Walay bayad ang pagkuha ug birth certificate karong bulan ra sa Mayo dinhi sa Sugbo

by Juju S. Manubag

 

CEBU CITY, May 20 (PIA) – Ang pagkuha o paglukat sa birth certificate walay bayad didto sa National Statistics Office (NSO) ug local civil registrar (LCR) alang sa tibuok nga bulan sa Mayo alang niadtong mga beneficiaries sa Pantawid Pamilya Pilipino Program.

Mao kini ang gipahibalo ni Aileen Lariba, ang Program Coordinator sa Department of Social Welfare & Development (DSWD)-7 sa gipahigayon nga Kapihan sa Philippine Information Agency sa bag-ohay pa lamang.

Ang libreng pagkuha sa birth certificate usa kini ka pagtambayayong sa DSWD-7, National Statistics Office (NSO)-7 ug Department of Interior and Local Government (DILG)-7.

Matod pa ni Lariba, anaa sa P500 ang magasto unta sa kada birth certificate application nga kuhaon apan gi-wari kini alang sa Pantawid Pamilya nga mga benepesyaryo ug kutob ra usab kini karong bulan sa Mayo.

Midugang sa pagsulti si Lariba nga ang bayranan gi-wari sa NSO isip solusyon sa mga daghang suliran nga midagsa nga ma-epektibo sa pag-implementar ang kampanya sa DSWD batok sa kapobrehon.

Usa ka rason nga ma-diskwalipikado ang benepesyaryo tungod sa kakulang sa mga dokumento sama sa birth certificate.

Kadaghanan usab sa mga anak niini wala pa marehistro sa local civil registry sa lugar diin kini matawo, sumala pa.

Aduna nay 148,000 na ka mga benepesyaryo sa programang Pantawid  sa tibook rehiyon.

Singkwentay tres mil nuybe siyentos traynta siyete (53,937) sa mga benepesyaryo anaa sa probinsya sa Sugbo samtang 4,453 niini taga siyudad sa Sugbo. (PIA-Cebu/mbcn/JSM)

==========

Binay ngadto sa mga negosyante: “Makatabang kamo sa paghatag ug trabaho, pagpakunhod sa kawad-on”

CEBU CITY, May 19 (PIA)--- Si Bise Presidente Jejomar C. Binay nidayeg sa mga nanag-iya ug mga sari-sari stores ug sa mga  negosyante alang sa ilang kontribusyon sa paghatag ug mga trabaho ug pagpakunhod sa kawad-on dinhi sa nasud.

Si Binay nagkanayon atol sa 6^th Puregold “Tindahan Ni Ailng Puring” Sari-Sari Store Convention nga daghan ang matabangan sa pagtukod ug negosyo nga dili lang ang mga negosyante ang makapahimulos niini kon di lakip na usab ang ubang Pilipino.

Miingon si Bise Presidente nga ang micro, small, ug mga medium enterprises (MSMEs) sama sa mga sari-sari stores makatabang sa paggama ug mga trabaho busa makahatag ug kausbawan sa ekonomiya.

 
Base sa datos gikan sa Department of Trade and Industry nipakita kini nga sa tuig 2009, ang MSMEs nakahatag ug 3.5 ka milyon nga mga trabaho o 63.2 ka porsyento sa total jobs gikan sa nagkalain-laing matang sa pagnegosyo.

Binay kinsa usab ang Presidential Adviser on Overseas Filipino Workers’ (OFW) Affairs, nidasig mga OFWs sa pagtukod ug negosyo aron mapalambo ang ilang kinabuhi lakip na ilang mga pamilya.

Dugang pa ni Binay nga siya malaumon nga sa pakigtambayayong sa mga pribadong mga oraganisasyon, sa administrasyon ni Aquino mas makahatag pa ug dugang nga mga trabaho ug mga opurtunidad ngadto sa katawhan. (PIA-7/mbcn/Chrisley Ann C. Hinayas-CTU)

===========

Libreng birth registration sa mga benepisyaryo sa 4Ps sa NegOr

DUMAGUETE CITY, May 19 (PIA)---Usa ka libreng birth registration sa siyudad sa Dumaguete ang gitanyag sa National Statistics Office (NSO) alang sa mga beneficiaries sa Pantawid Pamilyang Pilipino Program (4Ps) sa Negros Oriental.

Ang NSO, sa pakigtambayayong sa Department of Social Welfare and Development (DSWD) ug sa Department of Interior and Local Government, nilibre sa bayad sa birth registration nga P240 alang sa mga beneficiaries sa 4Ps sa tibuok bulan sa Mayo.

Si Bella Tse, ang provincial coordinator sa Pantawid Pamilya, atol sa Kapihan forum sa Dumaguete nagkanayon nga ang libreng birth registration kabahin sa kampanya sa DSWD sa pagtubag sa kalisod, ang usa sa problema nga nihampak sa nasud karon.

Si Tse nibutyag nga siya malaumon nga sila makaabot sa 100 porsiyento nga target sa moparehistro niining buwana. (PIA-7/ mbcn/Angie P. Amodia-CTU)

===========

“Daghang maayong balita” sa administrasyon: P-Noy

CEBU CITY, May 19 (PIA)--- Si Presidente Aquino nipadayag sa iyang mga plano aron i-highlight ang iyang mga kalampusan sa panggobyerno karong Hulyo alang sa iyang state-of-the-Nation Address (SoNA) human kini nireklamo nga wala gipahibalo ug maayo sa media.

Atol sa usa ka convention sa siyudad sa Davao, ang Presidente miingon nga adunay “daghang maayong balita” sa iyang administrasyon lakip na ang limpyo ug maayong panggobyerno.

Usa sa mga kalampusan nga gipananglitan ni P-Noy ubos sa iyang administrasyon mao ang kalamboan sa pag-akses sa publiko sa medical care. 

Si P-noy nagkanayon nga usa kini sa mga pananglitan nga kinahanglan ipatim-aw panahon sa iyang State-of-the-Nation Address karong Hulyo. 

Dugang pa niya nga daghan ang maayong balita apan gikinahanglan pang ipa-usbaw ang abilidad sa pagdangat sa mensahe ngadto sa katawhan.

Masaligon si P-Noy nga sa tagsa-tagsa ka mga komunidad adunay makita nga kausabawan ug kabag-ohan.

Miingon siya nga ang gobyerno nagtinguha nga pangusgan ang pagbalita kabahin sa mga kalampusan ngadto sa publiko human wala kayo hatagi ug pagtagad sa media.

Matod niya nga ang gobyerno nahimong murag wala'y gibuhat, ug walay kausaban sa iyang administrasyon, kini base sa mga taho sa telebisyon, radyo ug newspapers.

Nagkanayon pa niya nga sagad ang media mas gitagaan pa ug dakong pagtagad ang mga negatibong balita kaysa sa mga maayong balita.

Dihang gipangutana si P-Noy kabahin sa iyang mga kalampusan sukad siya nilingkod isip Presidente, iyang gipadayag nga iyang gikonsiderar ang maayo ug saktong panggobyerno isip iyang “labing dako nga kalampusan”.

Matod niya nga ang gobyerno adunay kapabilidad sa pagtubag sa mga gikinahanglan sa katawhan alang sa matinud-anon ug walay gitagoan nga panggobyerno.

Ang Malacanang usab nagplano nga mohatag ug diyalogo sa mga columnista sa mga newspapers sa nasud aron pagpatin-aw diha kanila sa mga programa ug mga polisiya sa gobyerno taliwala sa pagpanlimbasog niini sa pagdasig sa maayong balita ngadto sa publiko. (PIA-7/mbcn/Chrisley Ann C. Hinayas-CTU)

===========

PNoy gipadayun ang pagpatuman niining OTOP

CEBU CITY, May 19 (PIA) --- Ang pagpatuman niining 'One Town One Product' (OTOP) nga programa gipadayun sa administrasyon ni Aquino, matud pa sa departamento sa Trade sa miaging martes.

Ang orihinal nga OTOP nga programa gilunsad sa tuig 2004 ug gituohang mahuman unta sa 2010.

Si Trade Secretary Gregory Domingo miingon, sa usa ka balita nga gibutang sa DTI website, nga ang pagpatuman niiining OTOP nga programa gipadayun sa karon nga administrasyon tungod kay ang maong programa napamatud-an nga epektibong pamaagi aron pagdasig sa pagpausbaw sa ekonomiya sa mga probinsiya sa Pilipinas

Matud pa sa Department of Trade & Industry (DTI) ang OTOP nakahimo ug nalabwan pa gani ang mga tumong niini nga naglangkub sa pagkahimo sa 33,964 micro, small ug medium enterprises sa 1,518 ka mga munisipyo ug siyudad sa Pilipinas.

Ang OTOP usab nakagama ug 668,000 nga mga trabaho; P7.431B nga mga investments; P12.377B domestic sales; ug $522M nga export sales.

Ang OTOP Philippines gihulagway nga makagama ug lig-ong nasud nga gipaluyohan sa mga mauswagong mga munisipyo nga magpasaka sa mga micro, small, ug medium enterprises (MSMEs) nga moresulta unya sa pagpanghatag ug mga trabaho ug magpalig-on sa mga lokal nga ekonomiya.

Ang pagpalig-on usab sa ekonomiya maggikan sa lokal nga lebel pinaagi sa pag-ila niining mga produkto ug mga serbisyo nga may kalabutan sa ilang nagkadaiyang mga kultura ug pahilapdan ang paggamit niini.

Pagpalampos niining OTOP MSMEs giplano aron paghatag ug mga trabaho ug pagpakunhod niining kapobrehon ug paggama ug mga malig-on nga mga lungsod.

Ang DTI isip nag-una nga ahensya sa gobyerno gimando aron magpauswag sa mga enterprises maong kining OTOP Philippines nabuhat alang sa pagpauswag sa mga produkto ug mga serbisyo sa mga lungsod ug siyudad sa Pilipinas.

Laing mga ahensya sa gobyerno susama sa Department of Tourism (DOT), ang Department of Science & Technology (DOST), ang Department of the Interior & Local Government (DILG) ug ang Department of Agriculture (DA), nakigtambayayung sa ubang mga opisina sa gobyerno ug mga pribadong sektor aron mapadayon ang maong programa. (PIA-7/mbcn/Ailene G. Limutan-CTU)

============

Aquino mipahigayon ug sorpresang pag-inspeksyon sa NAIA Terminal 1

MANILA, May 19 (PIA) --- Si Presidente Aquino, uban nila ni Department of Transportation and Communiction Secretary Jose Ping De Jesus, Finance Secretary Cesar Furisima, Arch.

Manuel Manuel Dimaculangan ug Manila International Airport Authority (MIAA) General Manager Jose Angel Honrado mipahigayon ug usa ka sorpresa nga pagbisita ngadto sa Ninoy Aquino International Airport(NAIA) Terminal 1 kagahapon human nabalita nga ang usa ka bahin sa atop niini nahugno niadtong Martes.

Ang presidente kinsa gikan pa sa usa sa mga kalihokan didto sa Davao gipahibalo ni Honrado kabahin sa panghitabo diin duha ka mga empleyado Delta Air ang naangol ug gidala sa opital.

Gipahibalo usab ni DOTC Secretary ug architect Manuel Dimaculangan ang presidente kabahin sa kasamtangang sitwasyon sa mga istruktura sa NAIA Terminal 1.

Ang maong pagbisita sa presidente milanat ngadto sa 15 minutos diin wala kini mihatag ug higayon pagpa-interview.

Sa laing bahin, ang Delta-Air Manager-Finance, Human Resource and Legal Australia, New Zealand and the Philippines Cesar L.T Veneracion III mipadala ug suwat hangyo ngadto kang Honrado sa pagdali paghatag sa mga panginahanglang medikal sa mga biktima nga empleyado.

Laing suwat usab ang gipagawas sa Delta Air nga nagsugyot nga ang MIAA ang angay nga manubag sa insidente nga miresulta sa pagkadaot sa ilang CTX Room ug sa Delta passenger’s baggage.

Gipaabot usab sa Delta ang ilang kusganong pagrekomenda sa pagpahigayon ug dinaliang inspeksyon sa kalig-on sa mga istruktura sa Terminal 1 alang usab sa kaayuhan ug seguridad sa mga pasahero, empleyado ug laing pang mga mogamit sa maong mga pasilidad.(PIA-7/mbcn/Maryknoll B. Lague-Ctu)

===========

Sugbo, nagtagana ug pondo alang sa usa ka programa sa radyo

CEBU CITY, May 19 (PIA) --- Ang konseho sa siyudad sa Sugbu nipasar kagahapon ug usa ka resolusyon nga nagtugot kang Mayor Micheal Rama pagsulod sa usa ka kontrata nga nagkantidad ug P 0.849 uban sa Word Broadcasting  Corp nga maoy nagpadagan sa estasyon sa radio nga DYRF.

Si konsehal Jose Daluz, usa sa mga nisumiti sa resolusyon, namahayag nga ang kontrata sa siyudad sa dyRF alang sa programang “Banat Sugbu” epektibo sulod na sa duha  ka tuig ug pagabag-ohon matag unom ka bulan.

Nagsugod matud pa ang programa sa panahon ni kanhi mayor Tomas Osmeña ug gipadayon karon ni Mayor Michael Rama.

Dugang ni Daluz, gipili sa Bids and Awards Committee (BAC) ang dyRF alang sa radio program sa siyudad kay tungod mao kini ang mihatag ug pinakaminus nga kantidad sa kontrata.

Ang siyudad sa Sugbu nagbayad kada bulan ug kantidad nga P141, 600 gikan sa pondo sa opisina sa mayor alang sa duha ka oras nga programa gikan Lunes hangtod Sabado ug madungog gikan sa alas dos hangtod sa alas kwatro sa kahaponon.

Usa ka kopya sa kontrata nga gipadala gikan sa beteranong komintarista Ike Durano nga adunay petsa Dec 29, 2010 ang gilakip ni Daluz sa usa ka kopya sa iyang resolusyon.

Matud sa kontrata, ang dyRF kinahanglang mopahigayon ug plug mahitungod sa programa sa dakbayan katulo matag adlaw.

Gisaad usab ni Daluz nga ang programa sa dakbayan magtuman sa lagda ug mando sa Kapisanan ng mga Broadcastr ng Pilipinas (KBP).(PIA-7/mbcn/Maryknoll B. Lague-CTU)

==========

Bgy Basak San Nicolas adunay pinakadaghang kaso sa dengue sa siyudad sa Sugbo

CEBU CITY, May 19 (PIA) --- Base sa uwahing listahan nga gipagawas sa health department sa Sugbu, gipildi sa Barangay Basak San Nicolas ang Guadalupe isip  nag-unang barangay nga adunay labing daghan nga kaso sa dengue sa siyudad.

Sa pagkakaron, ikaduha sa San Nicolas mao ang Barangay Mambaling ug Duljo Fatima ayon gisundan sa Barangay Labangon ug Lahug.

Si Durinda Macasocol, ang assistant head sa City Health Epedemiology Surveillance and Statistics Unit namahayag nga sukad niadtong Enero hangtod sa Abril sa niaging tuig aduna lamang unom ka namatay gikan sa kinatibuk-ang 561 ka mga kaso sa siyudad.

Matud sa mga city health officials, dako ug natabang sa pag-ubos sa mga kaso sa dengue sa Barangay Guadalupe ang mga impregnated curtains nga ilang gipanghatag ngadto sa barangay.

Kining maong mga kurtina adunay mga kemikal nga mopatay ug mga lamok lakip na kadtong nagdala ug dengue virus.

Dugang ni Macasocol, ang Guadalupe karon nahimutang na sa ika-10 nga dapit sa tanang mga barangay sa siyudad.

“Nalipay g’yud kaayo mi nga miminus na ang mga kaso sa dengue diha sa Guadalupe,” kini matud ni Macasocol atol sa usa ka media interview.

Gidayeg usab ni Macasocol si Dr. Verena Ramos, ang bag-ong gitudlo isip public doctor sa Barangay Guadalupe tungod sa grabeng dedikasyon niini.

Matud pa, si Dr. Ramos pirmeng molibot sa barangay aron pag-aghat sa mga residente sa pagpanglimpyo sa ilang tugkaran ug palibot.

Gihatagan usab ug pagtagad ni City Health Officer Stella Ygoña ang dakong pagkunhod sa gidaghanon sa mga nangamatay tungod sa dengue kung ikompara sa mga nangagi nga mga tuig.

Si Ygoña nagtuo nga kini resulta sa gipahigayon nga halapad nga information drive ngadto sa katawhan sa siyudad.

Kahinumdoman nga adunay 53 ka mga namatay tungod sa dengue niadtong tuig 2007 ug niubos kini ngadto sa 52 niadtong 2008 ug 41 sa tuig 2009 ug 22 sa 2010.

Sigun ni Ygoña, ang daling pagpakunsulta ang pinaka-epektibong pamaagi sa pagpaminus sa gidaghanon sa mga mamatay tungod sa dengue.(PIA-7/mbcn/Maryknoll B. Lague-CTU)

===========

PCSO mihatag ug P7M sa siyudad sa Sugbo

CEBU CITY, May (PIA)---Ang Philippine Charity Sweepstakes Office (PCSO) mihatag ngadto sa kagamhanan sa siyudad sa Sugbo sa tsike nga mobalor ug P7M nga nagsilbing bahin sa siyudad sa gross receipt sa PCSO.

Ang P7M naglakip sa singko porsiyento nga bahin sa mga lokal nga pangagamhanan gikan sa gross sale sa PCSO gikan sa mga halin sa lotto tickets alang sa buwan sa Hulyo ngadto sa Disyembre 2010.

Ubos sa Executive Order-357, gimando nga maggahin ug 30 porsiyento sa mga net receipts gikan sa operasyon sa lotto alang sa charity fund. Ang singko porsiyento sa 30 ihatag sa mga lokal nga pangagamhanan.

Ang LGUs isip sukli, mogamit sa maong pundo sa pagmintina sa mga ospital ug ubang health, social welfare ug charitable works sa ilang tagsa-tagsa ka mga lugar.

Si William Medici, kinsa General Manager sa Visayas-Mindanao PCSO, nagkanayon nga ang bahin sa siyudad sa Sugbo gikan sa mga baligya sa lotto outlets nga nagpadagan dinhi nisaka ug 26 porsiyento itandi sa bahin nga ilang nadawat sa niaging tuig.

Ang PCSO niremit ug P12, 898,573.11 sa niaging tuig samtang sa tuig 2009, ang siyudad nakadawat ug P10,585,913.00.

Kini nagpasabot nga ang siyudad adunay P2M nga dugang pundo nga magamit alang sa health programs.

Si Medici niingon nga ang P2M dakong tabang sa mga lumolupyo sa siyudad nga nagkinahanglan ug health assistance. 

Ang PCSO moremit sa singko porsiyento sa LGU matag semester o matag unom ka buwan.

Iyang gidugang nga ang bahin sa siyudad sa unang semester niining tuiga iremit sa Hulyo o Agosto ug gituohang motaas tungod sa nagpadayong saka sa halin sa mga lotto tickets.

Sa kasamtangan, ang Sugbo ang adunay labing taas nga halin sa tibuok Visayas ug Mindanao. (PIA-7/ mbcn/Angie P. Amodia-CTU)

===========

Abot sa asukal milabaw sa target karong 2011

CEBU CITY, May 19 (PIA) --- Ang nahuman nga produksyon sa asukal dinhi sa nasud milabaw na sa inisyal nga target karong tuig 2011, diin nagpasaka sa lokal nga pundo ug pagpangandam sa industriya alang sa dugang nga kinahanglanon sa merkado sa Estados Unidos.

Ang abot sa asukal gilaumang mukabat sa 2.2 million metric tons inig ka Augusto, ang hinapos sa current crop karong tuiga diin ang mga tig-galing mopadayun hangtud sa Hulyo, kini matud pa sa Philippine Sugar Millers Association Inc. executive director Archimedes B. Amarra.

Kung kini mahitabo moabot kini sa porsiyentong 12.24 nga mas taas kaysa sa inisyal nga target nga 1.96 million tons. Ang 1.96 million tons nga target maoy resulta sa miaging tuig diin ang kauga naghatag ug kahadlok nga gamay ra ang abot sa asukal. 

Si Amarra miingon nga ang mga tig-galing nakahatag ug 2.1 million tons sa asukal kutub sa Mayo 1, (gikan sa Setyembre 1 sa miaging tuig).

Matud pa sa usa ka impormasyon gikan sa Sugar Regulatory Administration, ang withdrawals hangtud Mayo karong tuiga miubos sa 25 nga porsiyento sa raw sugar ug 41 nga porsiyento sa refined sugar kumpara sa Mayo 2010.

Ang mga pundo hinuon misaka, diin ang raw sugar mikabat sa 80 nga porsiyento ug refined sugar 14 nga porsiyento sa karong buwana gikan sa miaging tuig. (PIA-7/mbcn/Ailene G. Limutan-CTU)

============

Aboitiz migahin ug P100B alang sa power

CEBU CITY, May 19 (PIA) --- Ang Aboitiz Power Corp. migahin ug P100B sa umaabot nga tulo ka tuig aron mahatagan ug puhunan ang coal-fired power nga mga proyekto sa Subic ug Davao, diin makapasaka sa generating capacity nga dili mominus sa 475 megawatts.

Sa usa ka panagtigum sa miaging Martes, APC president ug CEO Erramon Aboitiz miingon nga alang sa tuig 2011 lang, ang kumpaniya nagplano nga mugasto ug P42 bilyon.

Kini nga kantidad nagpresentar sa ipuhunan nga gikinahanglan sa tanang gikalambigitan nga mga proyekto sa APC, bisan pa man gipanag-iya nila ang kumpanya o gamay ra.

Ang kini nga plano sa pagpamuhunan hangtud tuig 2013 naglaum ng magpasaka sa generating capacity sa APC nga labaw sa 2,500 MW, nga gikan sa pagkakaron nga 2,050 MW.

Ang giduso nga Subic coal power nga proyekto gidumala sa Taiwan Cogen International Corp., pinaagi sa espesyal nga sakyanan sa kumpanya nga gitawag ug Redondo Peninsula Energy Inc.

Sa sinugdan, ang APC nagtan-aw sa usa ka 300-MW nga pasilidad apan ang Aboitiz miingon nga ang kumpanya mupadako sa planta sa kapasidad nga 600MW.

Ang Davao coal nga pasilidad kasamtangang gunitan sa APC pinaagi sa ilang gipang-iya nga Therma South.

Ang APC planong mosugod sa pagpatukod sa duha ka pasilidad karong tuiga.

Matud pa sa Aboitiz, ang kumpanya planong mubutang ug P50 billion sa pamuhunan niining proyekto alang sa plano sa Subic ug Davao coal nga mga pasilidad.

Dugang usab sa Aboitiz nga ang katapusang desisyon mahitungod niini nga proyekto mag-agad sa gihimo nga pagtuon ug unsa nga mga transmission lines ang gikinahanglang ibutang. (PIA-7/mbcn/Ailene G. Limutan-CTU)

Valencia LGU makabaton na ug rural health building nga nagkantidad ug P20M

NEGROS ORIENTAL, May 19 (PIA)--- Ang mga residente sa Valencia malaumon nga makabenepisyo sa modern Rural Health building aron mahatagan sila ug mas maayong nga mga serbisyo sa panglawas ubos sa bag-ong administrasyon sa municipyo.

Si Mayor Enrique Gonzales miingon nga ang mga residente sa barangay maka-akses na ug tarong nga mga serbisyo sa panglawas tungod  sa konstruksyon sa P20M nga kantidad sa Rural Health building.

Ang edipisyo anaa mahimutang sa 742 square meter floor area nga nagkantidad ug di mominos sa P20M ug gikonsiderar nga mas moderno nga rural health sa probinsiya.

Ubos sa corporate social responsibility program, ang Energy Development Corporation (EDC) nisaad sa pagpatukod sa maong edipisyo aron mapausbaw ang local health infrastructure ug maka-akses ang komunidad sa mas kalidad nga mga serbisyo sa panglawas ug medikal.

Ang Valencia kinsa anaa mahimutang ang geothermal facility sa EDC makadawat ug royalty taxes gikan sa kompaniya.

Ang EDC usab nisalmot sa mga nagkalin-laing mga proyekto sama sa panglawas, edukasyon, kalamboan sa panginabuhian, imprastraktura ug sa kalikopan aron makabenepsiyo ang mga host communities ug ang lungsod sa Valencia.

Gituhoan nga ang maong proyekto mahuman sa dili pa matapos ang tuig kon diin pormal nga i-tunol gikan sa EDC ngadto sa lokal nga pangagamhanan sa Valencia.

Base sa memorandum of agreement nga gipirmahan sa duha ka mga parti, ang Valencia maoy modumala ug momintinar sa operasyon sa maong edipisyo.

Pipila sa mga design features sa bag-ong rural health unit naglakip sa recovery room ug emergency land pad. (PIA-7/mbcn/Chrisley Ann C. Hinayas-CTU)

===========

Kinse ka tuig nga kontrata sa pagsuplay sa tubig pirmahan sa Siyudad sa Danao ug MCWD

CEBU CITY, May 19 (PIA)--- Ang Metropolitan Cebu Water District ug ang gobyerno sa siyudad sa Danao nipirma kagahapon ug kontrata alang sa pagsuplay ug 20mil ka cubic meters nga tubig kada adlaw ngadto sa water utility firm sa Danao City.

Ang maong gikasabotan gituhoan nga dili lang makabenepisyo sa mga residente sa siyudad sa Danao kinsa makaminos sa ilang bayranan sa tubig kon di lakip na usab ang 15 mil ka mga panimalay sa ubang bahin sa Mandaue, Mactan ug Pit-os sa siyudad sa Sugbo.

Si Danao City Mayor Ramon “Boy” Durano, Jr. miingon nga ang siyudad gituhoang mokita ug P153 ka milyon kada tuig nga gamiton usab sa siyudad aron pagpaminos sa ilang bayranan sa tubig.

Kanayon ni Durano nga samtang ang konseho sa siyudad nagreklamo tungod iyang gidelatar ang pagpaimplementar sa maong proyekto, ang mayor miingon nga ang ubang dokumento kinahanglan pa tarongon ug tan-awon sa dili pa mafinalized ang kontrata.

Atol sa ceremonial contract signing, miingon si Durano nga wala siya naglangan-langan sa pagpaimplementar sa proyekto. Siya mismo gusto madayon ang proyekto kay daku kini ug ikatabang sa Danao.

Si Danao City Legal Officer Gloria Lastimosa-Dalawampu nagkanayon nga ang kontrata isumiti pa ngadto sa konseho sa siyudad alang sa pag-aproba niini.

Si Danao City Engineer Galacito Camao-ngay Jr. miingon nga ang P450 ka milyon nga proyekto gipondohan sa World Bank ug ang dam gituhoang mahuman unom ngadto sa pito ka buwan sugod karon.  (PIA-7/mbcn/Chrisley Ann C. Hinayas-CTU)

===========

Mas hapsay nga sistema ipatuman alang sa mas maayong pag-monitor sa duha ka tulay dinhi sa Sugbo

 CEBU CITY, May 19 (PIA) --- Ang sistema sa monitoring niining duha ka tulay nga nagsumpay sa mga siyudad sa Mactan ug Mandaue kinahanglang hapsayon pa.

Pipila ka mga reklamo ang gipasaka sa nahitabong panagtigum kagahapon sa Macta- Cebu Bridge Management Board.

Usa niini ang security camera nga dili makadakop ug klarong imahe.

Upat ka spotlight ang dili makahatag ug ensaktong kahayag sa gitutukan ug ang video library ug ang recording system kulangan ug duha ka disks.

 Gitumbok usab nga ang software nga gigamit walay proof of authenticity ug ang ikaduha nga bahin sa systems training wala pa nahitabo.

Ang Integrated Security and Automantion (ISA), ang kumpaniya nga nagbutang sa monitoring system miingon nga kini nga reklamo may kalabot sa camera natubag na ug nabutangan na ug duha ka spotlights sa kada duha ka tulay.

Ang Department of Public Works and Highways (DPWH) mangandam sa tantiya nga kantidad alang sa pagpalit niining power generator alang sa duha ka tulay. (PIA-7/mbcn/Ailene G. Limutan-CTU)

===========

Ang kagamhanan ug NGO magtambayayong alang sa National Greening Program

CEBU CITY, May 19 (PIA)---Ang Department of the Interior and Local Government (DILG), Ramon Aboitiz Foundation Inc. (RAFI) ug ang Cebu Provincial Government mopirma ug usa ka kasabotan aron pagtabang sa National Greening Program (NGP) sa administrasyong Aquino.

Si DILG secretary nga si Jesse Robredo sa iyang suwat ngadto sa RAFI chief operating offficer nga si Dominica Chua nagkanayon nga kini aron pagsiguro nga ang paningkamot ug kabtangan sa DILG ug sa ilang development partners direkta paingon sa katumanan sa National Greening Program (NGP).

Ubos sa kasabotan, ang RAFI maoy mangulo sa pagpatuman sa GREENIN Philippines Program, usa ka forest-based sequestration approach aron pagtabang pagtubag sa impak sa kaalautan sa kalikopan ug sa climate change.

Ang NGO usab mao ang manguna sa pagpahigayon sa Run 2 Plant 4 GREENIN Philippines nga kalihokan nga adunay katuyoan nga motanom ug 100,000 nga nitibo nga liso sa kahoy sa usa ka dungan nga pagpananom sa 52 ka siyudad ug munisipalidad sa Sugbo sa Hunyo 25, 2011.

Ang DILG sa laing bahin ang mopromot ug mosuporta sa systematic information and dissemination campaign alang sa GREENIN Philippines Program, isip kabahin sa Billion Trees Program ubos sa NGP.

Ang kagamhanan sa probinsya sa Sugbo moisyu ug direktiba aron pagsugyot ug resolusyon o ordinansa nga magmando sa mga siyudad, munisipalidad, ug mga barangay sa pagsuporta ug pagsagop sa GREENIN Philippines Program.

Pinaagi sa gipalapdan nga Green and Wholesome Environment that Nurtures Our Cebu Program (e-GWEN), kini mopalihok sa 51 ka siyudad ug munisipyo nga mopahigayon  ug Run 2 Plant 4 GREENIN Philippines sa ilang lokalidad sa Hunyo 25, dungan sa labing dakong kalihokan sa siyudad sa Talisay.

Ang kagamhanan sa probinsya sa Sugbo mohatag usab ug logistikal nga suporta ug mogahin ug pundo aron pagsiguro nga ang mga liso ug ubang kinahanglanon anaa atol sa hini-usang pagpananom.

Si Robredo nagkanayon nga sila malipay kung usa ka tripartite memorandum of agreement uban sa RAFI ug sa kagamhanan sa probinsya sa Sugbo ang mouswag sa sunod nga mga adlaw, tungod kay ang inisyitiba ug gipakitang pasalig sa RAFI alang sa kalikopan mahinungdanon alang sa maong katuyoan. (PIA-7/mbcn/ Angie P. Amodia-CTU)

==========

NegOR insurance cards gipang apod-apod sa kabos nga pamilya sa siyudad sa Canlaon

CEBU CITY, May 19 (PIA)---Si Gobernador Roel Degamo sa Negros Oriental nangulo kagahapon sa pagapod-apod sa moabot usa ka libo nga insurance cards ubos sa Provincial Health Insurance of Negros Oriental (PHINO), usa ka nilahi nga programa nga gipatuman sa kagamhanan sa probinsya dinhi sa NegOr.

Matud ni Adrian Sedillo, ang Information Officer sa Kapitol, ang pagapod-apod sa PHINO cards sa siyudad sa Canlaon ika-onse nga bahin sa kampanya sa probinsya nga ipalista ubos sa PHINO ang tanang giila nga kabos nga pamilya sa Negros Oriental.

Si Sedillo nagkanayon nga human sa Canlaon, ang sunod nga apod-aporan sa PHINO card mao ang lungsod sa Ayungon, diin iyang giingon nga nipadayag na sa ilang interes sa pagpasakop sa mga giilang kabos nga pamilya sa ilang lungsod.

Ang PHINO nga programa gimugna ni kanhi gobernador Emilio Macias, kinsa usa ka mediko, nga adunay katuyoan nga mohatag ug libreng health insurance sa mga kabos nga mga residente sa probinsya.

Si Gobernador Degamo niingon nga iyang gipadayon ang pagpatuman sa maong programa tungod siya nituo nga usa kini ka maayong programa tungod ang insurance alang sa tanan.

Iyang gidugang nga ang pagpalista sa maong programa sayon ug dali lamang tungod kay ang proseso sa pagpalista buhaton lang sa Kapitol.

Ang gobernador daling nibakwi nga ang PHINO wala mokompetensya sa PhilHealth. Iyang giklaro nga ang mga tawo adunay kagawasan nga mopili kung unsa nga health insurance ang ilang gusto.

Si Dr. Ely Villapando, kinsa nag-asikaso sa pagpatuman sa PHINO, nibutyag nga ang pasyente mamahimong mamiyembro sa duruha—sa PhilHealth ug sa PHINO.

Sa kasamtangan, ang ospital nga accredited sa PHINO mao ang Negros Oriental Provincial Hospital. (PIA-7/ mbcn/Angie P. Amodia-CTU)