Mas dakong pundo kinahanglan sa pagsulbad sa problemang malnutrisyon

CEBU CITY, May 3 (PIA) --- Igong pundo alang sa Cebu City Comprehensive Barangay Nutrition Program (CBNP) ang kinahanglanon aron masuportaan ang programa ug mominus ang nagkadaghang kaso sa malnutrisyon sa siyudad sa Sugbo. Giingon sa nagpadayong report ni Dr. Florentino S. Solon, nutrition consultant sa siyudad Sugbo, diin gidumala kining CBNP epektibo ang kini nga programa sa mga “depressed” barangays. Sigon sa mga pagtuong nahimo, niminus na ang kaso sa malnutrisyon sa upat ka mga “at-risk” barangays nga maoy prayoridad sa maong programa. Gani, upat niining mga barangays dili na apil sa Top 10 barangays nga taas ang kaso sa malnutrisyon sa tuig 2010 diri sa siyudad sa Sugbo. Ang mga barangays nga nakabenepisyo ani nga programa mao ang barangay T. Padilla, Mambaling, Kalunasan, ug San Roque. Ang kalampusan ani nga programa nagpakita nga ang mga tigpatuman nga mga departamento susama sa City Health Department, City Agriculture Department ug ang Department of Social Welfare and Services anaay kapasidad sa pagpalapad niinii nga programa sa tanang barangay sa siyudad kung anaa lay igong pundo. (PIA-7/Ailene G. Limutan, Intern-CTU)

===========

CPVDC motubag sa demand sa industriya sa BPO dinhi sa Sugbo

CEBU CITY, May 3 (PIA)--- Tungod sa padayong pagtaas  sa demand sa mga Business Process Outsourcing (BPO) nga mga opisina sa IT Park, ang tigbubuhat sa 24 ka ektarya nga Cebu Asiatown IT Park nga mao ang Cebu Property Ventures and Development Corporation (CPVDC)  motubag sa maong demand pinaagi sa pagkuha ug dugang nga lote.

Matod sa presidente sa CPVDC nga si Francis Monera nga ang kompanya hapit ng manag-iya sa 2.1 ka ekatarya nga lote nga nahimutang tupad sa cyberpark.

Kining pagpahalapad sa lugar tubag sa CPVDC aron sa pagpalambo ug pagdugang ug mga residential ug mga bakanteng opisina sa Park maong sugdan na kini sa dili pa mahuman karong tuiga.

Ang maong proyekto sa kompanya tipik sa gimugnang stratehiya nila sa pagpuhunan  ug balik  sa ilang nakita gikan sa mga halin nila sa ubang proyekto alang sa pagpatukod ug mga edipisyo nga magamit ilabi na sa industriya sa BPO.

Dugang pa ni Monera nga ang padayong pagtaas sa industriya sa BPO sa Sugbo naghatag ug kahigayunan sa mga mamumuhunan sa pagtukod ug mga real estates. (PIA-7/Chrisley Ann C. Hinayas, Intern-CTU)

===========

Peligro sa mga OFWs gawas sa nasud, gipasidan-an

CEBU CITY, May 3 (PIA)--- Bisan man ug daghan ang opurtunidad alang sa mga Pilipino gawas sa nasud, daghan usab ang mga hagit o katalagman ang maagian nila sa laing nasud.

Gipasidan-an ni Josephus Jimenez, usa ka abogado nga dapat magbantay kadtong mga Pilipinong nangandoy makatrabaho gawas sa nasud  sa mga ”hugaw, lisod, kuyaw, alaot ug malimbungon” nga mga trabaho nga gitanyag kanila.

Matod ni Jimenez nga bisan pa man ang usa ka ahensiya adunay lisensiya sa pagrecruit gikan sa Philippine Overseas Employment Administration, mamahimo pa kining ma-ilegal recruitment kon sila nag.recruit bisag walay job orders. 

Dugang pa niya nga 90 porsento sa mga problema sa amga OFWs nagagikan sa mga nagtrabaho nga ni-ikyas sa ilang mga amo tungod sa pagmaltrato o mga sexually abused nga mga biktima.

Usa sa mga katalagman sa mga OFWs mao ang trafficking syndicates nga mopahimulos kanila ilabi na sa mga inosente samtang ang uban mabiktima isip mga drug traffickers nga suguon aron ipa-smuggle ang mga drugas padulong sa laing nasud.

Bisan pa man niini, gisigurado ni Jimenez nga ang tanan mamaayo ug malinawon kon ang mga OFWs nasayod sa mga peligro nga ilang madangatan sa laing lugar.  (PIA-7/Chrisley Ann C. Hinayas, Intern-CTU)

===========

Mga Koreano nanghatag ug 23 ka Computer Units sa Lungsod sa Medellin, Cebu

CEBU CITY, May 3 (PIA) --- Ang Wonkwang Health Science University sa Korea mihatag ug 23 ka mga computer units ngadto sa Martin Salimbangon Training Center nga nahimutang sa Barangay Curva, Medellin, Cebu usa ka buwan human ang gipirmahan ang Memorandum of Agreement.

Ang agreement gipirmahan nila ni Cebu fourth district Rep. Benhur Salimbangon , Presidente sa Wonkwang University nga si Kim In Jong ug Technical Education and Skills Development Authority (Tesda) Secretary Joel Villanueva.

Kiing maong training center sa Curva, Medellin gipatukod ni Salimbangon ug gipangalan sa iyang namatay nga amahan nga kanhi nag-alagad isip Barangay Kapitan sa maong lugar. Kining maong training center ilawon sa pagdumala sa Tesda.

Lakip sa donasyon, mihatag usab ang Wonkwang ug libreng serbisyo sa pagpaayo sa mga gidonar nga mga ekipo.

Ang mga computers adunay mga software kung diin mamahimong makat-on ang mga estudyante sa pinulongang kinoreano sa tuyo nga makat-on sila ug mamahimong makatrabaho sa nasud sa Korea.

Ang pagtuon sa pinulongang Korean dili lamang makatabang sa pagpangita ug trabaho sa laing nasud kundili apil ang lokal nga panarbaho sama sa Medellin nga maoy nagdumala sa 200 ka mga Koreans matag semana atol sa ilang pagduwa ug golf.

Sa laing bahin, aduna usab nga mga negosyanteng Koreano ang interesado sa pagtukod ug mga world class facilities sa maong lungsod sama sa hotel, spa ug laing international golf course.

Mahitungod niini, si Medellin Mayor Ricardo Ramirez nag-aghat sa mga Koreanong negosyante sa pagprioritize sa mga residente sa Medellin sa pagdawat sa trabaho.

Si Salimbangon mapasalamaton sa unibersidad ug sa TESDA sa pagpili sa ilang training center isip recipient sa mga computer units.

Sa iyang bahin, si Kim misaad sa pagtabang sa mga interesado ug adunay katakus nga estudyante sa maong training center pagpasulod ug trabaho sa ilang nasud.

Misaad usab siya nga sila mohatag pa ug laing tabang ngadto sa lungsod sa umaabot nga panahon sama sa pagpatukod ug buiding alang  sa ilang health center uban na ang kompleto nga mga ekipo.(PIA-7/Maryknoll B. Lague Intern-CTU)

============

SEA-K program sa DSWD, dakong tabang ilabi na sa may kakulangan

CEBU CITY, May 3 (PIA)--- Isip tabang sa mga tawo nga naay mga kakulangan, usa ka tseke ang gihatag sa Department of Social Welfare and Development sa Central Visayas (DSWD-7) nga nagkantidad ug 15 mil ka pesos ngadto sa tulo ka mga buta nga nigradwar sa Area Vocational Rehabilitation Center II (AVRC), usa ka panggobyernong pasilidad nga nag-alagad sa mga persons with disabilities (PWDs).

Ang maong hinabang gamiton isip pundo alang sa ilang therapeutic massage service nga maoy gigikanan sa ilang panginabuhian apan 80 porsento sa maong kantitad ibalik didto sa gobyerno sulod sa duha ka tuig nga bayran ug P400 matag buwan.

Ang nabayad nga kantidad gamiton na usab sa DSWD aron itabang sa ubang nagkinahanglan o sa mga asosasyon nga gusto usab makabebepisyo  sa maong hinabang.

Tungod niining programa  nga gitawag ug Self-Employment Assistance-Kaunlaran (SEA-K), masuportahan niini ang pinansyal na kinahanglan sa mga PWDs aron magamit  ang ilang mga abilidad alang sa ilang panginabuhian. (PIA-7/Chrisley Ann C. Hinayas, Intern-CTU)

==========

Tinguha sa limpyo nga baybayon sa Sugbo

CEBU CITY, May 4 (PIA)---Ang bag-ong gitudlo nga Bantay Dagat Commission Project Director Ranulfo Sebusa miingon nga gusto niyang masiguro, kuyog sa tabang sa Coastal Resource Management Board, nga ang mga baybayon sa siyudad sa Sugbo adunay igong kalimpyo aron sa pag amuma ug mga marine life.

Si Sebusa mipadayag nga gusto usab niya nga makigtambayayong sa ubang Bantay Dagat units sa lalawigan aron malikayan ang pagpaninda ug mga ilegal ug dinaminitahan nga isda.

“Ang isda nga ginamitan ug dinamita makadaot sa lawas. Ang paggamit ug mga explosives makaguba usab sa mga corals,” si Sebusa, atol sa press briefing sa City Hall.

Si Sebusa nga ni asumir niadtong Lunes mibutyag nga mangita siya ug dugang nga tulo ka law enforcers aron ipuno sa 10 ka bantay dagat personnel—lima gikan sa pulis sa siyudad ug maritime police offices ug laing lima ka sibilyan nga sinuholan sa City Hall. Iyang gidugang nga gusto niya ang iyang mga personnel ma hasa sa rescue operations.

Si Sebusa mipadayag nga nagkinahanglan sila ug bag-ong pumpboat aron sa paggukod sa mga ilegal nga mga mananagat. (PIA-7/ Angie P. Amodia, Intern-CTU)