BJMP nisang-at pagbalik sa Alternatives sa Imprisonment bill

CENTRAL VISAYAS, June 8 (PIA)---Ang Bureau of Jail Management and Penology (BJMP) nihingusog alang sa pagpasar sa Alternatives to Imprisonment nga sugdan sa pagsang-at pagbalik sa balaodnon sa kongreso.

Sa usa ka interbyu, si BJMP Deputy Chief of Operations Doris Dorigo nagkanayon nga ang bureau nag-atubang ug problema sa panagdasok nga ang gidaghanon sa mga piniriso gituhoan nga motubo ngadto sa 70,000 niining tuiga. Si Dorigo nagtoo nga ang Alternatives to Imprisonment bill kinahanglan nga himoong legal aron pagtabang sa pagpahapsay sa 900 ka pasilidad sa prisohan sa tibuok nasud.

Siya niingon nga ang mga gaan nga kalapasan dili kinahanglan magpasabot nga mapriso. Siya nipasabot sa mga ninglapas sa ordinansa sa siyudad o munisipyo sama sa anti-littering kinsa dili kinahanglan nga ipriso isip silot. Nuon, siya niingon, ang mga nakalapas sa maong mga ordinansa mamahimo nga mohatag ug serbisyo sa komunidad sama sa paglimpyo sa mga estero ug kanal. Ug tungod niini, ang mga hout nga nga mga prisohan dili na mapun-an pa.

Sumala ni Dorigo, ang 59,000 kapin nga metro kwadrado sa jail facilities sa tibuok nasud gihan-okan ug mga piniriso katuloon sa iyang angayan nga kapasidad. Sa kasamtangan, ang 20,000 unta nga piniriso nga kapasidad sa jail facility nadasokan ug mokabat sa 64,777 nga piniriso.

Aron paghapsay sa maong mga pasilidad, ang BJMP nagpromot ug restorative justice program nga maghatag sa mga piniriso ug akses sa paralegal services. Kini aron pagpasayon sa paghusay sa kaso nga abagan sa justice department's program sama sa Justice on Wheels.

Lakip sa maong programa mao ang mga interbensyon nga mopagaan sa akses sa mga piniriso sa Alternative Learning Sytem (ALS), skills ug livelihood trainings, counselling, ug sports ug religious nga mga kalihokan.

Ang BJMP usab mopasaka usab sa ilang nga tawo nga motarget ug di momenos 500 nga recruits matag tuig. (PIA 7/mbcn/Angie P. Amodia)

=========

Talisay migarantiya ug libreng abang sa mga pwesto sa merkado sulod sa tulo ka buwan

CEBU CITY, June 8 (PIA) --- Ang konseho sa siyudad sa Talisay kagahapon mitugot sa gidusong resolusyon kabahin niining libreng abang sa mga pwesto sulod sa tulo ka buwan sa bag-ong publikong merkado sa barangay Lagtang. Nakabutang sa bag-ong naaprubahan nga resolusyon nga pagkahuman sa pakisayod ug igong pagsabot-sabot ug rekomendasyon ug indorso sa Local Finance Committee, gitagaan ug insentibo ang tanang mga mamaligyaay diin migarantiya ug tulo ka buwan nga abang sa bag-ong publikong merkado. Ang maong buhat nahimo human si Mayor Socrates Fernandez mitanyag nga garantiyahan ang mga mamaligyaay ug tulo ka buwan nga abang aron ipakita sa mga mamaligyaay nga ang siyudad sa pangagamhanan mitabang nila sa ilang kalisod. (PIA-7/mbcn/Ailene G. Limutan)

=========

Hatagan nato ang mga ex-convict ug higayong mag-usab - BJMP

CENTRAL VISAYAS, June 8 (PIA) --- Ang prisohan gihimo aron mausab ang mga nakalapas sa balaod, dili ang silutan sila. Apan ang mga ex-convicts gitagaan ug gamay ra nga higayon aron mag-usab pagkahuman nila ug silbi sa ilahang sentensiya sulod sa prisohan tungod ang mga komunidad hukman dayun sila. Kini matud pa ni Chief Supt. Doris Dorigo, Deputy Chief sa Operations sa Bureau of Jail Management ug Penology (BJMP) sa nahitabong pakighinabi kagahapon sa TV/radio  nga “Talking Points” sa pangagamhanan. Ang BJMP mitanyag ug Reintegration Program alang sa mga bilanggo pinaagi sa Therapeutic Community Modality diin migamit sa komunidad isip pamaagi aron anaay kausaban ang mga pamatasan ug panghunahuna sa mga piniriso aron usab pagpangandam nila sa bag-ong kinabuhi gawas sa prisuhan. Si Dorigo miingon nga nakig-istorya sila sa mga NGOs, socio-civic ug mga spiritwal nga mga grupo aron pagtabang niini nga programa sa paghatag ug mga serbisyo pinaagi niining counseling, trainings, pangitaan o oportunidad sa panginabuhian. Dugang usab niya nga kadaghanan ang mga problema niining mga napriso naggikan sa kakuwang sa komunikasyon sa ilahang pamilya. Ang Deputy Chief misulti ug usa ka kaso diin ang mga priso mubalibad sa paghawa sa prisuhan tungod kay wala nay pamilya nga balikan. Mao ila gitinguha sa pagkuha sa mga numero niining pamilya sa mga piniriso aron ang mga piniriso dili unay nga lainan sa ilahang pamilya. Laing dugang niya nga ang mga ex-convict anaa usab katungod niining Restorative Justice. Nanginahanglan sila ug pagpatarung sa relasyon tungod sa nausik nila nga pila ka tuig nga anaa sila sa prisuhan. (PIA-7/mbcn/Ailene G. Limutan)

==========

Senador niduso ug mga kausaban kabahin sa Nat'l Health Insurance Act

CEBU, June 8 (PIA) --- Ang akses sa health insurance sa nasud nagpabiling dili matukib tungod kay adunay 23.5 ka milyon nga mga Pilipino nga hangtod karon wala pa malakip sa healthcare program sa gobyerno.

Aron ipamatuod kini , si Senador Loren Legarda mipasaka ug balaodnon sa pagpausab sa National health Insurance Act o RA-7875.

Kini nga Act nagmando sa barato ug daling maakses nga healthcare nga kinahanglan available ngadto sa katawhan.

Apan, matod ni Legarda nga ang akses sa healthcare nagpadayon nga problema, kon di man kini hingpit nga nawala, alang sa mga kabus nga mga Pilipino sa tibuok nasud.

Iyang gipananglitan ang pagpaningkamot sa gobyerno sa paghatag ug mga serbisyo alang sa panglawas ngadto sa mga kabus nga katawhan kon diin kini mialokar ug P3.5 ka bilyon aron malakip ang health insurance premiums sa mga kabus nga mga pamilya karong tuiga.

Sa Central Visayas, adunay 1,733,564 ka mga membro sa PhilHealth kon diin 1,186,666 nagagikan sa Sugbo samtang 310,645 ka mga membro gikan sa Bohol.

Ang Negros Oriental adunay 210,290 nga mga membro sa PhilHealth samtang Siquijor adunay 25,343 ka mga tawo ang nalakip niini.

Gipunting usab ni Legarda nga ang gahin sa gastoan sa panglawas sa GDP misaka gikan sa 3.7 porsyento sa tuig 2007 ngadto sa 3.8 ka porsyento sa tuig 2009.

Apan kini ubos sa lima ka porsyento nga standard nga gitakda sa World Health Organization (WHO) alang sa mga 'developing' nga mga nasud sama sa Pilipinas.

Dugang pa sa senador nga ang out-of-pocket payments sa mga pasyenteng Pilipino misaka ngadto sa 49 ka porsyento samtang ang social insurance payments anaa ubos sa 11 ka porsyento.

Eksplikar pa sa senador nga ang Senate Bill 2849 nagtinguha sa pagtubag niini pinaagi sa pagmando sa nasyunal nga panggamhanan sa pagsubsidiya sa mga kontribusyon alang sa mga kabus.

Pinaagi sa gipasakang pamaagi, malaumon si Legarda nga ang gobyerno magpadayon sa pagpahalapad sa basic ug barato nga healthcare protection ngadto sa katawhan ug sa mga pamilya nga nagkinahanglan niini, panapos pa ni Legarda. (PIA-7mbcn/Chrisley Ann C. Hinayas)

=========

Ang nasud niabli sa P2B nga pagpangutang alang sa mga OFWs kaniadto ug sa kasamtangan

CENTRAL VISAYAS, June 8 (PIA)---Ang kagamhanan sa Pilipinas kagahapon niabli sa P2B nga programa sa pagpangutang nga mapahimuslan sa mga overseas Filipino workers kaniadto ug karon nga adunay gamay o walay kolateral.

Si Labor Secretary Rosalinda Baldoz, kinsa nianunsyo sa programa atol sa 1^st National Congress of OFWs and Families sa SM Mall of Asia, nagkanayon nga ang loan facility kabahin sa reintegration program sa kagamhanan alang sa mga balikbayan nga OFWs aron pagtabang kanila sa pagsugod sa ilang kaugalingon nga negosyo.

Siya nibutyag nga ang Land Bank of the Philippines ug ang Development Bank of the Philippines maggahin ug P1B alang sa loan program sa mga OFWs.

Ang loan gigarantiya nga adunay P1B nga pundo gikan sa Overseas Workers Welfare Administration (OWWA).

Ang miyembro sa OWWA kaniadto ug karon mamahimo nga mo-avail sa loans nga mokantidad ug minimum nga P300,000 nga adunay maximum nga P2M.  Si Baldoz nagkanayon nga kini bukas sa tanan.  

Si Secretary Danilo Cruz nibutyag nga ang mga aplikante kinahanglan nga moadto una ug bisan asa nga buhatan sa OWWA aron pagkompirma nga nga sila miyembro sa OWWA.

Sila usab kinahanglan nga mopaubos ug usa ka training kung unsaon pagsugod ug pagpadagan ug usa ka negosyo.

Ang mga manghulam ug kwarta gikinahanglan usab nga mobubo ug 20 porsyento sa ilang kapital sa iyang giplanohan nga negosyo samtang ang loan mao na ang moabaga sa uban. (PIA 7/mbcn/Angie P. Amodia)

===========

Programa nga PPP sa CV niposte ug ginansiya, nimugna ug mga trabaho

CEBU CITY, June 8 (PIA)---Ang Subcontracting Partners for Innovation (SPIN) program, private-public partnerships (PPP) program nga gipasiugdahan sa Department of Trade and Industry in Central Visayas (DTI 7) nitala ug ginansya nga mokabat ug P50.2M sa sales sa tuig 2010.

Si DTI 7 Director Asteria Caberte nagkanayon nga sila nalipay sa ang programa nga SPIN nitubo sa mga far-flung areas sa rehiyon ug sa lakip na sa ubang rehiyon. Kini usa ka pagpakita sa hugot nga pakigtambayayong sa kagamhanan ug sa mga exporters.

Gikan sa opisyal nga tala, si Cabarte nagkanyon nga gawas sa P50.2M nga abot sa ginansya sa niaging tuig, ang programa nga SPIN nakahatag usab ug 4,756 nga trabaho, nitabang ug 159 nga micro small ug medium enterprises (MSMEs) ug nakapahigayon ug 38 nga trainings sa 2010, kini bisan sa budyet lamang nga P2M.

Si Caberte nikonsidera sa maong kahimoan isip indikasyon nga ang programa nakatabang sa nasud sa pagmugna ug mas daghan nga trabaho alang sa mga Pilipino.

Siya nidugang nga ang mga training ubos sa programa nga SPIN gipahigayon sa "market-driven" scheme diin ang mga produkto nga gihimo sa mga trained nga grupo mga order sa mga ekspotador.

Siya nibutyag nga ang DTI adunay tumong nga palapdan ang programa nga SPIN ngadto sa mga su-ok nga mga lugar, lakip na sa mga lugar nga adunay kagubot (conflict area) kaniadto nga giila sa Armed Forces of the Philippines.

Sa karon nga tuig, ang kagamhanan nigahin P1.5M nga pundo alang sa programa, nga P600,000 alang sa Central Visayas.

Ang DTI 7 regional director nagkanayon nga alang sa unang kwarter sa tuig, ang programa nga SPIN nisang-at ug P10.13M sa sales, nimugna ug 3,126 nga trabaho, nakatabang ug 49 MSMEs sa tibuok probinsya sa Bohol, Cebu ug Siquijor.

Ang programa nga SPIN, usa ka government-private sector nga kahimoan gikonseptwalays sa Cebu, wala lamang naghatag ug trabaho kundi nagtabang sad kini sa eksport sa pagpasaka sa produksyon sa mga gi-eksport nga produkto. (PIA 7/mbcn/Angie P. Amodia)

============

DepEd mipahimangno sa mga magtutudlo sa dili paghatag ug mga dagko ug kapoy nga mga buluhaton sa mga kabataan

CEBU CITY, June 8 (PIA) --- Ang mga magtutudlo kinahanglang dili muhatag ug “tedious ug irrelevant” nga mga bulohaton sa mga estudyante, ang opisyal sa edukasyon miingon kagahapon. Si Department of Education (DepEd) 7 Assistant Director Carmelita Dulangon miawhag usab sa mga estudyante sa pagtuon sa ilang mga sinuwat sa ilahang balay aron mahinumduman pa nila ang mga leksiyon sa sunod adlaw. Si DepEd Secretary Armin Luistro miisyu ug memorandum sa miaging tuig nga nagpugong sa mga magtutudlo sa eskwelahan sa paghatag ug buluhaton kada human sa semana ngadto sa mga estudyante aron ang mga bata anaay igong oras sa pagduwa. Ang pagtuon ug pagpahuway importante sa pagtubo sa mga bata ug tanang mga pagtuon kinahanglang maghinlabot ug trabaho ug duwa matud ni Luistro ngadto sa mga tigbalita sa iyang pagbisita dinhi sa Sugbo sa miaging tuig. Si Dulangon miingon usab nga ang ubang mga estudyante dili makabuhat sa ilang buluhaton sa eskwelahan tungod sa trabaho-on sa balay. Ang pag-eskwela sugod 7:30 sa buntag ngadto sa 4:30 sa hapon kapoy sa bahin sa mga bata matod niya. Si Dulangon midugang usab nga ang mga ginkanan kinahanglang tabangan ang ilang mga anak sa pagbuhat sa mga bulohaton sa eskwelahan. (PIA-7/mbcn/Ailene G. Limutan)

==========

Ang populasyon sa Pilipinas giingong miubos

CENTRAL VISAYAS, June 8 (PIA) --- Ang populasyon sa nasud miubos sigon sa bag-uhay nga datus sa census. Matud sa Stats-in-a-flash nga gibuhat sa National Statistics Office (NSO) Bohol provincial office, ang nasud milampos sa pagpa-ubos sa sa populasyon gikan sa 2.36 ngadto sa 2.04 sa miaging dose (12) ka tuig. Kini mipasabot nga sa Setyembre sa tuig 1995, diin anaay 68.6 million ka mga Pinoy, ang populasyon mi-ubos sa Mayo tuig 2000, ug ang populasyon misaka ngadto sa 76.5 million sa 2.16 nga growth rate. Pagkahuman sa pito ka tuig, sa Agusto 2007, ang saka sa populasyon anaa na sa 2.04 o populasyon nga 88.56 million. Ang Central Visayas anaay 5.01 million sa tuig 2005 ug misaka kini sa 5.70 million pagkahuman sa lima ka tuig diin anaay growth rate nga 2.81. Ang populasyon sa Visayas mikabat sa 6.4 million diin ang saka sa populasyon nahimong 1.59 sa 2007. Ang dakong paghimaba sa growth rate sa populasyon sa Central Visayas ang Siquijor nga anaay 1.0 ka porsiyento sa miaging pito ka tuig. Misunod usab ang Bohol dul-an sa halos 1.06 nga growth rate sa populasyon sa miaging pito ka tuig. (PIA-7/mbcn/Ailene G. Limutan)

==========

DTI nangandam na alang sa SME Development Week

CEBU CITY, June 8 (PIA)--- Ang Department of Trade and Industry nangandam na alang sa pagselebrar sa Small and Medium Enterprises (SME) Development Week nga ipahigayon karong buwan sa Hulyo kon diin ipasundayag ang usa ka libo nga  top-quality nga mga lokal nga mga produkto gikan sa tibuok nasud. 

Ang maong development week mo-highlight sa mga negosyante nga moambit sa ilang malampusong mga kaagi kon diin motanyag usab sila ug mga libreng programa kabahin sa negosyo.

Adunay tema nga “Pinoy SME: Business Tayo!”, ang maong kalihokan ipahigayon karong Hulyo 7 sa Philippine Trade Training Center (PTTC) nga buyon sa pag-abli sa Tindahang Pinoy nga mopakita sa usa ka libo nga pinalian ug locally-made nga mga produkto sa One Town, One Product program gikan sa tibook nasud.

Si Presidente Aquino usab gikatakdang hatagan ug SME Pledge Book isip timaan sa pagkomitir sa tanang mga hingtungdan sa pagpalambo sa mga SME's nga gitawag nga 'backbone of Philippine economy'. 

Ang SME briefing sessions gikatakdang ipahigayon karong Hulyo 8 samtang ang Demo-skills and Business Management Seminars karong Hulyo 9 sa PTTC. (PIA-7/mbcn/Chrisley Ann C. Hinayas)

=========

Dul-an 50 ka mga jeepney operators lang una ang nikuha sa Pantawid Pasada Cards atol sa unang adlaw sa pagpang-apod-apod niini

CEBU CITY, June 8 (PIA) --- Ubos lamang ang gidaghanon sa mga public utility operators ang mikuha sa ilang mga “Pantawid Pasada” Cards atol sa unang adlaw sa pagpang-apod-apod niini niadtong Lunes.

Kini matud ni Arnel Tancinco, ang Land Transportation office assistant regional director atol sa usa ka pamahayag kahagapon.

Dul-an sa 50 lamang ka mga jeepney operators ang miadto sa SM terminal aron sa pagkuha sa ilang mga cards.

“So far, gamay ra gyud ang ni-claim sa cards. Maybe wala kaayo ni na disseminate nga information,” matud pa ni Tancinco.

Gibutyag usab sa assistant director nga ang mga cards nga dili pa makuha kutob karong Biyernes ihatag ngadto sa mga buhatan sa LTO dinhi sa Metro Cebu aron maoy padayong mohatag mga cards ngadto sa mga operators.(PIA-7/mbcn/Maryknoll B. Lague)

==========

TESDA motanyag sa tech-voc training pinaagi sa internet

CEBU CITY, June 8 (PIA) --- Ang Technical Education Skills Development Authority (TESDA) motanyag ug technical and vocational training pinaagi sa internet sa dili madugay.

Gibutyag ni TESDA director general Joel Villanueva nga ang ahensya nagtrabaho na sa mga tukmang mga modyul alang sa online nga tech-voc training kon diin ang mga magtutungha mamahimo nang mopili ug mga kurso pinaagi sa internet. 

Matod ni Villanueva nga ang 'distance learning' pinaagi sa internet mohimo sa technical vocational education nga daling maakses sa katawhan ilabi na sa mga Overseas Filipino Workers nga bisan anaa na gawas sa nasud, gustong mopalambo sa ilang mga abilidad ug makakat-on ug laing mga abilidad.

Buyon sa bag-ong pag-abli sa klase, miingon si Villanueva nga ang technical vocational training nga itanyag sa ahensiya sa tibuok nasud mamahimong usa ka epektibong alternatibo sa edukasyon ngadto sa katawhan.

Sigon sa TESDA chief nga gitanyag ang technical vocational education aron mopalambo ug mopausbaw sa mga abilidad sa mga tinun-an nga sa dili madugay malakip sa manarbahoay sa nasud.

Gawas sa mga lawak tunghaan, matod ni Villanueva nga ang mga magtutungha mamahimong makahimulos sa community-based ug enterprise-based sa TESDA nga naglakip sa Dual Training System, usa ka pamaagi nga kombinasyon sa pagtuon nga makuha sa tunghaan ug usa ka kompaniya nga mohatag sa mga tinun-an ug kasinatian nga gikinahanglan sa mga kompaniya.

Panapos pa ni Villanueva nga ang TESDA magpadayon sa paghimo ug technical vocational training curriculum nga tukma sa panrabaho, pagpahalapad sa akses niini, ug pagpalambo sa pisikal nga mga pasilidad alang sa pagbansaybansay sa mga magtutungha (PIA-7/ mbcn/Chrisley Ann C. Hinayas)

===========

Eksportador sa Shellcraft andam makigbatok sa mga iligal nga mamaligya-ay ug mga pagang

CEBUCITY, June 8 (PIA) ---  Mokabat sa 30 ka mga eksportador sa mga kinhason ug tigpatigayon niini dinhi sa Sugbu ang nagpahigayon ug tigum kagahapong adlawa aron sabotan ang pakigbatok sa mga iligal nga manguha ug mga pagang (corals) sa ilawom sa kadagatan sa nasud.

Matud ni Joy Sharpe sa Cebu Asia Trade Center, buot sa mga eksportador nga mag-umol ug usa ka grupo ubos sa Philippine Exports Federation Inc., sa tuyo nga i-reorganisa ang industriya ug pagtabang sa pakigbatok sa mga iligal nga mamaligya-ay niining mga pagang.

Atol sa maong tigum gikompleto sa grupo ang mga gikinahanglan nga requirements alang sa pagsumiti niini ngadto sa Bureau of Customs Client Profile Registration System.

Gidugang ni Sharpe, kung dili kini nila buhaton karon, moabot ang panahon nga mawala na ang industriya tungod kay wala siya mailhi isip kabahin sa industriya sa pagpang eksport ngadto sa laing nasud.(PIA-7/mbcn/Maryknoll B. Lague)

===========

OWWA mibutyag sa ilang gipahalapdan nga mga serbisyo ugbenepisyo alang sa mga miyembro niini

CEBU CITY, June 8 (PIA) -- Aron mapalambo ang kahimtang sa kinabuhi ug mapausbaw ang kaayohan sa mga Overseas Filipino Workers (OFWs) lakip na ang tagsa-tagsa ka mga pamilya niini, ang Overseas Workers Welfare Administration mibutyag sa ilang gipahalapdan nga mga serbisyo ug mga benepisyo nga madawat sa mga rehistradong miyembro niini.

Alang sa USA$25 membership contribution, ang mga miyembro niini ug iyang pamilya adunay madawat nga benepisyo alang sa medikal, edukasyon, pagbansaybansay ug atol sa kamatayon niini.

Sa kaso sa dismemberment , ang mga miyembro makakuha ug P50 mil; P100 mil alang sa total nga permanent disability; death benefit nga P100 mil tungod sa natural nga mga hinungdan ug P200 mil nga death benefit tungod sa aksidente. 

Ang ahenisya usab nagtanyag ug mga scholarships program alang sa mga kwalipikadong OFWs lakip na ang ilang mga benepisyaryo.

Ubos sa Skills-for-Employment Scholarship Program, adunay maximum nga P14,500 nga ihatag sa kada kurso alang sa short term  (hangtod sa duha tuig) nga vocational o technical nga mga kurso. 

Ubos usab sa Education for Development Scholarship Program (EDSP), adunay 150 ka mga college scholarships nga gihatag ngadto sa mga benepisyaryo sa mga OFWs aron makahuman ug upat hangtod lima ka tuig nga kurso.

Samtang ubos sa OFW Dependents Scholarship Program, ang OWWA mohatag ug P20 mil kada tuig isip pinansiyal nga hinabang ngadto sa mga kabus apan takos nga mga benepisyaryo kon ang OFW magsweldo lang ug dili molapas US$400 kada buwan.  (PIA-7/mbcn/Chrisley Ann C. Hinayas)

==========

P10M ang napupo sa Dumaguete gikan sa mga senador alang sa Rizal Boulevard project

DUMAGUETE CITY, June 7 (PIA) --- Pito ka mga senador ang misaad ug nagkalain-laing mga kantidad gikan sa ilang tagsa-tagsa ka mga priority development assistance fund (PDAF) isip hinabang sa mga gastosan sa gikonstrak nga Rizal Boulevard Boardwalk project sa pangagamhanan sa siyudad sa Dumaguete.

Ang mga mihatag sa maong hinabang naglakip nila senador  Manny Villar, Tito Sotto III, Juan Miguel Zubiri, TG Guingona III, Francis Pangilinan, Raphael Recto ug Chiz Escudero.

Si Dumaguete City mayor Manuel Sagarbarria nagkanayon nga ang siyudad nakatigom na ug kapin sa P10 ka milyon gikan sa pito ka mga senador alang sa on going nga konstrasiyon sa Rizal Boulevard boardwalk project.

Matod ni Sagarbarria nga ang kapin sa P10 ka milyon nga hinabang sa mga senador makahatag ug dakong tabang kanila alang sa pagpalambo sa Rizal Boulevard nga gikonsiderar isip 'show window' sa siyudad sa Dumaguete. (PIA-7/mbcn/Chrisley Ann C. Hinayas, CTU)

==========

Pundo sa PDAF giapod-apod sa DSWD-7 ngadto sa 115 nga gipapahawa nga pamilya

CEBU CITY, June 8 (PIA)---Mokabat ug P339,000 gikan sa Priority Development Assistance Fund (PDAF) sa mga tigbabalaod gikan sa representante sa habagatan ug amihanang distrito sa siyudad sa Sugbo nga si Tomas Osmena ug Rachel Marguerite del Mar ang gigasto alang sa hinabang sa mga pamilya nga gipabalhin gikan sa Mahiga Creeks lakip na sa mga squatters area sa Raja Jumabon St. sa North Reclamation sa siyudad sa Sugbo.

Mga 115 ka pamilya nga biktima sa katalagman bag-ohay lang nakadawat ug P1,000 ngadto sa P8,000 nga hinabang pinansyal gikan ni Rep. Tomas Osmena ug Rachel Marguerite del Mar pinaagi sa Department of Social Welfare and Development sa rehiyon (DSWD-7).

Matag apektado nga pamilya nga kanhi nagpuyo subay sa Mahiga Creeks nakadawat ug P5,000 gikan ni Osmena ug puno nga P3,000 gikan ni del Mar.

Sa managlahi nga kalamboan, ang magbabalaod nga si del Mar nirilis ug laing P1,000 sa matag 83 nga gipabalhin nga pamilya gikan sa Raja Jumabon St. sa North Reclamation area. (PIA 7/mbcn/Angie P. Amodia)

=========

Aplikasyon sa DOST 2012-2013 high school scholarship program  gibuksan na

DUMAGUETE CITY, June 8 (PIA)---Ang Department of Science and Technology-Philippine Science High School (DOST-PSHS) nianunsyo sa pagbukas sa proseso sa aplikasyon alang sa SY 2012-2013 high school scholarship program.

Matud sa DOST, ang Philippine Science High School nga iskolar mahatagan ug libre nga tuition fee, libre nga laon sa mga texbooks, ug binuwan nga allowance. Mga iskolar nga gikan sa low-income groups maka-avail ug uniporme, transportasyon ug living allowances.

Ang scholarship abli sa Grade 6 o Grade 7 nga mga tinun-an sa elementarya sa mga tunghaan nga giila sa Department of Education (DepEd).

Aron makasarang alang sa scholarship, ang aplikante kinahanglan nga 1) anaa sa upper 10 percent sa batch SY 2010-2011, walay grado nga moubos sa 80 percentile nga sertipikado sa prinsipal sa tunghaan; 2) usa ka Pilipino ug walay pending nga aplikasyon nga immigration sa langyaw nga nasud; natawo sa o human sa June 1, 1997; 3) maayo ang panlawas ug piskay nga mopailawom ug malisod nga academic program; 4) maayo ug pamatasan.

Ang mga tinun-an nga nahagbong sa naunang PSHS NCE dili kwalipikado alang sa scholarship

.

Kung ang aplikante wala malakip sa upper 10 percent sa klase, kinahanglan nga adunay siyay espesyal nga kahanas sa Science ug Math nga gipadayag sa report card. Siya kinahanglan nga adunay pinal nga grado nga dili moubos sa 85 sa Science ug Math ug 80 sa tanang ubang subject.

Ang mga takus nga aplikante kinahanglan nga mosumite ug duha ka kopya sa accomplished application forms, duha ka bag-o nga 1x1 ID picture, ug kopya sa ilang report card kung sila wala malakip sa upper 10 percent sa batch SY 2010-2011.

Si Roslyn Tambago sa DOST sa Negros Oriental nagkanyon nga ang mga application forms napadala na sa mga elementary school principals sa probinsya.

Mamahimo nga mofile sa mga application forms sa bisan asa nga PSHS campuses, buhatan sa DOST sa rehiyon o sa probinsya. Ang deadline sa pagsumite sa Hunyo 15, 2011.

Ang petsa sa NCE gitakda sa Sityembre 10, 2011. Ang eksaminasyon usa ka one-time scholastic aptitude test nga gidesinyo aron pagsukod sa scientific abiliy, quantitative ability, abstract reasoning ug verbal aptitude sa mga aplikante.

Ang mga interesado nga mga aplikante sa Negros Oriental mamahimo nga motawag sa buhatan sa Daro, siyudad sa Dumaguete sa numero nga 422-2300 o 225-4551. (PIA 7/mbcn/Angie P. Amodia)