Kreminalidad sa CV mikunhod ngadto sa 25% sa unang tulo ka bulan sa 2011

By: Juju S. Manubag

CEBU CITY , May 3 (PIA) --- Krimenalidad sa Central Visayas mikunhod ngadto sa 25 porsiyento sulod sa unang tulo ka bulan sa 2011 kung ikumpara kini sat ala sa miaging tuig sa parehong mga bulan (January-March).

Mao kini ang taho ni P/Supt Audie Villacin, OIC sa Regional Investigation Detection Management Division (RIDMD) ug ni PO2 May Torregosa, Crime Registrar sa Police Regional Office (PRO-7).

Sigun sa tala adunay 6,732 nga kadaghanon sa krimen sa Central Visayas sa unang mga tulo ka bulan sa 2011 samtang sa 2010 sa susama gihapon nga mga bulan, aduna kini 8,986 nga mga natalang gidaghanon nga krimen.   

Ang mga krimeng index batok sa tawo (murder, rape, physical injuries, homicide) karong tuiga mirehistro ug 1,233 o 33.39 porsiyento ang pagkunhod niini kung ikatandi sa miaging tuig nga  1,851 ka mga krimen sa Central Visayas.

Kini sulod lamang sa Enero ngadto sa Marso nga tala. Segun pa sa taho ni Villacin, ang siyudad sa Sugbo ang mitala sa kinadaghang krimen nga 2,105 sa unang 3 ka bulan rong tuig.

Gisundan kini sa probinsiya sa Sugbo nga may 1,868 ka mga krimen;  Negros Oreintal nga may 1,019 ka krimen; Bohol nga may 667 ka mga krimen ug Lapulapu nga may 541 ka mga krimen.  

Misunod ang Mandaue City nga may 480 nga mga insidente ug ang probinsiya sa Siqiujor nga may 52 ka mga insidente nga natala sa unang 3 ka bulan karong tuiga.

Samtang ang mga krimeng index batok sa mga katigayonan ug kabtangan (robbery, theft, carnapping ug cattle rustling) mikunhod usab ngadto sa 20.83 porsiyento sa 3,606 nga natala niini.

Kung ikumpara kini sa miaging tuig, ang krimeng index batok sa kabtangan o katigayonan mitala ug 4,555 ka mga krimen sa unang tulo ka bulan.

Ang pagpangawat o theft ang labing daghang krimen nga narehistro.  Mikabat kini sa 45.44 porsiyento sa 2,199 ka mga pagpangawat nga kremin sulod lamang sa a unang tulo ka bulan ning tuiga.

Ang kremin sa pagpanulis o robbery nga may 25.71 porsiyento sa 1,244 nga insidente mao’y ikaduha nga daghan ug tala.

Gisundan kini sa mga kremin sa physical injuries nga may 18.43 porsiyento sa 892 nga narehistro nga mga kaso.

Murder o pagpatay anaa sa mga 3.39 porsiyento sa 164 nga natala niini; carnapping nga 2.98 porsiyento sa 144 ka mga kaso ug homicide nga may 2.03 porsieynto sa 98 ka mga kaso.

Ang kaso sa rape ana asa mga 1.63 porsiyento sa 79 ka mga insidente ug cattle rustling nga .39 porsiyento sa 19 mga kaso nga natala.

Panapos pa ni Villacin nga ang siyudad sa Sugbo nagpabilin nga daghang natala nga mga krimen batok sa tao ug batok sa kabtanganan samtang ang Siquijor nagpabilin usab nga tagsa ray krimen. (PIA-Cebu/JSM)

============

845 ang na-hired diha-diha dayon sa Labor Day Jobs Fair dinhi sa CV

by: Juju S. Manubag

CEBU CITY, May 3 (PIA) – Otso siyentos kwarentay singko (845) ka mga aplikante sa Labor Day Jobs Fair dinhi sa Sugbo ang na-hired diha-diha dayon.

Si DOLE-7 acting regional director Ezequiel Sarcauga nagkanayon  nga sa 845 nga na-hired on the spot, 22 niini alang sa gawas sa nasod kon overseas employment samtang ang nahabiling 823 alang sa pagpanarbahong lokal.

Ang DOLE-7 milaum nga ang gidaghanon mosaka pa tungod ang ilang taho gi-basi sa tala nga gihatag kutob alas 5 kagahapong adlawa lamang.

Adunay mga ahensiya nga anaa pa lang sa paghatag ug testing ug interbyu. Lagmit duna pay ikadugang sa gikataho nila sumala ni Ken Silvano, ang Statistician sa DOLE-7.

Si Sarcauga, nagkanayon usab nga 5,706 ang na-rehistro kagahapong adlawa nga mga jobseekers sa tibuok Central Visayas .

Adunay 5,681 niini ang gi-refer ngadto sa mga kumpanya nga miapil sa jobs fair ug 5,583 ang na-interbyu dayon kagahapong adlawa.

Sa na-hired on the spot nga 845 ka buok, 360 kanila gikan sa SM jobs fair, samtang 463 usab ang gikan sa CICC jobs fair nga gipahigayon kagahapong adlawa.

Siyento singko (105) ka mga lokal employers ug trayntay sais (36) ka mga ahensiya alang overseas employment ang miapil sa 4 ka mga jobs fair nga gipahigayon sa Central Visayas diha sa SM Cebu, CICC, Cebu City Sports Complex ug Macias Sports Center, Dumaguete City.

Ang jobs fair usa lamang sa tipik nga pamaagi sa paghatag ug trabaho sa mga nagkinahanglan niini sama sa bag-ong gradwado, Overseas Filipino Workers (OFWs) nga namauli ug nawad-an ug trabaho ug uban pa nga nangita ug trabaho sa rehiyon.

Kapin sa 17,500 mga trabaho ang gi-andam alang sa mga nangita ug trabaho nga kapilian sa giphigayon nga usa ka adlaw nga jobs fair kagahapong adlawa sa Adlaw sa Pamuo.

Ang pagpahigayon sa jobs fair nagtuman sa tinguha sa administrasyong Aquino sa paghatag ug kasayon sa mga pagpangita sa kawani ug trabaho maingon man sa agalon ug trabahante aron makahatag sa nasod ug eknomikanhong kalamboan ug kausbawan.

Ang mga jobs fair gi-organisar sa DOLE 7, Philippine Overseas Employment Administration (POEA) inabagan sa mga local government units sa Sugbo, probinsiya sa Sugbo, Negros Oriental ug SM Cebu City. (PIA-Cebu/JSM)

============

Eco Store maayong sumbanan aron malikayan ang mga kalamidad

CEBU CITY, May 3 (PIA) --- Si Senator Loren Legarda miawhag sa mga kooperatiba sa pagpanghinlabot sa pagpatuman aning mga “green” nga pamaagi sama sa pagpatukod sa Eco Store aron mas makalikay ang nasud sa mga nagkalaing-laing kalamidad.

Sa gipahigayon nga unang NCR Cooperative Sector Conference on climate change, si Legarda, chair sa senate committee on climate change miingon nga mas tagaan ug tumong ang paggamit niining mga “green” nga mga teknolohiya ug mga proyekto.

Matod pa ni Legarda, ang kooperatiba anaay dakong kapasidad sa pagpahigayon niining mga kalihukang adunay kalabotan  sa mga “green” nga mga proyekto batok sa pagsukol niining climate change.

Ang coop sector mahimong mohimo ug kasabutan sa Technical Education and Skills Development Authority (TESDA) alang sa pagbuhat sa mga livelihood programs aron makat-unan ang mga “green skills” susama sa pagbuhat sa newspaper bag weaving, pagbuhat sa mga tsinelas ug paghimo sa bag gikan sa water lilies ug pagbuhat usab sa mga bracelets ug rosaries gikan sa mga ginamit nga magasin.

Miingon si Legarda nga responsibilidad sa tagsa-tagsa kanato ang pag-apil niining mga pamaagi aron paglikay sa mga kalamidad. (PIA-7/Ailene G. Limutan, Intern-CTU)

===========

AFP pension system ipadumala sa GSIS

CEBU CITY, May 3 (PIA)---Tungod kay ang mga unipormadong mga personnel trabahante sa gobyerno, ang ilang retirement ug mga benipisyo gikinahanglan managsama sa ubang empleyado sa gobyerno.

Kini maoy giingon ni senador Chiz Escudero, chairman sa Senate Committee sa National Defense and Security, ang pension sa mga unipormadong mga trabehante gikan sa lain-laing serbisyo sama sa Armed Forces of the Philippines (AFP), Philippine National Police (PNP), Bureau of Fire Protection (BFP) ug ang Coast Guard gidumala sa nagkalain-laing retirement ug benefit system busa ang suholan dili tugbang sa ilang serbisyo.

Karon, ang Armed Forces of the Philippines (AFP) pension system gidumala sa Retirement Service and benefit System sa military samtang ang mga police personnels makakuha ug mas maayong balos kompara sa ubang unipormadong empleyado.

Si Escudero nagkanayon nga tungod sila empleyado sa gobyerno, angay lang nga ang Government Service Insurance System (GSIS) ang modumala sa ilang pension system.

Ang GSIS adunay kahanas sa maong butang mao nga ang senador nimando nila sa pag himo ug pagtoon sa pagkamatarunganon sa pension system sa mga unipormadong trabahante.

Ang senate defense ug security committee nihatag sa GSIS sa mga datos alang sa actuarial nga pagtoon, kaparehas nga datos nga gigamit sa committee sa niaging panagtigom ug pagdungog sa niaging tuig. 

Si Escudero mipasabot nga gusto nila nga ang mga unipormadong empleyado mahatagan ug makiangayon ug makatarunganon nga pension tugbang sa katakos sa ilang panirbisyo.(PIA-7/ Angie P. Amodia, Intern-CTU)

===========

Ten Outstanding Students of the Philippines:

20 ka entrante, tinun-an sa Central Visayas

CEBU CITY, May 2 (PIA)---Baynte ka mga tinun-an sa kolehiyo gikan sa onse ka mga tunghaan sa Central Visayas ang makigtigi para sa luna nga usa sa Ten Outstanding Students of the Philippines Region VII (TOSP-R7). Ang TOSP Alumni Community ug ang Commission on Higher Education Region VII mipagawas sa pangalan sa mga kandidata nga gipili human miagi ug mahugot nga screening process nga gihimo sa Cebu City sa niaging bulan.

Gikan sa Sugbo, ang mga entrante mao sila si Laurraine May Georfo, Shiela Marie Ladroma, Athena Plaza ug Karl Patrick Ermac gikan sa University of San Carlos; Lovely Genoguin, Charles Ruel Novabos, ug Alvin Pahati gikan sa University of San Jose-Recoletos; Edilyn Lopez gikan sa University of Cebu-Banilad; Dexter Dungog ug Alan Angelo Llevares sa Cebu Institute of Technology-University; Patricia Andrea Pateńa gikan sa St. Theresa's College; Jollyjoie Serad sa University of the Visayas; Nikki Marie Gerevola ug Carla Marie Tumulak sa University of the Philippines Cebu College; ug Luigine Christi Chan sa Southwestern University.

Sa Dumaguete, ang mga apil mao sila si Argie Pinanonang ug Chic Borromeo gikan sa St. Paul University ug Johanna Lei Bandoy, Jonathan Andro Tan ug Marie Chielo Ybio sa Silliman University.

Ang TOSP-R7 tinuig nga kalihikan aron sa pag-ila sa mga labing maayo ug utokan nga tinun-an sa lalawigan sa Rehiyon 7 kinsa nanghawod sa academic, leadership ug social responsibility. Dugang pa nga naa kini katuyoan nga mopahiluna ug mga ehemplo nga modasig sa mga kabatan-onan nga motabang sa kinatibuk-ang tawhanon ug ekonomikong paglambo sa nasud. (PIA-7/ Angie P. Amodia, Intern-CTU)

============

Negosyanteng grupo dinhi sa Sugbo mogasto ug P5B alang sa halapad nga mga proyekto diha sa IT Park

CEBU CITY, May 3 (PIA) --- Ang mga opisyales sa Cebu Holdings Inc. (CHI), ang grupo nga nagdumala sa Cebu Business Park dinhi sa Sugbo, mo tugyan pag-usab ug laing P5 billion nga capital expenditure alang  sa mga proyekto nga moapil sa pagpalapad sa Asiatown IT Park  karong tuiga. Kini maoy ikaduhang bahin sa mga proyekto diin sila midugang ug laing 8.1 nga ektarya sa yuta aron sa pagpalapad sa ilang 'business operations.' Matod pa sa presidente sa CHI nga si Francis Monera, mosugod sila sa duha ka ektaryang pagpalapad sa Asiatown IT Park ug mopadayon na usab sa residential nga mga proyekto nga anaa sa kabtangan. Si Monera misulti usab nga anaa na sila sa panghianpos nga hugna sa pagkuha niining 8.1 nga ektarya sa yuta nga anaa tapad sa Asiatown IT Park, diin plano sa grupo nga himuon ug residential hub ang lugar. Naghinaot ang CHI nga ang pagpalapad sa Asiatown IT Park masugdan karong tuiga o unang mga buwan sa 2012. Ang CHI nakuha pag-usab ang duha ka ektarya sa Cebu Business Park ug planong mobutang ug mas daghang residential nga mga proyekto sa lugar. Ang kini nga mga plano sa CHI gi-anunsyo ni Monera sa miaging Biyernes atol sa Annual’ Stockholders’ Meeting sa Cebu City Sports Complex. (PIA-7/Ailene G. Limutan, Intern-CTU)

===========

Red Cross  mopasidungog sa mga journalists

CEBU CITY, May 3 (PIA)--- Aron paghatag ug pag-ila sa mga binuhat sa mga journalists gikan sa print, online ug broadcast media, ang International Committee of the Red Cross (ICRC) kauban ang Philippine Red Cross (PRC) nag-organisa ug Red Cross Award for Humanitarian Reporting, ang labing una nga indigay sa journalism karong Mayo 7 didto sa siyudad sa Pasig.

Ang katuyoan sa maong kalihukan mao ang pagpadasig sa responsableng pagbalita sa mga 'conflict situations' pinaagi sa pagpunting sa mga kalisud nga naagian sa mga naapektuhan niini.

Matod ni Anastasia Isyuk, ICRC’s communication coordinator nga ang mga journalists ug mga pangkatawhan nga mga organisasyon naay komun nga responsilibilidad nga seguraduhon nga ang wala mahilambigit dili hilabtan ug hatagan sa kahigayonan nga magpuyo ug normal nga kinabuhi. 

Ang Red Cross Award ihatag ngadto sa mga journalists nga nagkugi sa pagtukod ug mas maayo nga kaugmaon sa mga katawhan nga dili kanunay mahatagan ug pagtagad o gihuwad isip inosenteng biktima sa gubat.

Dul-an sa 23 ka mga entrante nagagikan sa nagkalain-laing rehiyon ang mosalmot sa maong inindigay kon diin lakip niini ang mga beterano ug mga community journalists.

Apil usab sa maong kalihukan ang 15 ka mga hurado gikan sa mga kaubang organisasyon, mga beteranong jouranalists, executive director sa Kapisanan ng mga Brodkaster ng Pilipinas nga maoy mohukom sa mga mananaog sa maong indigay. (PIA-7/Chrisley Ann C. Hinayas, Intern-CTU)

============

 Pagsalmot sa mga barangay sa Sugbo aron sa pagpukan sa human trafficking

CEBU CITY, May 3 (PIA)---Ang konseho sa siyudad sa Sugbo buot nga mosalmot ang tanang mga barangay sa pagmonitor sa mga kadudahang kalihokan nga mosangko ngadto sa human trafficking sa ilang mga tagsa-tagsa ka ginsakupan.

Si konsehal Lea Japson, vice chairperson sa Cebu City Inter-Agency Council Against Trafficking(CCIACAT), nagkanayon sa resolusyon nga ang pagsalmot sa mga barangay makatabang sa ilang kampanya sa pagpukan sa trafficking dinhi sa siyudad.

Si Japson miingon nga gusto nila nga ang mga barangay mopatuman sa mga probisyon sa Republic Act 9208 kon ang Anti-Trafficking in Persons Act of 2003.

Ang mga barangay usab gihangyo sa pagduso ug mga bag-ong polisiya nga mopahugot sa seguridad sa ilang barangay. (PIA-7/ Angie P. Amodia, Intern-CTU)

============

231 ka pamilya sa NegOr ang nipahimos sa serbisyong medikal

CEBU CITY, May 3 (PIA)---Nikabat ug 231 ka kabus nga pamilya gikan sa duha ka barangay sa lungsod sa Siaton , Negros Oriental ang nipahimulos sa libreng medical ug dental nga serbisyo nga gihatag sa mga kasundalohan sa Philippine Army's 302^nd Infantry Brigade Niadtong miaging bulan sa Abril.

Nikabat ug 133 ka lumolupyo gikan sa barangay Siit ug 98 nga naggikan sa barangay Bonbon ang giatiman sa mga medical ug dentals, kini mao ang gibutyag sa assistant civil military operation officer 1^st Lt. Win Love G. Bag-ao.

Apil sa maong serbisyo mao ang dental check-up ug ang pag-ibot sa ngipon, libreng tuli ug libreng masahe.

Sa samang adlaw, laing medical nga grupo gikan sa maong brigade ang nanghatag ug libreng tuli sa Piapi High School Compound sa Dumaguete City sa 193 ka mga bata gikan sa mga barangay Bantayan, Daro, Piapi ug Lo-oc. (PIA-7/ Angie P. Amodia, Intern-CTU)

============

Pantawid Pasada information drive, hingusgan sa gobiyerno

CEBU CITY, May 3 (PIA) --- Aron hingusgan ang ilang paghatag sa suporta sa Pantawid Pasada Program sa gobyerno, ang mga Government Information Agents (GIA) gikan sa lainlaing lugar sa nasud nagpahigayon sa panagtigum niadtong Martes sa Hotel Rembrant sa Siyudad sa Quezon sa kaulohan. 

Ang nag-unang tinguha niining maong tigum mao ang paghatag ug tabang sa mga drayber sa PUJ ug tricycle nga maoy nag-unang apektado sa padayong pagsaka sa presyo sa lana pinaagi sa pagpatuman sa mas epektibo nga pamaagi sa pagpahibaw sa mga drayber sa mga butang mahitungod niining Pantawid Pasada Program, kini sigun ni Energy Secretary Rene Almendras sa gipahigayon nga briefing sa wala pa magsugod ang tigum.

Siya miingon nga ang kasamtangang bakasyon sa eskwela nagdugang sa pag-antos sa mga drayber tungod sa dili malimod ang kadako sa kunhod sa gidaghanon sa mga sumasakay.

Human sa pipila ka mga panaghisgot kauban ang mga transport groups, ang gobyerno maghatag sa ayuda karong sunod semana pinaagi sa pagpanghatag sa mga Pantawid Pasada Cards sa mga pampublikong drayber ug sakyanan aron maminusan ang epekto sa kamahal sa lana karon. 

Kining maong proyekto misubay sa gi-isyu nga Executive Order 32 sa Presidente sa Pilipinas Benigno Simeon Aquino.

Matag usa ka pantawid pasada card may sulod nga P1,050.00 nga mamahimong gamiton sa mga drayber sa ilang pagpamalit og fuel ngadto sa mga misalmot nga mga gasoline stations.

Kining maong kantidad mamahimong gamiton sulod sa usa ka buwan apan ang cards epektibo hangtod sa musunod nga lima ka tuig kung diin mamahimong magamit kini pag-usab sa mga umaabot pa nga ayuda gikan sa gobyerno.

Giklaro hinuon ni Almendras nga kining maong programa kabahin lamang sa dinaliang solusyon nga gihimo sa gobyerno ug  ang ilang giisip nga pinakaepektibong solusyon niini mao ang paggahin ug dakong kantidad aron magpatukod ug kaugalingong planta sa lana sa Pilipinas pinaagi sa pagdebelop sa mga lugar nga adunay potensyal mamahimong source sa lana sa tibuok nasud. (PIA-7/Maryknoll B. Lague Intern-CTU)

===========

Kusganong pagpatuman sa garbage segregation dinhi sa Sugbo

CEBU CITY, May 3 (PIA)---Tungod sa hugot nga pagpatuman sa polisiya sa segregation sa basura, di mu-minos 1,283 ka indibidwal ang na-isyuhan na ug citation tickets sa dili pagtuman sa polisiya sa Cebu City nga paglain-lain sa basura.

Si konsehal Nida Cabrera miingon nga katunga sa mga na-isyuhan nibayad sa gikasabutan nga multa nga P500.

Ang mga nahibilin adunay kinse ka adlaw sa pagpakita sa city hall ug pagbayad sa multa aron malikayan ang pagpasaka ug reklamo alang sa kalapasan sa Ecological Solid Waste Act of 2001 ug sa ordinansa sa siyudad.

Republic Act No. 9003, o ang Ecological Solid Waste Act of 2001, nagdili sa katawhan sa paglabay ug sagol-sagol nga basura.

Si Cabrera miingon nga dili lamang sila sa paggukod sa mga molapas sa polisya kundi lakip sa pagdala sa ilang mga kampanya ngadto sa mga katawhan.

Iyang gidugang nga ang mga opisyales sa mga barangay nakigtambayayong na sa ilang adbokasiya. (PIA-7/ Angie P. Amodia, Intern-CTU)

===========

Gobyerno sa siyudad sa Sugbo planong paubsan ang amusement tax

CEBU CITY, May 3 (PIA) --- Ang bise-mayor  sa Sugbo nga si Joy Augustus Young miingon nga ang gobyerno sa siyudad sa Sugbo motinguha sa paghimo sa siyudad isip “amusement capital” sa tibuok nasud.

Kini ang dakong tumong sa gobyerno maong plano nilang paubsan ang amusement tax aron pangdani sa mga tigpasundayag, tigpamuhunan sa pagpatukod ug mga amusement park sa siyudad ug ang mga tigbuhat ug mga kalihukan.

Sigun ni Young, kini nga tumong mahitabo sa pag-“cut” sa amusement tax gikan sa treynta (30) porsiyento ngadto sa singko (5) porsiyento.

Sa umaabot, plano ni Young moduso ug proposal diin pagwagtang na gayud niining amusement tax apan kinahanglan pang hinay-hinayon aron dili kalit maapektuhan ang kolekta sa buhis.

Dugang pa ni Young ang mga tigpasundayag gikan sa kauluhan pabayron ug diyes(10) porsiyento sa amusement tax ug singko (5) porsiyento usab sa amusement tax ang mga local nga tigpasundayag.

Ang maong proposal wala pa na-aprubahan apan matud pa ni Young, malaumon siya nga ma-aprubahan kini. (PIA-7/Ailene G. Limutan, Intern-CTU)