PhilHealth Cards ipang-apod-apod sa mga katawhan sa Sogod, Cebu

CEBU CITY, May 5 (PIA) --- Kapin sa 400 ka mga PhilHealth Cards ang ipang-apod-apod sa mga miyembro sa PhiHealth didto sa minicipalidad sa Sogod, Cebu ugmang adlawa.

Ang gobyerno sa municipalidad sa Sogod pinaagi ni Mayor Lisa Marie Durano namahayag nga sila mi-pa-enrol sa 439 ka mga kunstituwente nga walay igong kinitaan isip prinsipal nga miyembro ubos sa Programa sa PhilHealth.

Ang programa naglangkob sa health insurance alang karong tuiga ug gisalmotan sa mga kwalipikadong indibidual nga ulitaw o dalaga, walay tarong nga trabaho, nag-edad ug ubos sa 21 anyos, legal nga anak kung diin ang ginikanan nag-edad ug 60 pataas ug dili miyembro sa PhilHealth.

Aduna’y mga nalakip nga nag-edad labaw sa 21 anyos nga nag-antos sa bisan unsang balatian nga miresulta sa pagdepende niini sa ilang mga ginikanan alang sa ilang pang-adlaw-adlawng panginahanglan.

Gipamahayag ni Durano nga ang lokal nga gobyerno sa Sogod andam mopasalmot sa uban pang mga kabos nga pamilya ubos sa samang programa sa mga umaabot nga tuig.

Sigun sa mayor, usa sa ilang gitutukan karon mao ang pagpanindot sa serbisyo sa Sogod Rural Health Unit (RHU), nga karon kasamtangang gi-akreditahan sa PhilHealth isip service provider sa maong lugar.

Uban sa mga gitanyag nga serbisyo ngadto sa mga miyembro naglangkob sa konsultasyon, chest x-ry. Urinalysis, fecalysis, sputum microscopy, CBC, Visual acetic acid screening for cervical cancer, breast exam, blood pressure monitoring, annual rectal exam, body measurement, counseling alang sa smoking cessation ug lifestyle modification.

Si Mayor Durano usab nanghinaot nga mapalapdan ang kapabilidad sa RHU aron mamahimo na kining mudawat ug mga lying-in patients.

Ang mga miyembro usab nga ipaubos sa normal nga pagpanganak sa RHU mamahimong makapahimulos sa maternity care package sa PhilHealth nga nagkantidad ug P6,500.

Gipaniguro usab sa PhilHealth ngadto sa RHU ang paggahin ug kantidad nga P5,000 alang sa delivery ug postpartrum care.

Ang mga membro usab guhatagan ug katungod sa pagpahimulos sa P1,500 nga kantidad alang sa prenatal care services.(PIA-7/Maryknoll B. Lague Intern-CTU)

============

Kampanya batok sa illegal nga panagat gihingusgan sa gobyerno
By Eli C. Dalumpines

CEBU CITY, May 5 (PIA) --- Gihingusgan na pag-ayo sa gobyerno ang kampanya niini batok sa illegal nga panagat, matud sa opisyal sa Bureau of Fisheries and Aquatic Resources (BFAR) dinhi sa Tunga-tungang Kabisay-an.

Si Assistant Regional Director Allan Poquita, sa pakighinabi sa PIA, nagkanayon nga duna na’y mga kinabag-uhang mga kahimanan ang mga Bantay Dagat Task Force dinhi sa rehiyon nga makatabang ug daku sa ilang pag-patrolya sa kadagatan aron pag-abog sa mga illegal nga mga mananagat.

Gipadayag ni Poquita nga ang mga Bantay Dagat Task Force sa nagkalain-laing mga munisipyo dinhi sa rehiyon armado na ug mga global positioning satellites nga maka-abag kanila pagpahigayon ug mas epektibo nga pagpanakop.

Ang mga kaanib sa mga task force ug sa mga lokal nga pundok sa mga fish wardens mipalanog sa ilang reklamo sa sayo pa tungod kay ang mga dagku nga mga mananagat nga ilang madakpan nga anha managat sulod sa 15 ka kilometro nga gilatid sa Fishery Code isip municipal waters dali ra man kaayong makalingkawas kay makiglalis man kini kanila nga anaa ra sila managat sa gawas.

Matud ni Poquita nga nakasabot siya sa kahimtang sa mga tigpatuman sa fishery laws tungod kay dali ra man tuod nga malalis kung magsalig ka lang sa mata sa pagbana-bana sa gilay-on sa nahimutangan sa mga illegal nga mga mananagat ngadto sa baybayon.

Apan pinaagi sa GPS ug sa uban pang modernong kahimanan ang mga tigpatuman sa balaod makapakita na gyud ug lig-ong kapasikaran sa ilang pagdakop ug dili na makalalis kadtong mga dagkung mananagat nga mosulod sa mga municipal waters.

Gipadayag usab sa opisyal nga ang BFAR gikatakda nang magapud-apod sa pito ka mga patrol boats ngadto sa mga Bantay Dagat sa rehiyon. Kini nga mga patrol boats, nga dunay mga outboard nga mga makina diin modagan kini hangtud 20 knots, daku unya’g ika-tabang sa kampanya batok sa illegal nga panagat.

Suma pa kang Poquita, ning-minos na ang mga nanggamit ug destruktibo nga paagi sa panagat sama sa pangdinamita ug pagpanghilo. Kung duna man, tua na kini sila sa lagyo nga mga lugar sa rehiyon diin kuli na nga maabot sa mga awtoridad.

Ang gikabalak-an na lang sa mga awtoridad, matud niya, mao na lang kadtong mga dagku nga mga mananagat nga mosulod sa 15-kilometro gikan sa kabay-bayonan nga hugot nga gidili sa Fishery Code. (PIA 7/ECD)

==========

Wage board mo-tuki sa umento sa suholan karong Mayo 12

By Eli C. Dalumpines

Cebu City, May 4 (PIA) – Mopahigayon sa iyang katapusang panagtigom ang Regional Tripartite Wages and Productivity Board (RTWPB) dinhi sa Tunga-tungang Kabisay-an aron pag-tuki sa posibleng umento sa suhulan karong Mayo 12.

Si RTWPB Legal Counsel Atty. Glen Tabon, sa pakighinabi sa PIA, nagkanayon nga wala makakab-ot ug desisyon ang board kung duna ba’y “supervening condition” nga nag-eksister dinhi sa rehiyon atol sa ilang panagtigom kaniadtong Byirnes sa gabii tungod kay naghuwat man kini sa mas kumpleto nga mga datos gikan sa National Statistics Office (NSO) bahin sa kahimtang sa mga katawhan dinhi sa
Tunga-tungang Kabisay-an.

Wala hinoon mohatag si Tabon sa iyang panahom kung nakakita na ba siya ug igong kapasikaran nga kinahanglanon na gyud ang umento sa suhulan basi sa mga datos nga gi-presentar sa ubang mga ahensya sa gobyerno nga didto sa tigom tungod kay matud niya kinahanglan gyud ang kumpleto nga mga datos arong kini mahibaw-an.

Apan mipahibawo ang legal counsel sa RTWPB nga sa higayon nga maka-deklarar na ug “supervening condition” ang board, tuki-on dayon niini ang mga petisyon sa umento sa suholan nga gi-sumiter sa mga pundok sa mga mamumuo
Kahuman gyud nga masabutan kung pila ba ang angay nga ipatuman nga umento, mohimo gilayon ug wage order ang board ug ipa-kumpirmar kini sa National Wages and Productivity Commission didto sa Manila, matud ni Tabon.

Ipadala kini ug balik sa komisyon dinhi sa RTWPB nga naka-basi dinhi sa Sugbo human kini i-kumpirmar. Ang board mopa-patik dayon niini sa mga mantala-an aron mahibaw-an sa publiko.

Ang umento sa suholan mo-epekto 15 ka adlaw human kini mapatik sa mga mantala-an, suma pa niya.

Iya hinoong gi-klaro nga mas dali ang pagpahigayon ug umento sa suholan ubos niini nga sitwasyon itandi sa normal nga proseso tungod kay gi-kunsiderar man ang “supervening condition” nga dili ordinaryo nga sitwasyon nga nagkinahanglan ug dinali-an nga mga lakang.

Gipaniguro sa opisyal nga kung maka-deklarar ug “supervening condition” ang board karong Mayo 12, posibleng maka-implementar ug umento sa suholan karong moabot nga Hunyo. (PIA 7/ECD)

===========

Relasyon sa Pilipinas ug Amerika mas mapalig-on pinaagi sa “14 American Corners”

CEBU CITY, May 5 (PIA) --- Ang gobyerno sa Estados Unidos nagpadayon sa pagpalig-on sa relasyon niini sa gobyerno sa Pilipinas pinaagi sa pagsabwag ug mga impormasyon gamit ang '14 American Corners' nga gipakatap sa tibuok kapuluan.

Ang kining American Corner magsilbing “information outpost” nga nagtinguha sa pagkab-ot niining pakighiusa ug pagsabut sa mga lokalidad sa Pilipinas ug Amerika sa paghatag sa mga tinuod nga nagkalain-laing panghitabo mahitungod sa mga tawo ug palisiya sa Amerika.

Ang American Corners usa ka pakigsabot sa Public Affairs Section sa US embassy sa Manila ug ang mga laing institusyon niini.

Tungod sa American Corner, makahatag kini ug mga bag-o ug kasaligang impormasyon mahitungod sa Amerika pinaagi sa mga makolektang mga libro, ang internet, ug lokal nga programming.

Leslie Bassett, deputy chief of mission for US embassy sa Manila, miingon nga ang American Corners magsilbing lugar alang sa paghinatagay sa mga nagkadaiyang idiya ug kultura sa duha ka nasud.

Si Bassett nagkanayon nga anaay 401 ka mga American Corners sa tibuok kalibutan.

Sa Pilipinas, iyang giiingon nga 14 ka mga American Corners nga anaa sa mga importanteng rehiyon gikan sa Batac sa norte paingon sa south sa Tawi-tawi.

Ang American Corners usab gustong ipadayon ang paghatag ug oportunidad sa publiko sa pagsulti sa ilang gusto pinaagi sa mga programa nga nagpasabot “build bridges of understanding” ug sa laing bahin motugot sa paggamit sa mga English language resources, mga komputer ug internet. (PIA-7/Ailene G. Limutan, Intern-CTU)

===========

BIR malaumon nga makakolekta’g P89.7 billion sa Mayo

CEBU CITY, May 5 (PIA) --- Ang Bureau of Internal Revenue (BIR) masaligon nga makuha ang tinguhang abut sa buhis nga P89.7 billion sa buwan sa Mayo.

BIR Commissioner Kim Henares misulti nga ang katuyuan sa ahensya karong buwana mipakita ug 13.5% nga saka kumpara sa miaging tuig nga aktwal nga nakolekta diin mikabat kini ngadto sa P79.049 billion.

Sa pagpangutana kang Henares mahitungod sa iyang panlantaw alang sa kolekta sa buwan sa Mayo, miasoy si Henares nga masaligon siya sa resulta sa Mayo.

Ang BIR, ang labing unang ahensiya sa nasud nga nag-gunit sa buhis, ang responsable sa halos saysenta (60) porsiyento sa tinuigang abut sa gobyerno.

Sa unang bahin sa tuig, milabaw sa planong tumong ang nakolekta nga buhis diin ang kantidad mikabat sa P2.5 billion. (PIA-7/Ailene G. Limutan, Intern-CTU)

==========

Pag-IBIG membership alang sa mga job orders nga mamumuo

CEBU CITY, May 5 (PIA)---Ang Pag-IBIG Fund-Cebu North Branch nakigtambayayong sa mga Local Governmant Units (LGUs) alang sa enrollment sa job order, project-based ug casual nga mga trabahante sa gobyerno.

Si Dale Mark Antonio, Pag-IBIG-Mandaue Branch Information Officer nagkanayon nga ang Pag-IBIG bag-ohay lang nisud ug kasabutan sa mga municipal governments sa Tabogon ug Borbon isip sakop sa ilang job order, project-based ug casual nga mamumuo.

Ang maong mga trabahante masakop ubos sa self-employed nga kategoriya. Ang duha ka munisipalidad modidak sa mga suholan sa trabahante matag bulan sa kantidad nga mobalor ug duha ka porsiyento sa ilang binulan nga suholan.

Ang trabahante mamahimong mobayad ug sobra pa sa gisugo sa balaod.

Ang LGU, kinsa moremit sa koleksiyon direkta sa Pag-IBIG Fund, gitugotan nga mokolekta sa loan payment pinaagi sa pagdidak sa sweldo.

Si Antonio niingon nga sa ilang pag-enrol, ang mga trabahante makabenipisyo sa mga serbisyo sama sa housing loan, short-term loan/multipurpose loan o calamity loan.

Ang job order nga mga mamumuo walay employee-employer relationship sa LGU, apan ubos sa Republic Act 9679, gikinahanglan sila moparehistro isip miyembro sa Pag-IBIG ubos sa self-employed nga kategoriya way sapayan sa negosyo o trabaho basta adunay kinitaan ug di mominos P1000 ang bulan ug dili molapas 60 anyos.

Ubos sa kasabutan, ang job order nga mga mamumuo dili na kinahanglan moadto sa opisina sa Pag-IBIG Fund aron mobayad sa ilang binuwan nga bayranan.

Ang munisipalidad sa Borbon ug Tabogon dili ang unang LGUs sa Sugbo nga niparehistro sa ilang mga job order nga trabahante sa Pag-IBIG Fund.

Ang Medellin, San Remegio, ug Siyudad sa Bogo nisugot na nga moparehistro ug moremit sa mga Pag-IBIG deductions sa mga job order nga trabahante sa bulan sa Abril. (PIA-7/ Angie P. Amodia, Intern-CTU)

===========

Mga Veterinary suplays ug materyales giturn-over ngadto sa Cebu City

CEBU CITY, May 5 (PIA) --- Tulo ka mga pribadong organisasyon mihatag ngadto sa Siyudad sa Sugbo sa mga suplays ug materyales alang sa mga kagamitan sama sa anesthetics ug rabies vaccine sa Cebu City Department of Veterinary Medicine and Fisheries (DVMF).

Adunay mga 20 ka kahon niining mga suplays nga giturn-over sa ngadto sa DVMF niadtong miaging Abril 13 ug 20.

Ang mga suplays ug materyales gikan sa Humane Society International (HSI). Ang mga anesthetics naggikan sa Japan International Cooperation Agency (JICA) samtang ang mga rabies vaccines hinatag sa Bill and Melinda Gates Foundation (BMGF).

Sa kahinumdoman, ang HSI nipirma ug memorandom of understanding (MOU) uban sa Cebu City government, pinaagi sa DVMF, nga mohatag ug mga suplays, materyales, dugang nga veterinarians ug training alang sa mga lokal nga veterinarians.

Sayo niining tuiga, sunod-sunod nga training ang gipangulohan sa HSI ug sa DVMF. (PIA-7/ Angie P. Amodia, Intern-CTU)

==========

July isip PWD month

CEBU CITY, May 5 (PIA)---Ang konseho sa siyudad sa Mandaue nipasa ug ordinansa aron sa pagdeklara sa bulan sa Hulyo isip Persons with Disability (PWD) Month.

Ang ordinansa adunay katuyoan nga mohatag ug kadungganan sa mga tawong adunay kakulian sa lawas o PWD dinhi sa Sugbo.

Si Louella Cabaner, vice chairperson sa Cultural, Historical, Sports and Tourism (CHEST) Foundation, nibutyag nga daghang PWD ang adunay espesyal nga talento ug aron ipamatuod nga mabuhat nila ang mabuhat sa normal nga tao, gisugyot ang PWD Month nga i-celebrar sa Mandaue City karong uma-abot nga Hulyo.

Sayo niining buwana, ang gobyerno sa Mandaue City nihatag ug P2.3 milyones nga pasilidad alang sa PWDs ug alang sa mga masuso ug kababayen-an sa compound sa City Social Welfare Services. (PIA-7/ Angie P. Amodia, Intern-CTU)

===========

DOH molunsad sa Cervical Cancer Awareness Month karong adlawa

By: Juju S Manubag

CEBU CITY, May 5 (PIA) --- Ilunsad karong adlawa Mayo 5 ang pag-obserbar sa Cervical Cancer Awareness Month sa Vicente Sotto Memorial Medical Center (VSMMC), siyudad sa Sugbo.

Mao kini ang gipahibalo ni Doctora Belinda Pañares, hepe sa Departamento sa OB-Gyne sa VSMMC ug ni Farrah Baroña ang Assistant Coordinator sa Non-Communicable Disease Seksyon sa Centre for Health Department (CHD) sa usa ka pakighinabi sa Philippine Information Agency (PIA).

Si Pañares mipahibalo nga adunay mga kalihukan sa pag-inambitay ug kasayuran kabahin sa cervical cancer, paagi sa paglikay, kontrol ug guidelines unsaon nga mahimuslan ang walay bayad nga cervical cancer screening.

Mitumbok si Pañares nga kadtong mga babae nga sexually active o sexually exposed ang mahimong magpahimulos sa libreng cervical cancer screening nga himoon karong bulan sa Mayo sa VSMMC ngadto sa Cervical Cancer Prevention (CCAP) Bldg nga anaa mahimutang sa luyo sa talambalanan.

Walay bayad usab ang pagpanambal o mga tests na pagabuhaton niadtong matino nga adunay mga abnormalidad o samad sa pag-screen sa cervix, dugang pa ni Pañares.

Sa laing bahin, si Baroña mipahibalo nga sa alas 10 karong buntaga magsugod ang programa alang sa paglunsad sa ‘Free Cervical Cancer Screening’.

Human sa mga pag-ambitay ug mga kasayuran, adunay open forum ug presscon nga pagabuhaton nga pagadumalaon sa hepe sa Local Health Support Division sa CHD nga si Dr. Angelita Salarda, si Baroña miingon.

Ang mga dinapit sa ‘launching’ ugma mao ang taga-CHD, Provincial Health Office (PHO) Rural Health Units (RHU), Technical Working Group (TWG), Global Pharmaceutical Company Merck, Sharp & Dohme (MSD), medical societies sa Philippine Obstetrical and Gynecological Society (POGS), Society of Gynecologic Oncologists of the Philippines (SGOP) ug ang Philippine Society for Cervical Pathology and Coloscopy (PSCPC).

Segun pa sa gikabalita sa DOH, ang pag-obserbar sa bulan sa Mayo nga ‘Cervical Cancer Awareness Month’ maghatag ang DOH ug walay bayad nga cervical cancer screening sa mga babaye nga nag-edad ug traynta (30) hangtod kwarentay singko (45) sa singkwentay otso (58) ka mga akredito nga mga tambalanan tibuok nasod.

Segun sa World Health Organization (WHO) ang nag-edad ug trayntay singko (35) hangtod kwarentay singko (45) anyos ang gitino nilang pangedaron alang sa sa cervical cancer screening, matod pa.

Ang pag-screening himoon matag-Martes ug Huwebes nga inuyonan sa VSMMC, matod sa DOH.

Ang ‘cervical cancer’ pagka-karon maoy ikaduha nga klaseng kanser sa mga kababaenhan ug siyam (9) sa matag napulo (10) ka mga kaso niini nahitabo sa developing countries.

SA tuig, ang gidaghanon sa nahilngan nga adunay sakit sa totoy miabot ug di kapin dose mil (12T) ug ang sa cervix adunay hapit dos mil (2T) nga mga kaso. (PIA-Cebu/JSM)

==========

P-Noy mobisita sa haya sa kanhi bise gobernador sa Sugbo karong adlawa

CEBU CITY, May 5 (PIA)--- Aron paghatag ug respeto ug pahisubo sa nitaliwan nga Bise Gobernador sa Sugbo nga si Gregorio Sanchez, Jr., si Presidente Benigno Aquino III mobista sa haya ni Sanchez karong adlawa, May 5, 2011 diha sa Crystal Palace kun diin kini gihaya.

Sa miaging adlaw ang mga membro sa Presidential Security Group (PSG) nangita sa anak nga babaye ni Sanchez nga si Grecilda “Gigi” Zaballero aron pagpahibaw sa pagbisita sa presidente.

Kagahapon, ang grupo sa OPSOG nakig-miting sa miembro sa pamilya ni Sanchez aron mahapsay ang pagduaw sa Presidente ug mamahimo kini nga usa ka solemni ug simple nga pagrespeto ug pagpahisubo sa mga nahibilin nga pamilya ni Sanchez.

Matod ni Zaballero nga ang ilang pamilya naghuwat sa pagbisita sa presidente dihang gi-confine pa si Sanchez sa Cardinal Santos Hospital didto sa kaulohan apan si P-Noy wala makahimo niini.

Mahinumduman nga si Sanchez usa ka local nga loyalista sa Liberal Party (LP) ubos ni Aquino kinsa nakadaog sa 2010 presidential election. (PIA-7/Chrisley Ann C. Hinayas, Intern-CTU)

===========

Wage Board nangita ug igong rason aron sa usbaw sa suholan dinhi sa CV

CEBU CITY, May 5 (PIA)---Ang Regional Tripartite Wages and Productivity Board sa rehiyon 7 mohimo ug pagpakisayod kauban ang lain-laing mga stakeholders aron sa pagtino kung aduna bay mga 'supervening condition' nga makatabang aron pausbawan ang mga suholan sa mga trabahante dinhi sa Central Visayas.

Si Asteria Caberte nga RTWPB government representative sa wage board, nibutyag nga kutob sa niaging adlaw, base sa ilang pagmonitor sa mga presyo sa mga nag-unang panginahanglanon, wala nisaka ang mga presyo niini.

Si Caberte, kinsa usab regional director sa Department of Trade and Industries-7 nagkanayon nga human sa pagpakigsayod una pa desisyonan sa mga miyembro sa board kung mopahigayon ba ug public hearing aron sa pagtuki sa wage hike petition.

Iyang gidugang nga ang giluwatan nga pamahayag ni Presidente Benigno Aquino III nga usbaw sa suholan sa mga trabahante sa Metro Manila mamahimong basihan sa board sa ilang desisyon kung ang usbaw sa suholan angay ba dinhi sa Rehiyon 7.(PIA-7/ Angie P. Amodia, Intern-CTU)

==========

Siyudad sa Naga nag-una sa DepEd nga pasulit sa CV

CEBU CITY, May 5 (PIA) --- Ang Siyudad sa Naga, Cebu maoy milangkat sa unang dapit sa 2011 regional achievement test alang sa mga estudyante sa elementarya sa tibuok Central Visayas, samtang ang Siyudad sa Sugbo nahimotang isip ikaduha sa pinakauwahing dapit, sumala sa natala sa Dep-Ed sa rehiyon 7.

Gilupig sa Naga ang uban pang 18 ka mga school divisions sa rehiyon pinaagi sa pagkuha sa mean percentage score (MPS) nga 82.41 porsento sumala sa resulta nga gianunsyo niadtong Lunes.

Sa laing bahin, ang siyudad sa Sugbu nakakuha lamang ug MPS nga 53.68 porsento. Nahilakip sa Siyudad sa Sugbo ang lima ka nangulahi mao ang Bayawan nga adunay MPS nga 48.69 %, Carcar 59.41 %, Mandaue 61.66 % ug Bohol Province 62.72 %.

Samtang ang Siyudad sa Naga gisundan sa siyudad sa Bogo nga nakakuha ug 82.32 porsento; Tanjay City 78.73 %; Toledo City 77.67%; ug Negros Oriental nga may MPS nga 75.83 porsento.

Ang tibuok rehiyon 7 nakakuha ug MPS average nga 68.05 porsento.

Ang bise mayor sa Sugbo nga si Augustus Young nagdumili paghatag ug reaksyon kabahin niining maong mga resulta ug mibutyag nga adunay mga report nga niabot kaniya nga may mga sayop ang mga answer keys nga gigamit sa mga testpapers.

Apan ang Direktor sa Dep-ed 7 nga si Recaredo Borgonia sa laing interview mihimakak sa maong taho tungod kay dali nilang nausab ang mga nakit-ang kasaypanan ug nakorehian sa pinakadaling panahon.

Gipaniguro ni Dir. Borgonia nga sakto ug tukma ang ilang gipagawas nga mga resulta. (PIA-7/Maryknoll B. Lague Intern-CTU)

===========

DOE mipirma ug kasabutan sa BPI alang sa “Pantawid Pasada Cards”

CEBU CITY , May 5 (PIA) --- Ang Bank of the Philippine Islands(BPI) maoy nakaangkon sa kontrata kabahin sa produksyon sa mga Pantawid Pasada Cards alang sa Pantawid Pasada Program sa gobyerno.

Si Energy Secretary Rene D. Almandras, BPI Executive Secretary Ma. Ysabel P. Sylianteng ug Land Bank of the Philippines (LBP) first Vice President alang sa NCR Branches Group mipirma sa Memorandum of Agreement (MOA) nga gipahigayon didto sa Philippine National Oil Company Boardroom sa Siyudad sa Taguig.

Ang maong pinirmahay sa MOA gitambongan sa mga miyembro sa Inter-Agency Energy Contingency Committee.

Gipildi sa BPI ang laing upat ka mga bidder pinaagi sa bidding nga gipanguluhan sa DOE’s Bids and Award Committee.

Sa BPI maggikan ang tanang Pantawid Pasada Assistance (PTA) Cards samtang ang LBP nga gipanag-iya sa gobyerno gitahasang motabang sa DOE isip settlement bank sa ahensya.

Gikatakdang magprodyus ang BPI ug 220,000 ka mga PTA cards, nagkantidad ug singkweta pesos matag card alang sa mga kwalipikadong PUJ operators ug drivers.

Lakip sa tahas sa BPI mao ang kompletong paghatod sa mga cards sa dili pa sugdan ang pagpang-apud-apud niini.

Ang DOE nagdahom nga mahuman pag-apud-apud ang mga PTA cards sa dili pa mahuman ang buwan sa Mayo samtang ang ubang rehiyon ipang-apud-apud human sa 20 ka adlaw sa pagsugod sa kaulohan kung diin kini pangunahan sa Land Transportation Office (LTO).

Kabahin sa gitakdang kantidad nga gigahin sa gobyerno alang niining maong proyekto, giklaro ni Secretary Almendras nga ang kinatibuk-ang kantidad mahatag ngadto sa mga PUJ ug tricycle drivers.

Si Secretary Almendras mipahinumdom usab sa mga drayber sa pag-amping sa mga cards bisan pa man nagamit na ang tibuok kantidad sulod sa card tungod kay sugod Hunyo 1, ang mga gasoline stations magkinahanglan sa mga cards gikan sa mga drayber aron sila makahatag sa mga diskwento .

Ang mga PTA cards epektibo hangtod sa lima (5) ka tuig ug mamahimong gamiton alang sa mga umaabot pang proyekto sa gobyerno. (PIA-7/Maryknoll Lague, Intern-CTU)