2 ka lugar sa Sugbo gi-ayan alang enerhiya sa hangin:DOE

ni Juju S.Manubag

CEBU CITY, Hunyo 23 (PIA) -– Ang Department of Energy-Renewable Energy Management Bureau (DOE-REMB) sa kaulohan ning panahuna nag-evaluate sa mga application sa mga gusto mo-ugmad ug mobubo ug puhunan sa mga proyekto kabahin sa enerhiya sa hangin para power generation diha sa lungsod sa Argao ug dakbayan sa Toledo.

Si DOE-REMB Asst Director Atty Marissa Cerezo mipahibalo sa gipahigayon nga Kapihan sa PIA diin gipahinungdan ang Philippine National Renewable Program  sa kagamhanan, nga iyang buhaton adunay gi-evaluate pagka-karon ug mga application sa gustong mopahimulos sa enerhiya gikan sa hangin sa duha ka lugar sa probinsiys sa Sugbo pinaagi sa pag-ugmad ug pagbubo ug puhunan niini.

“Sa dili pa namo ihatag ang service contract sa interesado nga mopalambo, itino una namo ang tanang rekisito (teknikal, pinansyal, balaodnon) kon plastada ug hapsay na ba tanan’”,si Cerezo misulti.

Ang Amihan Energy Corporation mao ang kumpanya nga ni apply ug kontrata sa pagsangonan ang mahinabo sa hangin nga mahimong renewable source sa enerhiya sa lungsod sa Argao ug dakbayan sa Toledo sa Sugbo, ug plano nga mogasto ug baynte siyete milyones ka pesos (P27M) sa pre-development stage pa lang, sa gikahibaw-an.

Sa Argao, ang proyekto gitawag ug ‘Argao-Dalaguete-Alcoy-Boljoon-Oslob Wind Power Project’ samtang ang sa dakbayan sa Toledo ginganlan ug ‘Cebu-Toledo-Balamban-Minglanilla-TalisayWind Power Project’. 

SA pagka-karon, ang tibuok nasod adunay singkwentay siyete (57) na ka mga application para sa hangin nga proyekto nga gipang-usisa sa DOE-REMB segun sa tala sa ahensiya.

Si Cerezo misulti nga human sa hingpit nga pagdukiduki sa mga rekisito sa mga interesadong mopalambo, anaa sa ilang aprubahan ang service contract o kaha hangyoon ang aplikante sa pagkumpleto sa kulang nga dokumento diin may traynta (30) ka adlaw sila nga lugway sa pagkumpleto sa gikinahanglan nga rekisito.

“Ang dili pagsumite sa mga kinahanglanong dokumento human sa traynta (30) ka adlaw nga gihatag nga lugway makapapildi nga mopadayon pa sa proyekto. Gihimo kini aron sa paghatag ug higayon sa uban pa nga interesadong momugna nga pagsangonan ang uban pa nga mga tinubdan sa renewable energy, sumala ni Cerezo.

Sa pagpanapos, si Cerezo miingon nga ang Sugbo adunay dako nga kalagmitan alang sa wind, solar ug biomass para alternatibo nga tinubdan nga matukbil nga enerhiya sa pag-aninaw sa nasod nga ka-tulohon ang singko mil kwatro siyentos (5,400) megawatts nga kapasidad karon sa paggamit sa tinubdan sa renewable energy ngadto sa disisais mil dos siyentos (16,200) megawatts sa tuig 2030. (PIA7-Cebu/JSM)