UN nipili sa Sugbo diin ipahigayon ang panagtagbo kabahin sa agrikultura sa Asia ug Pacific regions

CEBU CITY, May 16 (PIA)---Usa ka opisyal sa departamento sa agrikultura sa United Nations ang niduaw sa buhatan ni Gobernador Gwendolyn Garcia ug nipahibawo kalabot sa gitakdang panagtagbo sa mga delegado sa Asia ug Pacific region dinhi sa Sugbo sa umaabot nga Nobiyembre.

Matud ni Dr. Visno Songquite ang Food and Agriculture Chief sa United Nation nga anhi nila himoon ang ilang Annual Session sa Animal Production and Health Commission alang sa Asya ug sa Pacific Region.

Kini tambungan sa tanang mga opisyal sa agrikultura sa nagkalainlaing rehiyon sa Asia.

Sa pagkakaron namili pa sila og lugar nga kapahigayonan sa usa ka dakong kalihokan dinhi.

Si Songquite nibutyag nga ang mga delegado gikan sa nagkalainlaing nasud sa Asya maoy nipili sa Sugbo nga ilang pahigayonan sa maong komperensya pinaagi sa botasyon nga ilang gihimo.

Midugang siya nga nahigam ang ubang mga delegado kay nakasinati na sila sa maayong moabi-abi sa kagamhanan ning lalawigan sa mga turista nga moduaw nganhi busa mayoridad sa mga delegado gustong mobalik nganhi.

Usa sa nakalingaw kanila mao ang madanihon kaayong cultural ug indigenous presentation nga gipasundayag sa Kapitolyo niadtong nakatambong sila og international conference dinhi. (PIA-7/ mbcn/Angie P. Amodia, Intern-CTU)

===========
Australia nidonar ug P1 ka milyon sa Pilipinas

CEBU CITY, May 16 (PIA)---Ang kagamhanan sa Australia nidonar ug sobra P1M nga kantidad sa mga teknikal nga mga ekipo aron pagtabang sa kagamhanan sa Pilipinas sa pagpakigbatok sa human trafficking.

Kini maoy gibutyag sa Department of the Interior and Local Government (DILG) kagahapon.

Si DILG Secretary Jesse Robredo nagkanayon nga ang teknikal nga ekipo nagkantidad ug AU$32,052 nga mobalor ug gibana-banang P1, 462, 532.76, ug naturn-over na ngadto sa member-agencies sa Asia Regional Trafficking in Persons Project (ARTIP) aron pagduso sa paningkamot sa kagamhanan sa pagtubag sa kaso sa TIP sa nasud.

Ang mga ekipo ginastuhan ubos sa proyekto sa ARTIP sa Australian government's Agency for International Development (AusAID).

Ang Secretary nibutyag nga ang bag-ong ekipo naglakip sa siyam ka desktop computers, napulo ka laptop computers, walo ka multi-media projectors, pito ka printers, pito ka digital cameras, pito ka video cameras ug siyam ka voice recorders.

Ang ahensya nga miyembro sa ARTIP nga nakadawat sa mga ekipo mao ang: DILG; Philippine National Police (PNP); National Bureau of Investigation (NBI); Bureau of Immigration (BI); Department of Justice (DOJ); Philippine Judicial Academy of the Supreme Court; Department of Social Welfare and Development (DSWD); Bureau of Jail Management and Penology(BJMP); Philippines Center on Transnational Crime(PCTC); Asia Regional Trafficking In Persons (ARTIP) Project ug ang Inter-Agency Council Against Traffiking(IACAT).

Ang DILG chief nagkanayon nga ang mga ekipo dakong gamit sa maong mga ahensya tungod kay sila mopahigayon ug proactive nga mga imbestigasyon ug magrekord sa interviews sa mga biktima ug suspek sa human trafficking.

Sukad niadtong tuig 2006, ang ARTIP nagtinguha sa pagtampo sa pagpugong sa human trafficking sa Asya pinaagi sa pag-abag sa mas epektibo ug pahimutang nga mga paningkamot sa mga biktima ug suspek sa trafficking pinaagi sa criminal justice systems sa mga nisalmot nga national governments sa South East Asia. (PIA-7/ mbcn/Angie P. Amodia, Intern-CTU) 

============

Lapu-lapu ug Mandaue, dako ug kakuwang sa mga classroom

CEBU CITY, May 16 (PIA) --- Sa pagbalik eskwela sunod buwan, ang siyudad sa Mandaue ug Lapu Lapu nipasalig sa paghatag ug kasulbaran sa dakong problema kabahin sa kakuwang sa mga lawak tunghaan ug mga magtutudlo sa dili pa mahuman ang panahon sa enrollment.

Matud pa, ang siyudad sa Lapu-Lapu nagkuwang ug 253 ka mga classroom ug dul-an sa 100 ka mga magtutudlo sa elementary ug highschool samtang ang siyudad sa Mandaue nanginahanglan ug dugang labaw sa 200 ka mga classroom alang sa pagpahiluna sa tanan niining mga estudyante.

Ang Mayor sa Mandaue Jonas Cortes namahayag nga plano sa siyudad pagpanawat ug daghang lokal nga mga magtutudlo alang sa pagsulbad sa kakuwangon.

Sigun sa mayor, sila magpatukod ug mga classroom ngadto sa mga barangay Tingub, Cubacub, Banilad, Casili ug Maguikay.

Si Mayor Paz Radaza usab sa Lapu-Lapu namahayag nga siya nipahigayon ug tigum kauban ang mga kapitan sa mga barangay alang sa kasulbaran niining problema.

Sigun ni Radaza, plano usab niyang hingusgan ang seguridad nga ipatuman sa ilang mga tulonghaan aron malikayan ang sama sa nahitabo ni Ellah Joy Pique sa Minglanilla niadtong Pebrero.

Dugang ni mayor Radaza, iyang gitahasan ang mga tanod sa paglakip sa mga eskwelahan sa ilang regular nga pagronda sa siyudad.(PIA-7/mbcn/Maryknoll B. Lague Intern-CTU)

============

Gobyerno nisaad ug limpyong tubig alang sa tanan

CEBU CITY, May 16 (PIA)--- Ang mga ahensiya sa gobyerno nagtinabangay sa usag-usa aron segurohon ang limpyong tubig mainom alang sa tanan.

Si Interior and Local Government Secretary Jesse Robredo nanawagan sa mga mayor aron pagtabang kanila sa pagpaimplementar sa “Sagana at Ligtas na Tubig sa Lahat” ubos sa water and sanitation program ni Presidente Aquino.

Ang DILG, Department of Health (DOH) ug ang National Anti-Poverty Commission (NAPC) nakig-alayon sa usag-usa aron pagpaimplementar sa mga rules and regulations (IRR) alang sa programa kabahin sa sufficient water supply.

Ang 2011 General Appropriations Act nitagana ug P1.5 ka bilyon alang sa mainom nga tubig sa DOH.

Kanayon ni Robredo nga ang maong programa nagtinguha nga mapatas-an ang mga serbisyo kabahin sa tubig ngadto sa 155 ka mga priority “waterless” nga mga municipalidad.

Ang mga “waterless municipalities” giila nga kadtong mga municipalidad nga adunay di mominos sa 50 ka porsyento nga maabtan nga serbisyo sa tubig.

Niadtong niadtong tuig, ang DILG, DOH ug NAPC nipirma sa Memorandum of Agreement alang sa pagpaimplementar sa Water and Sanitation program sa Presidente.

Ang maong programa nagpromot sa gitungang responsibilidad sa national government ug local government units sa paghatag ug water supply systems ngadto sa mga walay tubig nga mga lugar pinaagi sa paghatag ug national government grants ug pag-agni sa mga pangagamhanang lokal sa pag-pundo usab niining mga programaha.

Ubos sa pagpaimplementar niini, ang NAPC magsilbing kinatibok-ang coordinating agency sa programa ug mao kini ang motino sa lista sa mga waterless nga mga lugar ug pagsiguro sa mga priority barangays sa mga municipalidad aron makonsiderar nga sila nagkinahanglan gayud sa maong serbisyo.

Ang DOH mismo ang mo-review, mosusi ug moaproba sa mga ipangtanyag nga mga plano ug programa nga gisumiter sa mga LGUs ug sila usab ang mopasilitar sa pagpagawas sa pondo ngadto sa mga LGUs pinaagi sa Centers for Health Development. (PIA-7/mbcn/Chrisley Ann C. Hinayas, Intern-CTU)

============

V sulod sa ikalima nga mga lugar nga daghan 'child laborers'

CEBU CITY, May 16 (PIA)--- Matod sa bag-ohay lang nga taho gikan sa  Department of Labor and Employment(Dole), adunay dul-an sa 172 mil ka mga child laborers sa Central Visayas sa tuig 2009 ug sagad niini nanarbaho sa sektor sa agrikultura.

Base sa report nga gipagawas niadtong Marso nga ang Central Visayas anaa sa ikalima nga pwesto gikan sa 17 ka mga rehiyon sa nasud kon hisgotan ang populasyon sa mga nanarbahong mga bata.

Ang Republic Act 7658 nagdili sa pagpatrabaho sa usa ka bata nga ubos 15 anyos apan mahimo kining motrabaho kon ang bata nagtrabaho ubos sa responsibilidad sa iyang mga ginikanan or legal guardian ug kon ang iyang pagskwela, panglawas ug personal nga kausbawan wala na risgo.

Ubos sa balaod, ang usa ka bata makatrabaho sa publikong pangkalingawan sama sa telebisyon ug radyo basta hatagan kini ug kontrata sa panrabaho nga gidesisyonan sa iyang mga ginikanan o sa iyang legal guardian.

Si Dole 7 Director Exequiel Sarcauga miingon nga dili tanang nanarbaho nga mga bata biktima sa child labor.

Matod ni Sarcauga nga ang ahensiya adunay programa nga motugot sa mga bata nga maka-appreciate sa bili sa panrabaho pinaagi sa pagtugot kanila sa pagtrabaho sa mga fast food chains.

Sigon sa taho gikan sa Dole nga ang populasyon sa mga bata nga nanarbaho dinhi sa nasud niminos gikan sa 2.4 ka milyon niadtong tuig 2004 ngadto sa 2.2 ka milyon sa tuig 2009 ug sagad sa mga bata nanarbaho sa sektor sa agrikultura.

Sa tuig 2009, 64.9 ka porsyento nga mga batang nanarbaho nag-edad sa 15 ngadto sa 17 anyos, 31.6 ka porsyento ang nanarbaho sa edad 10 ngadto sa 14 anyos ug 4.1 ka porsyento ang nag-edad singko ngadto sa siyam ka anyos.

Base sa report nga ang sa Northern Mindanao adunay 226 mil ka mga bata nga nanarbaho nga naghimo sa rehiyon nga may pinakadaghan nga mga bata nga nanarbaho sa tuig 2009.

Gisundan kini sa rehiyon sa Bicol nga adunay 196 mil ka nga nanarbahong mga bata, Eastern Visayas nga adunay 186 mil ka mga nanarbahong mga bata ug Western Visayas nga adunay 181 mil ka mga nanarbahong mga bata.

Matod ni Sarcauga nga ang mga rescue operations sa child laborers buhaton pinaagi sa task force nga naglakip sa mga representante gikan sa Dole, sa Philippine National Police, National Bureau of Investigation ug sa Department of Social Welfare and Development.

============

Cordova ug Consolacion gihagit sa pagpromot sa ilang mga lungsod

CEBU CITY, May 16 (PIA)---Si Arleigh Sitoy, kinsa miyembro sa Provincial Board sa ika-unom nga distrito sa probinsya sa Sugbo, nihagit sa local government units (LGUs) sa Cordova ug Consolacion nga mahimong mamugnaon sa pagpromot sa ilang 'specialty' sa tagsa-tagsa ka lungsod.

Si Sitoy nagkanayon nga ang lungsod sa Cordova ug Consolacion mosunod sa gibuhat sa siyudad sa Mandaue diin ilang gihimo ang record-breaking nga bibingka.

Iya usab gi-awhag ang duha ka LGUs nga mamahimong sama ka mamugnaon sa Mandaue sa pagpromot sa ilang tagsa-tagsa ka kultura ug arts.

Ang Bakasi mao ang sikat nga delikasi sa Cordova, diin mao kini ang gikuhaan sa pangalan sa ilang kapistahan.

Samtang ang “sarok” diin usa ka kalo nga ginama sa kawayan ug dahon sa saging mao ang sikat sa Consolacion.

Kini gamiton sa pagprotekta sa lawas gikan sa uwan ug init sa adlaw. Mao usab kini ang gikuhaan sa ilang kapistahan.

Si Sitoy nidayeg sa siyudad sa Mandaue sa ilang paghatag ug importansya sa ilang mga kabilin ug kaagi. (PIA-7/ mbcn/Angie P. Amodia, Intern-CTU)

===========

Sobra 500 nga piniriso sa siyudad ang nahatagan ug libreng medical, optical ug dental check-up

CEBU CITY, May 16 (PIA)---Nikabat ug lima ka gatos (500) ka piniriso sa Cebu City Jail's Dormitory sa mga lalaki ang nakapahimulos sa medical, dental ug optical mission kagahapon nga gipahigayon sa Alpha Phi Omega (APO) International Pilippines, Inc.

Ang usa ka adlaw nga kalihokan kabahin sa P500M nga kantidad nga serbisyo nga gitanyag sa organisasyon sa tibuok nasud.

Ang mga piniriso gihatagan ug health and dental check-up lakip na ang libre nga tambal ug mga anteyohos alang sa pagbasa.

Si Dani Carlo Pangatungan, kinsa tigpamaba sa APO, nagkanyon nga ang ilang sponsor sa maong misyon mao ang ilang fraternity brothers ug sisters nga nagbase sa abrod.

Si Pangatungan nitug-an nga gawas nga aduna silay tulo ka fraternity brothers nga anaa sa prisohan, gusto nila nga ipadangat sa mga piniriso ang mga serbisyo nga ilang gihatag ngadto sa ubang tao.

Duha ka tuig na ang nilabay, ang APO usab nihatag ug legal assistance sa mga piniriso sa samang prisohan.

Si Superintendent Ma. Victoria Jimenez, kinsa jail warden, nagkanayon nga sila nihinangop sa mga mohatag ug serbisyo sama sa APO tungod wala silay igong pundo sa pagtubag sa tanang panginahanglanon sa mga piniriso.

Moabot usab ug 80 ngadto sa 100 nga piniriso sa City Jail's Female Dormitory ang nahatagan ug optical check-up ug libreng anteyohos kagahapon.

Ang maong misyon gipahigayon sa APO isip pagsunod sa katuyoan sa ilang organisasyon. (PIA-7/ mbcn/Angie P. Amodia, Intern-CTU)

===========

Barangay Ibabao-Estancia, Eco-Barangay sa Mandaue karong tuiga

CEBU CITY, May 16 (PIA) --- Ang Barangay Ibabao-Estancia ang gideklara isip pinakalimpyo ug pinakamahigalaon sa kalikopan nga barangay sa siyudad sa Mandaue.

Gipildi sa Ibabao-Estancia ang lain pang 27 ka mga barangay nga nakigtigi sa maong titulo karong tuiga.

Isip pahalipay, gihatagan ang barangay ug P20,000 nga kantidad nga pagabahinon sa tanang Clean and Green Workers sa ilang lugar.

Kining maong kompetisyon usa ka tinuig nga programa sa siyudad aron pagdasig sa ilang mga katawhan sa pagpabilin sa kalimpyo ug kanindot sa ilang kalikopan.

Ang pagpanglimpyo matud pa dili lamang kutob sa ilang mga pinuy-anan ug tugkaran apan lakip usab ang kinatibuk-ang barangay.

Ang mga barangay kapitan ug mga konsehal sa siyudad daan nang gipahibawo sa mayor pag-agni sa katawhan sa pag-apil sa maong programa.

Ang Kapitan sa Barangay Ibabao-Estancia nga si Carmelino Del Mar Jr. namahayag nga ang kompetisyon usa ka epektibong pamaagi sa pag-awhag sa ilang katawhan pagpabilin sa kalimpyo sa ilang barangay.

Gidugang ni Del Mar nga plano niya nga ipadayon ang hugot nga pagpatuman sa cleanliness drive sa ilang barangay aron sila magsilbing ehemplo sa uban pang mga barangay.

Plano usab sa siyudad sa Mandaue nga mag-umol ug usa ka Ecological Solid Waste Management Committee nga maoy tahasan sa pagpabinin sa kalimpyo sa kalikopan sa Mandaue.(PIA-7/mbcn/Maryknoll B. Lague Intern-CTU)

============

Tanan gidasig sa pagbalhin ngadto sa brown rice

CEBU CITY, May 16 (PIA) --- Ang Department of Science and Technology (DOST) pangusgan ang paggamit niining brown rice aron pagsulbad tali niining kakuwang sa produksyon ug konsumo niining puti nga bugas. Si Science Secretary Mario G. Montejo miingon nga aron masulbad ang nagpadayung kakuwang sa bugas, miagni ang DOST sa mga pinoy sa pagbalhin gikan sa puti nga bugas ngadto sa brown rice atol sa iyang pakig-atubang sa medya sa Communication and News Exhange or CINEX, usa ka programa sa Philippine Information Agency (PIA). Dugang pa ni Montejo, kung kita tanan mukaon ug brown nga bugas, ato nang masulbad ang problema sa kakuwang sa bugas. Sa paggaling niining brown rice, makakuha ug dugang nga kinse (15) porsiyente nga bugas gikan gihapon sa parehong basakan. Ang kini nga bugas dili jud brown kundi usa ra ka bugas nga wala kaayo mahashasi. Dugang pa, inig luto niining brown nga bugas, makakuha ka ug dugang nga treynta (30) porsiyento tungod kay mas mosuyop kini ug tubig ug anaa usab mas daghan nga fiber. Ang ideya sa pagbuhat ug pagkonsumo niining brown rice anaay duha ka kapuslanan: kini usa ka tubag sa kakuwang sa bugas ug problema sa malnutrisyon. Ang mga health dyornal nagsulti nga anaay kamatuoran ang maong sugyot sa mga benepisyo niining brown rice. Ang brown rice matud pa, gituohang mas makapahimsog kumpara sa puti nga bugas diin ang puti mas daghan nga brown layer ang mawagtang sa agiang kinaawitang proseso. Daghan usab kini ug fiber nga anaa sa brown ban layer sa lugas sa bugas. Ang mga benepisyo niining high fiber diet sa panlawas gipamatud-an sa mga medical experts ug kini usa ka ensaktong rason ngano kinahanglang mukaon ug brown rice imbis ang puting bugas. Si Montejo nag-ingon nga nagkaon usab siya ug brown rice, gani ang mga resulta sa medical chemical blood tests sukad mikaon siya ug brown rice kay stable na. Apan, ang shelf life niining brown rice mas ubos kay mukabat ra kini sa upat hangtud lima ka buwan. Paghuman sa lima ka buwan, ang kini nga brown rice mapan-us na. Tungod kini sa natural nga oils nga anaa sa bran layer sa lugas diin kung madugay na gani mapan-us na. Sa pagproseso niining puti nga bugas, wagtangon ang bran layer. Tungod kay mas hait ang grano sa brown rice kumpara sa puti, ang brown rice kinahanglang humulan ug treynta (30) minutes sa dili pa lutuon matud pa sa sekretarya. Si Montejo misulti nga ang ratio sa maong brown rice kinahanglang 2:1. (PIA-7/mbcn/Ailene G. Limutan, Intern-CTU)

==========

I-Rice tubag sa micronutrient deficiency sa Pinas

CEBU CITY, May 16 (PIA)--- Aron tubagon ang problema kabahin sa micronutrient deficiency dinhi sa Pilipinas, anaay gipasar nga balaodnon nga nagmando sa pagbutang ug iron sa mga ordinaryo nga bugas nga ginatawag ug Iron Fortified Rice.

Ang Iron nutritional disorder dili lang dinhi sa Pilipinas kon di lakip na ang tibook kalibotan nga nagsagubang sa kagutom o kakulangan sa nutrina sa mga pagkaon.

Ang micronutrient deficiency mao ang kakuwang sa Vitamin A, Iron ug Iodene nga kinahanglan alang sa lig-on nga panglawas ug sa baskog nga panghunahuna.

Ang Philippine Food Fortification Act of 2000 o Republic Act 8976 naningkamot nga mahatagan ug dakong pagtagad kini nga problema nga nialarma sa nasud ilabi na sa malnutrisyon sa mga kabataan.

Ang fortification mao ang pagbutang ug mga bitamina ug minerals sa kasagaran nga gipangaon nga pagkaon nga kulang sa mga basic nutrients.

Ang maong balaod nanawagan nga gikinahanglan ang fortification sa mga kan-onon sama sa humay, harina, refined nga asukar ug cooking oil.

Kini nagdasig usab sa mga manghimo sa ubang mga processed foods sa pag 'fortify' sa ilang mga produkto ubos sa voluntary system sa Sangkap Pinoy Seal Program (SPSP).

Ang proseso sa fortification mao ang resulta sa mga pagtuon nga gihimo sa mga nagpakabana nga mga ahensiya sa gobyerno sama sa Bureau of Food and Drugs (BFAD), food and Nutrition Research Institute (FNRI) sa Department of Science and Technology (DOST), ug Food Development Center (FDC) sa National Food Authority.

Adunay mga benipisyo nga madawat kon ang pagkaon fortified sama sa pagpugong sa anemia, resistensya sa mga impeksyon, pagimprob sa mental ug pisikal nga kalamboan ug pagpugong sa mga depekto sa pagpanganak ug kamatayon atol sa pagbuntis.

Matod sa National Food Authority Regional Information Officer nga si Ma. Lucia Rosales nga ang Iron Fortified Rice mapalit sa mga NFA accredited retail outlets ug mga publikong nga merkado.

Aron makapailt ang publiko sa I-rice, ang presyo niini susama ra sa presyo sa ordinaryo nga bugas nga anaa sa P27 kada kilo. 

Dugang pa ni Rosales iyang gidasig ang katawhan sa pagpalit sa I-RICE aron matubagan ang problema sa iron deficiency.(PIA-7/mbcn/Chrisley Ann C. Hinayas, Intern-CTU)

==========

DOT molunsad ug bag-ong slogan sa pag-promot sa Pilipinas alang sa turismo niini

CEBU CITY, May 16 (PIA) --- Ang Department of Tourism planong moduso ug tourism “slogan” sa nasud sa umaabot nga tulo (3) hangtud upat (4) ka buwan human naporma kining “Branding Counsel” diin muabot na sa kinatapusang gutlo niining pagpauswag sa Pilipinas gawas sa nasud. Sa usa ka interbyew sa DOT assistant secretary Benito C. Bengzon, Jr. miingon siya nga ang “Branding Counsel” sa pagkakaron nagtrabaho sa posibleng slogan nga gamiton sa Pilipinas sa pag-promote niini sa gawas sa nasud, human niadtong kontrobersiya sa “Pilipinas Kay Ganda” nga nakadawat ug daghang pagsaway. Ang “Branding Counsel” naglangkub sa gobyerno ug mga pribadong sektor matud pa ni Bengzon. Anaa usab laing himuon, kini ang Special Bids and Awards Committee (SBAC) nga mamahimong tigbantay sa awarding sa mga proyekto alang sa promosyon collaterals ug uban pa. Misulti si Bengzon sa rason kung nganong ang DOT kinahanglang mupaila ug bag-ong slogan tungod sa pag-usab niiining “WoW Philippines” nga maoy gipaila niadtong si Richard Gordon pa ang nagdumala tungod kay base sa usa ka pagtuon ang ubang Mercado wala kaayo makasabot sa “wow”. Diin sa miaging mga katuigan, ang Pilipinas migamit ug nagkalain-laing slogan sa pipila ka mga Mercado. Si Bengzon nag-ingon nga tungod niini nga problema, ang bag-ong nagdumala sa DOT mag-usab sa branding posisyon sa Pilipinas sa kinatibuk-ang mercado ug diin usa ka unified slogan ang kinahanglang ipagawas. Dugang ni Benzon nga ang pinaka-importante sa pagkakaron mao ang pagdawat sa kadaghanan sa atong slogan ilabi na gayud ang mga stakeholders sa sektor sa turismo kay sila man ang mogamit niini nga slogan ug dalhon ngadto sa mercado sa gawas sa nasud. Giingon nga ang tanyag niining branding sa Pilipinas gikinahanglang maggikan sa kamatuoran ug dili lamang usa ka promosyon nga komersyal. (PIA-7/mbcn/Ailene G. Limutan, Intern-CTU)

============

Rescue Training alang sa 17,000 ka mga tanod sa Sugbo, pagasugdan

CEBU CITY, May 16 (PIA) --- Mokabat sa 100 ka mga barangay tanod uban sa mga representante sa mga lokal nga opisyales sa Sugbo ang niboluntaryo pag-apil sa unang hugpong sa usa ka semana nga disaster rescue and relief operations training nga ipahigayon sa isla sa Bantayan.

Kining 100 ka mga tanod lakip lamang sa kinatibuk-ang 17,000 ka mga tanod sa tibuok probinsya nga ipailawom sa pagbansay-bansay alang sa pagdugang-abag sa atong mga kapolisan.

Ang  training sa unang grupo sa mga tanod gisugdan niadtong Mayo 9 ug nagtapos niadtong Mayo 13 nga gipahigayon didto sa municipal gym sa isla sa Bantayan.

Gipangulohan ang maong kalihokan sa mga miyembro sa 7^thRegional Community Defense Group (7RCDG) gikan sa Army Reserve Command ubos sa pakigtambayayong niini sa Office of the Civil Defense.

Ang Bantayan mao ang napili isip unang benepisyaryo niining Defense Disaster Risk Reduction Management Training.

Ang programa gilunsad niadtong Pebrero ug gipanguluhan kini sa Gobernador sa Sugbo Gwendolyn Garcia.

Ang pondo nga gigahin alang niining maong programa gikan sa buhatan sa Cebu Provincial Government.

Gawas sa disaster relief and rescue operations, ang pagbansay-bansay maglakip usab sa fire prevention, a pakigbatok sa illegal nga drugas, illegal nga pagpangisda, pagprotihir sa kalikopan, kahapsay ug uban pang mga socio-economic nga kalihokan.(PIA-7/mbcn/Maryknoll B. Lague Intern-CTU)