anaa sa ulahing angang mokantidad na sa dos siyentos mil ka pesos (P200,000) alang sa external chemotherapy ug sen mil pesos ((P100,000) para sa internal radiation. Si Pañares mihatag ug pahinungdanon sa sayo nga pagpahiling sama sa gitanyag sa VSMMC nga libreng cervical cancer screening tungod mao lamang kini ang sulbad nga malikayan ang pag-usbaw sa sakit. Ang sakit nga cervical cancer sa kalibutan-on nga tala, kada duha ka minuto adunay mamatay samtang diri sa atong nasod, kada adlaw dose ka babaye ang mangamatay tungod sa sakit. Sa pagpanapos, si Pañares nagpahinumodom alang niadtong magpa-cervical cancer screening nga kinahanglang walay regal ug sulod sa baynte kwatro oras pugngan ang pakighilawas. (PIA 7-Cebu/jsm)

==========

Amlan, Negros Oriental wins DOH Red Orchid Awards 2011

by Juju S. Manubag

CEBU CITY, June 13 (PIA) – Ang munisipalidad sa Amlan, Negros Oriental ubos sa liderato ni Mayor Bentham dela Cruz midaog sa Department of Health (DOH) Red Orchid Award 2011 alang sa malampuson nga pagpahigayon sa lokal nga ordinansa nila nga siyento porsiyento nga kalikupang luwas sa aso sa pagpanabako. 

Ang hepe sa DOH-7 Non-Communicable Disease Section nga si Dr. Juditha Tawatao ang mipahibalo sa bag-ong gipahigayong Kapihan sa PIA kabahin sa programa sa departamento nga  “Anti-Smoking”. 

Si Tawatao malipayon nga mipahibalo nga ang ganti nga gihatag sa DOH didto kang Amlan Mayor Bentham del Cruz gipahigayon sa usa ka halangdon nga seremonyas sa  Crown Plaza Hotel sa kaulohan niadtong Mayo 31 atol sa gideklarar sa World Health Organization (WHO) nga adlaw sa walay pagpanabako. 

Si Tawatao miingon nga ang Amlan midaog sa Red Orchid Award human mipuntos ug 100 porsiyento sa mga daghang sumbanan nga ginasikad sa DOH ug sa bayanan sa WHO. 

Sa laing bahin, si Tawatao misulti sa pakighinabi niini sa Philippine Information Agency (PIA)-Cebu nga ang Red Orchid Award ginahatag sa DOH ngadto sa mga ahensiya, tambalanan ug lokal nga pangagamhan basi sa kakusganon sa matukibon nga pagpanlimbasog nga ipatuman ang 100 porsiyento nga kalikupan nga luwas sa aso sa tabako nga misunod sa WHO MPOWER nga pasiugda. 

Si Tawatao midugang sa pagsulti nga ang MPOWER minubo nga kahulugan sa unom ka minatud-an nga palakat sa pagsumpo sa tabako sa WHO sa ato pa: M- Monitoron ang paggamit ug paagi sa pagsumpo sa tabako; P- Panalipdan ang katawhan sa aso sa tabako; O- Oper ug tabang nga mobiya sa pagtabako; W-Warninggan ang katawhan sa ngil-ad nga epekto sa pagtabako; E- Emposar ang pagdili sa pagmantala, pagpausbaw ug pangabaga sa tabako; ug R – Raise o ipasaka ang buwis sa tabako. 

Miingon usab si Tawatao nga ang mga mananaog gibahin pinaagi sa kolor diin ang midaog ug Red Orchid nakakuha sa kinatas-ang puntos ug gideklarar nga mananaog samtang ang ganti nga Pink Orchid ug White Orchid kay alang sa pirmero ug ikaduhang dapit. 

Sa miaging tuig, ang munisipalidad sa Amlan usa ka mananaog sa Pink Orchid. 

Isip mga gideklarar nga mananaog sa ganti nga Red Orchid, ang Amlan nakadawat ug tropeo, sertipiko ug usa ka gatos ka libo nga peos (P100,000) nga kantidad sa nicotine replacement therapy (NRT) patches/ medisinang tabang alang sa mga manigarilyo nga buot nang mohunong sa pagpanigarilyo nga gamiton diha sa ilang klinika nga para pagpundang ug tabako, si Tawatao misulti. 

Gipadayag usab ni Tawatao nga si Mayor dela Cruz mihangyo ug pagbulig gikan sa DOH-7 pinaagi sa pagpahigayon ug ‘planning workshop’ sa Hulyo rong tuig nga pagatambungan sa mga kadagkoan sa iyang pangagamhan aron masustinir nila ang programa hangtod sa hangtod.(PIA 7-Cebu/jsm)

===========

LTO-7 molugway sa pagpanghatag sa mga Pantawid Pasada card hangtud Biyernes
By Eli C. Dalumpines

CEBU CITY, June 13 (PIA) – Lugwayan sa Land Transportatio Office 7 ang pagpanghatag sa mga Pantawid Pasada card ngadto sa mga drayber sa mga public utility jeepney hangtud sa Biyernes. Adto na hinoon kini ipahigayon sa buhatan sa LTO sugod karong adlawa.

Si LTO 7 Director Raul Aguilos nagkanayun nga mga 1,500 pa lang ka mga card ang ilang napangapud-apod gikan niadtong milabay’ng Lunes. Gamay pa lang kini nga bahin sa kinatibuk-ang gidaghanon sa mga card nga gikatakdang ipanghatag dinhi sa rehiyon.

Dunay, matud pa, 214,596 ka mga jeepney sa tibook nasud ang gikatakdang panghatagan ug mga smart card nga dunay sulod nga P1,050 isip fuel assistance.Sa Rehiyon 7 dunay 11,978 ka mga jeepney ang mahatagan ug mga smart card, duolan sa 7,000 niini dinhi sa Dakbayan sa Sugbo.

Kung kahinumduman, gipagawas ni Pangulo Benigno S. Aquino III ang Executive Order No. 32 diin naghatag ug fuel assistance sa mga drayber sa mga PUJs sa nasud.

Matud ni Aguilos nakuha na sa mga dagkung mga PUJ operators sa Sugbo, sama sa CITRASCO ug VUDRASCO, ang ilang mga card. Kining maong mga pundok, matud pa, dunay hapit kapin sa 1,000 ka mga unit sa jeepney.

Dugang pa ni Aguilos nga pagkahuman sa Biyernes ila nang itunol ang mga card nga dili pa makuha ngadto sa mga LTO district office dinhi sa Metro Cebu diin adto kini makuha sa mga jeepney operator.

Magamit kini nga mga card pagpalit ug krudo sa mga gasolinahan nga dunay pahibawo nga modawat sila ug Pantawid Cards. (PIA-Cebu/ECD)

==========

Parada, sayaw mi-marka sa kasaulugan sa Adlaw sa Kagawasan
By Eli C. Dalumpines

CEBU CITY, June 13 (PIA) --- Mga parada ug sayaw ang gipahigayon sa Metro Cebu atol sa pagduyog niini sa tibook nasud sa ika-113 nga kasaulugan sa Adlaw sa Kagawasan kagahapon.

Sa Dakbayan sa Sugbo usa ka civic-military parade ang gipahigayon gikan sa Gorordo Avenue paingon sa Cebu City Sports Center tinambungan sa mga kawani sa City Hall ug sa mga pribado ug pampublikong mga high school sa syudad.

Ang mga partisipante nanagsul-ob ug pula nga T-shirts isip paghatag ug katahuran sa mga bayani nga nakig-away aron makab-ot ang nasudnong kagawasan.

Subay sa maong okasyon, mipasundayag ug usa ka kulturanhong sayaw ang Abellana Dance Troupe nga mi-interpretar sa awit nga gi-uluhan ug “Inang Bayan.”

Sulod sa Sports Center gipamuhi-an sa mga opisyal sa City Hall ang mga puting salampati nga mi-simbulo sa kalinaw ug kagawasan.

Si City Administrator Jose Marie Poblete maoy mihatag ug mensahe hulip kang Mayor Michael Rama nga didto sa Israel alang sa panagtigum sa mga mayor sa tibook kalibutan.

Sa iyang pangabling pamahayag, si Konsehal Margot Osmena nagpasalamat sa mga Pilipino nga nakig-away alang sa kagawasan.

Samtang ang Dakbayan sa Lapu-Lapu mipahigayon usab ug motor caravan gikan sa Mactan Benito Ebuen Airbase paingon sa City Hall.

Matud ni Mayor Paz Radaza, sa iyang pakigpulong, nga iyang tun-an pag-ayo ang manifesto nga gipadala sa komunidad sa Isla sa Olango nga nangayo ug kagawasan gikan sa syudad.

Kini, suma pa ni Radaza, tungod ka yang kasaysayan nagpamatuod nga ang kagawasan maoy yawi alang sa ekonomikanhong paglambo.

Sa laing bahin, ang Dakbayan sa Mandaue usab mihalad ug mga buwak didto sa Rizal ug Bonifacio Memorial stage ug dayon mibuhi ug 15 ka puting mga salampati.

Si Mayor Jonas Cortez, atol sa okasyon, nagkanayun nga mahinungdanon kaayo sa mga Sugbuhanon ang pagsaulog sa Adlaw sa Kagawasan aron makita pag-ayo ang bili sa pagka-gawasnon. (PIA-Cebu/ECD)