DOH 7 nag-inusarang ahensiya nga misalmot sa smoke-free search

CEBU CITY, June 02 (PIA)--- Ang Department of Health (DOH) ang nag-inusarang ahensiya sa gobyerno sa Central Visayas nga misalmot sa nationwide search sa mga smoke-free nga mga opisina ug mga edipisyo.

Si DOH 7 information officer Jesson Morata miingon nga ang Talisay District Hospital ug ang St. Anthony Mother and Child Hospital ang opisyal nga mga entrante sa rehiyon alang sa hospital category.

Matod niya nga walay mga nominasyon gikan sa mga siyudad ug mga munisipyo sa probinsiya sa Sugbo.

Ang lungsod sa Amlan ra sa Negros Oriental ang nominado alang sa Red Orchid award ug kini ang unang musipyo sa Central Visayas nga gideklarar nga smoke-free nga munisipyo, dugang pa ni Morata.

Ang DOH Red Orchid Awards nga lakip sa pagsaulog sa World No Tobacco Day karong adlawa, mopasidungog sa mga maayong mga praktis kabahin sa  pagpatuman sa World Health Organization Framework Convention on Tobacco Control Article 8 o ang pagproteher gikan sa exposure sa pagpanigarilyo.

Matod ni Morata nga ang maong award tipik sa adbokasiya sa departamento sa panglawas sa pagbaton ug himsog nga estilo sa panginabuhi nga lakip usab sa kampanya nila batok sa pagpanigarilyo.

Ang kalihokan nagtinguha sa pagtipig sa gibana-bana nga P149 ka bilyon nga mawagtang kada tuig tungod sa gasto sa health care.

Kini tungod sa nag-unang upat ka mga sakit nga mamahimong miresulta tungod sa pagpanigarilyo, nga mao ang: kanser,  sakit sa kasingkasing, stroke ug chronic obstructive pulmonary disease.

Ang kampanya nagtinguha usab sa pagproteher sa mga kabatan-onan gikan sa daotan nga mga epekto sa pagpanigarilyo ug exposure niini.

Kaniadto, ang maong indigay limitado lang sa mga DOH regional offices ug mga ospital apan karong tuiga, naglangkob na kini sa mga ospital nga gidumala sa lokal nga panggamhanan ug sa mga opisina sa gobyerno.

Ang mga mananaog makadawat ug tropeyo, sertipiko ug nicotine replacement therapy patches ug mga medisina nga nagkantidad ug P100 mil isip hinabang ngadto sa mga tigtabako aron sila moundang na.

Matod niya nga ang mga mohukom sa indigay motan-aw gayud sa palibot (sa sumasalmot) ug kinahanglan nga walay upos sa sigarilyo ang makit-an sa lugar.

Ang mga estandards naglakip sa pagpatuman sa  mga polisiya nga nagkontrolar sa tobacco, probisyon sa pagpakatap ug inpormasyon ug edukasyon aron moabisohan ang katawhan sa peligro sa pagpanigarilyo ug exposure sa second-hand smoke ug ang pagdeliber ug mga serbisyo aron makigbatok sa problema.

Matod ni Health Assistant Sec. Paulyn Jean Rosell-Ubial, kinsa ang chairperson sa DOH Red Orchid Awards, nga kini usa ka pagpamatuod nga adunay aksiyon nga gihimo ang katawhan aron malayo sa epekto sa pagpanigarilyo.

Dugang niya nga importante alang sa mga lider sa politiko, mga maestro ug mga ginikanan nga protektahan ang kabatan-onan gikan sa pagpanigarilyo. (PIA-7/mbcn/Chrisley Ann C. Hinayas)

=========

DTI mitakda ug multi-sectoral and achievement motivation training

SIQUIJOR, June 1 (PIA) --- Ang lokal nga opisina sa Department of Trade and Industry mipatakda na niining multi-sectoral and achievement motivation training sa Hunyo 6-10 sa probinsiya sa Siquijor. Ang training matud ni DTI Provincial Director Nimfa Virucio usa ka tinuigang buluhaton sa DTI-Center alang sa Industrial Competitiveness (CIC) nga ipahigayon sa mga napiling mga rehiyon diin dakong tumong niini ang pagpauswag sa kalidad ug pagpausbaw sa mga kalambuan nga mga programa sa publiko ug pribadong sektor nga mga organisasyon. Kini nga tumong gikinahanglan sa pagpatarung sa ekonomiya sa atuang kanasuran ug atong kapabilidad sa epektibong kumpetensiya sa kinatibuk-ang merkado. Kini nga training ipahigayun sulod sa duha ka adlaw diin tumong niini nga mapadayun ang  lebel sa pagpalambo sa organisasyon pinaagi sa pagkab-ot sa mga maayong motibo ug entrepreneurial values sa atuang SMEs sa pagpataas sa ilang kapabilidad pinaagi sa kalidad ug produktibong programa nga anaay values enhancement. Ang puntirya nga mga partisipante mao ang SMEs, ilabi na ang mga benepisyaryo sa OTOP kini sigon sa DTI. (PIA-7/mbcn/Ailene G. Limutan)

==========

CCPO maglunsad ug usa ka feeding program alang sa mga bata sa kadalanan sa siyudad sa Talisay

CEBU CITY, June 1 (PIA) --- Ang Cebu City Police Office planong maglunsad ug usa ka feeding program alang sa gatusan ka mga street children pinaagi sa ilang programa nga gitawag ug “Piso sa Pulis alang sa Batang Libod Suroy” sa dili pa mahuman ang bulan sa Hunyo.

Matud sa CCPO Director Melvin Ramon Buenafe, ang ilang buhatan planong mopahigayon ug mga programa nga makatabang sa mga kabatan-onan nga kasagarang maoy suspek sa snatching ug pagpanguot apan dili mamahimong pahamtangan ug silot.

“We cannot arrest the children, but we can do something.

 Kuwang sa pagtagad lang ni sila. So, maayo pa atong ayuhon og pagtrato aron moundang sa ilang dautang binuhatan.” Matud ni Buenafe atol sa iyang pamahayag.

Gihimong ehemplo ni Buenafe ang sitwasyon karon ni Joavan Fernandez ang inilang badlongon nga anak sa Mayor sa Talisay Socrates Ferandez.

“In need ra siya sa maayong approach. Usahay gud ang tawo tagdon nimo in a right manner and project him in a right way.”

Sigun sa director nga mikuyog ni Joavan atol sa gipahigayon niini nga feeding program.

Subay niining maong proyekto, si Buenafe nibutyag nga matag miyembro sa CCPO giawhag sa paghatag ug P1.

Ug sa panahon nga mokabat ang kontribyusyon sa P500, sila magpahigayon dayon ug usa ka feeding program sa 100 ka mga kabatan-onan.

“Sa pagkakaron, more than 800 (kapolisan) mi sa CCPO. Naa tay P100 magasto lang nato usahay sa mga dili kayo kinahanglanon nga butang sama sa sigarilyo, bino o cosmetics. Apan dili pugson ang pulis na mo-donate,” dugang ni Buenafe.

Gibutyag usab ni Buenafe nga uban sa mga negosyante, pribadong personalidad ug bisan mga langyaw nga maoy kasagarang biktima sa pagpanguot ug pagpangawat sa mga bata mihatag na sa ilang donasyon alang sa proyekto, isip kabahin sa mga programa sa kapolisan.

Gisaysay usab ni Buenafe nga kining maong programa dili lamang makabenipisyo sa mga kabatan-onan kundili lakip na ang publiko ug kapolisan.(PIA-7/mbcn/Maryknoll B. Lague)

==========

300 ka mga kabatan-onan miapil sa usa ka kalihokan alang sa pagpromot sa kultura ug kasaysayan sa nasud

CEBU CITY, June 1 (PIA) --- Mokabat sa 300 ka mga kabatan-onan gikan sa Oriental Negros Children’s Advocacy Network (ONCAN) ang miapil sa programa nga gitawag ug “Magdula Ta” ug  niapil sa mga tradisyonal nga mga dula isip lakip sa selebrasyon sa National Heritage Month.

Ang ONCAN mao ang nagpasiugda sa lain-laing mga tradisyonal nga mga dula  alang sa mga bata uban sa panghinaot nga kini maghatag ug inspirayon sa mga kabatan-onan ug pagpromot sa sportsmanship sa matag bata nga Pilipino.

Kapin sa napulo ka mga purong pinoy nga mga dula ang nalangkob sa programa nga naglakip sa kayukok, patintero, siatong, bulan-bulan, sepak takraw, bao-bao, bato-lata, luksong tinik, takarang, sud-sud, takyan, taksi ug uban pa.

Base sa pamahayag sa president sa ONCAN Baby Jambora sa wala pa magsugod ang programa, lain-laing mga ahensya sa gobyeno lakip na ang mga non-government organization (NGO) ang miapil sa fun run nga ilang gipasiugdahan ug gani gipangunahan ni Gobernador Roel Degamo ang pagdagan tuyok sa dagkong kadalanan sa siyudad sa Dumaguete.

Uban sa tabang sa mga member networks, gibutyag usab ni Jambora nga aduna usab gihigayon nga collaborative painting competition alang sa mga youth participants nga gipahigayon didito sa buhatas sa Roninson’s Place.

Ang Philippine Army ug ubang mga NGO maoy gitahasang modala sa mga easles, plywood ug bagul aron maggamit sa mga pobreng kabatan-onan nganiapil sa maong painting competition.

Ang miyembro National Commission for Culture and the Arts (NCCA) Kitty Taniuguchi gikan sa Maria Gallery nakigtambayayong usab sa proyekto ug milingkod isip usa sa mga hurado sa maong kompetisyon.

Sa laing bahin, ang Information Officer sa Philippine National Police PO3 Edilberto Euraoba atol sa iyang pamahayag, mihatag og importansya sa programa isip kabahin sa pagpaningkamot sa pagpabilin sa kultura nga Pilipinhon ug isip paghandom sa mga kultura sa atong mga katigulangan.

Gi-aghat usab ni Euraoba ang mga kabatan-onan sa pag-apil sa lain pang mga mosunod nga mga kalihokan nga mamahimong modebelop sa ilang sense of responsibility ngadto sa nasud.

Ang ONCAN usa ka organisasyon ubos sa usa ka NGO nga naglihok alang ug ngadto sa mga kabatan-onan sa probinsya aron pagtabang sa ilang mga panginahanglan ilabi nga kadtong mga namuyo sa kadalanan, walay inahan ug amahan, piniriso ug kadtong adunay mga kakuwang sa panglawas nga naggikan sa mga kabus nga pamilya.(PIA-7/mbcn/Maryknoll B. Lague)

=========

Siyudad sa Dumaguete mohimo ug Tree Park duol sa Water Septage tank

DUMAGUETE CITY, June 1 (PIA) --- Ang pangagamahan sa siyudad sa Dumaguete mobuhat ug Tree Park sa dili madugay sulod sa pasilidad sa septage sa Barangay Camanjac. Ang tagdumala sa siyudad nga si William Ablong miingon nga ang siyudad, sa katuyoan niini, magpadayon sa aktibidad niining pagpananom sa kahoy sulod sa pasilidad sa septage uban ang Friends of Environment sa Negros Oriental ug konseho sa Brgy. Camanjac nga gipangunahan sa barangay chairman nga si Bartolome Aranas. Ang Couples for Christ usab motanom ug mga kahoy sa Hunyo 12 dugang usab ni Adlong nga dili momenus sa 50 ka mga paresan ang mobuhat niini. Sigon usab ni Ablong nga ang City Environmental Natural Resources Office mangandam ug seedlings alang niining pagpananom ug kahoy. Sa laing bahin, ang city Environmental Natural Resources Office (ENRO) milinya usab ug mga aktibidades isip pakighiusa niining Environment Month nga selebrasyon karong Hunyo.  Si Arman Adanza sa ENRO miingon nga inig Hunyo 4, ang City Tourism Council modumala ug aktibidad nga  pananom ug kahoy sulod sa pasilidad sa septage. Sa Hunyo 17 hangtud 30 usa ka environmental exhibit ang mahitabo sulod sa Robinsons mall kauban ang mga nagkalain-laing lokal nga pangagamhanan sa Negros Oriental. Sa Hunyo 24, ang siyudad modumala ug pagpanglimpyo sa mga katubigan ug mga lugar nga duol sa baybayon. Karong adlawa sugdan ang environment month pinaagi sa “walk-clean-and-bike for the environment” nga aktibidad. Ang Environment and Natural Resources Division sa pangagamhanan sa probinsiya uban sa Metro Dumaguete Road Runners Club ug mga grupo sa mamisikleta muila sa mga lugar sa Metro Dumaguete nga kinahanglang limpyuhan. (PIA-7/mbcn/Ailene G. Limutan)

========= 

CA nikompirma sa gitudlo nga hepe sa DFA ug DAR

MANILA, June 1 (PIA)---Ang Commission on Appointments (CA) niaprobar kagahapon sa appointments ni Albert del Rosario isip secretary sa Department of Foreign Affairs (DFA), ug si Virgilio delos Reyes isip secretary sa Department of Agrarian Reform (DAR).

Ang CA niaprobar usab sa appointment sa 21 ka ambassadors ug 39 ka opisyales sa DFA.

Ang aprobal nahitabo human ang foreign affairs ug agrarian reform committees  nirekomenda kanila ug kompirmasyon sayo kagahapon.

Usa ka pagsupak ang gisang-at batok ni del Rosario apan dali kini nga gibasura tungod sa kakuwang sa ebidensya nga maglambagit kaniya sa kaso sa syndicated estafa niadtong siya pa ang direktor sa banko.

Laing CA panel ang mohisgot sa nominasyon sa Commission on Election (Comelec) chairman Sixto Brillantes karong adlawa.

Ang CA naglangkob sa Senate president isip hepe ug 12 ka senador ug 12 ka kongresista isip miyembro.

Ang  tahas sa CA mao ang pagkompirma sa mga gitudlo sa presidente sa Pilipinas: ang pangulo sa executive departments, ambassadors, ubang public minister and consuls, o mga opisyales sa Armed Forces gikan sa ranggo sa colonel o naval captain, walay labot sa Ombudsman ug Supreme Court Justices. (PIA 7mbcn/Angie P. Amodia)

=========

60 porsyento sa mga lokal nga panggamhanan sa CV, mobuhat pa sa ilang mga websites- DILG

TAGBILARAN CITY, Bohol June 1, 2011 (PIA) –-- Dul-an sa 60 porsyento sa mga lokal nga pangagamhanan sa Central Visayas ang mobuhat pa sa ilang tagsa-tagsa ka mga websites aron ibutang ang ilang pinansiyal nga mga transaksyon, kini subay sa pagpangusog sa administrasyon ni Aquino sa pagbaton ug walay gitagoan nga panggobyerno. Kini gibutyag ni Department of Interior & Local Government (DILG) Regional Director Pedro Noval Jr. atol sa usa ka pakighinabi sa radyo. Ang mga lokal nga panggamhanan gitagaan na ug igong panahon aron pagmugna sa ilang websites buyon sa DILG Memorandum Circular 2010-83 nga nagmando kanila sa pagpakita sa ilang pinansiyal nga mga transaksiyon nga naglakip sa mga proseso sa bidding aron makahibalo ang publiko. Matod ni Noval nga ang maong polisiya anaa sa probisyon sa 2011 general appropriations act nga kon ang mga lokal nga panggamhanan dili makatuman niini sila mag-atubang ug mga sangpotanan. Sigon niya nga nakasabot siya nga ang ubang mga lokal nga panggamhanan naglisod sa pagbuhat niini sanglit pipila sa mga lungsod walay serbisyo sa internet ug mokabat ug pila ka oras ang pag-upload sa mga files. Ang DILG regional office midayeg sa pagkugi sa lokal nga panggamhanan sa Maribojoc ug Balilihan kinsa maoy nag-unang mga lungsod sa probinsiya sa pagbuhat sa DILG memorandum circular. Dugang pa ni Noval nga ang probinsiyal nga panggamhanan mitukod usab ug website aron ibutang ang pinansiyal nga mga transakyon nila. Ang mga lokal nga panggamhanan nga dili ka makabuhat sa website, temporaryo   usa mobutang sa ilang pinansiyal nga transaksiyon sa tulo ka mga lugar sa ilang lungsod nga daling makit-an sa publiko. (PIA-7/mbcn/Chrisley Ann C. Hinayas)

==========

Forfeiture proceedings gitakda alang sa mga nasakmit nga corals sa Sugbo

CEBU CITY, June 1 (PIA)---Ang Bureau of Customs gikatakda nga mosugod sa Hunyo 8 sa forfeiture proceedings alang sa P15M nga smuggled black corals nga nasakmit dinhi sa Sugbo.

Si Cebu customs district collector Ronnie Silvestre niisyu na ug warrant of seizure and detention niadtong Mayo 24 batok sa 1X20-footer container van nga gihatud sa Cebu Junkshop.

Si Silvestre nitakda na ug pagdungog sa forfeiture proceedings samtang usa ka imbestigasyon ang gipahigayon aron pag-ila sa mga tao nga nagpaluyo sa pagpalusot sa mga black corals ug ubang protected marine species.

Siya nagkanayon nga sa higayon nga ang mga aytem mapildi pabor sa kagamhanan, kini iturn-over sa Bureau of Fisheries and Aquatic Resources alang sa proper disposal.

Usa ka senate investigation ang ipahigayon karon aron pagsuta sa mga tao nga nagpaluyo sa ilegal nga baligya ug corals sa nasud. Ang maong imbestigasyon gipasikaran tungod sa pagkasakmit sa mobalor P35M nga smuggled black corals sa Manila ug sa Sugbo.

The shipments were all named under Exequiel Navarro, who was apprehended in Manila. Deputy Commissioner Horacio Suansing of the Customs Enforcement Group said Navarro already identified a Chinese-Filipino businesswoman as financier and two other accomplices.

Si Suansing, kinsa niinspeksyon sa nasakmit nga corals dinhi Sugbo kagahapon, nibalibad sa paghatag sa mga ngalan sa mga gidudahang financier ug accomplices samtang naghuwat sa resulta sa ilang imbestigasyon ug ang pagpasaka sa pormal nga reklamo.

Si Enforcement and Security Service director Nestorio Gualberto kinsa anaa atol sa inspeksyon nagkanayon nga pipila ka mga lokal nga opisyales sa Zamboanga ang gituhoan nga anaa atol sa Senate investigation aron pagtin-aw sa padayong coral poaching sa ilang mga lugar.

Ang mga opisyales sa Custom nagtoo nga ang shipment nga nasakmit sa Sugbo ug Manila naggikan sa Zamboanga.

Sila nagtoo nga ang gidudahang nagdala usa lamang ka sinugo sa Mindanao-based syndicate nga responsable sa smuggling sa black corals ug ubang endangered marine life. (PIA 7/mbcn/Angie P. Amodia)

=========

Palasyo misaad ug usa ka milyon nga trabaho kada tuig

CEBU CITY, June 1 (PIA)--- Ang Malacanang mikomitir sa pagmugna ug “di mominos ug usa ka milyon nga mga trabaho kada tuig” aron pag-hangup sa mga gradwado sa kolehiyo o ang mga bag-ong entrante sa panarbaho. 

Atol sa usa ka media briefing, si Presidential Communications Operations Office (PCOO) Secretary Herminio Coloma miingon nga kining pagkomit sa administratsyon usa sa mga nag-unang prayoridad sa pangagamhanan ni Aquino.

Sigon niya nga kini tipik sa pasalig ni Presidente Benigno S. Aquino III ngadto sa katawhang Pilipino sa paghatag ug kalamboan.

Kini usab ang prayoridad sa development blueprint sa nasud o sa Philippine Development Plan (PDP) alang sa tuig 2011-2016 nga gipreparar sa National Economic Development Authority (NEDA).

Giawhag ni Coloma ang mga entrante sa kolehiyo ug ilang mga ginikanan sa pagkonsiderar sa mga kurso nga adunay labing taas nga demand sa merkado.

Sa samang panagtigom, si Commission on Higher Education (CHED) Chair Patricia B. Licuanan miingon nga mga kurso alang sa taas nga edukasyon kinahanglan “industry engaging".

Ang nasud temporaryong wala mitanyag sa mga kurso sama sa nursing, information technology (IT), education, hotel and restaurant management (HRM), ug business administration.

Kini tungod matod niya, dili na kinahanglan ipromot sa mga institusyon kon di “kinahanglan mas ipalambo pa kini”.

Giklaro niya nga mas maayo mokuha ang mga entrante ug mga kurso nga makatubag usab sa mga gikinahanglan sa nasud.

Matod niya nga adunay gamay nga populasyon lang sa mga migradwar sa kursong agrikultura nga importante sa pagpalambo sa seguriad sa pagkaon sa nasud. 

Si Coloma ug Licuanan nahinabi kagahapon atol sa Communication and NewsExchange Forum/Talking Point nga gi-sponsor sa Philippine Information Agency sa pakig-alayon sa PCOO. (PIA-7/mbcn/Chrisley Ann C. Hinayas)

=========

350 mil ka mga OFWs ang mawad-an ug trabaho sa higayon nga mapatuman ang palisiya sa Saudi Arabia

CENTRAL VISAYAS, June 1 (PIA)---Mokabat ug 350,000 ka overseas Filipino workers (OFWs) ang mapahawa sa higayon nga pahingusgan sa kagamhanan sa Saudi Arabia ang ilang bag-ong palisiya kalabot sa migrant workers, usa ka Filipino migrant rights watchdog nagkanayon kagahapon.

Apan ang Philippine Overseas Employment Administration (POEA) wala nabalaka sa palisiya sa Saudi ug nagkanayon nga adunay 180,000 nga trabaho ang anaa sa Australia ug laing 11,000 sa South Korea.

Ubos sa 2006 nga palisiya sa Saudi, ang mga kompaniya sa Saudi Arabia gimandoan nga mogahin ug di momenus 10 porsyento sa ilang mga trabahante sa mga Saudi Nationals, apan ang programa wala nagmalampuson sa pagpatuman sukad sa pag-aprobar.

Tungod sa maong palisiya, ang kagamhanan sa Saudi dili na mo-renew sa work permits sa mga langyaw nga trabahante kinsa nakapuyo na ug unom ka tuig sa maong nasud.

Adunay gibana-bana nga 10M nga mga langyaw nga trabahante sa Saudi Arabia nga nagtrabaho sa lain-laing mga patigayon sama sa construction, telecommunications, health ug services sectors, domestic workers ug uban.

Kadaghanan sa mga migrant workers naggikan sa India, Pakistan, Bangladesh, Phiilippines ug ubang mga nasud.

Si John Leonard Monterona, Migrante-Middle East regional coordinator, nagkanayon nga kung mapatuman, kini makaapekto ug liboan ka mga OFWs kinsa nagpuyo sa Saudi ug sobra unom ka tuig, diin siya nipunting nga 60 porsyento sa 1.2M OFWs sa Saudi ang rehires.

Sa 60 porsyento nga rehires, 40 porsyento ang nagtrabaho na ug sobra unom ka tuig sa ingon 350,000 OFWs ang maapektohan sa six-year work permit cap kung mapatuman sa kagamhanan sa Saudi.

Apan si POEA Administrator Carlos Cao Jr. nagkanayon nga ang kagamhanan andam na kung ang maong programa pinal na nga mapatuman.

Siya nibutyag nga wala sila naalarma sa anunsyo sanglit ang kagamhanan sa Saudi Arabia sa sayo pa nipahibaw na sa ilang tumong. Iyang gidugang nga ang kagamhanan nag-adbokasiya na ug massive reintegration program alang sa mga OFWs.

Iyang gibutyag nga gawas sa skills training ug livelihood assistance, ang POEA usab mokonsidera sa ubang labor markets sama sa South Korea ug Australia isip alternatibo alang sa mga apektadong OFWs. (PIA 7/mbcn/Angie P. Amodia)

==========

Stocks sa GSIS mamahimong mosaka ngadto sa 15% sa investments

CENTRAL VISAYAS, June 1 (PIA)---Ang Government Service Insurance System (GSIS), kinsa nagpabalik ug mokabat sa US$700M nga pundo nga ilang gi-invest abroad niadtong 2008, nagkanayon nga kini makatabang sa pagsaka sa stock holdings ngadto sa 10 hangtod 15 porsyento sa ilang P580B portfolio.

Si Benedicto Arcinas, executive vice president for finance nagkanayon nga ang pension fund magtutok sa power, utility ug ubang kompaniya nga mamahimong makakuha ug pagsaka gikan sa Public-Private Partnership (PPP) infrastructure program sa kagamhanan.

Si Arcenas nagkanayon nga nagsugod na sila sa niaging duha ka buwan pinaagi sa pagpadali sa ilang investment sa stock market.

Samtang ang GSIS ni-bubo ug pundo abroad aron sa pagtabang sa pagpalapad sa ilang hinitaan, ang ilang performance naapektohan pipila ka buwan human sa pagkaging sa

global financial markets. 

Si Arcenas nibutyag nga ang GSIS mopadayon ug fixed-income investments sa 35 porysento tungod sa low interest rates. (PIA 7/mbcn/Angie P. Amodia)

=========

Pangagamhanan sa siyudad sa Mandaue mihatag na ug mga balay ngadto sa mga squatters

CEBU CITY, June 1 (PIA) --- Dose (12) ka mga balay ang nahatag na ngadto sa mga kaniadtong urban poor settlers sa siyudad sa Mandaue. Kini nga mga balay nagbarug sa susamang lugar diin miyembro usab sila sa Malibu-Matimco Village Homeowners Association, Inc. (MMVHAI) diin nagpuyo sa kapin na sa usa ka dekada ang milabay. Ang mayor sa siyudad sa Mandaue nga si Jonas Cortes ug Philippine action for Community-led Shleter Initiative, Inc. (PACSI) executive director Fr. Roberto Carcellar mihatag na sa mga balay ngadto sa unang bahin sa mga benepisyaryo niadtong Domingo. Usa kini sa mga daghang susama nga mga proyekto niining 9.2 ka ektarya nga gipanag-iya sa siyudad nga anaa sa sentro sa komersyal nga distrito. Kining lugara taas ug commercial value diin ang miaging administrasyon planong ibaligya ngadto sa mga negosyante ug ibalhin ang mga squatters nga nagpuyo niining yutaa sa laing lugar. Apan gibarugan ni Mayor Cortes ang pagpanghatag niini nga mga lote alang sa on-site housing ug tabang gikan sa PACSI, ang maong proyekto napatuman na gayud, ikaduha sulod sa 9.2 ka ektarya nga yuta. (PIA-7mbcn/Ailene G. Limutan)

=========

Dos mil kapin ka mga bag-ong lawak tunghaan andam na sa pag-abli sa klase- DPWH

CEBU CITY, June 1 (PIA)--- Usa ka semana sa dili pa ablihan ang klase, ang Department of Public Works and Highways (DPWH) mikompleto sa konstraksyon sa 2,488 ka mga bag-ong mga lawak tunghaan sa tibuok nasud.

Matod ni DPWH Secretary Rogelio L. Singson nga usa kini ka pakigtambayayong nga proyekto kauban ang Department of Education ubos sa School Building Program niini.

Miingon si Singson nga gawas sa school building program, ang buhatan usab mikompleto sa road maintenance work isip preparasyon alang sa pormal nga pag-abli sa klase karong Hunyo 6.

Siya nagkanayon nga kini buyon sa Oplan Balik Eskwela Program sa gobyerno aron pagsiguro sa kaluwasan sa mga maglalakaway ug mga motorista.

Sila mikompleto sa pagpang-ayo sa mga libaong nga mga kadalanan , pagpamintal sa mga kadalanan nga anaa duol sa mga tunghaan.

Ang DPWH chief midugang nga ang ilang mga regional ug district offices nagpahigayon usab ug line canal declogging ug mga pagpang-limpiyo aron paglikay sa panghitabo sama sa baha ug ang pagtangtang usab sa dili luwas nga mga signages ug billboards nga anaa mahimutang sulod ug duol sa mga tunghaan.

Samtang ang DPWh usab mikompleto sa konstraksiyon sa 76 ka mga pansayan sa mga tunghaan sa tibuok nasud.

Ang mga pansayan gikonstrak aron pagpromot sa luwas nga panglawas sa publiko ug sa mga tinon-an.

Sa laing bahin, ang DPWH district engineering offices, nagsusi na sa mga tunghaan nga hangtod karon wala maabti sa maong mga serbisyo.

Matod sa DPWH nga ang mga tunghaan nga masuta butangan ug rainwater collection facility aron paghatag kanila ug tinubdan nga mainom nga tubig.

Bag-ohay lang, ang DPWH migahin ug P38M alang sa konstraksiyon sa dugang nga mga rainwater collection facilities ilabi na sa mga anaa magpuyo sa lagyong mga kabaranggayan sa nasud nga adunay problema sa tinubdan sa tubig. (PIA-7/mbcn/Chrisley Ann C. Hinayas)

=========

DILG migahin na ug pundo alang sa pagpangandam sa umaabot nga mga kalamidad

CEBU CITY, June 1 (PIA) --- Ang pangagamhanan sa Pilipinas migahin na ug P40M nga pundo alang sa pagtabang niining mga lungsod ug mga siyudad nga modumala sa mga epekto niining mga kalamidad tungod sa climate change, kini sigon sa Department of Interior and Local Government kagahapon.

Ang pundo gamiton alang sa pagtudlo sa mga lokal nga mga opisyales aron pagpangandam batok sa mga kalamidad, ug pagtabang aron makabuhat ug “disaster resiliency” sa lokal nga pangagamhanan sa pagsagubang niining mga natural nga mga kalamidad kini matud pa ni Interior Secretary Jesse M. Robredo sa usa ka saysay.

Gitawag kini ug “Enhancing LGU Capacity on Climate Change Adaptation and Disaster Risk Management,” diin kini nga proyekto nakitang makabenepisyo sa mga 360 ka mga siyudad ug lungsod, sigon usab ni Robredo.

Ang pundo gipagawas sa Department of Budget and Management ngadto sa DILG isip pagtuman sa Republic Act (RA) 9729.

Kini nagmando sa pagpausbaw sa programa sa pagtudlo ngadto sa mga LGUs kalabot niining climate change, ug RA 6716 diin magtabang sa pag-ayo niining mga atabay, mokulekta sa mga uwan, pagpa-ayo sa mga springs ug sa mga atabay sa tanang barangays. (PIA-7/mbcn/Ailene G. Limutan)

==========

Liga ng mga Barangay sa Sugbu nakadawat ug tabang pinansyal gikan sa Capitol

CEBU CITY, June 1 (PIA) --- Mokabat sa 51 ka mga chapters nga miyembro sa ‘Liga ng mga Barangay’ sa probinsya sa Sugbu ang nakadawat kagahapon sa ilang bahin gikan sa dos milyones nga kantidad nga gihatag ni Gobernador Gwendolyn Garcia ngadto sa Federation of Association of Barangay Councils.

Si Garcia uban sa presidente sa FABC ug Board Member Jose Ribomapil Holganza, mao ang nangulo sa pagpanghatag sa mga tseke ngadto sa mga presidente sa Liga nga gipahigayon ngadto sa buhatan sa gobernador.

Matag presidente sa Liga nakadawat ug P39,000 kapin nga kantidad human gibahin ang dos milyones sa 51 ka nga chapters kung diin nalakip ang Mandaue City ABC.

Ang kinatibuk-ang kantidad giktakdang gamiton alang sa nagkadaiyang proyekto nga ipatuman sa matag chapter.

Gipahalipayan usab ni Garcia si Holganza sa dali nga pagpatuman sa iyang hangyo sa paghatag niining maong mga kantidad balik sa mga katawhan sa probinsya.

Ang mga PhilHealth Cards nga gitagana usab ngadto sa 1,093 ka mga barangay kapitan sa probinsya gipanghatag usab kagahapon.

Matag PhilHealth Cards naglakip ug kantidad nga P1,200 matag tuig alang sa mga baranagy kapitan – ang pundo nga gikuha alang niining mga PhilHealth Cards naggikan sa Legislative Assitance Fund ni Holganza.

Human sa pagpang-apod-apod, namahayag si Garcia nga aduna siyay ihatag nga laing dugang dos milyones ngadto sa FABC pinaagi gihapon ni Holganza.

Isip tubag, si Holganza namahayag nga ang mosunod nga financial assistance planong ipatukod ug usa ka edipisyo kung diin mamahimo kining magamit sa mga opisyales atol sa mga pagbisita sa siyudad sa Sugbu.(PIA- 7/mbcn/Maryknoll B. Lague)

=========

CHED nag-aghat sa mga SUCs sa pagpatuman ug mga income generating projects

CEBU CITY, June 1 (PIA) --- Ang Commisson Higher Education (CHED) nag-awhag sa mga State Universities and Colleges (SUC) sa nasud sa pagpatuman ug mga “income generating projects(IGPs)” isip dugang kantidad sa ilang budget human mikunhod sa niaging tuig ang budget nga gitagana ngadto sa CHED.

Kini usa sa mga pamahayag ni CHED Chairperson Dr. Patricia Licuanan uban ni Atty. Tonisito Umali ang tigpamaba sa Department of Education atol sa Communication and News Exchange Forum (CNEX) nga gipahigayon sa buhatan sa Philippine Information Agency uban sa pakigtambayayong sa Philippine Communications Operations Office PCOO).

Gidugang ni Licuanan nga ang SUCs dili na mamahimong magsalig pa sa gobyerno. Gani, ang ubang mga tunghaan nagpahigayon na ug mga income generating projects kung diin sila gitugutan sa paggamit niining maong income sa mga galastuhan sa operasyon sa tunghaan.

Ang CHED, matud pa, planong ipatuman kini nga stratehiya sa laing pang mga tunghaan tibuok nasud.

Si Licuanan hinuon miangkon nga wala pay natino nga sistema alang sa pagmonitor sa mga pundo nga makuha niini nga mga proyekto aron malikayan ang mga kakulian ug kagubot sa umaabot.

Gisaad hinuon sa CHED nga ila kining pangitaan ug mga pamaagi tungod kay responsibilidad sa mga opisyales sa CHED ang pakig-alayon sa mga tunghaan alang sa maayong pagpadagan ug operasyon niini.(PIA-7/mbcn/Maryknoll B. Lague)

==========

Mga SME sa NegOr mas lig-onon pa pinaagi sa IT

DUMAGUETE CITY, June 1 (PIA)--- Adunay mga 16 ka mga small and medium enterprises (SMEs) sa Negros Oriental ang gibansaybansay aron mapalambo ang ilang pagpromot sa mga produkto ug food and hospitality industries pinaagi sa worldwide web.

Ang Department of Trade and Industry (DTI) sa pakigtambayayong sa Philippine National IT Standards Foundation Inc. (PhilNITS) nilunsad ug usa ka proyekto nga gitawag ug Training Enhancement for Competitiveness in Harnessing Innovative Entrepreneurs (TECHIE) alang sa mga SME.

 Si DTI officer Jose Julio Somido nagkanayon nga aron matabangan ang mga lokal nga mga SMEs kabahin sa Information Technology (IT), kinahanglan hatagan kini ug kahigayonan sa mas halapad nga publisidad ug makakonekta gawas sa nasud ug kini pinaaagi sa worldwide web.

 Gawas sa pagkat-on ug epektibong online brochures ug bulletin, ang DTi mibansay usab sa mga sumasalmot nga mga SMEs kabahin sa epektibong mga disenyo, layouts ug insaktong kombinasyon sa mga kolor, text ug images alang sa ilang website ug kini anaa ubos sa phase 3 sa Project TECHIE.

Miingon si Somido nga ang Project TECHIE usa ka independente nga proyekto nga lahi sa ubang mga proyekto sa gobyerno tungod kini adunay tinguha sa pagpalambo sa ablidad sa mga SMEs pinaagi sa mga pagbansaybansay kanila sa teknolohiya aron pagpromot sa ilang mga produkto ug mga serbisyo diha sa website.

Ang TECHIE naglangkob ug upat ka mga phases nga naglakip sa Basic Computer Literacy and Applications Training, promotion and Marketing: Internet-based Marketing, Electronic Brochures Bulletin, E-Commerce Applications ug Market Research and Intelligence pinaagi sa Technology Applications.

Ang maong pagbansaybansay nagtinguha usab sa pagpalig-on sa market promotion ug market research pinaagi sa paggamit sa mga teknolohiya ug pagpalambo sa mga regional centers isip maoy mohatag sa pagbansaybansay alang sa dugang nga alamag sa mga SME ug MSME. (PIA-7/mbcn/Chrisley Ann C. Hinayas)

=========

Mga drayber sa Sugbo makadawat na sa

Pantawid Pasada Cards sugod karong Biyernes

                                                                                  

By Juju S. Manubag

CEBU CITY, June 01 (PIA) – Karong Biyernes Hunyo 3, mga drayber sa Sugbo magsugod na ug dawat sa Pantawid Pasada cards nga may load na nga daan nga mokantidad ug mil singkwenta pesos (P1,050) nga bulig gikan sa Department of Energy (DOE)  nga mapalit alang lamang sa gasolina ug krudo.

Adunay dul-an sa dose mil (12T) ka mga Pantawid Pasada Cards nga I-pormal iduso sa DOE ngadto sa Land Transportation Office (LTO) ug sa Land Transportation Franchising and Regulatory Board (LTFRB) diri sa Sugbo.

Si Energy Usec. Jay Layug ang mag-una sa pormal nga pagduso sa Pantawid Pasada Cards karong Biyernes sa buntag ngadto sa daan terminal sa SM City, Cebu kang LTO-7 Regional Director Raul Aguilos ug LTFRB-7 Regional Director Ahmed Cuizon nga saksihan sa mga miyembro sa duha (2) ka dagkong organisasyon sa mga jeepney drayber sa Sugbo nga mao ang Cebu Integrated Transport Service Cooperative (CITRASCO) ug ang Visayas United Drivers and Transport Cooperative  (VUDTRASCO).

Si DOE-7 Regional Director Antonio Labios misulti nga adunay mga usa gatos (100) ka tao nga gipang-imbitar nga motambong ug mosaksi sa pormal nga pagduso sa dul-an 12T nga Pantawid Pasada cards ngadto sa LTO ug LTFRB nga molangkob sa mga drayber, media, nakigtambayayong nga mga ahensiya ug uban mga stakeholders.

Sa 12T ka mga Pantawid Pasada cards, anaa sa sais mil (6,000) ngadto sa siyete mil (7,000) nga mga cards ang gigahin alang sa mga drayber sa jeep ug ang sobra adto iapodapod sa probinsiya sa Negros Oriental ug Bohol sa Central Visayas, sumala pa sa gipahibalo.

Sa sayohay pa sa niaging bulan, gibutyag nga ang rehiyon adunay kapin sa nuybe mil (9,000) ka mga Pantawid Pasada Cards nga ipang-apodapod segun sa tala sa mga lehitimong nanag-iya ug mga prangkisa sa mgarehistradong sakyanang dyipney sa rehiyon.

Sa karon, misaka ang kadaghanon sa mga drayber nga modawat sa Pantawid Pasada cards ngadto sa dul-an sa dose mil (12,000) sa pag-admitir sa LTFRB-7 nga lagmit pa gani nga mosaka pa gyod ang gidaghanon niini basta lang kay ang mga operator sa mga sakyanan makahatag sa duha (2) ka mga rekisito nga mao ang lehitimo nga prangkisa ug ang sakyanan rehistrado sa LTFRB.

Bisan pa niini, si Labios nagkanayon nga ang Pantawid Pasada cards magamit lamang ug sugod lima (5) ka adlaw gikan sa pagdawat ug ngadto lamang ipresentar sa mga gasolinahan nga adunay point of sales (POS) nga mga ekipo.

“Giaghat namo ang mga gasolinahan sa pagsusi sa numero sa plaka sa sakyanan nga nahasulat sa luyong bahin sa card ug kini sama ba sa numero sa plaka sa sakyanan nga magpatubil sa ilaha ug gasolina ug krudo nga gamit ang Pantawid Pasada card,” si Labios misulti.

Si Aguilos usab sa iyang bahin mibahad sa mga operators nga posibleng moatubang sila silot sa higayon nga dili nila ihatag ang Pantawid Pasada Card ngadto sa gitumong nga angayan nga mkadawat niini nga mao ang drayber sa dyip..

“Magpagawas mi ug ug ‘memorandum’ nga momando sa mga operators nga ihatag ang Pantawid Pasada card sa ilang drayber kay ug dili, posibleng moatubang sila ug silot,” si Aguilos mibahad.

Ang mahitabo sa Biyernes kay pauna lamang kini sa buhaton nga pag-apoapod sa Pantawid Pasada nga mga card ug ang kinabagaan nga pag-apodapod sa mga cards magsugod sa Lunes hangtod Biyernes sunod semana gikan sa alas 8 sa buntag hangtod sa alas 5 sa hapon ngadto sa daang terminal sa SM City, Cebu, pagpanapos ni Aguilos.

Ang siyudad sa Sugbo ang nag-una alang sa kinaunhang pagpangapod-apod sa Pantawid Pasada Cards sa Visayas Region. (PIA 7-Cebu/JSM)

==========

DSWD-7 mihatag ug tseke balor P139T sa Sudlon 4Ps SEA-K Association

 by Juju S. Manubag

CEBU CITY, June 1 (PIA) – Ang Department of Social Welfare and Development(DSWD)-7 mitunol kagahapong adlawa ug siyento trayntay nuybe mil ka pesos (P139T) nga tseke ngadto sa presidente sa  Sudlon 4Ps SEA-K Association nga si Dionesia Burdas.

Ang P139T usa ka pautang ubos sa programa sa Department of Social Welfare and Development (DSWD)-7 nga ginganlan ug Self Employment Assistance Kaunlaran (SEA-K) Project nga para lamang sa gigasahan sa Pantawid Pamilyang Pilipino Program ang maka-benepisyo nga gikategorya nga kinapobrehan sa tanang pobre, matod pa ni Regional Director sa DSWD nga si Evelyn Macapobre..

Ang gihatag nga P139T makahatag benepisyo sa baynte (20) ka buok nga mga miyembro ug opisyales sa Sudlon 4Ps SEA-K Association nga nakapasar sa gihimong screening, training ug project-study, dugang ni Macapobre.

Ang SEA-K nga pautang kay walay interest nga bayran sulod sa usa ka tuig pinaagi sa pagbayad ug installment kada semana. Ang labing gamay nga mahulam kay singko mil pesos (P5,000) ug ang kinadak-an nga mahulam kay diyes mil pesos matag tao, depende sa gisumitir nga project study, sumala pa ni Macapobre.

Ang presidente sa Sudlon 4Ps SEA-K Association nga nahinabi sa Philippine Information Agency (PIA) mipahibalo nga ang P5,000 nga pautang diha nila kay adunay P170 nga bayranan matag-Biernes kada semana. Ang P10,000 usab nga pautang, adunay P340 nga senemanang installment nga bayad.

Dugang usab ni Burdas, nga karong Biyernes Hunyo 3 na sila magsugod sa pagbayad sa maong loan.

Si Burdas misulti usab nga ang baynte (20) ka buok miyembro sa ilang asosasyon nga makabenepisyo sa P139T nga loan nga gihatag sa ilang pundok kay tagsa-tagsa mitunol ug project study ug kadaghanan kanila kay anaa sa pagpananom og kaha manumod ug utanon ug baligyaon sa Carbon.  

Nagkanayon usab si Burdas nga tanan sila, nakapanukad na sa proyekto nga ilang gisumitir sa DSWD ug ang kantidad nga ilang madawat magsilbe na kining dugang nga puhunan.

Ang makadawat sa kinadak-ang mautang sa SEA-K nga diyes mil ka pesos (P10,000) sa Sudlon 4Ps SEA-K Association sa Sudlon 1, dakbayan sa Sugbo mao sila Mary Jane Cabiles, Pacita Ladrazo, Saturnina Anobling, Algonsa Ibonalo, Lucia Mahusay, Lorena Lapuz, Buenaventura Bitor ug Dionisia Burdas.

Siyete mil ka pesos (P7,000) usab ang ihatag ngadto nila Jesus Sadio, Jennifer Bolo ug Janet Bitor.

Si Nida Bacarisas lang ang dunay sais mil ka pesos (P6,000) ang mahulam sa SEA-K samtang sila Rosita Apostol, Florencia Cabiles, Nenita Pasacan ug Annajel Cabaluna ang may singko mil ka pesos (P5,000) nga mahulam sa SEA-K.

Ang nahabilin sa baynte (20) nga mga miyembro nga mao sila Norma Cabiles, Evangeline Auia-ot ug Neza Cabusas adunay tres mil ka pesos (P3,000) nga SEA-K hulam usab.

Sumala ni Macapobre, ang SEA-K nga programa igsoon nga proyekto sa Pantawid Pamilyang Pilipino Program nga adunay talagsaong latid nga dihadiha mohatag ug kwarta sa mga beneficiaries sa kondisyon nga paeskuylahon ilang mga anak ug dalhon sa sentro sa panglawas nga makanunayon sulod sa lima (5) ka tuig.

Ang benepisyo nga makuha sa mga Pantawid Pamilyang Pilipino Program kay sais mil pesos (P6,000) ang tuig o kinyentos pesos (P500) ang bulan kada panimalay alang sa kagastohan sa panglawas ug nutrisyon ug lain usab nga tres mil pesos (P3,000) sa usa ka tuig nga pagtungha (10 ka bulan) o tres siyentos pesos (P300) matag bulan kada bata alang sa kagastohan sa pagtungha diin hangtod tulo (3) lamang ka bata matag bulan ang mahimong tagaan matag panimalay. Kinahanglan usab nga ang edad sa motungha wala pay katorse (14) anyos.

Ang didto kagahapon alang sa seremonyas sa pagtunol sa P139T nga tseke ngadto sa Sudlon 4Ps SEA-K Association didto sa Sudlon 1, dakbayan sa Sugbo mao ang mga mga rehiyonal nga ahensiya nga nakitambayayong sa Pantawid Pamilya Program sama sa Department of Health (DOH), DepEd, Department of Interior and Local Government (DILG), National Nutrition Council(NNC), Department of Agriculture (DA) ug ang Population Commission (POPCOM). (PIA 7-Cebu/JSM)

=========

PIA milunsad sa OFW Watch sa Facebook

by Juju S. Manubag

MANILA, June 01 (PIA) --- Gilunsad sa Philippine Information Agency (PIA) ang OFW Watch nga panid sa Facebook pinaagi sa pakigtambayayong sa Department of Labor and Employment (DOLE) ug Department of Foreign Affairs (DFA). 

Tumong sa OFW Watch mao ang pagtino nga maabagan ang mga overseas Filipino workers(OFWs) aron maarang-arang ang kahimtang sa panrabaho. 

Magsilbi usab kini nga dangpanan sa mga pamilya sa mga OFW diin makapangutana sila sa kagamhanan aron mahibalo sila sa kahimtang sa ilang kabanay nga tua nagtrabaho sa laing nasud. 

Suma kang PIA Director-General Atty. Jose A. Fabia, ang social networking nga pahina mahimo usab nga paagi sa mga hingtungdan nga mga ahensiya aron makahatag sila ug dali ug maangayon nga lakang pagtubag sa mga pangutana sa mga OFWs.

Sa usa ka memorandum nga gipadala ngadto sa mga rehiyonal ug probinsiyal nga mga buhatan sa PIA, si Fabia mitahas sa mga information officers sa tibuok nasod nga i-promote ang OFW Watch sa mga ahensiya sa gobyerno nga nagtan-aw sa overseas Filipino workers (OFWs) ug sa ilang mga pamilya.

 “Pahibaw-a ninyo ang DOLE, Overseas Workers Welfare Administration, Philippine Overseas Employment Administration, Bureau of Immigration ug DFA sa inyong dapit sa mosunod:: 1) nga duna’y PIA OFW Watch Page sa Facebook; 2) nga ang PIA OFW Watch usa ka venue diin ang mga OFW ug ilang pamilya makapa-abot sa ilang mga pangutana ngadto sa kagamhan; 3) nga ang PIA OFW Watch mo-abag sa mga hingtungdang ahensiya sa gobyerno aron mapaarang-arang ang kahimtang sa OFWs ug sa ilang pamilya pinaagi sa pakig-koordinar niini sa kagamhanan; ug 4) nga ang PIA OFW Watch mahimong luna alang sa hingtungdan nga mga ahensiya nga mkapadangat sa ilang anunsiyo ug ubang pang pakisayod nga gikinahanglan sa OFWs,” matud ni Fabia. 

Miaghat usab si Fabia nga pahibaw-on bahin niini ang publiko, labi na ang mga OFWs ug ilang mga pamilya, nga mahimo silang makapadangat sa ilang mga pangutana ngadto sa mga hingtungdang mga ahensya sa kagamhanan.

Si Fabia misugo usab nila nga magtigom ug mga ‘situation reports’ sa DOLE, OWWA, POEA, DFA, Immigration ug uban pa nga mga ahenisya sa gobyernong nasyonal ug non-government organizations (NGOs) nga dunay kalabutan sa OFW ug sa mga pamilya mismo nga adunay pahingawa nga buot nilang ipadangat sa gobyerno. 

Ang mao nga mga taho mahimong ipatapot diretso sa pahina sa Facebook page o ipadala nga ‘situation reports’ pinaagi ug ‘short messaging system’. 

Ang programa gilunsad luyo sa tensiyon nga ‘socio-political’s sa Middle East ug sa uban mga parte sa kalibutan diin apektado ang mga Pilipinos. 

Si Fabia misulti nga pinaagi niining PIA OFW Watch, makatabang ang opisina nga ma-arangarang ang kondisyon sa pagpanarbaho sa mga OFWs sa paghatag ug garanitya nila ug dali nga aksyon gikan sa gobyerno para sa ilang lehitimong kalabotan. (PIA-Cebu/JSM)