Bantay Dagat seryoso sa pakigbatok sa illegal fishing sa Sugbo

CEBU CITY, May 6 (PIA) --- Ang mga mananagat gawas sa Sugbo kinahanglang magbinantayon nga dili moabot pagpanagat sa teritoryo sa siyudad aron dili kini madakpan, kini ang pahimangno sa Bantay Dagat Project Director sa Siyudad nga si Ranulfo Sebusa.

Iyang gidungag nga bisan kadtong mga mananagat nga nagamit ug ordinaryo nga mga fishing nets dili tugotan sa pagpanagat sa kadagatan sa siyudad gawas kung lumulopyo kini sa dakbayan.

“Dakpon gyud namo sila kay mao man kini ang gilatid sa balaud. Protihian nato ang mga mangingisda nga taga dakbayan sa Sugbo” sumala ni Sebusa.

Kahinumdoman nga ang mga mananagat sa Sugbo nipaabot sa ilang mga reklamo sa mga opesyales sa siyudad kalabot sa wala pagtagad sa mga miyembro Bantay Dagat sa mga komersyal nga mga mananagat nga kanunayng mangisda sa kadagatan sa siyudad panahon sa kagabhion.

Aron sa mas epektibong pagpaimplementar niining maong balaud, ang mga Local Government Units gitambagang magbaton ug kompleto nga listahan sa mga gagmay o dagkong mananagat ubos sa ilang mga lugar sa tuyo nga mas daling mahibaw-an ang mga kinahanglang hatagan ug prayoridad ug daling masakpan ang mga illegal nga mga mananagat.

Si Sebusa ang bag-ong gitudlo isip direktor sa Bantay Dagat, kanhi na-asayn sa PNP Maritime District sa wala pa siya miretiro pipila na ka tuig ang nilabay.

Gipaniguro ni Sebusa nga paningkamotan niya ug sa iyang kaubanan nga mamahimong epektibo ug malampuson kining ilang kampanya batok sa illegal nga pagpangisda. (PIA-7/Maryknoll B. Lague Intern-CTU)

===========

1700 kapin ang gi-interbyu alang job overseas sa DMDP

By: Juju Manubag

Cebu City, May 5 (PIA) --- Ang DMDP mitala ug 682 ka mga walk-in nga mga aplikante alang sa pagpanarbaho sa gawas ug 1,704 ang gipang-interview alang usab sa overseas job, matod pa sa hepe sa Labor and Employment Division sa DMDP nga si Flor Monteveros sa pakighinabii niini sa PIA. Ang Department of Manpower Development and Placement (DMDP) usa ka departamento sa kagamhanan sa Sugbo nga gitugyan sa pagdawat ug rehistro niadtong mga aplikante nga gustong motrabaho sa gawas sa nasod ug moapil sa jobs fair nga gipahigayon sa Cebu City Sports Complex atol sa Adlaw sa Mamumuo niadtong Dominggo. Si Monteveros midugang ug ingon nga 22 nila ang nakakuha ug trabaho diha-diha dayon niadtong Dominggo. Ang 16 ka buok nadawat sa CSV International Placement Agency ug ang laing unom 6 nadawat sa Integrated Skills Development Incorporated. Sagad sa gipangdawat o nakuha dayon ug diha-diha nga trabaho mao kadtong kumplete sa mga papeles ug adunay duha ngadto sa tulo ka tuig nga kasinatian sa trabaho nga gi-applyan matod ni Monteveros. Ang mga trabaho nga nasudlan sa 22 nga nakuha dihadiha dayon mao ang hotel staff, cleaner, electrician, machine operator, erector ug warehouseman ni Monteveros pa. Si Monteveros mipahibalo nga ang ilang buhatan nagahatag usab ug pagbansay-bansay sa mga kursong industrial ug bokasyonal alang niadtong lumlopyo lamang sa Sugbo. Adunay tulo ug unom ka bulan nga mga kurso silang gipanghatag nga libre. Ang mga kurso nga modangat ug tulo ka bulan mao ang culinary arts, food and beverage service, cosmetology, dressmaking, housekeeping ug tailoring. Samtang ang mga kurso nga modangat ug unom ka bulan mao ang refrigeration and aircon technician, building wiring electrician, plumbing ug electronic technician. Si Monteveros misulti nga voters ID lang ang gikinahanglan para matino nga lumlopyo siya sa Sugbo aron siya makaeskuyla sa mga libreng kurso nga gitanyag sa ilang buhatan. Gikinahanglan usab ang x-ray exam alang sa mokuha ug culinary arts, dungag ni Monteveros. Ang culinary arts usab ang kurso nga adunay 3 ka hugna nga mapilian sa oras, ang a.m., p.m., ug evening nga kada lamang MWF ug TTh  ang klase skedyul. Ang ubang kurso kay kada adlaw ang klase. Si Monteveros mipahibalo nga nagsige karon ang enrollment para sa sunod nga tigutlo ka bulan nga mga kurso sa ilang buhatan sa ikaduhang andana sa Ramos Public Market, siyudad sa Sugbo. (PIA-Cebu/ JSM)

============

Pagapud-apud sa 12,000 nga fuel subsidy cards sa Sugbo

CEBU CITY, May 5 (PIA)--- Ni-anunsyo ang Department of Energy sa Central Visayas (DOE-7) nga moapud-apud sila ug di mominos sa 12,000 nga mga Pantawid Pasada cards subsidy fuel ngadto sa mga public utility jeepneys (PUJs) sa Sugbo.

Sigon sa DOE-7 Regional Director nga si Antonio Labios nga nangita pa sila ug saktong mekanismo kon unsaon paimplementar sa “Pantawid Pasada Card” diri sa Sugbo aron ang mga drayber siguradong makadawat sa maong card sa dili pa mag-Nobyembre.

Matod usab sa DOE-7 Science Research Specialist nga si Engr. Rey Malesa nga ang mga Pantawid Pasada Cards naay P1,050 load nga konsumohon sulod sa lima ka buwan.

Ang Land Transportation Office (LTO) mao ang moapud-apud niini pinaagi sa mga jeepney operators sulod sa Metro Cebu.

Ang mga drayber makapahimulos lang sa maong card sa mga gas stations nga naay koneksyon sa Bank of the Philippine Islands (BPI) kon asa gideposito ang kantidad alang sa fuel subsidy.

Dugang pa ni Malesa nga ila pang tinoon kon asa nga mga gas stations sa Sugbo pwede makagamit ang mga drayber sa maong card ug magbutang pa usab sila ug mga signages aron mamahimong timailhan sa mga drayber.

Gimandoan sa DOE ang mga fuel distributors sa pag-ila sa mga plate number ug franchise number sa mga sakyanan aron ibutang sa mga ipangapud-apud nga mga cards. (PIA-7/Chrisley Ann C. Hinayas, Intern-CTU)

============

ATC gimandoan sa pagpa-implentar sa kasabutan sa chemical weapons

MANILA, May 5 (PIA)--- Si Presidente Benigno Aquino III ni-isyu ug Executive Order (EO) 39 nga nag-designate sa Anti-Terrorism Council (ATC) nga maoy mangulo sa pagpangusog sa internasyunal nga kasabutan kabahin sa pag-ban sa paggamit sa mga chemical weapons.

Matod ni Executive Secretary Paquito Ochoa Jr. nga ang pag-isyu sa maong kamandoan usa sa mga obligasyon sa nasud ubos sa Chemical Weapons Convention (CWC), usa ka internasyunal nga kasabotan nga gisagop niadtong 1992 aron mapukan ang produksyon, pagtipig ug ang paggamit sa mga chemical weapons.

Dugang pa ni Ochoa nga sa Paragrah 4, Article VII sa maong kasabutan, naglatid nga ang taga-parti sa CWC magtukod ug “National Authority” aron makigalayon ang Pilipinas ngadto sa Netherlands-based Organization for the Prohibition of Chemical Weapons (OPCW) kon diin ang Pilipinas membro niini.

Sa wala pa ang pag-isyu sa EO 39, ang Department of Foreign Affairs giisip nga temporaryo nga Philippine National Authority (PNA) sa CWC.

Sa bag-ong EO, ang ATC gitawag na ug PNA-CWC kon diin dili lang kini usa ka national coordinating body sa OPCW kon di lakip na usab ang pagpanguna sa pagpa-implentar sa mga prohibisyon kabahin sa maong kamandoan.

P5 million ang pasiunang pondo alang sa PNA-CWC nga nagagikan sa Contingent Fund of the Office of the President (OP).

Ang CWC gitawag usab ug Convention on the Prohibition of the Development, Production, Stockpiling and Use of Chemical Weapons Convention nga gisagop niadtong Setyembre 3, 1992 kon diin ang Pilipinas nipirma ug nitugot sa Convention niadtong January 13, 1993 ug February 21, 1995. (PIA-7/Chrisley Ann C. Hinayas, Intern-CTU)

===========

DILG-7 miawhag sa mga LGUs sa pag-sumiti sa lista sa mga registradong prangkisa sa mga tricycles aron malakip sa Pantawid Pasada Program

CEBU CITY, May 5 (PIA) --- Ang Department of Interior and Local Government (DILG) nanawagan sa mga mayor sa mga dakbayan ug munisipalidad tibuok nasud nga mosumitir ug sertipikado ug kompletong listahan sa mga rehistradong prangkisa sa mga traysikul sa ilang isig ka lugar aron kini malakip sa makabenipisyo sa programa nga Pantawid Pasada sa gobyerno.

Ang direktor sa DILG 7 Pedro Noval Jr. miingon nga ubos sa executive Order No.32, si Presidente Aquino mihatag lamang karong buwana sa mga ahensya sa gobyerno aron kompletong maimplementar ang Pantawid Transport Assistance Program (PTAP) lukop nasud.

Dinhi sa Sugbo, ang Department of Interior and Local Government ang gitahasang mang-apod-apod sa mga “Pantawid Pasada Cards” ngadto sa mga nanag-iya ug mga traysikul kung diin sila hatagan ug sabsediya nga nagkantidad ug P150.

Si Noval namahayag nga sa kinatibuk-ang 150 ka milyon ka pesos nga ipanghatag sa 990,514 ka mga prangkisa sa trayskul lukop nasud, ang P3.4 ka miyon ka pesos niini gigahin para sa Central Visayas.

Giklaro ni Noval nga kinahanglang makig-alayon ang mga lokal nga lider ngadto kanila tungod ka yang listahan nga ilang isumitir maoy magsilbing basehanan sa ilang pagpang-apod-apod sa Pantawid Pasada Cards.

Base sa Local Government Code, ang Local Government Unit(LGU) ang adunay katungod pag-isyu ug mga prangkisa ngadto sa mga traysikul sa ilang mga lokalidad.

Kinign maong programa gipatuman sa gobyerno aron mpaghatag ug ayuda sa mga drayber tungod sa padayong pagsaka sa presyo sa krudo.

Niadtong Abril 29, mipagawas ug kopya ang DILG sa mga kopya sa guidelines mahitungod sa Pantawid Pasada Program aron ipahibalo sa mga mayor, gobernador ug mga opisyales ang striktong pagpa-imlementar niining programa sa gobyerno. (PIA-7/Maryknoll B. Lague Intern-CTU)


===========

PIA OFW Watch nabutang na sa Facebook

CEBU CITY, May 6 (PIA) --- Alang sa mas maayong pag-alagad sa gobyerno sa Pilipinas sa mga Overseas Filipino Workers (OFWs), ang Philippine Information Agency (PIA) nagbutang na ug bag-ong panid sa Facebook nga gitawag ug “PIA OFW Watch”.

Ang Facebook page napagawas sa miaging Abril 29, diin kaalagad niini ang Department of Labor and Employment (DOLE) ug ang Department of Foreign Affairs (DFA).

Ang PIA OFW Watch magsilbing susi sa OFWs ug ang ilang mga pamilya aron mapaabot ang ilang mga nagkalain-laing pangutana ug uban pang problema ngadto sa gobyerno sa Pilipinas.

Anaay grupo nga maggikan sa PIA ang mutan-aw ani nga mga pangutana ug ipadangat kini ngadto sa mga nagkadaiyang ahensya sa gobyerno sama sa DOLE, DFA, Philippine Overseas Employment Administration (POEA), Overseas Workers Welfare Administration (OWWA), Bureau of Immigration (BI), Commission on Filipinos Overseas (CFO), ug Manila International Airport Authority (MIAA) alang sa mga tubag o aksyon nga mahimo.

Ang PIA OFW Watch usab magsilbing lugar diin ang mga nahisgutang mga ahensya sa gobyerno mobutang sa ilang mga anunsiyo ug uban pang impormasyon mahitungod sa mga pangutana sa OFWs

Ang PIA usab mobutang ug mga nakuhang istorya sa disi-sais (16) ka mga regional offices ug saysentay-otso (68) ka provincial information centers nga may hinlabot sa OFW.

Ang mga istorya maglangkob sa lokal nga gobyerno ug mga non-government agencies. 

Sa palid sa facebook makita usab ang mga balita gikan sa print, broadcast ug online media nga maghisgot sa panghitabo sa tibuok kalibutan nga may posibilidad nga makaapekto sa mga OFWs. (PIA-7/Ailene G. Limutan, Intern-CTU)

==========

Beautification drive sa Sugbo

CEBU CITY, May 6 (PIA)---Liboan ka mga Sugbuanon ang nisalmot sa “Beautify Cebu Unity Walk” nga gipangulohan ni Gobernador Gwendolyn Garcia, Mayor Michael Rama ug ang philanthropist Mariquita Salimbangon-Yeung.

Si Yeung, chairwoman sa Cebu Beautification Movement Foundation Inc. niimbita sa tanang Sugbuanon sa pagtabang pagpahiuli sa kaanindot sa Sugbo pinaagi sa pagdonar ug pundo.

Siya nidonar ug P1 ka milyones alang sa restorasyon sa Osmeńa Blvd. nga gitawag ug Osmeńa Boulevard Restoration Project”.

Si Yeung kuyog sa mga ubang kababayn-an sa lain-laing sektor nanghinaut nga makalikom ug minilyon alang sa beautification project nga naglangkob sa pagsuga sa mga kahoy, pagtaod ug mga lampposts ug ang pagkonkreto ug bricks sa mga aseras sa karsada.

Ang grupo nagkauyon nga mopahigayon ug concert for a cause uban sa mga Sugbuanong artista ug ang concert king nga si Martin Nievera aron makalikom ug pundo. Ila usab giplanohan ang pagpahigayon ug fashion show for a cause.

Iyang gibutyag nga samtang ang kagamhanan wala pay ikagasto sa proyekto, ang maintenance mao ang gitugyanan aron sa pagsiguro sa mga suga ug ubang mga materyales nga igtutukod alang sa restorasyon nga dili makawat. (PIA-7/ Angie P. Amodia, Intern-CTU)

===========

LPA magdala ug uwan sa Sugbo —Pag-asa

CEBU CITY, May 6 (PIA)---Ang weather bureau kagahapon niabiso sa mga residente sa Sugbo sa Low Pressure Area (LPA) nga mamahimong magdala ug uwan nga makaingon ug landslides ug pagabaha.

Si Oscar Tabada, chief sa Pag-asa Mactan, nagkanayon ang adunay nakit-an nga low pressure area dul-an 300 ka kilometro sa sidlakang bahin sa Surigao nga mamahimong mo-debelop ngadto sa tropical depression.

“Adunay kalagmitan nga ang kaning low pressure area modebelop ngadto sa tropical depression nga makaingon ug kusog nga pagbunok sa uwan”, si Tabada niingon.

Si Tabada nidugang nga kung ang low pressure mamahimong tropical depression, mao unya kini ang ikaduhang tropical depression sa nasud nga pagatawgon ug Bebeng.

Apan sa Tabada nibutyag nga mahibaw-an kini 12 ngadto sa 24 ka oras sukad kagahapon.

Iyang gidugang nga tungod kay ang low pressure duol na sa kayutaan, dili kaayo kini kusog kung mamahimo man ganing tropical depression. Usab iyang giingon nga dili kini direktang moigo sa Sugbo.(PIA-7/ Angie P. Amodia, Intern-CTU)

===========

Naapektuhan sa 2009 nga demolisyon makadawat na ug hinabang nga kwarta

CEBU CITY, May 6 (PIA) --- Muabot sa halos 28 ka pamilya sa Sitio San Jose sa Barangay Sambag I diin ang ilang mga kabalayan naapil sa nahitabong demolisyon sa tuig 2009 makadawat na ug hinabang nga kwarta gikan sa gobyerno sa siyudad sa Sugbo.

City Councilor Edgardo Labella mi-sponsor ug resolusyon mahitungod sa paggahin ug P140,000 nga hinabang nga kwarta sa mga naapektuhan nga pamilya. Ang kada pamilya makadawat ug P5,000.

Kini nga demolisyon nahitabo niadto pang tuig 2009, diin ang Regional Trial Court Branch 19 mipagawas ug demolition order batok sa mga miyembro sa United Group Association sa Barangay SambagI.

Pagkhuman sa nahitabong demolisyon, ang mga pamilyang naapektuhan nihangyo ug hinabang sa gobyerno sa siyudad sa Sugbo apan wala diha-diha dayun matagaan ug hinabang nga kwarta.

Diha ra na desisyunan ang paghatag ug hinabang nga kwarta sa pasiugda ni Labella sa resolusyon aron matabangan ang mga naapektuhang mga pamilya.

Si Daluz mipuno nga kung ang maong kantidad ma-charge sa Supplemental Budget no.2 sa siyudad, muabot na pud ug pipila ka mga buwan una mapagawas ang maong kwarta.

Matud pa Daluz, dili na siya gustong mag-antos pa ang maong mga pamilya sa paghuwat na usab ug laing pipila ka mga buwan human sa duha ka tuig nilang pinaabot. (PIA-7/Ailene G. Limutan, Intern-CTU)