DILG miawhag sa LGUs sa pagdumala sa lista sa “Pasada beneficiaries” CEBU CITY, May 8 (PIA) --- Ang Department of Interior and Local Government (DILG) sa Tagbilaran miawhag sa mga local government units sa pagdumala aning pagpanghatag sa lista sa mga benepisyaryo sa programa sa gobyerno nga Pantawid Pasada alang sa mga tricycle drayber. Kini aron masugdan na ug paglihok sa DILG Bohol ang pagproseso aning P150.00 nga hinabang alang sa mga drayber, mga franchise owners ug mga operator sa dili pa ang deadline. Matud pa sa DILG Provincial Director Ma. Louella Lucino, karong higayuna gani, kinahanglang anaa na silay ensaktong lista sa mga benepisyaryo isip basehan alang sa pagkuha sa ensaktong pundo. Mipuno usab si Lucino nga kinahanglang magbutang sila ug Pantawid Pasada help desks aron anaay maduolan ang mga benepisyaryo sa ilang mga pangutana. Si Lucino mipabungat sa iyang hangyo didto sa Kapihan sa PIA sa miaging huwebes mahitungod sa posibilidad nga ang cash assistance dili mahatag sa buwan sa Mayo nga naka-plano. Dugang ni Lucino nga ang gobyerno migahin ug P3.4M alang sa cash assistance sa Central Visayas, ang hinabang nga mudiretso sa halos P4,600 ka mga tricycle operators sa siyudad sa Tagbilaran ug laing beynte uno (21) ka mga lungsod sa tibuok Bohol. Tungod sa nagpadayung pagtaas sa gasoline sa tibuok kalibutan, ang gobyerno sa Pilipinas naglunsad aning Pantawid Pasada Program. Si Lucino miingon nga ang LGUs kinahanglang mu-certify sa mga benepisyaryo ug ang local franchising office, ang mayor ug bise mayor kinahanglan usab mupirma sa lista, diin ang town council gikinahanglan mo authorize sa mga mayor nga maoy mupirma sa memorandum of agreement sa tigdumala ani nga programa. (PIA-7/Ailene G. Limutan, Intern-CTU) ============

DepEd ni-isyu ug mga guidelines kabahin sa paggamit sa Rehabiltation Fund

CEBU CITY, May 8 (PIA)--- Ang Department of Education (DEpEd) Secretary nga si Armin Luistro ni-isyu ug mga guidelines sa pagpaakses sa P550 ka milyon nga Quick Response Fund (QRF) alang sa pagpadali sa konstruksyon, pagpa-ayo ug pagrehabilitate sa mga skwelahan nga naagi-an ug nabiktima sa kalamidad.

Iyang gihatagan ug dakong importansiya ang standby emergency fund aron dili mapalyar ang mga klase ug gimando usab ni Luistro ang pagreview sa procurement process aron siguradohon ang maayong paggamit sa gialokar nga budget.

Sigon pa niya nga kinahanglang unahon ang mga programa ug mga proyekto nga makapausbaw sa teaching and learning process.

Ang mga kalamidad nga naglakip sa QRF nga gilista sa mga nagpakabana nga mga ahensiya sa gobyerno mao ang sunog, baha ug linog. (PIA-7/Chrisley Ann C. Hinayas, Intern-CTU)

============ 

PNoy mangulo sa “Ehersisyo Pangkalusugan” sa kauluhan karong Mayo 15

CEBU CTIY, May 8 (PIA) --- Aron sa pagdasig sa kadaghanan sa pagsalmot sa programang ‘Ehersisiyo Pangkalusugan” sa Department of Health, si Presidente Benigno S. Aquino kauban si Health Secretary Enrique Ona maoy manguna karong sunod Dominggo, Mayo 15, sa “Ehersisiyo Pangkalusugan Para sa Lahat 2011” nga ipahigayon ngadto sa Quezon Memorial Circle sa siyudad sa Quezon.

Gidasig sa DOH ang tanang gustong musalmot nga mahimong tipik ug kabahin sa maong kalihokan kay tungod matud pa, ang ehersisyo walay gipili nga edad ug siguradong maghatag ug kaayuhan sa panglawas.

Lakip sa mga musalmot sa kalihukan mao ang mga opisyales sa gobyerno, local government units(LGU), non-government units(NGO), pangpubliko ug pribadong ospital ug eskwelahan, mga medical professionals ug mga pribado nga mga indibidwal.

Kabahin sa kaayohan nga mahatag sa pag-ehersisyo, gidasig usab ni Ona ang katawhan sa pag-apil sa mga kalihokan nga may kalabot sa pagbisikleta, jogging, walking, aerobics, volleyball, badminton ug lain pang mga alternatibong paagi sa pag-ehersisiyo.

Sumala sa natala sa Food and Nutrition Research Institute (FNRI)- National Nutrition Health Surveys gikan 2003 ngadto sa 2008, dako nga porsyento sa mga katiguwangan karon ang wala naghatag ug interes sa pag-ehersisyo ug lain pang kalihokan nga makatanang alang sa kaayuhan sa panglawas.

Base sa record, 82.1 ka porsyento (8 sa 10) ka mga indibidwal ang adunay ubos nga lebel sa pag-ehersisyo matag-adlaw busa mao kini ang nagdasig sa DOH sa pagorganisar sa sama niini nga kalihokan. (PIA-7/Maryknoll B. Lague Intern-CTU)

===========

Konseho sa Sugbo nihangyo sa DOT sa pagpuksa sa mga illegal tour operators

CEBU CITY, May 8 (PIA)--- Ang Cebu City Council’s committee on tourism nihangyo sa Department of Tourism (DOT) ug ang city tourism commission aron sa paghimo ug aksyon batok sa nagkadaghan nga mga illegal tour operators ug mga tour guides nga nikuha na sa mga kinitaan sa mga lehitimong mga travel agencies.

Sa iyang report, si Councilor Alvin Dizon, vice chairman sa committee on tourism, nirekomenda ngadto sa DOT ug sa Cebu City Tourism Commission nga tan-awon ang mga sumbong sa Cebu Asociation of Tour Guides.

Bag-ohay lang ang CAT-G nireklamo ngadto kang Councilor Margarita “Margot” Osmena kabahin sa nagkadaghan nga mga illegal tour operators ug mga tour guides sa siyudad.

Ang mga lehitimong mga tour operators nihangyo sa konseho sa siyudad nga magmugna ug mga pamalaod aron sa pagwala sa mga ilegal nga mga aktibidad sa dili mga akreditadong mga tour operators ug mga tour guides tungod maapektar kini sa ilang negosyo.

Matod ni Dizon nga ang DOT ug ang city tourism commission angayan makighinabi sa mga membro sa CAT-G aron matino kon unsang mga solusyon ang anagy idapat sa maong problema ug aron usab makatanyag ug mga proposals kabahin sa pagpangusog sa asosasyon batok sa mga dili lehitimong mga operators.

Ang mga lehitimong mga tour operators ug guides kinahanglan mo-undergo ug mga trainings nga gidumala sa DOT ug gikinahanglan usab sila mangayo ug permit gikan sa Cebu City Tourism Council.

Ang mga lehitibong mga tour operators gusto nga ang siyudad magmugna ug mga polisiya kabahin sa pagpaimplementar sa Tourism Act of 2009  sa local nga lebel nga nag-require sa mga tour operators nga anagayang maakreditado  sila ug aron maprotektahan usab ang industriya ug mapugngan ang mga profiteers sa pagbintaha sa uban.

Nirekomeda si Dizon  sa pag-review sa mga existing tourism ordinance aron matino kon unsaon mamahimong mahinungdanon ang mga ordinansa alang sa mga bag-ong mga hagit nga giatubang sa industriya sa turismo. (PIA-7/Chrisley Ann C. Hinayas, Intern-CTU)

===========

DOH nipasidaan sa publiko kabahin sa dengue

  

CEBU CITY, May 8 (PIA )---Tungod sa 115 na ka mga indibidwal ang namatay tungod sa dengue karong tuiga, si Health Secretary Enrique Ona kagahapon nipasidaan sa publiko nga dili mokompiyansa sa maong sakit ilabi na sa panahon sa ting-init.

Sigon pa ni Ona nga maayong buhat ang tanang pamaagi aron sa pagwala sa mga lamok tungod ang dengue usa ka year-round nga sakit.

Matod pa niya nga bisan unsang orasa makadungog ug mga kaso sa dengue sa bisan asa nga lugar sa Pilipinas ug ang dengue kanunay nga naa ra sa palibot, mao nga angayan gayud nga ipadayon sa katawhan ang pagpanglimpyo sa ilang kalikopan.

Base sa mga rekord sa Department of Health (DOH), nipakita kini nga gikan pag-Enero hangtod Abril 9, 2011, adunay natalang 18,885 ka mga kaso sa dengue lakip na ang 115 nga namatay tungod niini.

Kini nga tala nagpasabot nga 5.24 porsento ang gisaka kon itandi sa 17,945 nga nakalista nga mga kaso atol sa paparehong mga bulan sa niaging tuig.

Sigon sa DOH Assistant Secretary ug director sa National Epidemiology Center nga si Dr. Eric Tayag nga bisan sa ting-init adunay posibilidad nga ang mga kaso sa dengue mosaka.

Dugang pa niya nga kon adunay kakulangan sa tubig, ang katawhan lagmit mopondo ug tubig sa mga kontiner o sa mga sudlanan nga walay mga takob nga maoy lugar sa pagpasanay sa mga lamok.

Aron pagpangusngan pa ang pagkombate batok sa dengue, ang DOH mopalit ug Mosquito Ovicida/Larvicidal (OL) trap system sa Department of Science and Technology.

Kining OL trap system adunay gamay nga itom nga plastik kontiner nga adunay tubig ug organic pellets ug naay piraso nga lawanit.

Ang mga pellets isagol sa tubig aron ang tumoy sa lawanit matugsaw. Ang mga lamok nga dali madani ug solusyon, magpundok didto sa kahoy ug adto mangitlog apan mamatay ra pud.

Ang DOH nagplano nga moapud-apud niining mga mosquito traps sa mga lugar kon diin aghan ang kaso sa dengue.

Nakadesisyon ang DOH nga i-extend pa nila ang ilang kampanya kabahin sa door-to-door nga pagbakuna batok sa tipdas ug German measles o rubella hangtod sa Hunyo 4 aron malabot pa ang 6.2 ka milyon nga mga bata nga wala makapahimulos sa libreng bakuna.

“Ang tinguha sa programa mao ang makaabot sa 95 nga porsento nga naglakip sa mga takos nga mga bata sa tibook nasud isiip tipik sa Millenium Development Goal number 4 nga mao ang pagminos sa pagkasakit sa mga bata ug ang pagkamatay.” matod ni Ona.  (PIA-7/Chrisley Ann C. Hinayas, Intern-CTU)

============= 

Mga proyekto sa RDC-7 kinahanglang paspasan: Rama

CEBU CITY, May 8 (PIA )--- Si Cebu City Mayor Michael Rama gustong papaspasan ang pagpaimplementar sa mga proyekto nga gi-endorso sa Regional Development Council (RDC-7) ngadto sa National Economic and Development Authority (NEDA).

Si Rama nga bag-ohay lang natudlo isip chairman sa RDC Central Visayas niingon nga importante nga mapaimplementar dayon ang mga proyekto sa rehiyon nga buyon sa mando sa organisasyon sa pagpadali sa pagpausbaw sa ekonomiya.

Giangkon sa NEDA-7 director nga si Marlene Rodriguez nga adunay mga proyekto nga gi-endorso ang RDC-7 apan mokabat pa kini ug taas nga panahon sa dili pa kini mapaimplementar.

Lakip sa maong mga proyekto mao ang North Coastal Road ug Cansaga Bay bridge sa Barangay Paknaan sa siyudad sa Mandaue.

Matod ni Rodriguez nga human maendorso ang mga proyekto naa pa kini daghang agian sama sa mga pre-feasiblity studies, pila ka tuig nga mga feasibility studies ug ang paprepara pa sa detailed engineering ug ang pagkuha sa pondo alang sa proyekto ug kini nga mga proseso ang nakadugay sa pagpaimplementar sa mga proyekto.

Sa dili pa i-endorso ang proyekto ngadto sa NEDA ang RDC usab mopahigayon ug evaluation nga maglangkob sa pagtuon pagbalik sa technical, social, pinansyal ug economic vialibity sa mga proyekto. 

Ang RDC naglangkob sa mga gobernador, mga mayor sa mga siyudad, mga regional directors sa ahensiya sa nasyonal nga gobyerno sa Central Visayas ug ang mga pangulo sa nagkalain-laing mga sectoral technical committees. (PIA-7/Chrisley Ann C. Hinayas, Intern-CTU)

==========

Smoking ban sa Sugbo, gidayeg

CEBU CITY, May 8 (PIA)--- Tungod sa padayong pagpangusog sa gobyerno sa Sugbo kabahin sa ilang adbokasiya sa pagdili sa pagpanigarilyo sa pampublikong mga lugar sulod sa siyudad, ang mga sektor sa negosyo sa Sugbo nakadayeg kanila human nipasar ang maong ordinansa sa konseho sa siyudad.

Matod sa presidente sa Cebu Chamber of Commerce and Industry nga si Samuel Chioson nga ang maong ordinansa makabenepisyo sa kadaghanan ilabi na sa mga dili manigarilyo nga mabiktima lang sa second hand smoking.

Dugang pa niya nga ang mga sektor sa negosyo gikinahanglang motuman sa maong ordinansa ug motagana ug lugar alang sa smoking area.

Sigon usab sa presidente sa Cebu Business Club Presidente nga si Dondi Joseph nga dako ang epekto sa anti-smoking ordinance sa pagproteher sa panglawas sa katawhan.

Apan matod niya tungod sa bag-ong ordinansa temporaryo usab kini nga makaapekto sa mga establisamento sa mga negosyo.

Na-aprobahan ang bag-ong ordinansa human nabantayan sa konseho sa Sugbo nga ang mga ordinansa sa anti-smoking kalabot sa Republic Act 9211 o ang Tobacco Regulations Act in 2003 gibaliwala lang sa publiko.

Bisan pa man ug naay nasyonal ug lokal nga mga balaod sa pagdili sa pagpanigarilyo ug pagpamulta kon naa sulod sa pampublikong mga sakyanan ug mga edipisyo, padayon gihapon ni nga nikatap ug tungod niini nakaapekto kini sa kalawasan sa publiko ilabi na kadtong mga mabdos ug mga bata nga hinay pa ang immune system.

Ang Cebu City’s Comprehensive Anti-Smoking Ordinance nagdili sa pagpanigarilyo sa mga publikong mga lugar apil na sa mga terminal, estasyon sa bus, conference halls ug mga kan-anan.

Gi-ban usab ang pagpanigarilyo sulod sa mga opisina sa gobyerno, eskwelahan, study centers, kalingawang mga pasilidad alang sa mga nag-edad ubos sa 18, gas stations, mga ospital ug mga tambalanan.

Sigon sa bag-ong ordinansa, ang molapas niini moatobang ug pagkapriso sulod sa unom ka buwan ug tres mil ka pesos nga multa. (PIA-7/Chrisley Ann C. Hinayas, Intern-CTU)

===========

CV Nutrition Council molunsad ug regionwide media campaign batok malnutrisyon

CEBU CITY, May 8 (PIA) --- Ang National Nutrition Council (NNC) sa Rehiyon 7 mupahigayon ug media launch aning tri-media advocacy campaign diin madala pinaagi sa Media Information Network for Nutrition and Development (MIND7) karong Mayo 13 sa siyudad sa Sugbo.

Alang sa pag-ila sa papel aning mga media practitioners aron sa pagsulbad batok sa problemang malnutrisyon ug kakuwang sa pagkaon, ang MIND 7 nabuhat sa NNC aron mapalapdan ang pagpamudpud ug impormasyon mahitungod sa saktong nutrisyon ngadto sa publiko, mao kini ang anaa sa sulat ni Jun P. Tagalog, general manager sa Vimcontu Broadcasting Corp. nga nakabase sa siyudad sa Sugbo.

Ang mga kalihukan sa ipahigayon nga kampanya sa tibuok tuig manghinlabot ug mga radio plugs diin ipagawas sa mga miyembrong istasyon AM ug FM sa MIND 7, kalabot sa maong plano ang animation aning mga prutas ug utanon, crossword puzzle ug comic strip sa duha ka lokal nga vernacular dailies ug pinaagi usab sa blogs ug mga artikulo sa internet.

Usa usab ka photo contest sa mga photojournalists sa rehiyon ang ipahigayon sa parehong adlaw, apil nausab ang General Assembly sa mga miyembro sa MIND 7 matud pa sa suwat.

Ang MIND 7 naglakip kini sa mga photojournalists sa rehiyon nga naggikan sa print, radyo ug t.v. Apil usab sa mga miyembro niiini ang mga information officers nga naggikan sa ahensya sa gobyerno, mga local government units nga nanghinlabot sa pagkaon ug nutrisyon ug mga debelopmental nga isyu. (PIA-7/Ailene G. Limutan, Intern-CTU)

===========

Muslim traders nangayo ug lugar kapanindahan sa Cebu City LGU

CEBU CITY, May 8 (PIA)--- Ang mga Muslim traders sa siyudad sa Sugbo nihangyo sa gobyerno sa siyudad nga hatagan sila ug lugar nga pwede sila makapaninda sa ilang mga produkto. Ang maong isyu gipasaka atol sa gipahigayong forum nga gipangunahan ni Mayor Michael Rama aron i-check ang gipasalig sa mga Cebuano Muslims kabahin sa kalinaw. Si City Liaison Officer for Muslim Affairs nga si Geeorge Chu nipadayag sa iyang kabalaka sa mga Muslim nga mga manindahay. Matod ni Chu nga gusto nilang sundon ang gibuhat sa mga Muslim sa siyudad sa Davao kon diin nagpadagan sila ug kaugalingong merkado sa downtown area sa siyudad. Mahinumduman nga si Rama nitanyag sa City Center nga nahimutang sa Colon St. alang sa mga Muslim apan gamay ra ang nioukupar sa maong lugar sa pagkakaron. Ang mga Muslim business leaders niangkon nga naghuwat pa sila sa igong pondo alang sa pag-renovate sa lugar. Buyon usab sa ilang kasabotan sa gobyerno sa siyudad, sila ang moopera sa City Center. Nabantayan usab nila nga kasagaran sa mga Muslim nga adunay mga negosyo sulod sa siyudad mga small scale ug walay kapabilidad nga mopadagan sa lugar. Aron tubagan ang maong isyu, gidasig ni Chu ang mga magpapatigayon nga mga Muslim sa pagorganisa ug ilang asosasyon ug iparehistro kini aron makapahimulos sila sa mga loans gikan sa international aid organizations nga motabang sa mga minority groups. Sa bahin usab sa mga Muslim nga mamaligyaay sa siyudad, nipakita sila sa ilang suporta sa gobyerno sa pagbalhin kanila. Dugang pa nila nga nakasabot sila sa kampanya sa mayor nga kini alang lang sa kaayohan sa siyudad.  “Apan kinahanglan pa namo ug daghang mga aktibidad alang sa pagpromot ug livelihood ilabi na kadtong makahatag ug support system alang sa mga tawo nga adunay pinansyal nga kalisod,” matod ni Marlon Badio, usa sa mga membro sa Muslim communities sa Metro Cebu. (PIA-7/Chrisley Ann C. Hinayas, Intern-CTU)

============

Gibalik pagmugna sa gobiyerno ang Task force vs. illegal recruitment

CEBU CITY, May 8 (PIA)--- Aron pangusgan pa ang paningkamot sa gobyerno sa pagpahunong sa mga malimbungon nga mga recruiters nga mobiktima sa mga Pilipino nga nangita ug trabaho gawas sa nasud, gi-reactivate sa Malacanang ang Presidential Task Force Against Illegal Recruitment (PTFAIR) ubos sa Executive Order No. 41 .

Ang EO 41 nga gipirmahan sa Chief Executive niadtong Abril 29, gipamatood didto nga si Bise Presidente Jejomar Binay ang mamahimong chair sa PTFAIR nga usa usab ka  Presidential Adviser on Overseas Filipino Workers' Concerns, ug ang mga secretaries sa Department of Labor and Employment ug sa Department of Justice (DOJ) ang mamahimong mga vice chairs.

Sigon pa ni Binay nga isip usa ka Presidential Adviser on Overseas Filipino Workers’ (OFWs) Concerns iyang personal nga adbokasiya ang pagproteher sa OFW’s batok sa mga malimbungon nga mga recruiters.

Ang Presidente nimando sa pag-reactivate sa maong kamandoan aron pagpangusgan sa task force ang pagsumpo sa illegal recruitment nga nagpabiling hulga sa mga trabahanteng Pilipino.

Matod sa Executive Secretary nga si Paquito Ochoa Jr. nga ang PTFAIR makig-alayon sa mga programa ug inisyatibo sa ubang ahensiya sa gobyerno nga may kalabot sa mga problema ug mga isyu kabahin sa illegal recruitment.

Ang PTFAIR responsable sa pagpalambo ug pagpaimplemetar sa mga stratehiya ug mga programa aron mahunong ang mga modus operandi sa mga illegal recruiters sama sa “escort” nga mga serbisyo sulod sa mga international airports ug ubang mga ports of departure areas.

Uban usab niini ang pagsumpo kanila ilabi na kadtong mga pagbaligya ug mga pekeng mga pasaporte ug dokumento ug ang pagpasaka ug kaso sa mga illegal recruiters apil na ang ilang mga alyansa ug ang nagproteher kanila.

Gibutyag sa Executive Secretary nga ubos sa EO, ang PTFAIR anaay gahom nga mopahigayon sa pagpaniid ug mga entrapment operations sa mga gidudahang mga illegal recruiter.

Mahimo usab nga mopagawas kini ug warrant of arrests pinaagi sa law enforcement arm ug pag-imbestigar alang sa paspas nga prosekusyon sa kaso alang sa epektibong magpatuman sa maong kamandoan.

Matod sa EO nga gikinahanglan ang special task force batok sa illegal recruitment tungod kay ang nasud adunay obligasyon nga protektahan ang interes sa publiko ug aron mapugngan ang mga trabahanteng Pilipino nga mabiktima sa mga malibungon nga mga recruiters.

Ang ubang membro sa PTFAIR mao ang mga representante sa Department of Foreign Affairs ug Department of Interior and Local Government, administrator sa Philippine Overseas Empolyment Agency (POEA), Immigration Commissioner Ricardo David, Prosecutor General Carlo Arellano, National Bureau of Investigation (NBI) Director Magtanggol Gatdula, the Criminal Investigation and Detection Group (CIDG) chief, and the general manager of the Manila  re Airport Authority.

Gi-reactivate ni Aquino ang PTFAIR tungod sa mga kaso sa illegal recruitment nga padayong naghulga sa mga trabahanteng Pilipino. (PIA-7/Chrisley Ann C. Hinayas, Intern-CTU)

==========

Mayor Rama misaad ug relocation site sa mga Fuente Osmeña vendors

CEBU CITY , May 7 (PIA) --- Ang mayor sa siyudad sa Sugbo Micheal Rama kagahapon mipasalig nga dili talikdan sa dakbayan ang mga manindahay nga naapektohan sa pagpanindot sa palibot sa Fuente Osmeña ug Osmeña Bouevard.

Matud ni Rama ang mga apektadong mamaligyaay giplanohang hatagan ug relocation site kung diin mamahimo silang magpadayon sa ilang pagpamaligya.

Gipamahayag ni Raman nga usa sa iyang mga consutant iyang gitahasan sa paghimo ug plano alang sa usa ka programa nga dako ug ikaabang ngadto sa mga manindahay sa siyudad.

Kahinumdomang ang mga manindahay gipapahawa sa palibot sa Fuente Osmeña tungod sa Cebu Beautification Movement Inc. nga nagtinguha ug “zero vendors” sa palibot sa Fuente Osmeña Rotunda ug sa Osmeña Boulevard.

Niadtong Huwebes, si Rama ug Gov Garcia nangulo sa “unity walk” alang sa nagkantidad ug 50 ka milyon nga proyekto sa pagpanindot sa palibot sa tibuok siyudad sa Sugbo.

Gipahibaw usab sa mayor nga ang Bangko Senral ng Pilipinas(BSP) ug Banco De Oro makigtambayayong usab sa maong proyekto pinaagi sa pagpanindot usab sa ilang mga lugar.

Ang probinsya sa Sugbo nga gipanguohan sa gobernadora motabang usab pinaagi sa paghaag ug dugang tabang pinansyal.

Wala pa hinuon giklaro sa probinsya kung pila ang kantidad nga ilang ikahatag alang sa proyekto sa siyudad.(PIA-7/Maryknoll B. Lague Intern-CTU)

============

BFAR nanghatag ug patrol boats ngadto sa Probinsya sa Sugbo

CEBU CITY , May 7 (PIA) --- Ang Bureau of Fisheries and Aquatic Resources(BFAR) mihatag ug duha ka mga patrol boats ngadto sa probinsya sa Sugbo isip tabang sa mas gipanghingusgang kampanya batok sa illegal nga pagpangisda.

Kining maong mga sakayan naggikan sa United States Agency for International Development (USAID) nga gihatag ngadto sa BFAR.

Sigun kang Benhur Salimbangon, representante sa 4th District ug kasamtangang nangulo sa komite sa Fisheries and Aquatic Resources sa probinsya, siya mihangyo sa BFAR nga ihatag ang maong mga sakayan sa probinsya kay dako kini ug matabang alang sa pagbantay sa kadagatan isip kabahin sa kampanya sa ilegal nga pagpangisda.

Atol sa tigum nga gipahigayon kagahapon kuyog ang gobernador sa Sugbo Gwendoyn Gracia ug ang direktor sa BFAR7 Andres Bojos, mihangyo si Salimbangon nga ang kadagatan sa Isla sa Malapascua kabahin sa iyang distrito ang himuong prayoridad nga lugar nga bantayanan sa patrol boats.

Si gobernador Garcia ang gihatagan ug katungod sa BFAR pagpili sa lugar sa probinsya kung asa kinahanglang ibutang ang maong mga sakayan.

Gipasabot ni Saimbangon sa gobernador nga ang maong isla kinahangang bantayan aron maprotihian ang mga inila nga thresher sharks nga namuyo sa kadagatan sa maong dapit.

Base sa natala sa BFAR, daghang kaso ilegal nga pagpangisda ang gikataho sa amihanang bahin sa Sugbo.(PIA-7/Maryknoll B. Lague, Intern-CTU)

===========

Siyudad ug mga lungsod gihangyo sa pagpaubos sa bayad sa birth registration

CEBU CITY, May 7 (PIA) --- Mga mayor sa siyudad ug munisipalidad gihangyo sa pagpaubos sa mga bayrunon sa 'birth registration."

Si Local Government Secretary Jesse Robredo gipahingusgan ang paghangyo sa mga mayor sa siyudad ug mga munisipalidad sa pagsuporta sa programa karong Mayo sa pagpaubos niining mga bayrunon ilabi na kining mga pagparehistro sa pagpanganak (birth).

Mimando usab si Robredo sa tanang regional directors sa pagbantay ug pagsumite ug report mahitungod sa pagpatuman ani nga programa sa mga local chief executives.

Apil ani nga programa ang nagkalain-laing mga taw, katong mga magpa-enrol sa pampublikong eskwelahan, ug mga estudyante sa publikong eskwelahan nga walay birth certificate ug uban pang mga benepisyaryo. (PIA-7/Ailene G. Limutan, Intern-CTU)

==========

P4.23-B ‘Rice for Work’ kaayuhan sa 2-M nga mga pobreng mag-uuma ug mangingisda

CEBU CITY, May 7 (PIA) --- Sugod karong Mayo kinse (15), mga dos (2) milyones ka mga small-scale nga magsasaka ug mangingisda sa tibuok nasud makabenepisyo sa P4.23 billion “Rice for Work” nga programa sa administrasyon ni Aquino, kini matud pa ni Social Welfare Secretary Corazon Juliano-Soliman kagahapon atol sa CNEX Forum sa Philippine Information Agency.

Ang DSWD chief miingon nga ang subsidiya magamit isip bayad sa mangingisda ug ang banay niini sa ilang sweldo nga mutumbas sa katorse (14) ka adlaw nga trabaho nila sud sa usa ka buwan.

Miingon si Soliman nga ang kining subsidiya hinlabot kini sa plano sa gobyerno sa pag-atubang aning problema sa pagsaka sa mga palaliton ug ilabi na sa paghatag ug trabaho sa mga pareho nila.

Ang mga benepisyaryo matud pa niya, hatagan ug vouchers, kwarta o sako sa bugas gikan sa DSWD puli sa ilang serbisyo diin makuha nila sa pinakaduol nilang local government units.

Kini nga mga serbisyo maglangkob sa pag-andam ug pagpanlimpyo sa mga umahan nga gamiton sa umaabot nga tigpananom.

Alang sa pagsiguro nga ang mga benepisyaryo jud ang nanginahanglan, anaay muhatag ug kasaligang lista nga maggikan sa National Household Targeting System for Poverty Reducation, Department of Agriculture, ug ang Department of Agrarian Reform.

Sigon pa ni Soliman, kining mga benepisyaryo tan-awon sa provincial ug mga lokal nga social welfare offices sa ilang lugar.

Ang DSWD mupuno sa ilang lista sa mga miyembro sa benepisyaryo ug laing pang mga pobreng komunidad. (PIA-7/Ailene G. Limutan, Intern-CTU)

==========

Maayong panahon sa Cebu karong adlawa- 5/7/2011 CEBU CITY, May 7 (PIA) --- Ang siyudad sa Sugbo karong adlawa makabatun ug maayong panahon diin anaay ginagmay’ng uwan ug igung kainit, kini matud pa sa Mactan office sa Philippine Atmospheric Geophysical Astronomical Services Administration (Pagasa) kagahapon. Si Mactan Pagasa weather analyst Boy Artiaga miingon nga makabatun ug igung kainit ang dapit sa norte sa Cebu. Si Artiaga misulti nga ang La Niña nahuman ra sa miaging Marso apan ang uwan-uwan wala pa kaayo nagsugod tungod sa kainit nga panahon. Ang hinungdan sa kagahapon nga uwan kay ang low-pressure area (LPA) duol sa Catbalogan, Samar. Sigon pa ni Artiaga nga magsugod ang mga uwan-uwan mga ikaduhang semana karong buwana, diin mao jud ang kasagarang sugod sa uwan. Ug kung magsugod na ang uwan, kada-adlaw na jud ni siya. Dili pareho sa mga nilabay’ng adlaw nga lab-ang lab-ang, kini matud pa ni Artiaga. Ang mga kadagatan duol sa Bohol, Siquijor ug Leyte medyo bawud tungod sa low-pressure area. (PIA-7/Ailene G. Limutan, Intern-CTU)

===========

22 sa kada100T ka mga Pilipina nangamatay sa cervical cancer

By: Juju S Manubag

CEBU CITY , May 7 (PIA) --- Baynte dos (22) ka buok sa kada usa ka gatos ka libo (100T) nga mga Pilipina ang nangamatay sa cervical cancer.

 Mao kini ang gipahibalo ni Dr Belinda Pañares, hepe sa OB-Gyne Departament sa Vicente Sotto Memorial Medical Center (VSMMC) atol sa pagpamulong niini sa paglunsad sa Sugbo sa ‘Cervical Cancer Awareness Month” sa miaging adlaw.

Dugang ni Pañares nga ang maong tala wala’y kausaban sukad pa sa 1980 ug kwarenta’y kwatro porsiyento (44%) lamang ang mabuhi niining sakita.

Ang hinungdan niini mao ang walay ‘organized screening’ ug mahal ang cervical cancer vaccine.

Ang cervical cancer nga sakit walay mga sintomas nga ginapakita sa sayo pa nga ang-ang sa pagtakboy niini apan mamahimong kalikayan ug katambalan kini kung ma-detect “at an earlier stage,” tataw ni Panares.

Ang mga angay nga bantayan nga signs ug symptoms sa cervical cancer mao ang abnormal nga pagdugo sa kinatao; bahong isda nga diskarga sa kinatao; dili kumportable sa may bat-ang; sakit sa pagpangihi ug triad of leg edema, matod pa ni Pañares.

Gipahibalo usab ni Pañares nga taas ang risk factors nga magka-cervical cancer alang niadtong nakighilawas sa bata pa ang edad nga ubos sa katorse (14) anyos, sayo nga kaminyoon, full-term nga pag-mabdos nga ubso sa disisyete (17) anyos.

Uban usab niini ang adunay multiple sex partners; unom o sobra pa sa unom ka lifetime sexual partners; commercial sex workers; promiscuous male partners; may history sa sexually transmitted disease (STD).

Laing mga risk factors mao ang ubos ang socio-economic status; kung wala’y tuli ang lalaki; manigarilyo, kaliwat ug walay cervical cancer screening nga gihimo.

Ang angay nga buhaton aron malikayan ang cervical cancer sa mga kababayen-an mao ang pagbaton ug healthy lifestyle, exercise, kaon sa mga masustansiyang pagkaon, ampingan ang immune system, ug maglikay sa stress.

Likayan usab ang mga highrisk sexual practices; magbaton ug usa lamang ka partner ‘for both the male or female partners.

“Kinahanglan jud ang duruha mobaton ug tagsa ra gyod nga partner,” matod pa ni Pañares.

Si Dr Helen Amorin, usa usab sa mga namulong nga ob-gyne doctor sa VSMMC nag-ingon nga ang pagpa-cervical cancer screening buhaton kini kun ang babaye nag edad nga dili moubos sa 21 ug sa 3 ka tuig gikan sa pagsugod ug pakighilawas.

Dugang ni Amorin nga mahimo nga mausban ug pagpa-screen duha o tulo pa ka tuig kung ang resulta sa tulo ka pagpa-screen o papsmear negatibo sa human papillomavirus (HPV).

Ang nag-edad ug 65 ngadto sa 70 ka tuig ug ang nagpa-total hysterectomy mahimo nga dili magpa-screen, matod pa ni Amorin. (PIA-Cebu/JSM)

 ===========

Gilusad sa DOH ang ‘Scarlet May’ sa VSMMC

By: Juju S Manubag

CEBU CITY, May 6 (PIA) --- Gilusad kagahapon sa Vicente Sotto Memorial Medical Center (VSMMC) ang Cervical Cancer Awareness Month o Scarlet May nga gisugdan sa usa ka ribbon-cutting ceremony sa Out-Patient Department (OPD) nga tinambongan sa mga kadagkoan sa Department of Health (DOH) ug VSMMC.

Diha usab mga pag-inambitay ug impormasyon unsaon sa paglikay, kontrol, pamaagi sa pagpahiling ug pagpanambal sa cervical cancer nila ni Dr Belinda Pañares, hepe sa VSMMC’s OB-Gyne Dept, Medical Specialist Dr. Helen Amorin ug ni Dr Angelita Salarda, hepe sa DOH-7 Technical Division nga gipahigayon sa awditoryum sa VSMMC nga kadaghanan sa nanambong anaa sa natad sa medico.

Gitapos ang programa ug usa ka open forum diin ang talay sa mitubag sa mga pangutana kay naglangkob nila Pañares, Amorin, Salarda, DOH National Coordinator sa Degenerative Diseases nga si Dr. Frank Diza ug ni Dr. Roque Paradela, hepe sa VSMMC Clinics.

Kagahapon usab gisugdan ang programa sa ‘Free Cervical Cancer Screening’ sa alas 8 sa buntag alang sa traynta (30) ka mga babae nga nag-edad ug 30 hangtod sa 45 anyos.

Ang pag-screen buhaton hangtod lamang alas 5 sa hapon ug traynta (30) ra ka buok ang maserbisyohan matag-adlaw.

Buhaton ang cervical cancer screening kada Lunes hangtod Biyernes sa Cervical Cancer Prevention (CECAP) Bldg., nga nahimutang sa likod sa VSMMC, segun sa nagdumala kagahapon nga nahinabi sa Philippine Information Agency (PIA).

Sumala ni Pañares, ang pamaagi sa cervical cancer screening karon kay himoon nga one time o single approach na diin dili na magbinalik-balik sa tambalanan ang pasyente alang sa resulta. 

Mahimo ra pud gani ug ma-screen bisan gikan pa nag-sex sa bag-ong pamaagi karon nga pagpahiling. Human sa pagbutang ug acetic acid sa cervix, diha-diha dayon mahibaloan na sa doctor ug may impeksyon o wala.

Ug adunay impeksyon, ipaagi kini ug cryotheraphy nga procedure sa pagpanambal nga libre usab, sumala ni Pañares.

Gi-awhag ni Pañares ang tanang mga babaye nga magpahiling gayod tungod ang sakit nga cervical cancer mahimo rang kalikayan ug katambalan.

Dili sama sa ubang sakit ang cervical cancer nga sinunod sa mga katigulangan.

Usa pa sab ang sakit nga cervical cancer kasagaran anha mosugod ug siaw inig edad ug traynta (30) anyos sa babae.

Lagmit usab sa magpahiling, 75 porsiyento kay anaa na sa advanced stage matod pa ni Pañares.

Dungag usab ni Pañares nga ang pagpa-vaccine ang maoy labing unang paagi sa pagsumpo sa cervical cancer ug segunda ra ang pagpa-screen.

Matod pa ni Pañares, tinood mahal ang kantidad sa vaccine alang cervical cancer nga anaa sa P4,500 ang 3 ka shots pero lifetime protection naman sab ang pagatagamtamon.

Samtang ug itandi kini sa masakit na sa cervical cancer anaa sa dos siyentos mil hantod usa ka milyon ang galastohon ini, dugang ni Pañares.

Angay usab nga kahinumduman nga kada minuto, 2 ka babae sa tibuok kalibutan ang nangamatay sa cervical cancer ug 12 ka mga Pilipinas matag adlaw ang nangamatay tungod ang sakit nga cervical cancer ang ika-5 nga klaseng kanser nga hinungdan sa kamatayon matod pa sa datos nga gihatag sa mga doctors nga didto sa pag-abri sa Scarlet May o Cervical Cancer Awareness Month kagahapong adlawa. (PIA-Cebu/JSM)

============

DOE-7 nimando sa paghatag sa lista sa mga POS gas retail outlets

CEBU CITY, May 6 (PIA)--- Ang Department of Energy (DOE) sa rehiyon 7 gimandoan ang mga major oil companies nga mo-sumiter ug listahan sa ilang mga gasoline retail stations sa rehiyon nga adunay POS (Point of Sale) system kon diin ang ‘Pantawid Pasada’ Program ilunsad sa probinsya lakip na sa Sugbo.

Matod ni DOE-7 Regional Director Antonio Labios nga mga POS gas retail outlets ra ang makadawat sa mga Smart cards nga adunay P1,050 nga load isip hinabang sa gobyerno sa mga drayber sa jeep kinsa naapektohan ug maayo sa pagsaka sa presyo sa lana sa kinatibok-ang merkado sa kalibutan nga niresulta sa pagsaka sa presyo sa krudo sa nasud.

Dugang pa ni Labios nga naghuwat pa sila sa kompletong lista sa mga oil companies sa ilang mga gas retail outlets.

Sigon ni Labios nga kini ang usa sa mga rason nganong ang pagpa-implementar sa Pantawid Pasada Program, usa ka fuel purchase nga hinabang sa gobyerno pinaagi sa DOE nadugay sa mga probinisya.

Niadtong Lunes, ang programa naimplementar na sa Metro Manila kon diin gipangapud-apud ang mga Smart cards ngadto sa mga jeepney operators kinsa maoy mohatag sa mga fuel assistance ngadto sa mga drayber.

Dayag pa niya nga gisiguro sa mga oil companies diha kanila nga ang mga remote areas naay usa ngadto sa tulo ka mga gas retail outlets nga adunay POS system aron ang mga drayber sa jeep makapalit ug krudo gamit ang Smart card.

Bisan pa man ang unang tinguha sa programa mao ang hupayon ang gibating kalisod sa mga drayber sa jeep nga labing naapektuhan sa pagsaka sa presyo sa lana apan ang basehan sa pagapud-apud sa Smart card mao ang rehistrasyon sa mga jeepney vehicle nga adunay prangkisa.

Tungod sa padayong kasamok sa Middle East nga hangtod karon wala pa miresolba, gihangyo ni Labios ang publiko nga mangupot usa sa pagsaka sa presyo sa lana.

Pasabot pa ni Labios nga ang nasud nag-import ug lana sa Middle East.

Ang krisis sa Middle East nga nagsugod sa Egypt nga mikatay sa Yemen, Libya ngadto sa Syria nga walay resolusyon sa umaabot nga kaugmaon siguradong makaapektar sa mga presyo sa lana sa kinatibok-ang merkado sa kalibotan nga moresulta sa pagsaka sa presyo sa krudo sa Pilipinas nga gi-base sa law of demand and supply apil usab ang kasamtangang dollar to peso exchange rate.

Matod ni Labios nga ang Philippine Government padayong mangita ug paagi aron makakita ug indigenous sources sa lana aron maminosan ang pagdepende sa imported nga krudo. (PIA-7/Chrisley Ann C. Hinayas, Intern-CTU)

===========

Mga Sugbuanon nga Muslim naghinaot usab nga magpabilin ang kalinaw sa Sugbo

CEBU CITY, May 6 (PIA) --- Ang mga sugbuanong Muslim dinhi sa Sugbo mipasalig sa gobyerno nga sila usab nanghinaot nga magpabilin ang kalinaw ug seguridad sa lugar ilabi na sa Siyudad sa Sugbo.

 Kini sigun sa pamahayag nga gi-isyu atol sa haya sa napatay nga internasyunal nga terorista ug lider sa al Qaeda nga si Osama bin Laden kung diin ang giingong kamatayon nagmugna ug kahadlok sa mga katawhan sa tibuok kalibutan sa hunahuna nga kini ang magsilbing ugat sa mga dagkong pagatake ngadto sa mga nasud nga adunay kalambigitan sa Estados Unidos.

Ang Direktor sa Office of Muslim Affairs (OMA)-7 Malo B. Manonggiring, sa usa ka forum kagahapon, kuyog ang lain-laing lider sa mga  Muslim Communities dinhi sa Sugbo, namahayag nga bisan pa man nagbangutan ang ilang komunidad sa kamatayon sa ilang igsuong muslim, dako ang ilang pagsupak sa mga nabuhat niining dagkong pagpangatake tungod kay dakong supak ug wala misuporta ang Koran niini.

Midungag si Manunggiring, nga ang mga komunidad sa Muslim dinhi sa Metro Cebu subling ipadayon ang Community Information Center nga adunay tahas sa pagmonitor sa mga kwestyonableng personalidad nga mosuod sa ilang mga komunidad aron masiguro nga walay mahitabong kagubot dinhi sa siyudad diin kadaghanan sa mga muslim ngainabuhi sa lugar.

Iya usab gi-angkon nga ang ilang komunidad karon nagpadayon pa pagpangita ug mga pamaagi aron daling mamonitor ang mga taw nga nagsulod gawas sa siyudad, apan iyang gisaad nga ilang paningkamotan aron makakita sa pinakaepektibong paagi alang niini.

Giklaro usab sa direktor nga ang mga sugbuanong muslim nianhi sa Sugbo aron manginabuhi ug dili aron magtanom ug kahadlok ug kagubot. Gani, sila nanghinaot ug maayong relasyon kuyog ang ilang mga igsuong kristyano sa pagpadayon pagpanginabuhi ug malinawon dinhi sa siyudad. (PIA-7/Maryknoll B. Lague Intern-CTU)

===========

P.Noy gihatagan ug mga dokumento ug papeles gikan sa kanhi bise gobernador sa Sugbo

CEBU CITY, May 6 (PIA) --- Ang mga anak sa kanhi bise gobernador sa Sugbu nga si Gregorio Sanchez Jr. ang nitunol sa mga proyekto ug ubang dokumento nga nahibilin sa ilang amahan ngadto kang President Benigno Aquino III, atol sa pribadong pagbisita niini sa haya kagahapon.

Alang sa pamilya, ang nahitabong pagbisita sa president usa ka dakong oportunidad aron ilang mapaabot ang mga maayong tinguha sa ilang amahan ngadto sa probinsya sa Sugbo sa wala pa kini nataptan sa sakit nga cancer.

Naglakip sa mga dokumentong gihatag ngadto kang P.Noy mao ang wala pa gyud masugdi nga plano nga pagpahimo sa trans-axial highway nga mao untay magdugtong sa norte ug ubos nga bahin sa Sugbo.

Gilakip usab ang desisyon sa Civil Service Commission kalabot sa gahom kanh bise gobernador sa pagtudlo ug mamahimong opisyales sa probisya ug ang iyang counter affidavit ngadto sa Opisina sa Ombudsman kabahin sa knotrobersyal nga Balili Property kung diin gitamla sa kanhi bise gobernador ang iyang thumb mark.

Si Aquino nakigkita sa pamilya Sanchez sa usa ka pribadong lawak sulod sa Crystal palace sa Nivel Hills, Lahug, wala mukabat ug 20 minutos ang giingong panagtigum.

Sigun sa kinamaguwangang anak sa kanhi bise gobernador Grecilda Sanchez-Zaballero, iya usab gihatag ang kopya sa Civil Service Action ug usa ka kopya kabahin sa kaso sa Balili property.

Mipasalig ang presidente ngadto sa pamilya nga siya magahin ug panahon aron sa pagbasa niini.

Si Aquino atol sa iyang pagbisita nagsuot ug itom nga polo ug slacks, miabot siya sa Crystal Palace mga alas diyes sa buntag kuyog ang iyang mga kapartido sa Liberal Party nganhi sa Sugbo.

Kahinumdoman nga ang kanhi bise gobernador usa sa mga sinaligang miyembro sa partido liberal dinhi sa Sugbo. (PIA-7/Maryknoll B. Lague Intern-CTU)

============

Cebu Mayor Rama mimando sa pagsusi sa mga infa projects sa siyudad

                                           

CEBU CITY, May 6 (PIA) --- Ang mayor sa siyudad sa Sugbo Micheal Rama nimando sa Department of Engineering and Public Works (DEPW) aron pagsusi sa walo ka mga school buildings sa dakbayan nga gikatahong adunay mga depekto.

Sumala sa mayor iyang dimanduan ang DEPW sa paghimo sa ilang trabaho ug pagkuha ug propesyonal nga civil engineer aron sa pagsusi sa mga buildings.

Gidugang ni Rama nga iya usab nga gitahasan ang Engineer sa Siyudad nga si Kenneth Enriquez sa pagsusi sa tanang proyekto sa siyudad nga may kalabotan sa imprastraktura.

Sigon sa mayor, kinahanglang pagabuhaton ang pagsusi sa ligdong nga pamaagi ug walay mahitabong tabon-tabon, tungod kay kini naglambigit sa kaluwasan sa katawhan ilabi na sa mga kabataan nga kanunay nga naggamit sa mga depektadong school buildings.

Base sa natala sa rekord sa bise mayor, ug nagsilbing pangulo sa Local School Board Joy Augustus Young, tulo sa walo niining mga buildings nga giingong depektibo naggikan sa pondo sa Special Education sa siyudad ug ang laing walo naggikan sa pondo sa Department of Education.

Naglakip sa walo ka mga giingong depektadong building mao ang Tong Integrated School, Sirao Integrated School, Don Vicente Rama High School ug Don Vicente Rama Elementary, Busay Elementary School, Sibugay Integrated School, Hipodromo Elementary School ug Sinsin Elementary School.

Base sa unang pakisusi, unom niining walo ka mga buildings ang adunay mga liki tungod lamang sa mga finishing defects ug dili makaapekto sa kalig-on sa maong imprastraktura.

Ang lain duha nga mao ang mga school buildings gikan sa Toong ug Sirao natukod sa humok nga yuta ug giingong humok maigo sa landslide.

Sigun sa bise mayor, siya padayong nakig-alayon karon sa mga kontraktor sa maong mga buiding aron sa pagtarong sa mga nakit-ang depekto.(PIA-7/Maryknoll B. Lague Intern-CTU)

==========

Mga pampublikong magtutudlo ipasaka na ang sweldo karong Hulyo

CEBU CITY, May 6 (PIA) --- Ang suweldo sa mga magtutudlo sa pampublikong eskuwelahan ipasaka na karong ting-abli sa klase alang sa pagpatuman sa Salary Standardization Law (SSL) matud pa ni Department of Education (DepEd) 7 Director Recaredo Borgonia. 

Ang balaud mihatag ug saka sa sweldo kada tuig sa mga trabahante sa gobyerno sukad pa pag 2009.

Ubos sa SSL, ang saka sa sweldo gibahin ug kaupat, diin ang pasabot niini, ang saka sa sweldo mahatag kada tuig gikan 2009 hangtud 2013. 

Sugod karong Hulyo uno (1), ang mga magtutudlo sa pampublikong eskuwelahan makadawat sa ikatulong bahin sa saka sa sweldo.

Ang balaud nag-ingon nga ang usa ka trabahante nga sakup sa sub-professional nga lebel (salary grades 1 to 9) makadawat ug baynte-otso (28) hangtud trentay sais (36) nga porsiyento nga saka sa sweldo, ug sa laing bahin ang katong sakup sa professional nga lebel (salary grades 10 to 24) madakawat ug trentay-otso (38) hangtud 100 nga saka.

Ang mga magtutudlo nahimutang sa salary grades diyes (10) hangtud baynte kwatro (24) nga nagpasabot nga trentay-otso (38) porsiyento ang ilang saka sa sweldo.

Si Borgonia mipuno nga ang sugod nga sweldo sa mga maestro sa pagkakaron kay mikabat sa P17,000. (PIA-7/Ailene G. Limutan, Intern-CTU)

==========

Gobyerno mo-alokar ug P4.2 ka milyon alang sa biyahe ni P-Noy sa 18^th ASEAN Summit

MANILA, May 6 (PIA)--- Ang gobyerno mogasto ug duol-an sa P4.2 ka milyon alang sa biyahe ni Presidente Benigno S. Aquino III kabahin sa tinuig nga panagtigom sa mga lider nga miembro sa Association of Southeast Asian Nations (ASEAN) karong Mayo 7 hangtod 8.

Ang Chief Executive molarga karong biyernes sa hapon padulong sa Jakarta nga ubanan sa 54-man delegation lakip na usab ang Foreign Secretary nga si Albert Del Rosario, Trade and Industry Sercetary Gregory Domingo, Finance Secretary Cesar Purisima ug Energy Secretary Jose Rene Almendras.

Matod ni Executive Secretary Paquito N. Ochoa Jr. nga ang Presidente mosalmot sa mga plenary sessions ug bilateral meetings aron i-pursige ang inisyatibo kabahin sa mga katungod sa katawhan, disaster risk reduction, pagproteher sa mga migranteng trabahante, kalinaw ug seguridad ug sa kalikopan apil na usab ang katumanan sa Millenium Development Goals.

Dugang pa niya nga pareho sa mga naunang mga opisyal nga mga biyahe sa Presidente sa laing nasud, ilang gibuhat tanang pamaagi aron pagpaminos sa mga gasto-an sa Presidente.

Lakip sa P4.2 ka milyon mao ang gasto sa hotel accommodations, pagkaon, transportasyon, telekomunikasyon ug mga equipment requirements ug dili pa lakip niiini ang pletehan sa eroplano.

Apil usab sa presidential delegation ang ubang opisyales nga silang Secretary Ramon Carandang sa Presidential Communications Development and Strategic Planning Office, Mindanao Development Authority Chairperson Luwalhati Antonio, DFA UnderSecretary Erlinda Basilio, Chief Presidential Protocol and Presidential Assistant Miguel Perez-Rubio, Trade and Industry Assistant Secretary Ramon Vicente Kabigting ug DFA Assistant Secretary Victoria Bataclan. (PIA-7/Chrisley Ann C. Hinayas, Intern-CTU)

============ 

Minos nga P2.50 sa pletehan sa bus dinhi sa Sugbo

CEBU CITY, May 6 (PIA)--- Sugod karong Lunes, Mayo 9, ang mga pasahero sa bus makaminos na sa ilang pletehan human ang transportation board ni-aproba sapetisyon kabahin sa pagpaminos sa pletehan sa mga bus ug mini-bus diri sa Sugbo nga di mominos sa P2.50.

Mahinumduman nga ang Land Transportation Franchising and Regulatory Board (LTFRB) ni-isyu ug order niadtong Mayo 4, 2011, kabahin sa pagpaminos sa pletehan sa mga bus ug mini-buses gikan sa P8.50 ngadto sa P6 sa unang lima ka kilometro, ug gikan sa P1.40 ngadto sa P1.20 sa sunod nga mga kilometro.

Ang maong mando gipirmahan sa LTFRB Chairman Nelson Laluces ug sa mga Board Members Manuel M. Iway ug Samuel Julius Garcia nga mopekto karong Mayo 9.

Gi-abisohan sa LTFRB ang mga public utility bus drivers o mga operators nga kon sila molapas sa bag-ong probisyon sa pletehan, sila pamultahon ug P500 kada kalapasan ug pwede pa silang makuhaan sa ilang prangkisa depende sa gibug-aton sa ilang opensa.

Ang pagpaminos sa pletehan gi-base sa gipasakang petisyon sa mga representante gikan sa Cebu Provincial Government nga si Gobernador Gwendolyn Garcia, sa presidente sa Cebu Provincial Bus Operators Association nga si Richard Corominas ug ang presidente sa Cebu South Mini-Bus Operators Association (CSMBOA) nga si Julito Flores.

Matod nila nga pagkahuman nila ug tuki sa bag-ong rate sa pletihan ug ang epekto niini sa commuting public, ang mga membro sa bus ooperators’ associations ug ubang stakeholders sa public transport sector ni-uyon sa paghatag ug diskwento sa pletehan nga P6 sa unang lima ka kilometro ug P1.20 sa sunod nga kilometro nga “more reasonable” diri sa Subo.

Sigon pa ni Iway nga ang petisyon nisurpresa sa LTFRB tungod ang ilang counterparts sa kaulohan nangita aron patas-an ang pletehan apan diri sa Sugbo, ang mga bus operators nagtinguha makaminos sa pletehan.

Matod sa CSMBOA president nga si Flores nga ang ilang pagpaminus sa pletehan nagpasabot nga wala lang sila naghuna-huna sa ilang kaugalingon kon di lakip na usab ang sumasakay nga publiko. (PIA-7/Chrisley Ann C. Hinayas, Intern-CTU)

============

P500 nga binuwang pension alang sa mga senior citizens

CEBU CITY, May 6 (PIA)---Dul-an sa 13,000 ka mga senior citizens sa Central Visayas sa probinsya sa Bohol, Cebu, Negros Oriental ug Siquijor ang makadawat ug binuwan nga suholan gikan sa Social Pension Program sa Department of Social Welfare and Development (DSWD).

Si Ma. Evelyn Macapobre, ang Regional Director sa DSWD sa Central Visayas nagkanayon nga ang binuwan nga suholan sa mga senior citizens nakadugang sa ilang access sa mga social services ilabi na nga kadaghanan kanila nakigbahin sa iyang mga anak o ubang miyembro sa pamilya.

Ubos sa Republic Act 9994 kon ang Expanded Senior Citizens Act of 2010, ang cash assistance mahimong kabahin sa mga benipisyo ug katungod sa kabus nga mga tigulang nga gibungat ubos sa Section 1 sa Article 20.

Kini usab makadugang sa ilang inadlaw nga sustento ug lakip na alang sa ilang mga galastuhang pang medikal.

Ang kabos nga tigulang mao kadtong mahuyang, masakiton o kadtong adunay kakulian sa panglawas, walay pension o permanenting kakuhaan ug kinitaan ug kadtong mga nagsalig lang sa ilang mga kaliwat.

Ang mga senior citizen nga nagdawat ug pension gikan sa Government Service Insurance System, Social Security System, Armed Forces of the Philippines Mutual Benefit Association Inc., private insurance company ug kadtong adunay permanenting suporta gikan sa ilang mga kaliwat dili makapahimulos sa binuwan nga suholan.

Ang mga senior citizen nga wala maapil sa National Household Targeting System for Poverty Reduction nga gipahigayon sa DSWD sa tuig 2009 mamahimong mo-aplay sa Office of Senior Citizens Affairs (OSCA) sa ilang tagsa-tagsa ka mga lokalidad aron makapahimus sa binuwan nga suholan.

Ang mga mo-aplay hukman sa Social Welfare officers ug sa mga heads sa OSCA kon sila kwalipikado.

Nagpadyon na ang pag apod-apod sa mga hinabang.

Ang maong programa gilusad niadtong Abril sa lungsod sa Cordova sa Metro Cebu. (PIA-7/ Angie P. Amodia, Intern-CTU)