Tabang sa ADB alang sa E-trikes muabot na sa 100T

CEBU CITY, May 9 (PIA) --- Si Presidente Benigno Simeon Aquino mibutyag nga five-fold ang saka sa suporta nga pundo alang sa electric-powered tricycles “E-trike” aron pag-abaga sa problema dili lang sa pagsaka sa presyo sa gasolina kundi labot na usab sa problema sa polusyon sa Metro Manila, kini matud pa sa Philippine News Agency online kagahapon.

Si Aquino miingon nga ang Asian Development Bank (ADB) mupasaka sa ilang hinabang nga kwarta aron pagsuporta sa programang E-trike sa gobyerno nga diin 20,000 kabuok ang orihinal nga plano ug muabot na sa 100,000 ka mga electric tricycles.

Usa na sab kini ka maayong balita, diin nagpasabot nga mas nidako ang pagsalig diha sa gobyerno sa Pilipinas, matud pa ni Aquino.

Si Aquino, kuyog sa ADB, milunsad sa E-trike nga proyekto sa siyudad sa Mandaluyong sa dili pa lang dugay.

Ang kini nga proyekto nagtinguha sa pag-ilis sa kasagarang gamiton nga tricycle diin nagsalig sa gasolina ngadto sa usa ka environment-friendly lithium-battery powered tricycles diin tumong niini ang pagputol sa polusyon ug paggamit ug gasolina.

Ang 500-million-dollar nga proyekto maglabot sa pagbutang ug mga charging stations. Ang napulo sa E-trikes makalingkod ug unom hangtud walo ka mga pasahero, ug anaay unom ka kilowatt-hour lithium ion battery nga makapadagan sa tricycle sa distansyang 80 to 100 nga kilometro sa usa lang ka charge.

Ang uban anaay tulo ka kilo-watt-hour nga battery nga kinahanglang i-charge sulod sa baynte (20) minutos pagkahuman sa kuwarenta (40) hangtud singkwenta (50) ka kilometro nga biyahe. (PIA-7/Ailene G. Limutan, Intern-CTU)

===========

LTO-7 molusad sa ‘Decade of Action for Road Safety’ sa Kapihan sa PIA

By Juju S. Manubag

CEBU CITY, May 9 (PIA) --- Ang Land Transportation Office (LTO-7) dinhi sa rehiyon molusad sa ‘Decade of Action alang sa Road Safety 2011-2020’sa Sugbo karong Miyerkoles sa Kapihan sa PIA nga ipahigayon sa Citom Conference Room

Si Land Transportation Office (LTO)-7 Regional Director Raul Aguiluz nag-ingon nga ang kalihukan apil sa pagpamatngon sa ka importante sa kaluwasan sa kadalanan aron malikayan ang pagkalas sa kinabuhi tungod sa mga aksidente nga mga panghitabo sa karsada. 

Ang kanunay nga aksidente sa dalan sa nasud nagkataas segun sa madungog sa mga balita nga unta sa kaniadto pa gikatukod na aron malikayan ang mga pasaherong mabiktima sa aksidente nga mapangos, mabali-an ug ang labing pait ang kalit nga kamatayon, sumala pa. 

Matod pa ni Aguiluz ang ilang buhatan nakigtambabayong sa Land Transportation Franchising and Regulatory Board (LTFRB)-7 ug sa Cebu City Traffic Operations Management (CITOM) sa pagpaniguro nga makab-ot ang katuyoan sa plano nga ‘Decade of Action’. 

Si Aguiluz nag-ingon nga sa gihimo nga ‘random drug test’ sa mga drayber sa bus sa wala pay Semana Santa isip uban sa tinguha nila nga malikayan ang aksidente sa kadalanan, nakadawat kini ug positibo nga mga ‘feedback’ gikan sa publiko.

Duruha ka mga drayber sa bus ang nadiskubreng positibo nga nag-gamit sa ginadiling druga, sa gikataho pa.

Si Aguiluz midugang pag-ingon nga mohimo usab sila ug ‘road worthiness test’ sa mga bus ug public utility jeeps (PUJs) sa pagtino unsa ka luwas kining mga sakyanan nga anaa sa mga kadalanan. 

Ubos sa ‘action plan’ pangusgan ang pagpa-implementar sa ‘anti-smoke belching campaign’ ingon pa ni Aguiluz.

Ang CITOM, kauban sa mga pulis ang mag-una sa pagdakop sa mga smoke belching nga mga sakyanan, si Aguiluz mideklarar.

Karong Miyerkules sa Kapihan sa PIA, ang LTO-7 sa pakigtambayayong sa mga kaabag nga mga ahensiya naglaraw nga manghatag ug mga ‘road safety kits’ kabahin sa ka-importante sa seguridad sa kadalanan.(PIA 7-Cebu)

===========

Konseho sa siyudad nihangyo sa DEPW nga dalian and road-concreting project

CEBU CITY, May 9 (PIA)---Ang konseho sa siyudad sa Sugbo buot nga paspasas sa Department of Engineering and Public Works (DEPW) ang P100 ka milyones nga road-concreting nga proyekto sa 30 ka mga barangay.

Ang mga konsehal sa siyudad buot nga ang proyekto mapatuman sa dili pa ang ting-uwan ug ang sugod sa regular nga klase sa Hunyo.

Ang kagamhanan sa siyudad bag-ohay lang nagtino ug wa mominos 42 ka kadalanan sa 30 ka barangay sa siyudad—15 gikan sa amihanang distrito ug ang laing 15 sa habagatang distrito—nga ilang i-konkreto.

Ang maong mga proyekto ginahin gikan sa fifth supplementing budget sa siyudad sa niaging tuig nga mobalor ug P1.3 ka bilyones. (PIA-7/ Angie P. Amodia, Intern-CTU)

===========

Pagpahiuli sa mga America-period school buildings

CEBU CITY, May 9 (PIA)---Ang kagamhanan sa probinsya sa Sugbo nagplano nga tarongon ang mga American-period school buildings sa Probinsya nga gitawag ug Gabaldon buildings.

Si Gobernador Gwendolyn Garcia sa niaging adlaw didto sa lungsod sa Pinamungajan kasadpang bahin sa Sugbo nga gusto niya nga ihiuli ang maong mga edipisyo tungod iya kining isip nga heritage buildings.

Si Garcia nidugang nga ang mga maong edipisyo giisip na nga heritage buildings atol sa kagamhanan nu kanhi Presidente Corazon Aquino.

Ang mga edipisyo natukod lapas usa ka gatos na ang nakalabay ug gipangalan sa Assemblyman nga si Isauro Gabaldon sa Nueva Ecija, kinsa nagpasiugda sa Republic Act No. 1801, diin nigahin ug P1 ka milyones alang sa pagtukod sa maong mga edipisyo sa matag munisipalidad sa Pilipinas.

Siya nagkanayon nga ang uban sa maong mga edipisyo nagbarog pa niining panahona, apan kadaghanan nahugno o naguba na. (PIA-7/ Angie P. Amodia, Intern-CTU)

==========
Pundo sa mga environment programs kuhaon gikan sa pundo sa SK

CEBU CITY, May 9 (PIA)---Ang pundo sa Sangguniang Kabataan (SK) sa lain-laing barangay tibuok nasud mao ang gitan-aw nga kakuhaan ug pundo alang mga Climate Change Adaptation nga mga programa.

Si Senador Loren Legarda gikatakda nga mopasiugda sa People's Survival Fund bill, diin momugna ug special trust fund alang sa pamuhunan sa adaptation nga programa ug proyekto base sa National Strategic Framework ug sa National Climate Change Action Plan.

Si Legarda, kinsa nangulo sa Senate Committee sa Climate Change, nagkanayon nga iyang tan-awon ang posibilidad sa paggamit sa parte sa Pundo sa SK isip kakuhaan sa pundo alang sa nasudnong climate change adaptation nga programa ug proyekto.

Iyang gibutyag nga dyes porsyento sa bahin sa SK gikan sa general fund sa barangay ang mamahimong magamit alang sa dugang kalamboan ug long-term nga mga programa sama sa environment-and climate-related nga mga proyekto nga makahimo sa tanang komunidad sa tibuok nasud nga disaster-resilient.

Si Legarda niingon nga imbes nga gamiton ang pundo sa mga pakontes sa barangay diin dili maghatag ug long-term nga benipisyo, mas angayna nga gamiton kini sa maong kalihokan. Iyang gidugang nga makatabang usab kini sa pagpaamgo sa mga kabatan-onan mahitungod sa pagpreserba sa kalikopan. (PIA-7/ Angie P. Amodia, Intern-CTU)

===========

“One Town, One Scholar” nga programa makatabang sa estudyante’ng mosulod sa kolehiyo

CEBU CITY, May 9 (PIA) --- Napulo ka mga estudyante nga naggikan sa Mt. Province mosulod sa kolehiyo karong abli sa klase isip iskolar ubos sa “One town, one scholar” nga programa sa gobyerno.

Kini nga programa naglaum nga makatabang sa mga estudyanteng mi-gradwar sa hayskul ilabi na katong gikan sa mga pamilya nga walay igong kapasidad sa pagpadala sa ilang anak sa kolehiyo.

Ang mga mapiling iskolar makadawat ug libreng edukasyon sa kolehiyo ngadto sa state university o ubang eskwelahan sa kolehiyo.

Ubos ani nga programa, ang kada lungsod hatagan ug oportunidad alang sa usa ka iskolar sa school year nga 2011-2012 ug ang napulo (10) ka mga munisipalidad sa tanang probinsiya nakahatag na sa ilang napili nga estudyante.

Kini nga programa maglangkob sa upat hangtud lima ka tuig nga scholarship sa mga mag-first year sa kolehiyo nga napili sa ilang munisipalidad isip “town’s scholar”.

Ang programa niabot na sa tulo ka tuig sukad sa pagsugod niini, anaa nay baynte (20) ka mga estudyante sa probinsiya ang natabangan ug laing napulo (10) sa school year nga 2011-2012.

Matud ni provincial director Rufina Fegcan sa Department of Interior ug Local Government (DILG), aron sa pagsiguro sa kalampusan ani nga programa, ang DILG maoy nagbantay sa mga local government units sa pagpatuman ani nga programa ilabi na sa pagpili ug paghatag sa ilang napiling “town scholar”. (PIA-7/Ailene G. Limutan, Intern-CTU)

===========

DepEd, Rafi mipirma sa school assistance deal

CEBU CITY, May 9 (PIA) --- Ang mga opsiyales sa Department of Education (DepEd) ug Ramon Aboitiz Foundation Inc. (Rafi) mipirma ug kasabutan mahitungod sa pag-ayo sa mga daang edipisyo sa mga eskuwelahan sa probinsiya sa Sugbo, diin misaad usab sila sa pakighiusa sa pagtrabaho aron maayo ang edukasyon sa nasud.

DepEd Undersecretary Francisco Varela miingon nga ang pakigtinabangay sa mga pribadong sektor makatabang sa gobyerno sa pag-atubang aning problema sa edukasyon sa dili pa ang K+12 Basic Education Program maimplementar.

Lisud kayo ang pagkab-ot sa mga plano alang niining pagpamaayo sa kalidad sa edukasyon kung ang nasyonal nga gobyerno ra ang muabaga, kini matud pa ni Valera sa nahitabong paglunsad sa rafi aning programa nila sa edukasyon sa miaging Lunes (May2).

Ang presidente sa Rafi nga si Roberto Aboitiz nagsulti nga ang kwarentay-cuatro (44) ka tuig nila nga foundation magpadayon sa paghatag ug “conducive and engaging learning environment” sa mga estudyante sa probinsiya.

Rafi’s School Rehabilitation Program nag-ayo na sa 458 ka mga classrooms sa 136 ka mga eskwelahan sa probinsiya diin nakatabang sa labaw pa sa 18,000 ka mga estudyante.

Ang Aboitiz nagpadayag sa ilang pag-uyon sa K+12, nag-ingon usab nga ang duha katuig nga puno sa basic education sa nasud makahatag ug mas maayong mga indibidwal ug mas andam sa trabaho.

Si Valera miingon nga ang gobyerno karong tuiga migahin ug P9 billion nga kantidad alang sa pagpausab sa mga classrooms, ug P4 billion alang sa pagpausab ug pagpatarung sa mga edipisyo sa mga eskwelahan ug pasilidad alang sa mas limpyong tubig ug palibot.

Ang punto usab ni Valera aning pag-usab sa kurikulum kay kinahanglan jud ang kabag-uhan alang sa mas tarung nga eskwelahan, pasilidad, ug mga ensaktong gamit alang sa mga estudyante nga mao jud ang nag-eskwela. (PIA-7/Ailene G. Limutan, Intern-CTU)

============

Tuig 2011 gideklarar isip International Year of Volunteers.

CEBU CITY, May 9 (PIA) --- Ang Philippine Red Cross miapil sa 186 Red Cross ug Red Crescent Societies sa pagselebrar sa tibuok kalibutan kabahin aning tema nga “Find the Volunteer Inside You”. Ang tuig 2011 gideklarar sa United Nations isip International Year of Volunteers. Karong tuiga usab nagmarka sa ika-napulo (10) nga tuig nga anibersaryo sa International Year of Volunteers diin mahitabo sa Disyembre singko (5) isip International Volunteers Day. Ang Red Cross ug Red Crescent Societies ang pinakakaraan ug pinakadakong voluntary organization sa tibuok kalibutan sukad pa sa tuig 1863 diin mukabat sa halos 100 million nga mga volunteers ug mga miyembro ang nagbuhat ug mga pangkatawhan nga trabaho sa tibuok kalibutan. Sukad pa sa pagmugna niini, ang dakong katuyuan aning International Committee sa Red Cross’ kay ang pagpanghatag ug proteksyon ug hinabang sa mga biktima sa kagubot. Gani, gidani usab ang gobyerno sa pagpalambo ug paghatag ug respeto aning International Humanitarian Law (IHL). Sa pag-ila aning mga Red Cross volunteers, ang Philippine Red Cross pinaagi sa chairman niini nga si Richard J. Gordon mi-organisa ug “Red Cross Million Volunteers Run”. Ang kini nga dagan nagtinguha sa pag-usab sa record ug pagbuhat ug culture of volunteerism sa nasud. Ang “Red CrossMillion Volunteers run” ilunsad karong Mayo nueve (9) tuig 2011 sa Manila Polo club sa siyudad sa Makati. Ang pagpadayong pagdagan mahitabo sa key cities sa nasud sa Disyembre cuatro (4) tuig 2011. Si Gordon miingon nga kini nga pagdagan usa ka paagi usab sa pagtudlo ug disaster response isip pamaagi sa pagpagamay sa mga kuyaw nga panghitabo sa komunidad ug paghatag ug kapasidad sa pag-atubang sa mga kalit nga panghitabo. Ang kini nga dagan magsilbing pamaagi sa pagluwas sa mga kinabuhi sa nasud pareho sa Pilipinas nga duol sa kamalidad, kini matod pa ni Gordon. Tanan nga 100 Red Cross chapters magbuhat ug nagkadaiyang aktibidades sa ilang mga lugar kauban ang ilang mga volunteers. Ang Red Cross chairman mipuno nga ang kinig kalihukan naglaum nga makatigum ug P1 billion gikan sa usa ka million nga mga mudagan gikan sa ilang mga esponsors. Dugan ni Gordon nga ang maong kantidad nga maabut gamitun sa pagtudlo sa mga muapil sa disaster preparedness and response, ug apil na ang pagpanghatag ug mga butang nga makalawas ug kinabuhi. Ang mga muapil makarehistro ubos sa umbrella sa “Red Cross 143” nga programa, usa kini ka flag ship volunteer nga programa sa PRC nga naglaum sa pagpuno ug pagtrain sa mga volunteers sa kada barangay. (PIA-7/Ailene G. Limutan, Intern-CTU)

==========

P-Noy nimando sa sayo nga pagpagawas sa mid-year bonus, cash gifts

CEBU CITY, May 9 (PIA)--- Si Presidente Aquino nimando kagahapon sa sayo nga pagpagawas sa bonus ug mga cash gifts alang sa 1.1 ka milyon nga mga empleyado sa gobyerno, sa dili pa magsugod ang klase karong Hunyo.

Matod ni Executive Secretary Paquito Ochoa Jr. nga ang Presidente nimando sa pagpahatag sa advance nga half of the year-end bonus ug cash gift sa mga civil servants ubos sa Memorandum Order No. 14.

Matod ni Ochoa nga ang Presidente niila sa katinuoran nga ang compensation sa mga empleyado sa gobyerno dili papareho sa ilang mga counterparts sa mga pribado nga sektor, ug tungod niini iyang gipanumbaling ang pagpadali sa pagpausbaw sa pay scale sa mga trabahante sa gobyerno.

Dugang pa ni Ochoa nga ang pondo alang sa maong bonus susama sa half of one month’s basic salary ug tunga sa P5mil nga cash gift gikan sa Department of Budget and Management nga ihatag ngadto sa mga ahensiya sa gobyerno alang sa pagapud-apud sukad pa niadtong Mayo 1.

 “Ang sayo nga pagpagawas sa mid-year bouns makabenepisyo sa mga kawani sa gobyerno ug tungod niini kinahanglan nilang atimanon ang mga bayranan sama sa tuition sa mga anak.” sigon ni Ochoa.

Dugang pa, sugod niadtong Hunyo 1 usa ka buwan sa dili pa ang schedule, ang tanang trabahante ug mga opisyales sa gobyerno makakuha na sa ilang third tranche sa ilang salary increase ubos sa Salary Standardization Law III.

Base sa EO 40 nga ang tanang empleyado sa Executive, Legislative ug mga sanga sa Judicial sa gobyerno, constitutional commissions o mga opisina, state universities ug mga colleges, government-owned and controlled corporations ug financial institutions ug mga local government units maskin regular, casual, contractual, appointive o elective on full-time o part-time nasakop sa pagpausbaw sa suholan.

Ang pagpausbaw sa suholan naglakip usab sa mga kawani sa Department of National Defense ug uniformed personnel ubos sa Department of the Interior and Local Government, Philippine Coast Guard ug National Mapping and Resources Information Authority.

Ang ikaduhang installment naimplementar niadtong Hunyo 24, 2010 alang sa mga kawani sa national government agencies ug Enero 1, 2011 alang sa mga local government units. (PIA-7/Chrisley Ann C. Hinayas, Intern-CTU)

==========

BIR nihangyo sa publiko nga mangayo ug resibo kada pagpamalit

(“Premyo sa Resibo” isip usa sa paagi nga mosaka ang buwis)

By: Juju S. Manubag

CEBU CITY, May 9 (PIA) --- Tabangi ang gobyerno nga motaas ang koleksiyon sa buwis, mao ang panawagan sa Bureau of Internal Revenue (BIR) sa katawhan tungod kay sa pagpangayo lamang sa resibo sa bisan unsay paliton dako na kaayong ikatabang sa pagsumpo batok korupsiyon.

Si Eva Gonzalez sa BIR sa kaulohan misulti nga usa sa paagi nga mahugtan ang kolekta sa buwis mao ang kita nga makuha gikan sa pagpamalit sa produkto ug serbisyo nga may resibo.

 Ang dili pag-isyu niini, ang gobyerno gikuhaan sa gikinahanglang buwis nga ikadapat sa mga proyekto ug sosyal nga serbisyo alang sa katawhan, si Gonzales midugang.  

“Ang resibo mao ang mahinungdanon nga basehan alang sa buwis,” matod pa ni Gonzalez. 

Si Gonzalez nagkanayon sa bag-ohay lang nga gipatigayon nga tigum para sa tanang regional directors ug infocen managers sa Philippine Information Agency (PIA) sa tibuok nasod kabahin sa BIR’s ‘Premyo sa Resibo’ (PSR) nga proyekto.

Ang epektibo nga paagi sa pagkolekta sa buwis nagasugod sa sakto nga pagtuki sa entrada nga gibutang sa resibo ug mao kini ang hinungdan nga namugna ang proyekto sa ahensiya nga ginganlan ug “Premyo sa Resibo”.

Ang PSR usa ka SMS Text Raffle nga proyekto nga naghatag ug kadasig sa katawhan kay adunay kwarta ug uban pa nga mahimong madag-an, matod pa sa opisyal sa BIR. 

Ang labing mahinungdanon, ang PSR nakahatag sa mga negosyante ug kadasig sa pag-isyu ug sakto nga resibo ug malikayan ang dili pagtuman sa balaod, si Gonzalez mitino.

Basi sa datos nga ibutang sa resibo, ang BIR makahibalo ug ang gi-isyu nga resibo palsipikado ug ilang panggukoron kaadtong molikay sa pagbayad sa saktong buwis nga mao na unya niy tino-on alang sa laing programa nga ginganlan ug RATE (Run After Tax Evaders), sumala pa. 

Segun sa resulta sa pag-monitor sa BIR sa PSR ug sa mga negosyante nga wala mo-isyu ug resibo, ang nakolekta nga ‘penalties’ sukad 2007 mikabat na ug kwatro punto uno milyones ka pesos (P4.1M) alang sa PSR nga proyekto samtang ang dili pag-isyu ug resibo mikabat na usab ug dos punto kwatro milyones ka pesos (P2.4M) kutob lamang niadtong Agosto 31 sa miaging tuig, sa presentasyon gipaakita ni Gonzalez.

 “Tabangi ang gobyerno sa pagkolekto sa saktong buwis pinaagi sa resibo ug sa niining paagiha lang, ikaw nakatabang sa gobyerno sa pagsumpo sa korupsyon,” ingon ni Gonzalez.

Sukad sa Enero rong tuiga, ang PSR Project nagahatag ug duha ka mananaog ug baynte singko mil ka pesos (P25,000) matag semana ug usa ka milyon ka pesos (P1M) matag bulan sa binulan, sa gikahibalo-an. 

Ang PSR nagsugod niadtong Hunyo, tuig 2006 ug nasayran nga epektibo nga paagi sa pag-usbaw sa buwis. (PIA- Cebu )