Birth Certificate gikinahanglan kaayo alang sa universal public kindergarten program sa DepEd
by: Juju S. Manubag
CEBU CITY, May 11 (PIA) - - - Ang birth certificate gikinahanglan kaayo alang sa magpasakop sa universal public kindergarten program karong ting-abli sa klase alang sa tuig 2011-2012.
Mao kini ang gipahibalo ni Dr. Carmelita Dulangon, ang Assistant Regional Director sa Department of Education (DepEd) sa paghinabi niini sa Philippine Information Agency (PIA).
Ang birth certificate ang magmatood sa edad sa bata ug itunol kini sa Hunyo o sulod sa tuig, matod pa.
Gipakasayod usab ni Dulangon nga karong Hunyo 6 ang abli sa klase ug pagasugdan na sa pag-implementar sa tanang publiko nga tulonghaan ang K+12program sa ilang buhatan alang sa tuig 2011- 2012.
Si Dulangon mihangyo nga karon pa lang ipaandam na ang mga birth certificate sa ilang kabataan kay kasagaran sa nahitabo sa makadaghanan anha na hikayon ug panahon na sa graduwasyon segun sa iyang nasinati sa nangaging mga katuigan.
Sa gikataho nga ang mga bata nga natawo sa Oktubre 31, 2006 o sa sayo pa nga petsa ang adunay katakus sa pagpasakop sa kindergarten.
Samtang kadtong natawo sa Oktubre 31, 2005 o sa sayo pa nga petsa, miagi sa kindergarten ug wala moagi ug kindergarten, may katakus para magpasakop sa Grade 1.
Sa laing bahin, si Dulangon nagkanayon nga ubos sa gipahigayon nga kampanya alang sa sayo nga pagpa-rehistro niadtong mo-kinder sa ting-abli sa klase karong Hunyo gipahimutang na niadtong Enero 29 dinhi sa Central Visayas .
Tungod niini, si Dulangon makigtambayayong sa PIA sunod semana diin anaa na usab ang tanang kadagkoan sa ilang buhatan nga makahatag ug katin-awan ug impormasyon sa katawhan nga buot makahibalo, mahayagan, madasig sa programa nga K+12 sa DepEd.
Sa pagka-karon matod pa ni Dulangon ang ilang hepe nga si Dir. Recaredo Borgonia atoa sa kaulohan alang sa semanang panagtigom o Mancom meeting ug ang ubang hepe atoa usab sa Pagadian City alang sa Pambansang Palaro.
Gihangop kaayo ni Dulangon nga makaapil sila sa ipahigayon nga forum sa PIA uban ang kadagkoan sa ilang buhatan. (PIA 7- Cebu )
===========
K+12 ipa-implementar na karong abli sa klase
By Juju S. Manubag
CEBU CITY, May 11 (PIA) - - - Ang K+12 nga programa sa Department of Education (DepEd) ipa-implementar na sugod karong ting-abli sa klase sa Hunyo 2011 hangtod sa 2012.
Mao kini ang gipahibalo sa Information Officer sa DepEd-7 nga si Dr. Clara Falconi sa usa ka pakighinabi sa Philippine Information Agency (PIA).
Si Falconi mitin-aw nga ang K+12 nga programa magsugod sa Kindergarten alang niadtong mga kabataan nga nag-edad ug singko (5) anyos, ubanan sa unom (6) ka tuig nga elementarya gikan Grade 1-6 alang sa mga bata nga nag-edad ug sais (6) hangtod onse (11) anyos; ubanan sa upat (4) ka tuig nga Junior High School Secondary o Grade 7 hangtod Grade 10 alang sa nag-edad ug 12 hangtod sa sa 15 anyos; ug sa idungag nga 2 ka tuig nga Senior High School o Grade 11 ug Grade 12.
Gawas sa awhag sa DepEd nga ipasakop sa Kindergarten ang tanang kabataan nga nag-edad ug singko (5) anyos karong ting-abli sa klase sa Hunyo alang sa tuig 2011-2012, gitino usab ni Falconi nga kadtong mo-Grade 6 karong abli sa klase mao ang makatagamtan sa K+12 nga programa sa DepEd diin madungagan ug duha ka tuig ang ilang pagtung-tong sa hayskol.
Apan ang kadtong mo-1st year sa hayskol sa pagpasakup inig abli sa klase karong Hunyo, dili maapektohan sa K+12 nga program sa DepEd, matod pa ni Falconi.
Si Falconi midugang pag-ingon nga ang K+12 nga programa alang lamang niadtong motungha sa publiko nga mga tulonghaan ug kadtong magpasakop sa pribado nga tulonghaan dili maapektohan sa dugang nga 2 ka tuig sa hayskol.
Ang dugang nga 2 ka tuig sa hayskol mao ang panahon nga hatagan ang mga tulon-an ug lainlain nga mga ‘career o livelihood tracks’ alang sa ilang kahanas ug pagtulon-an.
Tinguha sa K+12 ang pag-andam sa mogradwar ug hayskol alang sa kalibutanong pagpanarbaho, kolehiyo nga edukasyon ug sa ‘global arena’, pagpanapos ni Falconi. (PIA 7-Cebu)
===========
“Isulong ang breastfeeding. Tama. Sapat. Ekslusibo” ang tema sa Nutrition Month 2011CEBU CITY, May 11 (PIA) --- “Isulong ang breastfeeding. Tama. Sapat. Ekslusibo” mao kini ang tema sa Nutrition Month nga ipahigayon sa buwan sa Hulyo karong tuiga.
Kini sumala sa direktor National Nutrition Council (NNC) Parolita Mission sa usa ka pamahayag ngadto sa mga lokal nga media.
Ug isip kabahin sa maong selebrasyon, magpahigayon ang NNC ug usa ka photo contest sa tibuok Central Visayas aron sa pagdasig sa katawhan kalabot sa impotansya ug kaayuhan sa breastfeeding.
Matud sa NNC, aduna pay dugang mga kalihokan ang pangulohan sa ilang buhatan kauban ang mga miyembro sa Media Infromation Network for Nutrition and Development (MIND) 7 ug kini ilunsad dungan sa mahitabong General Assembly karong Mayo 13 sa Harold’s Hotel dinhi sa Siyudad sa Sugbo.
Dungan sa maong kalihokan, ipahigayon usab ang oath taking ceremony sa mga opisyal sa MIND-7 nga kasamtangang gipangulohan ni DYLA Station Manager Jun Tagalog.
Kalabot usab niining dakong kalihokan sa NNC, magpahigayon kini ug halapad nga information drive sa tibuok rehiyon 7 kalabot sa breastfeeding aron pag-awhag sa mga inahan ug kababayen-an nga ipaubos sa breast feeding ang mga gagmayng bata alang sa mas himsog nga pagtubo ug maayo nga kaugmaon.(PIA-7/Maryknoll B. Lague Intern-CTU)
=============
Giawhag ang mga scouts sa pag-apil sa jamboree
CEBU CITY, May 10 (PIA) --- Ang Boy Scout of the Philippines (BSP) Agusan Council Executive Board muhatag sa lokal nga mga scouts ug scouters ug tsansa aron maila-ila ang ilang kaatbang gikan sa mga nagkalain-laing konseho ug mga silingan nga nasud.
Labot niini nga proseso ang posibilidad nga makakuha sila ug merit requirements aron pagsaka sa scouting ladder.
Atol sa Provincial Peace and Order Council (PPOC) nga panagtigum nga nahitabo sa dili pa dugay, ang Department of Education (DepEd) Agusan del Norte Education Program Supervisor Iglucito Duquesa mi-anunsiyo nga ang BSP Agusan Council miawhag sa mga miyembro sa pag-apil sa 15th National Scouts Jamboree and International Advancement Camp nga mahitabo sa Philippine Scouting Center for Asia-Pacific Region, sa Mt. Makiling, Los Baños, Laguna karong umaabot nga Mayo 25-31, 2011.
Si Duquesa miingon nga aron makaapil sa maong jamboree, ang aplikante kinahanglan bag-uhay nga rehistrado sa boy/senior scout ug dili ubos sa edad nga 11 o labaw nga 17 ½ ang edad sa dili pa ang pagsugod sa jamboree.
Gikinahanglan nga siya nagkupot ug bisan 2nd class sa scout badge o kapareho niini, ug adunay maayo'ng panglawas nga anaay kamatuoran gikan sa doctor.
Maayo nga aduna usab kini camping experience bisan usa ka tuig lamang ug igong kaalam sa scouting, ug nakaapil sa pre-jamboree training sa konseho.
Sa mga scouters, kinahanglan sila rehistrado sa BSP; nakaserbisyo usab isip Unit Leader o Assistant Unit Leader bisan duha ka tuig ug adunay good moral character.
Gikinahanglan usab nga maayo’g panglawas nga adunay kamatuoran gikan sa doctor ug bisan duha ka tuig nga camping experience ug igong kaalam sa scouting; ug naka-apil sa pre-jamboree training sa konseho.
Adunay bayad nga Php 9,500.00 alang sa rehistro sa scout ug Php 9,600.00 sa mga adult leader ang makuha sa kada muapil aron pagtapal sa transportasyon, pagkaon, jamboree fee, materyales sa kampo, kagamitan, ug lain pang mga bayrunon.
Apan, ang mga gastuon nga kalabot sa pag-apil kuhaon sa School Board/Local School Funds/School MOOE apil sa kasagarang accounting ug auditing rules ug regulations.(PIA-7/Ailene G. Limutan, Intern-CTU)
============
P-Noy magpalambo sa biyaheng kadagatan ug kahanginan
CEBU CITY, May 10 (PIA) --- Presidente Benigno Aquino II nangita ug paagi aron mas mapalambo ang mga biyahe sa kadagatan ug kahanginan alang sa pagdali sa paglihok sa mga katawhan ug pagpadala ug pag-abot sa mga produkto ngadto sa Brunei, Indonesia, Malaysia ug ang Pilipinas, kini matud pa sa opisyal sa palasyo.
Secretary Ricky Carandang, head sa Presidential Communications Development and Strategic Planning Office (PCOO) miingon nga anaa nay mga plano alang sa pagpalambo pa sa mga biyahe sa kadagatan ug kahanginan ngadto sa mga kanasuran sa BIMP- East Asian Growth Area.
Ang gustong tutukan ni Aquino mao ang pagpalambo pa sa programa sa BIMP-EAGA, dugang ni Carandang.
Si Aquino maoy nangulo sa 7th BIMP-EAGA Summit sa miaging Dominggo isip kalabot sa iyang pagbisita sa 18th Association of Southeast Asian Nations sa Jakarta Convention Center.
Matud pa ni Carandang, anaay plano nga ikonsidera ang pagpalambo sa pagbuhat sa balaud sa upat ka nasud tungod sa mas nagkabag-o nga pamaagi sa biyaheng sektor. (PIA-7/Ailene G. Limutan, Intern-CTU)
===========
DOH nakadawat og 175 ka ‘vaccine refrigerators’ gikan sa USAID
CEBU CITY, Mayo 10 (PIA) --- Department of Health (DOH) nakadawat og 175 ka yunit nga refrigerators gikan sa United States Agency for International Development (USAID).
Ang maong mga refrigerators gamiton alang sa pagtipig sa mga vaccines. Kini iapod-apod ngadto sa mga pangpublikong kahimanan sa DOH sa tibuok nasod. Apil na niini ang 23 ka yunit nga alang sa Autonomous Region sa Muslim Mindanao.
Health Secretary Enrique T. Ona naka obserbar nga kasagarang pabugnawanan sa vaccines sa mga probinsya gikinahanglan ng ilisan kay naguba kini niadtong bagyong Ondoy ug Pepeng.
Ang pagbutang sa mga vaccines sa refrigerator mao ang pagmentenar sa kusog ug malamposon nga programa sa immunization.
Secretary Ona miingon nga ang paghatag ug refrigerators sa USAID nakatabang kaayo ug dako sa departamento ilabina sa pagpadayon nga kampanya batok sa tipdas kay nagkinahanglan kini ug maayong tipiganan alang sa mga vaccines.
Matod ni Ms. Ann Hirschey sa USAID, ang paghatag nila sa maong pabugnawanan sa mga vaccines maoy tubag sa kalisod sa kahimanan sa buhatan sa panglawas. Ang paghatag sa maong mga yunit gikan ni Secretary Hilary Clinton sa Estados Unidos.
Agig tubag niini, mipasalig si Sec. Ona sa pagtudlo, pagmentenar og pag-apod-apod sa maong mga yunit ngadto sa nga nagkinahanglan niini.
Sa pagkakaron, adunay gikatahong 5,186 kaso sa tipdas sa tibuok nasod gikan sa Enero 1 hangtod sa Abril 16. Adunay 14 na nga namatay niini.
Ang labing daghang kaso sa tipdas nagagikan sa National Capital Region nga gisundan sa Central Luzon.(PIA-7/Hazel F. Gloria)
============
Budget Dep’t mihatag sa DepEd ug P7B alang sa mga classrooms
CEBU CITY, May 10 (PIA) --- Mokabat ngadto sa P7B ang gihatag sa Budget Department ngadto sa Department of Education alang sa pagpatukod ug pagpausab sa 8,997 ka mga bag-o ug guba nga mga classrooms sa tibuok nasud, kini matud pa ni Budget Secretary Florencio Abad niadtong Lunes.
Sigun ni Abad, ang pondo gikuha gikan sa P11.29 bilyon nga kantidad nga gigahin sa gitawag nga “lump sum fund” sa tumong nga mahatagan ug maayong mga pasilidad ug ekipo alang sa kaayuhan sa edukasyon sa nasud.
Giklaro sa Budget Chief nga ang kantidad nga gigahin dili lamang alang sa pagpatukod ug pagpaayo sa mga tunghaan kundili apil usab niini ang pagpamalit ug mga gamit alang sa eskwelahan.
Base sa natala, 563 ka milyon gikan sa kinatibuk-ang kantidad ang gigahin alang sa Central Visayas.
Base sa kwentada sa DepEd, ang 7 ka bilyon ka pesos makapahimo ug makapausab sa 8,997 ka mga lawak tunghaan ug gituohang makapahiluna kini ug dili muobos sa 404, 865 ka mga estudyante sa tibuok nasud.
Giklaro ni Abad nga kining maong dakong proyekto nagsubay sa saad ni Presidente Aquino ngadto sa katawhan nga hatagan ug dakong pagtagad ang edukasyon aron mapausbaw ang oportunidad nga mahatag sa mga kabatan-onan sa pagpangita ug trabaho.
Iyang gidugang nga sa tuig 2011, ang budget nga gigahin sa DepEd gikan sa P32.3B giusbawan kini ngadto sa 207.3 ka biyon ka pesos sa tuyo nga mahatagan ug dugang pondo ang pagpatukod ug mga classroom, libro ug pagdawat ug dugang mga magtutudlo alang sa mga publikong eskwelahan sa nasud.
Plano sa Deped nga hatagan ang matag classroom sa mga pangpublikong eskwelahan sa elementarya ug 23 ka lamesa, 46 ka lingkoranan .
Samtang sa matag lawak sekondarya hatagan ug minimum nga 45 ka mga armchairs.
Aduna usa’y pondo nga gigahin alang sa mga lamesa ug lingkoranan sa mga magtutudlo, lakip na ang mga blackboards ug uban pang gamit nga kinahanglan sulod sa tunghaan.(PIA-7/Maryknoll B. Lague Intern-CTU)
===========
Siyudad sa Sugbo mas motutok sa website alang sa pagpausbaw pa sa turismo
CEBU CITY, May 10 (PIA)--- Wala na ang mga paid advertorials sa Magellan’s Cross o sa mga hotels ug sa mga kan-anan sa siyudad sa Sugbo, ang web address makahimo na niini, kini ang mga pahayag ni Bise Mayor Joy Augustus Young.
Si Young, nga mao ang chairman sa Cebu City Commission niingon nga ang grupo gustong hatagan ug dakong pagtagad ang ilang site nga mao ang www.cebucitytourism.com alang sa pagpausbaw pa sa turismo sa Sugbo.
Dako ang pagtuo ni Young nga mas nibayad pa sila ug dako nga kantidad sa mga advertisements ug mga billboards nga pwede naman sila karon mobayad nalang sa mga technician aron pagmintinar sa tourism website sa Sugbo.
Ang bise mayor nanan-aw na sa mga nagkalain-laing mga tourism websites diri sa nasud ug sa gawas sa nasud aron matabangan sila sa pagpausbaw pa sa tourism website sa siyudad sa Sugbo.
“Ang among website dili man bati, dili pud gwapo,” matod ni Young, “apan kinahanglan pa kini ug dugang nga improvement.”
Matod ni Young nga kasagaran sa mga foreign tourists motan-aw gayud sa Internet kon mopili sa ilang mga travel destinations ug importante nga ang Cebu makahatag usab sa maong informative page.
Gipananglitan ni Young nga ang website gikinahanglan nga adunay mapa nga kon mo-type sa destinasyon ang tawo, i-magnify niini ang maong lugar ug mohatag sa mga detalye sa mga silangang kalsada niini.
Sa mga hotels ug mga pension houses, ang website kinahanglan usab nga mopresenta sa mga detalye sa hotel sama sa presyo niini, kon pila ka mga stars ug mga amenities niini.
Gusto lang ni Young nga ang maong website makaadvertise sa mga promos nga makapaengganyo sa mga turista nga moari sa Sugbo. (PIA-7/Chrisley Ann C. Hinayas, Intern-CTU)
===========
South Korea mohatag ug 60 ka mga computers sa siyudad sa Sugbo
CEBU CITY, May 10 (PIA)--- Ang siyudad sa Yeosu sa South Korea mohatag sa siyudad sa Sugbo ug 60 ka mga computers.
Kini sigun pa ni Konsehal Roberto Cabarrubias, usa sa tulo ka mga opisyales kinsa nibisita sa Korean City aron sa pagtambong sa tinuig nga Great Turtle Ship Festival niadtong Mayo 5- 8.
Siya nagkanayon nga ang ilang biyahe mas mabungahon kaysa sa ilang gidahum tungod kay dili lamang sa gisaad nga 60 ka computer, apan tungod kay usa ka grupo sa mga doctor sa Korea ang mipasalig nga mopahigayon ug medical mission dinhi sa siyudad sa Sugbo karong Hunyo nga kapuslan sa 2,000 ka mga lumolupyo.
Si Cabarrubias nibutyag nga ang mga computers iapod-apod sa mga tunghaan sa amihanan ug habagatang distrito.
Iyang gidugang nga ang mga computers nga madawat sa siyudad nagpanuig pa ug tulo ug maayo pa ang kondisyon.
Siya niingon nga abagahon sa modonar ang tanang galastuhan sa pagpadala padung nganhi ug ang siyudad igo na lang modawat niini atol sa turnover. Ang mga computer gidahum nga moabot sunod buwan.
Sa Hunyo, sumala ni Cabarrubias, usa ka grupo sa Korean Doctors gikan sa siyudad sa Yeosu ang mopahigayon ug duha ka adlaw nga medical mission.
Ang mga Korean Doctors tungaon sa duha aron usa sa amihanang distrito samtang ang laing usa ka grupo adto sa habagatang distrito. Sila abagan sa City Health Department.
Ang mga Korean Doctors nangayo na sa siyudad sa lista sa mga tambal nga panginahanglanon ug ang gibana-bana nga galastuhan tungod kay sila ang moabaga sa tanang galastuhan. (PIA-7/ Angie P. Amodia, Intern-CTU)
==========
DOLE adunay 1M ka mga bakanteng trabaho nga itanyag karong tuiga
CEBU CITY, May 10 (PIA) --- Ang Department of Labor and Employment (DOLE) nagsaad nga magtanyag ug usa ka milyon nga bakanteng trabaho alang sa mga bag-ong graduates, displaced workers ug jobseekers karong tuiga.
Si Labor Secretary Rosalinda Baldoz namahayag nga siya mipagawas na ug kamanduan alang sa mga opisina sa DOLE sa tibuok nasud sa paghikutar kauban sa ilang mga empleyado sa ilang lugar aron hingusgan ang ilang mga gitanyag nga job programs.
Usa matud pa sa mga pamaagi nga gibuhat sa DOLE gawas sa pagpahigayon ug mga jobfares mao ang paggamit sa Phil-Jobnet, usa ka internet based job ug applicant matching system sa DOLE, aron sa mas dali ug mas paspas nga pagpadangat sa kadaghanan sa mga impormasyon kabahin sa pagpanarbaho ug paghatag sa katawhan ug oportunidad nga daling makakita ug maayo ug regular nga trabaho.
Sigun ni Baldoz, tumong sa DOLE nga mokabat sa usa ka milyon kapin nga trabaho ang ilang matanyag ngadto sa mga aplikante tibuok nasud.
Siya miingon usab nga ang mga regional office sa DOLE kinahanglang hatagan ug quota aron makab-ot ang tumong nga usa ka milyon ka mga bakanteng trabaho.
Giawhag usab ni Baldoz ang mga Public Employment Service Office (PESO) nga makig-alayon sa mga buhatan sa DOLE kalabot sa pagpamili ug mga benepisyaryo sa ilang Special Program of the Employment of Students (SPES).
Kini tungod kay ang gobyerno naggahin ug dugang P168 ka milyon ka pesos para sa programa sa SPES aron mapatuman ang paghatag ug trabaho sa 52,000 mga estudiyante nga naglisod paggasto sa ilang edukasyon.
Kining maong mga programa sa DOLE kabahin sa ilang pagpaningkamot nga mapa-ubsan ang gidaghanon sa mga walay trabaho sa nasud ug alang usab sa kaayuhan sa ekonomiya sa Pilipinas.(PIA-7/Maryknoll B. Lague Intern-CTU)
===========
Rama gidasig ang mga negosyante sa pagsuporta sa waste segregation dinhi sa Sugbo
CEBU CITY, May 10 (PIA)--- Si Cebu City Mayor Michael Rama nihangyo sa tanang mga business establishments sa downtown area nga makig-alayon sa ilang kampanya kabahin sa proper disposal sa mga basura diri sa siyudad sa Sugbo.
Kini usa ka personal nga hangyo ni Rama ngadto sa mga representante sa mga nagkalain-laing mga establisemento atol sa ilang panagtigom kauban ang Cebu Hall Legislative Building kagahapon.
Si Rama ug ang mga opisyales sa Department of Public Services nipatin-aw sa mga representante sa mga establisemento kabahin sa pagpangusog sa siyudad sa pagpaimplementar sa polisiya nga “no segregation, no collection”.
Nipadayag ang mga representante sa ilang pasalig sa pagsuporta kang Rama kauban sa ilang pag-uyon sa slogan sa mayor nga mao ang, “Together we make things happen.”
Giangkon usab ni Rama nga ang siyudad nag-atubang karon ug mga problema kabahin sa saktong paglabay sa mga basura tungod kay ang katawhan mobalibad pag-alayon kanila.
Matod ni Rama nga ang mga membro sa Barangay Environment Officers naglisod sa pagpaimplementar sa maong balaod tungod kasagaran sa mga nilapas niini nagsakay ug mga sakyanan.
Ang mga DPS trucks dili mokolekta sa mga wala na-segregate nga mga basura.
Ang Lunes, Miyerkules ug Biyernes gi-skedyul sa gobyerno alang sa pagpangolekta sa mga malata nga basura.
Ang Martes, Huwebes ug Sabado alang usab sa mga di-malata nga mga basura. (PIA-7/Chrisley Ann C. Hinayas, Intern-CTU)
No comments:
Post a Comment