DILG-7 mopahigayon ug ‘Tapatan Road Show’ karong Mayo 24
By Eli C. Dalumpines

CEBU CITY, May 10 (PIA) --- Mahamutang na usab sa sentro ang kampanya sa gobyerno bahin sa transparency sa pangagamhanan sa pagpatuman sa full disclosure policy, matud sa opisyal saDepartment of the Interior and Local Government (DILG) Tunga-tungang Kabisay-an.

Si DILG-7 Regional Director Pedro Noval, atol sa pakighinabi sa radyo, nagkanayon nga ang iyang buhatan mopahigayon ug “Tapatan Road Show” karong Mayo 24 aron mapataas ang kasayuran sa mga opisyal sa lokal nga pangagamhanan bahin sa isyu.

Matud ni Noval nga si DILG Sec. Jessie Robredo maoy gikatakda nga mangulo sa panagsabot-sabot tali sa mga lokal nga mga opisyal, mga opisyal sa mga ahensya sa gobyerno, mga miyemro sa akademya, media ug uban pang mga pundok atol sa nahisgutang road show.

Kini kabahin sa lakang sa bag-ong pamunuan nga mapahibawo ang katawhan bahin sa mga transaksyon nga himoon sa gobyerno sa tuyong maminusan ang insidente sa korapsyon, suma pa ni Noval.

Ubos sa maong palisiya, gi-aghat ang mga LGUs sa pagbutang sa mga pampublikong dokumento sama sa financial statement, dokumento sa bidding ug mga proyekto nga ilang gi-implementar diha sa ilang website, bulletin board o ba kaha sa ilang mga publikasyon.

Kasumpay niini giaghat sa opisyal ang publiko nga motambong sa nahisgutang pagsabot-sabot tungod kay duna man sila’y mahinungdanong papel sa maong kampanya.

Gipahibawo usab niya nga ilunsad usab sa ilang rehiyunal nga buhatan ang website niini isip sumabanan sa mga LGU.

Atol usab sa maong kalihukan mopirma ug memorandum of agreement ang DILG ug andDepartment of Environment and Natural Resources (DENR) bahin sa National Greening Program nga gikatakdang ilunsar karong moabot nga Mayo. (PIA 7/ECD)

=======-===

DOE mohimo ug imbentaryo sa manggad nga tinipigang lana

By Juju S. Manubag

CEBU CITY, May 10 (PIA) --- Sa langas nga sitwasyon sa lana sa kalibutan-ong merkado, ang gobyerno sa Pilipinas pinaagi sa Department of Energy (DOE) niining panahona nag-implementar sa pag-imbentaryo sa mga manggad nga tinipigang lana sa mga kumpanya sa lana aron sa pagtan-aw nga ang nasod adunay igong gahin sa maong produkto. 

“Ang DOE nagahimo karon ug imbentaryo sa mga manggad nga tinipigang lana sa tanang kumpanya sa lana sa tibuok nasokd aron sa pagsiguro nga aduna kitay igong supply sa lana inkaso adunay kalit nga kagusbat sa supply sa lana sa kalibutan-ong merkado”, matod pa ni DOE-7 Regional Director Engr. Antonio Labios  sa bag-o lang gipahigayon nga Kapihan sa PIA.

Si Labios miingon nga ang nasod gakuha sa 80 porsiyento sa  panginahanglan sa lana sa Middle East samtang ang padayon nga suludnong pakigsungi sa  Middle East Region nakahatag ug dakong epekto sa pagsaka sa presyo sa lana sa kalibutan-ong merkado. 

“Tungod kay ang Pilipinas nagdepende sa lana sa gawas, ang walay lunga nga pagsaka sa presyo sa lana dili maapas sa kagamhanan nga mapugnan”, matod pa ni Labios.

Sukad sa Enero rong tuig, ang mga kumpanya sa lana mipasaka sa presyo sobra ka napulo ka beses sa ilang depensa nga taas ang kantidad  ang baril sa lana sa kalibutan-ong merkado, sumala sa gikataho.

Si Labios misulti nga ang krisis sa Middle East nga nagsugod sa Eypt, gisundan sa Yemen ug mikatag sa mga silinganang nasod sama sa Libya ug Syria ang labing tataw nga hinungdan sa pagsigeg saka sa presyo sa lana sa kalibutan-ong merkado.

“Ug dili masulbad dayon ang krisis sa Middle East, malantaw ta ng mosaka pa gyod ang presyo sa lana,” matud pa ni Labios.

Sa pagkakaron, ang DOE dili makatagna ug kanus-a matapos ang walay hunong nga pagsaka sa presyo sa lana kay bisan gani ang mga matukion dili makatino kanus-a kini mohuman,” pagpahibalo ni Labios.

Ang opisyal sa DOE-7 official misulti nga ang presyo sa lana mag-agad ug dako sa ‘law of supply and demand’ ug ang Pilipinas adunay dako nga panginahanglan tungod wala kiniy kaugalingon nga kakuhaan sa lana. 

Ang lain usab nga hinungdan mao ang binayloay sa kantidad sa peso ngadto sa dolyar nga naka-apekto sa presyo sa lana sa nasod, matod ni Labios. 

Si Labios however, misulti nga ang gobyerno kanunay ni-aghat sa paggamit sa mga nga kakuhaan sa enerhiya sama sa geothermal aron makab-ot ang seguridad sa enerhiya ug maminos ang pagsalig sa lana nga atoa sa gawas sa nasod.

Samtang sa paggamit sa renewable energy, “maglaum ta nga sa 3 ngadto sa 5 ka tuig nga panahon, makab-ot ta na ang makahinungdanon kaayohan sa paggamit niini tungod sa pagka-karo, anaa pa kita sa ‘development stage’, panapos ni Labios. (PIA 7-Cebu)

===========

BSP nagdasig sa mga pamilya sa OFW sa pagdaginot ug pagmamuhunan

CEBU CITY, May 10 (PIA) --- Ang Bangko Sentral ng Pilipinas (BSP) nagdasig sa mga kabanay sa mga Pilipinong nagtrabaho sa laing nasud sa pagdaginot ug pagpamuhunan ug negosyo aron sa pag-uswag sa kondisyon sa ilang kinabuhi ug ingon man sa ekonomiya sa nasud.

Kini sigun kang BSP Governor Amando M. Tetangco Jr. sa iyang pamahayag atol sa gipahigayon nga forum alang sa mga Overseas Filipinos Workers.

Gidugang ni Tetangco nga kinahanglan kining buhaton sa mga kabanay sa mga OFW alang sa ilang kaugalingon nga pag-asenso ug isip tabang aron hingpit nga makab-ot ang kauswagan sa ekonomiya sa nasud.

Ang BSP nagtuo nga ang regular nga pagkunsumo ug paggasto makatabang sa pagpalig-on sa ekonomiya, samtang ang pagdaginot ug pagnegosyo paagi aron sa pagpauswag sa pinansyal nga kondisyon sa matag-usa ug maghatag ug maayong epekto sa ekonomiya sa dugayng panahon.

Giangkon hinuon sa BSP chief nga kinahanglan pa ug dugang kakugi ug pagpamatuod sa kaayo nga mahatag niini usa makumbinsi ang mga kabanay sa mga OFW sa pagsunod sa mando sa BSP.

Si Tetangco mitumbok nga ang ilang kagamhanan padayong nangita ug paagi aron dili masayang ang mga OFW remittance dinhi sa nasud.

Usa pa, gidasig sa BSP ang mga pribadong bangko sa pag-aghat sa mga OFW sa pagpahimulos sa mga specialized investment products and services nga ilang gitanyag.

Niadtong 2008, ang Land Bank of Philippines u gang Development Bank of the Phiippines gimanduan sa pagpromot ug mga programang maghatag ug kaayuhan sa mga remittance sa OFW ug aron usab pag-aghat nila sa pag-apil sa mga long term negotiable certificate of deposits.

Dugang niini, ang BSP nagpahigayon ug 48 ka mga financial lectures sa nagkalain-laing lugar sa nasud ngadto sa dili muobos sa 6,000 ka mga kabanay sa mga OFW sugod sa nilabayng lima ka tuig.

Nakapahigayon usab ang BSP ug 14 ka mga lectures ngadto sa gawas sa nasud ug dul-an sa 2,000 ka mga OFW gikan sa Hongkong, Singapore, South Korea, Saudi Arabia, Bahrain, Qatar, Italy ug United Kngdom ang nakatambong.(PIA-7/Maryknoll B. Lague Intern-CTU)

==========

Kampanya batok dengue

CEBU CITY, May 10 (PIA)---Si Dr. Expedito Medalla, pangulo sa Regional Epidemiological and Surveillance Unit (RESU-7), nagkanayon nga sila naglusad ug mas pro-active nga kampanya batok dengue isip pagpangandam sa panahon sa ting-uwan.

Si Medalla nagkanayon nga ang mga residente kinahanglan nga mopadayon sa “search and destroy” method ug sigurohon nga walay sudlanan sa tubig ang biyaan nga nag-abli.

Sumala sa Abril 30 nga dengue update sa RESU-7, 10 na ang namatay ug 1,268 ka kaso ang natala sa Central Visayas niining tuiga.

Kadaghanan sa mga kaso naggikan sa siyudad sa Sugbo nga adunay 365 ka kaso ug lima na ang namatay, gisundan sa siyudad sa Mandaue nga 117 ka kaso ug usa nga patay ug sa Lapu-Lapu nga 114 ka kaso ug zero death.

Samtang si Medalla nipahimatngon sa mga lumolupyo nga tangtangon ang mga basiyo nga tin cans ug mga ginamit nga ligid sa sakyanan diin mosanay ang mga lamok nga magdala ug dengue.

Lakip sa cleanup drives, ang Resu-7 usab nipunting sa information and education nga kampanya alang sa mga lumolupyo.

Iyang gipasabot nga ang ilang sugot mabalewala kung ang ma residente dili mosunod sa mga tambag. (PIA-7/ Angie P. Amodia, Intern-CTU)

===========
Mga tunghaan gi-awhag nga mamahimong eco-friendly schools

CEBU CITY, May 10 (PIA)---Gi-agni sa mga environmentel advocates ang Department of Education (DepEd) sa pagpaigting sa ilang kampanya sa pagkunhod ug pagdumala sa mga basura nga ipagawas sa mga eskwelahan.

Matud ni Roy Alarvarez, presidente sa EcoWaste, nga ang zero waste resource management makatampo sa luwas ug socially-responsible nga sisitema sa tunghaan ug dili makadugang sa 35,000 ka tonelada nga basura nga i-prodyus sa nasud matag adlaw.

Aron makab-ot kini, si Secretary Armin Lim sa EcoWaste nipahimangno sa mga tunghaan nga sugdan pag-usab ang ilang tahas nga adunay kalabotan sa national green agenda sa kagamhanan, partikular na sa pagpugong ug pagpakunhod sa basura.

Ang DepEd usab gikinahanglan nga motanyag ug insentibo alang sa mga tunghaan aron mapatuman ug mapahingusgan ang ecological waste management. (PIA-7/ Angie P. Amodia, Intern-CTU)

===========
Labor group nisang-at pagbalik ug wage hike petition

CEBU CITY, May 10 (PIA)---Ang Cebu Labor Coalition nga gipangulohan sa Alliance of Progressive nisang-at pagbalik sa P128.60 across-the-board wage hike petition sa Central Visayas sa niaging semana sa Regional Tripartite Wages and Productivity Board.

Si Exequiel Sarcauga, kinsa chairman sa RTWPD-7 ug Regional Director sa Department of Labor and Employment-7, nagkanayon nga ang petition gisang-at sa niaging semana.

Si Sarcauga niingon nga ang bag-ong gisang-at nga petisyon ihiusa sa wage hike petition nga gisang-at sa Associated Labor Unions-Trade Union Congress of the Philippines.

Si Sarcauga nidugang nga ang board magtigom sa Huwebes aron hisgutan ang duha ka wage hike petition.

Ang ALU-TUCP nisang-at ug inadlawng P100 across-the-board wage hike alang sa mga mamumuo sa Central Visayas.

Ang CELAC naghisgot ug onse ka rason kung ngano nangita sila ug usbaw sa suholan.

Kini mao ang kulang nga usbaw sa suholan sa niagi, pagkunhod sa purchasing power of sa peso, ang usab-usab nga presyo sa lana, pagsaka sa presyo sa nag-unang palaliton, ang kantidad sa pagkakaron nga minimum nga suholan aduna lamang purchasing power nga P16, R-VAT ug usbaw sa taxes, epekto sa globalisasyon, pagsaka sa plitehan, ug pag-usbaw sa bayranan sa tubig ug kuryente.

Si Sarcauga nibutyag nga ang February 14, 2011 nga wage hike petition nga gisang-at sa CELAC gibasura tungod sa kakuwang sa basehan. (PIA-7/ Angie P. Amodia, Intern-CTU)

==========

Jeepney Drivers sa Sugbo dili pa makadawat sa ilang mga “Smart Cards”

CEBU CITY, May 10 (PIA) --- Ang mga jeepney drivers dinhi sa Sugbo uban sa lain pang mga probinsya sa nasud kinahanglan pang maghuwat ug diyutayng panahon  una makuha ang ilang mga “smart cards” gikan sa Pantawid Pasada Program sa gobyerno, kini matud pa sa usa ka opisyal sa Department of Energy (DOE).

Kini tungod kay wala pa maghatag ug mando ang kauluhan kung kanus-a pagasugdan ang pagpang-apod-apod sa mga smart cards sa laing mga probinsya sa nasud human kini nasugdan pagpang-apod-apod didto sa kauluhan.

Sumala ni Energy Undersecretary Zenaida Monsada, and pag-imprinta ug pagrodyus sa mga smart cards usa sa mga hinungdan sa pagkalangay sa pagpanghatag niini ngadto sa mga drayber.

Matud pa, ang makina nga mag-imprinta sa mga smart cards nga gikan Bank of the Philippine Islands adunay limit hangtod sa 3,000 ka smart cards lamang matag adlaw.

Gipasalig hinuon sa DOE nga ilang paningkamotan nga masugdan dayon ang pagpang-apod-apod sa mga smart cards sa tanang probinsya human nila makuha ang kinatibuk-ang gidaghanon sa mga gikinahanglang smart cards gikan sa BPI.

Kahinumdoman nga ang Bank of the Philippines (BPI) ubos sa Ayala Group maoy nakaangkon sa katungod sa pagprodyus sa kinatibuk-ang 220,000 ka mga smart cards nga ipanghatag sa mga drayber tibuok nasud aron ilang makuha ang P1,050 nga kantidad nga ayuda gikan sa gobyerno.

Matag card adunay mga impormasyon kabahin sa sakyanang gimaneho sa drayber sama sa franchise number, plate number ug ang rota sa sakyanan aron masiguro nga dili kini mamahimong magamit sa ubang tawo.(PIA-7/Maryknoll B. Lague Intern-CTU)

==========

PNoy naghimo ug plano alang sa mga “informal settlers”

CEBU CITY, May 10 (PIA) --- Usa ka plano ang padayong gihimo ug buot ipatuman sa umaabot isip tubag sa dakung problema sa nasud nga naglambigit sa nagkadaghang mga informal settlers.

Kini maoy gibutyag ni Presidente Benigno Simeon Aquino III sa ASEAN Summit sa Jakarta, Indonesia. 

Matud pa sa Philippine News Agency online, si Aquino miingon nga ang naa sa plano kay ang pagpanghatag ug yuta nga gipanag-iya sa gobyerno ngadto sa halos 560,000 (initial) nga mga pamilya nga gikonsiderang nag-“squatting” sa Metro Manila.

Ang numero nag- representar ug ika-tulo sa halos 1,4-million nga mga informal settlers sa tibuok nasud. 

Si Aquino miingon nga usa ka oportunidad ang una nga napagawas paghuman sa inventory nga gipanguluhan sa Department of Agriculture and Environment and Natural Resources ang nadiskubre nga anaay 1.5 million nga ektaryang yuta sa gobyerno ang libre diin pupuwedeng magamit sa mga informal settlers. 

Sigon pa ni Aquino, makahatag ang gobyerno sa kada pamilya sa halos 560,000 ka mga pamilya ug duha (2) ka ektarya nga yuta kung ilang siguruon nga ilang gamon, palambuon ug makapangita ug paagi nga makakuha ug kita gikan ani nga yuta.

Dugang pa ni Aquino, kung dili nila masunod ang maong mga kundisyones, kuhaon pagbalik ang yuta.

Giklaro ni Aquino nga tungod kay dili pa pinal ang maong plano, ang pinakadetalye mahitungod sa kinsa ang mga benepisyaryo, asa gayud ang lugar, ug kanus-a ni mahitabo nga plano gi-hisgotan pa. (PIA-7/Ailene G. Limutan, Intern-CTU)

============

Mga Serbisyo sa DSWD niadtong 2010 daghan ug natabangan

CEBU CITY, May 10(PIA) --- Matud ni Social Welfare and Development Secretary Corazon Juliano-Soliman, mokabat sa 91,177 ka mga indibidwal tibuok nasud ang nakapahimulos sa lain-laing serbisyo nga gihatag sa DSWD-Crisis Intervention Units (CIUs) sa 16 ka mga field offices niini niadtong niaging tuig.

Sa kinatibuk-ang nakabenipisyo, 27,123 o 23 porsyento ang nakaangkon ug libreng tabang medikal gikan sa buwan sa Enero hangtod Disyembre 31, 2010.

Sigun kang Secretary Soliman, molabaw sa P188 ka milyon ka pesos ang gigahin sa sa CIU alang sa mga programa gikan sa pondo sa DSWD ug sa Priority Development Assistance Fund(PDAF).

Ang CIU naghatag ug mga serbisyo sama sa dinaliang pagluwas ug proteksyon, dugang tabang kung adunay kalamidad ug medikal o legal nga suporta.

Gidugang ni Soliman nga kining maong Crisis Intervention Unit usa ka espesyal nga yunit sa DSWD nga nag-alagad isip action center aron daling makahatag ug tubag sa nagkalain-laing kaso sa mga indibidwal ug pamilya.

Gigamit usab sa DSWD ang kantidad nga P1.8 ka milyon aron maapil sa pagbayad ang mga PhiliHealth cards sa mga 3,340 ka mga pobreng benipisaryo.

Sakop niining maong PhilHealth Insurance ang libreng pagpa-ospital ug outpatient benefits gikan sa PhilHealth.

Gipamahayag usab ni Soliman nga adunay 257 ka mga indibidwal ang nakapahimulos sa programa nga Balik-probinsya kung diin and DSWD naghatag ug tabang pinansyal alang sa libreng transportasyon nga nagkantidad ug P92,632.69.

Nagtabang kining programa nga Balik Probisya sa mga indibidwal o pamilya nga gustong mobalik sa ilang mga probinsya o laing lugar diin gusto kini manimuyo.(PIA-7/Maryknoll B. Lague Intern-CTU)

=============

P-Noy uyon makighinabi kabahin sa RH Bill: Sec Coloma

CEBU CITY, May 10 (PIA) --- Gimatood ni Presidential Communication Operations Group (PCOO) Secretary Sonny Coloma nga mosuporta si Presidente
Benigno Aquino III sa Responsible Parenthood and Reproductive Health (RP-RH) bill ug uyon kini nga makighinabi ngadto sa mga tawo nga anaay pagduda sa ilang hunahuna kabahin sa maong isyu.

Atol sa Philippine Finance Association (PFA) 13th Annual Convention sa Manor Camp John Hay niadtong imaging Biyernes, niingon si Coloma nga kon
hisgutan sa Presidente ang maong balaod iyang himoong pananglitan ang usa ka babaye nga iyang nahimamat sa Baseco, usa ka depressed nga lugar sa Tondo Manila, nga sa edad nga 16, inahan na kini ug adunay duha ka mga anak ug amahan niini usa pud ka 16 anyos.

“Kon lantawon nimo ang maong eksena, unsa may mosulod sa imong hunahuna? Asa man mokuha ug kwarta ang magtiayon aron ipalit ug pagkaon, kwarta aron makaskwela ilang mga anak? Mao kini ang mga problema nga kinahanglan nga tubagon sa gobyerno,” matod ni Coloma.

“Ang administrasyon nagdasig sa konsepto sa responsible parenthood and RH Bill, nga kami nituo nga makapresentar kini ug konkreto nga tubag sa konkreto nga problema sa katawhan. Naay uban nga nakiglalis kabahin ani, mapilosopikanhon man o mga prisipyo sa simbahan apan ang ang pangutana nagpabilin gihapon: Unsaon nato ang atong populasyon?” matod ni Coloma.

Giklaro usab ni Coloma nga ang RP-RH bill wala kini naghingalan sa numeral population target. Ang gitumbok lang niini mao ang usa sa mga probisyon sa ideal family size sa mga Pilipino nga duha ka mga anak ug wala kini nagsugo o nagimposar ug bisan unsa nga silot o ang pag-require sa mga ginikanan nga mohunong sa duha ka anak lamang.

“Ang gi-adbokasiya niini mao ang kabahin sa edukasyon, pagpasaka sa kaalam aron naay saktong spacing sa pagpanganak ilabi na kadtong mga pamilya nga nagpuyo ubos sa economic bracket,” pagklaro ni Coloma.

Matod ni Coloma nga ang desired fertility sa mga magtiayon nga mga Pilipino mao ang tulo ka mga anak apan ang actual nga fertility sa pagkakaron kay lima ka mga bata ug kini nga gap sa desired ug actual figure nagpakita lang sa kakuwang sa edukasyon kabahin sa isyu. (PIA-7/Chrisley Ann C. Hinayas, Intern-CTU)

=============

Mga mananagat sa CV andam makigtambayayong sa BFAR sa kampanya batok sa illegal nga pagpangisda

CEBU CITY, May 10 (PIA) --- Ang mga  lider sa grupo sa mga mananagat ang mipasalig nga andam silang makigtambayayong sa Bureau of Fisheries and Aquatic Resources (BFAR) alang sa hingpit nga pagwagtang sa ilegal nga pagpangisda sa tibuok rehiyon 7, kini atol sa ilang oathtaking ceremony niadtong Mayo 2 nga gipangulohan sa direktor sa BFAR 7 Andres Bojos.

Si Bojos namahayag nga ang mga lider nining mga grupo sa mananagat dako ug papel sa pagtabang pagsugpo sa mga illegal nga mga mananagat pinaagi sa paghatag ug impormasyon ngadto sa mga gagmayng mananagat kabahin sa saktong pagpangisda ug daling paghatod ug balita kabahin sa mga panghitabo sa kadagatan ubos sa ilang pagbantay.

Ang BFAR matud pa nagtuo nga dako ug matabang ang mga awareness campaign sa mga komunidad aron mahunog ang mga ilegal nga kalihokan palibot sa atong kadagatan.

Gidungag ni Bojos nga dili lamang ang pagpangisda ang angayng bantayan karon kundili lakip na ang pagpanguha ug mga coral reefs gikan sa ilawm sa kadagatan sa siyudad.

Lakip sa pamahayag ni Bojos, iyang gisaysay ang kabahin sa mga proyekto ug donasyon nga ilang nahatag ngadto sa mga Local Government Units (LGU) ug mga komunidad sa mga mananagat sa tibuok Central Visayas.

Kahinumdoman nga ang BFAR nagpadayong nagselebrar sa ilang Farmers’ and Fisherfolks’ Month ug adunay mga kalihokan nga ipahigayon sama sa coastal clean-ups, mangrove planting lakip na ang paglunsad ug mga livelihood projects.

Niadtong niaging buwan, ang BFAR nanguna sa pag-abli sa usa ka pasilidad sa Bohol nga nagkantidad ug duha ka milyon ka pesos kung diin ang mga mangingisda mamahimong mamuhi ug isda.

Ang BFAR usab misaad nga mohatag ug mga fish pens nga giigla sa pangan nga “payaos” ngadto sa siyudad sa Talisay.

Human sa maong seremonya, adunay gipahigayon nga coastal cleanup sa mga baybayon ug kadagatan sa siyudad sa Talisay. (PIA-7/Maryknoll B. Lague Intern-CTU)

Pantawid Pasada isip benepisyo sa mga tricycle drivers sa NegOr

            Dumaguete City, May 10 (PIA) – Negros Oriental tricycle drivers  milaum nga makadawat sa fuel cash assistance agig tabang sa gobyerno pinaagi sa  Pantawid Pasada Program (PPP) alang sa temporaryong kahupayan tungod sa pag-umento sa presyo sa krudo.

            Gipanguluhan sa Department of Energy (DOE), ang katuyuan sa programa  makahatag ug tabang sa mga transport sector sama sa jeepneys ug tricycles pinaagi sa pagpanghatag ug mgafuel cards ngadto sa mga jeepney operators ug drivers isip tabang sa inadlaw-adlaw  nga panggasto sa krudo.

            Sa miaging pagbukas sa Pantawid Pasada Communication Program sa Philippine Information Agency (PIA) sa Manila, matod ni Energy Secretary Rene Almendras ang cash assistance tabang sa gobyerno gimugna alang sa mga jeepney ug tricycle drivers nga maoy mas labawng naapektuhan sa pag-saka sa presyo sa gasolina.

            Pinaagi sa gitawag nga fuel card, susama sa ATM nga adunay sulod nga P1,050 alang sa mga jeepney drivers aron maoy ilang gamiton sa pagpalit ug gasolina sa mga gasolinahan.

            Matod pa niAlmendras ang nationwide public transport assistance program mubinipisyo sa 957, 643 ka tricycle franchise holders bisan pa nga sila wala pa isyuhi ug cards.

            Sa maong gidaghanong sa mga tricycles sa tibook nasod, gikinahanglang ilhon sa Negros Oriental ang mga rehistradong tricycles pinaagi sa ilang tagsa-tagsa ka local government units aron makabinipisyo sa maong tabang.

            Sa pagkakaron ang DOE nangita pa ug paagi o pitsa sa pag pang-apud-apod sa kwartang magamit sa pagpalit sa gasoline nga mukabat sa P150 kada tricycle driver.

            Ang pangulo sa DOE gapahimangno sa mga jeepney card holders nga dili walaon ang card tungod kay kani magamit sa pag-avail sa P1.50 isip discount kada litro sa transport lane sa mga kompanya sa krudo.

            Kini nga tabang sa mga tricycle ug jeepney drivers makatabang batok sa pag-umento sa presyo sa krudo, ilabi na karong summer period nga ang gidaghanon sa mga pasahero limitado lamang tungod sa panahon sa bakasyon, matod pa ni Almendras.

  

            Basi sa Executive order No. 32, series of 2011, ang Pantawid Pasada Program, mao ang pagminus sa kapobrehon ug dugang sa social development strategy sa nasudnong kagamhan sa katuyuan sa paghatag ug pinansyal nga tbang sa mga pampublikong transport sector pinaagi sa cash grants aron mapaubsan ang padayun nga pagtaas sa presyo sa krudo. (PIA NegOr/Jennifer Catan-Tilos/Myla Saldasal)