DOLE-7 adunay mga pundo alang sa pagpalambo sa panginabuhian sa mga mamumuo sa CV

By: Juju S. Manubag

CEBU CITY, May 04 (PIA) - - - Ang Department of Labor and Employment (DOLE-7) dinhi sa rehiyon 7 adunay mga nagkalain-laing mga pundo nga alang sa pagpalambo sa panginabuhian sa mga mamumuo dinhi sa Central Visayas.

Usa niini mao ang pundo pa nga kapin trese milyones (P13M) ang nahibilin gikan sa P16.5M nga pundo nga gitawag ug Workers Income Augmentation Program (WINAP) alang sa mga programa karong tuiga.  

Matud pa ni Janet Toroy, DOLE-7 Budget Officer nga nakuhaan na kini ug kapin dos punto sais milyones (P2.6M+) nga napagawas sa DOLE-7 silbeng ‘grants’ alang niadtong mga lehitimong organisasyon, local government units (LGU), kooperatiba, unyon, impormal nga sektor nga nagkinahanglang ug dugang nga puhunan alang sa ilang negosyo o panginabuhian.

Segun pa ni Toroy, 20 na ka mga hugpong ang nakabenepisyo sa kapin P2.6M sa WINAP nga pundo.

Si Toroy midugang sa pag-ingon nga gawas sa kapin P13M nga pundo sa WINAP alang sa mga mamumuo, aduna pa’y laing pundo ang DOLE-7 nga P3.1M alang sa programa nga gitawag ug (PRESEED) kon Promotion Rural Enterprise through Self Employment and Enterprise Development ug P65T nga pundo gikan sa Workers Organization Development Program.

Matod pa ni Toroy, adunay tulo (3) na ka mga organisasyon nga nakabenepisyo sa PRESEED nga nibalor ug P738,380 ang ilang nahatag.

Samtang sa WODP, adunay duha (2) na ka pundok ang natagaan ug balor P 243T nga pundo niini.

Miingon usab si Toroy nga adunay espesyal nga programa ang DOLE-7 nga alang sa mga estudyante nga mo-empleyo sa panahon sa summer nga ginganlan ug SPES kon Special program for Employment of Students.

Sumala pa ni Toroy nga adunay memorandum of agreement (MOA) nga pagabuhaton ang LGU o tigpapatigayon diin sila ang mohatag sa 60 porsiyento sa suholan sa estudyante ug ang DOLE-7 ang mosubsidiya sa balance nga 40 porsiyento nga suholan.

Sa laing bahin, si Sheila Rosaroso, Labor and Employment Officer sa DOLE-7 miingon nga ang mga mosunod nga mga grupo mao’y pagahatagan sa mga tseke nga i-award atol sa programa’ng gipasundayag alang sa Adlaw sa Pamuo ngadto sa Sisters of Mary School sa niaging Mayo 1.

Gikan sa WINAP nga pundo sa DOLE-7, ang barangay Pajo, Lapulapu LGU proyekto nga triycycle spare parts trading  ang nakadawat ug P150,000.

Ang Barangay Pajac, Lapulapu LGU nahatagan ug kapin P144,500 alang sa proyekto niining detergent soap, fabric conditioner ug dish washing liquid making.

Ang barangay Guba Women’s Association nakadawat usab ug ‘grant’ nga P141,990 alang sa proyekto nilang decorative drape curtains ug bag making.

Ang Barangay Pulangbato usab nahatagan ug kapin P119,988 alang sa meat processing nga proyekto niini.

 Sumala usab ni Rosaroso ang LGU sa lungsod sa Pinamungahan nakakuha ug P466,950 alang sa  motorized fishing boat ug fishing net project niini.

Ang Sibonga’s  cutflower farming ug buy and sell grocery store project niini nakadawat ug P420,000 samtang ang LGU Ronda adunay P400,000 nga pundo alang sa mga proyekto niini.

Sa mga pundok sa mga mamumuo nga gustong makaangkon ug dugang nga puhunan alang sa mga livelihood projects, mahimong makigkita kang Efren Vito, Sr Labor Employment Officer.  Siya mao’y mangunay kabahin sa mga grants nga gipanghatag sa DOLE-7.

Alang sa dugang kasayoran sa mga proyekto sa DOLE-7 si Vito matawagan sa telepono 2549415 (PIA-Cebu/JSM)

============

No segregation, No Collection Policy’ sa siyudad sa Sugbo, ipadayon

CEBU CITY , May 2 (PIA) --- Usa ka buwan human gisugdan sa Siyudad sa Sugbo ang hugot nga pagpatuman sa “no segregation, no collection policy”, giangkon ni Mayor Michael Rama nga dako pa ang kinahanglang buhaton aron hingpit nga masulbad ang problema sa basura.

Kahinumdoman nga nakadawat ang maong desisyon sa mayor ug daghang pagsaway gikan sa ubang mga opisyales sa gobyerno ug miingon nga dili pa andam ang siyudad alang sa maong dakong kausaban.

Apan si Mayor Rama miklaro siya nga nangita lamang siya ug kasulbaran sa mga problemang gibilin sa niaging administrasyon ug mihangyo sa iyang mga kritiko nga inay dauton siya, makig-alayon kini kaniya aron pag-aghat sa katawhan sa pakigtambayayong ug pagsuporta sa mga programa sa gobyerno.

Siya niingon nga aduna siyay giplano nga magpahigayon ug tigum kauban ang mga opisyales sa kabarangayan sa Sugbo kabahin sa pagpahigayon ug assessment o pagbanabana sa kaepektibo sa mga ‘waste management program’ sa mga kumonidad.

Bisan pa man sa mga pagpanaway, desidido and mayor nga ipadayon ang iyang nasugdan ug pagabuhaton ang mga kinahanglang buhaton.

Gitahasan sa Mayor si Councilor Nida Cabrera nga maoy nangulo sa komite nga nagbantay sa kalikopan sa pagpadayon pagpaimplementar sa mga programa ug sa pagpatuman sa mga balidong sugyot nga posibleng makatabang sa programa.

Si Cabrera namahayag nga siya ug ang iyang mga miyembro wala naglisod sa pagkakaron sa pagpaabot ug mga impormasyon sa kadaghanan tungod sa dakong partisipasyon sa mga opisyales sa barangay.

Sigon ni Cabrera, masaligon siya nga masulbad kining maong problema  bisan pa man sa daghang pagpanaot tungod kay sila padayon sa pagpangita og hingpit nga kasulbaran niining problema. (PIA-7/Maryknoll B. Lague, Intern-CTU)

===========

21-Gun Salute alang sa kanhi bise-gobernador sa Sugbo

CEBU CITY, May 2, (PIA) --- Si kanhi Bise-Gobernador sa probinsiya sa Sugbo Greg Sanchez nga mitaliwan niadtong Biyernes, Abril 29 alas 2:40 sa kadlawon tungod sa stage 4 lung cancer gikatakdang ilubong karong Mayo 8 sa Queen City Memorial Garden sa Brgy. Carreta, siyudad sa Sugbo.

Atol sa ipahigayon nga lubong, si Sanchez hatagan og pasidungog pinaagi sa 21-gun salute gikan sa 511^th Naval Reserve Squadron of the Philippine Navy.

Ang lawas ni Sanchez kasamtangang gihaya sa Cosmopolitan Funeral Homes sa Nivel Hills, Brgy. Lahug ug personal nga giatiman sa mga sakop sa pamilya.

Sukad niadtong Biyernes, pinaagi sa mismong Facebook account ni Greg nagbaha ang mga mensahe gikan sa mga tigsuporta ug nipaabot sa ilang pahasubo ug pag-ampo alang sa pamilya sa kanhi bise gobernador.

Sigun kang Yody Sanchez, pag-umangkon ni Sanchez nga gipili isip tigpamaba sa pamilya nga sila nagpadayon sa pagpangandam sa mga kinahanglanon alang sa temporaryong paggawas sa anak ni Sanchez nga si Greco nga kasamtangang nagpaubos karon ug rehabilitasyon sa Manila Center aron kini maka-uli ug makatambong sa lubong sa iyang amahan.

Lakip sa mga mipaabot sa ilang pahasubo pinaagi sa pagpadala ug buwak uban ang ilang mga mensahe mao ang Liberal Party (LP) nga kaalyado ug kauban ni Greg sa politika.

Mipaabot usab sa ilang kagul-anan mao sila si DILG Secretary Jesse Robredo, mga senador nga sila si Manny Villar, Bongbong Marcos, Gringo Honasan, Vicente Sotto III, Miguel Zubiri ug Loren Legarda lakip na ang kanhi senador Mar Roxas.

Sa pagkakaron, si presiding provincial board officer Agnes Magpale ang magpadayong molingkod sa posisyong gibiyaan ni Sanchez isip bise gobernador sa probinsya sa Sugbo. (PIA-7/Maryknoll Lague and Ailene Limutan, Interns-CTU)

============

Ilegal nga pangisda sa Sugbo niubos

CEBU CITY, May 2 (PIA) --- Gibutyag sa Regional Director sa Bureau of Fisheries and Aquatic Resources (BFAR 7) nga si Andres  Bojos nga niining tuiga niubos ang mga reported cases nga adunay kalabotan sa illegal fishing.

Mao kini ang iyang gisaysay atol sa sinimanang tigom sa Association of Government Information Officers in Region 7 (AGIO 7).

Matud niya nga kini tungod sa mga kampanya nga ilang gipanghimo batok sa ilegal fishing.

Iya usab nga gidugang nga ang orientation kabahin sa mga violations sa mga ilegal nga panagat usa usab sa mga rason sa pag-ubos sa ilegal nga pangisda niining tuiga.

Si Bojos nanghinaut nga ang media motabang usab kanila aron sa pagpalambo sa ilang mga adbokasiya kalabot sa pagpakigbatok sa ilegal nga pangisda dili lamang dinhi sa lalawigan sa Sugbo kundi lakip na sa tibuok Rehiyon 7. (PIA-7/ Angie P. Amodia, Intern-CTU)

===========

DepEd-7 midepensa sa K+12 nga programa

 CEBU CITY, May 2 (PIA) --- Ang Department of Education (DepEd) Regional Director Recaredo Borgonia midepensa sa K+12 nga programa diin maimplementar na karong umaabot nga ting-abli sa klase.

Matod pa ni Borgonia, sa miaging interbyu sa radyo, gikinahanglan jud ang pagpuno ug 2 ka tuig sa pag-eskwela aron mas anaay kahanas ang mga kabatan-onan paghuman sa hayskul.

Kini nga tubag ni Borgonia mahitungod sa pagsaway ni Cebu Congressman Pablo Garcia batok sa K+12 program.

Si Garcia miingon nga ang 10 ka tuig sa pag-eskwela nga nagpadayon hangtud karon naghatag sa mga maayong lider sa nasud ug ang uban pa gane nga mi gradwet sa elementarya makahibaw usab motudlo.

Apan si Borgonia mikontra ani tungod kay dako daw ang kalahian sa mga estudyante sauna ug sa pagkakaron, diin mas daghan daw ang mga samok sa pagtuon pareho sa television.

Ang DepEd chief misulti nga samok kaayo ang karon nga kurikulum tungod kay daghan kaayo ang itudlo sa mga bata sa gamay ra nga panahon.

Kini nga pamaagi sigon ni Borgonia miresulta sa baba kaayo nga rating sa mga estudyante sa miaaging nationally administered tests.

Laing dugang usab ni Borgonia nga ang edad usab kinahanglang tagaan og tagad kay base sa gigamit karon nga kurikulum, mahuman sa edad nga 16 ang estudyante diin bata pa kaayo para mutrabaho. (PIA-7/Ailene G. Limutan, Intern-CTU)

============

Info officers sa Sugbo pahingusgan ang gahum sa komunikasyon sa mga lungsod, siyudad

CEBU CITY , May 2 (PIA) --- Ang Cebu Association of City and Municipal Public Information Officers (CAOCAMPIO) kauban ang bag-ong mga opisyales, mipasalig sa mas aktibo ug mas maayo nga pamunuan alang sa umaabot nga katuigan.

Si Cebu City PIO Carlo Dugaduga, ang bag-ong natudlong presidente sa CAOCAMPIO gihatagan ug dakong importansya ang gahum sa komunikasyon alang sa kalamboan sa matag lungsod ug siyudad sa Sugbo.

Matod niya ang katuyoan sa CAOCAMPIO mao ang paghatag sa komunikasyon nga panggobyerno ngadto sa mga katawhan ug ang paggamit niini sa pag-endorso sa mga produkto, serbisyo ug mga lugar sa Sugbo.

Suma pa ni Dugduga nga usa sa mga adbokasiya sa bag-ong administrasyon sa CAOCAMPIO mao ang pagkumbinser sa mga local executives sa pagtudlo sa mga Public Information Officers (PIO’s) isip regular item sa matag siyudad ug munisipalidad sa lalawigan.

Iyang gitumbok nga usa sa mga nakit-ang problema sa asosasyon mao nga ang ubang Local Government Units (LGU’s) walay mga PIO’s samtang ang uban designated lamang sa mga local chief executives.

Dugang niya nga dako ang matabang sa public information sa kalamboan sa mga siyudad ug municipalidad sa Sugbo maong dili angay ipaubos ang pagtan-aw sa gahum sa komunikasyon.

Sa wa pa ang indaksyon, ang outgoing president sa CAOCAMPIO nga si Nelson Ares naghinaot nga makab-ot sa asosasyon ang mga tinguha niini sa tibook termino ni Carlo.

“Ang kalamboan sa tagsa-tagsa ka mga lungsod maoy kalamboan sa atong nasud.” Kini ang mga hinapos nga mensahe ni Dugaduga aron makab-ot ang kauswagan dili lang sa natad sa maayong panggobyerno lakip na usab sa natad sa turismo. (PIA-7/Chrisley Ann C. Hinayas, Intern-CTU)

============

Fisherfolks registration, usa sa mga gipangusgang kalihukan sa BFAR 7

CEBU CITY , May 2 (PIA) --- Usa sa mga gipangusgang kalihukan karon sa Bureau of Fisheries and Aquatic Resources (BFAR) sa rehiyon 7 mao ang pag-implementar sa ‘Municipal Fisherfolk Registration’ isip tipik sa kasaulogan sa Farmers and Fisherfolks Month karong buwana.

Ang maong kalihukan usa ka bag-ong stratehiya sa buhatan alang sa mga mangingisda (fisherfolks) nga magparehistro aron mailhan sila ug mahatagan sa mga benipsiyo pinaagi sa mga proyekto nga gidalit alang kanila.

Matod ni Andres Bojos, Director sa BFAR 7, kining ‘Municipal Fisherfolk Registration’ nagdasig nga mahatagan ug igong pagtagad ang mga lugar nga nagkinahanglan sa mga pagbansay-bansay kabahin sa panagat  ug aron makagamit sa mga ‘state of the art’ nga mga pasilidad sa buhatan.

Kining pagparehistro dili lang nagsakop sa mga mananagat kundi lakip usab ang mga manindahay sa mga isda, nagproseso sa mga isda ug ubang trabaho nga kalabot sa pagpangisda.

Usa sa mga benepisyo nga madawat sa mga rehistradong  mangingisda mao ang nagkalain-laing mga proyektong panginabuhian sama sa kalihukan kabahin sa aqua culture kon diin ang mga mananagat tudloan sa mga pamaagi nga makapabuhi sa mga isda aron dili magsalig sa pagkuha sa kadagatan.

Kining maong kailhukan sa BFAR dili magtapos human sa kasaulogan sa Farmers and Fisherfolk kundi usa kini ka progresibo nga kalihukan. (PIA-7/Chrisley Ann C. Hinayas, Intern-CTU)