Gen. Bacalzo mipasidungog sa PRO-7

by: Juju S. Manubag

  

CEBU CITY, April 29 (PIA) --- Si General Raul Bacalzo, hepe sa Philippine National Police (PNP) sa iyang pagbisita kagahapong adlawa sa Sugbo mipasidungog ug mipahalipay sa Police Regional Office (PRO) – 7 tungod sa mga talagsaong nabuhat niini sa rehiyon.

Mao kini ang gipahibalo sa hepe sa Regional Police Community Relations Division (RPCRD) ug Regional Public Information Office (RPIO) nga si P/Sr Supt. Mariano Natuel JR sa Philippine Information Agency (PIA).  

Si Bacalzo diri sa Sugbo ron sa pag-abli sa bag-ong hinimo nga PNP Badge nga anaa sa kwartel heneral sa PRO-7 ug sa pag-bendisyon sa bag-ong inusab nga Integrated Police Office sa Visayas sa PC Hills, Lahug sa siyudad sa Sugbo.

Si Bacalzo usab mihatag ug mga medalya isip pasidungog sa mga talagsaong nabuhat sa ilang pundok.

Ang mga gipasidunggan mao ang Mandaue City Police Office (MCPO); Regional Anti-Illegal Drugs Special Operation Task Group (RAIDSOTG); Regional Anti-Human Trafficking Task Force (RATF); ug ang Lapulapu City Police Office (LLCPO).

Gipasidunggan usab ni Bacalzo ug ‘certificate of recognition’ ang Department of Justice (DOJ), International Justice Mission, Department of Social Welfare and Development (DSWD), mga opisyales sa barangay Kasambagan sa Sugbo ug sa Punta Engaño sa Lapulapu city.

Sa iyang mensahe, si Bacalzo midayeg ug mipasalamat sa mga local government units (LGUs), non-government organizations (NGOs) ug sa komunidad sa Central Visayas sa paghatag niini ug suporta sa kapulisan.

Si Bacalzo midasig sa iyang mga tao nga mag ‘optimistic for change’ nga magsugod sa tagsa-tagsa nga kaugalingon.

Iya usab gipahimangnoan ang mga pulis sa ka importante sa disiplina, ang pagkamatinahuron ug ang basic skills sa serbisyo.

Mi-anunsiyo usab si Bacalzo nga makadawat sila karong Hunyo sa kausbawan sa ilang mga sweldo. (PIA-Cebu/JSM)

============

Dengue numero uno nga sakit sa Cebu City sa 2010

By: Juju S. Manubag

CEBU CITY, 29 April (PIA)--- Ang sakit nga dengue nag-una sa Sugbo sa kadaghan sa kaso nga may 3,172 ug 22 namatay ug ang duruha lamang ka barangay sa Mabini ug Paril lang sa 80 ka barangay ang 0 sa dengue sa tuig 2010.

Mao kini ang anaa sa tala sa hospital surveillance case distribution list ug sa Disease Surveillance Report (DSR) nga gipadala ni Asst City Epidemiologist Durinda Macasocol sa City Health Department (CHD) sa Philippine Information Agency (PIA).

Kumparar sa tuig 2009, ang kaso sa dengue kay 2,256 ug 41 usab ang namatay.  Ang kaso sa dengue sa 2010 taas ug 37.19 porsiyento kay sa 2009.

Makita sa tala sa  City Epidemiology Statistics and Surveillance Unit (CESSU) nga ang gidaghanon sa sakit nga dengue kay 3:72 o upat ka kaso sa kada usa ka libo nga lumolopyo ug ang kadaghanon sa mamatay kay 0.694 o 1 ang patay sa usa ka gatos ka kaso.

Sagad sa mataptan sa dengue nag-edad ug 3 ka bulan hangtod 81 ka tuig ug mga lalaki nga adunay 51.7 porsiyento, sumala sa gikataho.

Sa 22 nga namtay sa miaging tuig, ang 3 tulo niini kay taga- Basak ug tag-2 ka buok niani kay taga-Tejero, Pasil ug Ermita.

Ang barangay nga Tisa, Punta Princesa, Lahug, Mabolo, Quiot, Bulacao, Busay, Pardo, Calamba, Buhisan, Zapatera, Malubog ug Babag adunay tagsa ka namatay sa dengue.

Ang asoy milista usab sa nag-una nga 20 ka barangays sa Sugbo nga taas ang kadaghanon sa kaso sa dengue.

Ang Guadalupe may 257, Tisa may 174, Labangon may 144, Punta Princesa may 124, Talamban may 123, Lahug may 119 ug ang Mambaling nga may 105 ka mga kaso sa dengue.

Ang mga barangays usab nga ang kadaghanon sa dengue nga ubos sa 100 kay mao ang Basak San Nicolas may 94, Mabolo may 91, Capitol may 88, Kamputhaw may 86, Apas may 83, Sambag 1 may 80, Sambag 11 may 78, Basak Pardo may 75, Tejero may 66, Duljo may 65, Pasil may 64, Bacayan may 61 ug Quiot nga may 55.

Ang Mabini ug Binaliw mao ang mga barangays nga may kinagamayan sa kaso sa dengue diin usa lang ang natala niini.

Samtang ang barangays Taptap, Sinsin and Sudlon II adunay tag-duha ka kaso sa dengue kada usa nga barangay.

Ang barangay Malubog nag-una sa 80 ka mga barangays sa Sugbo nga taas ang kadaghanon nga masakit  sa dengue diin mirehistro kini 9.85 o 10 ang ma-dengue sa kada 1000 nga lumlopyo sa Malubog .

Ang ubang mga barangays nga anaa sa top 10 mao ang Sto. Nino may 8.70, Kamagayan may 8.26, Pasil may 8.11, Sta Cruz may 7.51, San Antonio may 7.30, Parian may 6.68, Capitol may 6.56, Kasambagan may 6.53 ug ang Cogon Ramos nga may 6.36.

Ang mga barangays usab nga ubos ang insidente sa dengue mao ang Binaliw may 0.33, Pamutan may 0.66, Sinsin may 0.82 ug Kinasang-an nga may 0.83.

Segun usab sa tala sa CESSU ang bulan nga Agosto ug Setyembre ang may kinadaghanang kaso sa dengue sa tanang barangay sa Sugbo nga nataptan sa miaging tuig. (PIA-Cebu/JSM)

===========

Barangay Ermita nag-una sa kadaghanong batang dili himsog sa Sugbo

by: Juju S. Manubag

CEBU CITY, April 29 (PIA) --- Ang barangay Ermita nag-una sa 80 ka mga barangays sa siyudad sa Sugbo sa kadaghanong mga bata nga dili himsog o ‘malnourished children’  sa 2010 sa tala nga trese punto traynta porsiyento (13.30%).

Mao kini ang gipakasayod ni Emma Gaviola, ang City Health Department (CHD)-7 North Area Nurse Supervisor ug Nutrition Coordinator sa usa ka pakighinabi sa Philippine Information Agency (PIA).

Ang lain pa nga mga barangays sa Sugbo nga anaa sa Top 5 mao ang Alaska nga adunay 11.79 porsiyento;  Duljo , 9.60 porsiyento;  Sapangdaku,  9.37 porsiyento;  ug ang  Buot Taup nga adunay 8.92 porsiyento.

Ang mga datos kinuha sa sumada nga tala sa siyudad sa ‘Operation Timbang’ (OPT) sa  2010 diin ang mga batang nag-edad ug 0 ngadto sa 71 ka bulan ginatimbang sa kanunay sa mga barangay health centers sa pagsuta sa estado sa ilang nutrisyon.

Kapin siyento trayntay sais mil (136T) ka mga batang nag-edad ug lima ka tuig paubos gipangtimbang sugod sa bulan sa Enero hangtod Marso sa miaging tuig ug nakita ang resulta sa OPT nga 2,955 ka mga bata ubos sa timbang ug ang 826 kay grabe ka ubos sa timbang.

Basi sa tala sa CHD, 4.37 porsiyento sa 136T sa mga bata kulang sa kaon mao nang ubos kaayo sa timbang.

Sumala ni Gaviola, ang barangay Opra sa 80 ka mga barangays sa Sugbo ang mitala sa pinakaubos ug ihap sa mga batang dili himsog nga anaa lamang sa .38 porsiyento.

Misulti usab si Gaviola nga sa 2009 ang mga batang dili himsog mikabat ug 5.60 porsiyento ug mikanaug kini sa 4.23 porsiyento pagka 2010.

Si Gaviola mitataw nga ang inahan ang may labing mahinungdanon nga katungdanan sa pagsiguro nga ang ilang anak nakakaon ug sakto gikan sa adlaw nga sila gisabak hangtod sa sila gipanganak na kini tungod ang nutrisyon magsugod sa tago-angkan pa lang.

Ang mga inahan gikinahanglan nga moduaw kanunay sa mga barangay health centers sa pagseguro nga mahimsog siya matod pa ni Gaviola.

Si Gaviola midugang sa pagingon nga samtang ang inahan ug anak mokaon ug balanse ug makapahimsog nga pagkaon nga gipalabi ang utan ug prutas, protina ug carbohydrates, walay rason nga magpadayon ang mga bata sa kakulang sa timbang.

Ang mga puya nga nag-edad 0 hangtod sais (6) ka bulan gikinahanglan bugtong ipatotoy sa gatas sa inahan.

Kapin sa unom ka bulan, mahimo nang kumplementohan kini ug laing pagkaon apan padayonon lang gihapon sa pagpatotoy sa gatas sa inahan bisan pa ug moabot pa kini ug duha ka tuig, sumala ni Gaviola.

Gitataw usab ni Gaviola nga kinahanglan nga ang mga bata mabakunahan gayud gikan sa paghimugso niini hangtod sa 15 ka bulan kay makumpleto na ang tanang matang sa bakuna.

Ang batang gibakunahan kay layo sa sakit ug ganado sa kaon busa dili mahitabo nga kulang sa timbang ug dili himsog.

Usa pa sab, dili makatakod sa ubang bata ang batang gibakunahan, panapos ni Gaviola. (PIA-Cebu/JSM)

============

P-Noy dunay maayong balita karong Labor Day

by Eli C. Dalumpines

CEBU CITY, Apr. 29 (PIA) --- Bisan kung di ibalhin ang kasaulugan sa Labor Day ngadto sa Lunes, apan dunay maayong balita nga paabuton ang mga mamumuo karon Mayo 1.

Matud sa tigpamaba sa Malacanang nga si Atty. Edwin Lacierda kagahapon, dunay mga lakang nga gihimo ang Malacanang alang sa umaabot nga Labor Day. Kini aron paghatag ug kasuguruhan sa publiko nga gihimo sa gobyerno ang tanan aron mapagaan-gaan ang ilang gipas-an nga kalisud.

Si Lacierda namahayag, diha sa gipahigayon nga press briefing, nga  mius-os ang presyo sa bugas ug padayon pa nila kining gi-monitor ug gipaniguro nga magpabilin kini sa resonable nga presyo.

Kasumpay niini gipanghinaot ni Lacierda nga dunay maayong balita ang pangulo ug ang iyang mga ekonomista ngadto sa publiko.

Apan matud ni Lacierda nga di hinoon lakip niini ang mga gitawag ug populist measures sama pananglit sa pagpa-ubos sa mga nanag-unang paliton sa price control.

Hinoon gisabut-sabotan na sa mga economic managers sa pangulo ang mga lakang aron ma-minusan ang pagsaka sa presyo.

Duna na’y mga rekomendasyon ang mga economic managers ngadto kand Presidente Aquino nga mahimo niyang ipahayag sa di pa ang Labor Day nga saulugon karong Domingo.

Dugang pa ni Lacierda nga magsugod na ang pag-implementar sa fuel subsidy karong Mayo 2 ug susihon kini kada-buwan kung angayan ba kining ipadayon.

Bahin sa umento sa suholan, si Lacierda nagkanayon nga ang mag-desisyon niini mao lang ang wage board apan usa usab kini sa mga gikunsiderar sa mga economic managers sa pangulo.

Gi-klaro hinoon niya nga di mamasalig ang Malacanang bahin sa umento sa suholan tungod kay padayon pa man kining gitimbang-timbang. (PIA 7 - Cebu)

  

===========

Laing P1.2-B alang sa fuel subsidy gi-umol

By Eli C. Dalumpines

CEBU CITY, Apr. 29, (PIA) --- Posible nga makatilaw pa ug ikaduhang hugna ang  sektor sa transportasyon sa “Pantawid Pasada” nga programa sa gobyerno, kini suma kang Kalihim Jose Rene Almendras sa Departamento sa Enerhiya.

Namahayag si Almendras atol sa gipahigayon nga Communications Forum sa PIA nga 
dunay P1.2 billion gikan sa Department of Finance (DOF) ug sa Department of Budget and Management (DBM) alang sa maong tuyo.

Matud ni Almendras nga ang gisugyot nga ikaduhang hugna sa maong programa gikatakda na’ng hisgutan sa Inter-Agency Contingency Committee (IECC), ang samang grupo nga mi-umol sa P450 million nga gi-gahin sa unang hugna nga pagasugdan karong Mayo 2.

Sa laing bahin ang task force nga gi-komponer sa Department of Energy ug sa Department of Justice mo-imbestigar sa Pilipinas Shell ug sa PTT sa ilang posibleng pag-abuso sa presyo sa lana.

Lakip usab sa susihon mao ang Total Philippines ug Chevron Philippines diin mipa-usos sa ilang presyo usa ka adlaw human mo-taas ang presyo sa lana, matud ni Almendras. 

Alang sa unang hugna sa pag-pahimo sa fuel discount cards, mipadayag ang opisayal nga ang mga kumpanya sa lana misaad nga  mo-donar sila ug kwarta alang sa kahimuan sa 220,000 ka mga cards nga i-imprinta sa Bank of the Philippine Islands. Ang maong mga cards mo-kantidad ug P50 ang matag-usa.

Suma kang Almendras, bahala na ang mga nahisgutang kumpanya kung andam ba gyud silang motabang ug abaga sa maong proyekto basta wala lang sila’s pangayu-on sa gobyerno isip kabaylo sa ilang gihatag nga tabang. (PIA 7/ECD)

===========

“Konsumerismo” isip ugat sa korapsyon, ni Binay pa

CEBU CITY, April 29 (PIA) --- Kung ang Bise Presidente sa Pilipinas Jejomar Binay ang pasultihon, ang daghang kaso sa korapsyon sa Pilipinas angayng ibasol sa “consumerism”, kini usa ka teorya nga nagsugyot nga ang pagtubo sa kunsumo sa mga nagkadaiyang produkto adunay  positibo nga epekto sa estado sa ekonomiya sa usa ka nasud.

Miingon si Binay sa iyang pamahayag niadtong Martes atol sa gipahigayon nga tigum sa Management Association of the Philippines nga kining consumerism mikatap na sa nagkadaiyang klase sa media ug naghatag ug dakong impluwensya sa katawhan bahin sa ilang  pagtan-aw sa konsepto sa kausbawan.

Kada-adlaw, matud pa, ang katawhan gilibutan ug lain-laing butang nga makahatag ug impluwensya sa ilang pagtuo mahitungod sa kausbawan, adunay  tv, radyo, internet ug bisan mga mantalaan kung diin naghatag kini ug mga mga konsepto nga magmugna ug kausaban sa pagtuo sa katawhan.

Sigun ni Binay,  kining mga impormasyon nga gihatod sa media naghatag ug dakong tabang sa katawhan apan sila usab nagpakita ug mga butang nga mitatak sa pangisip sa katawhan isip maoy nagsilbing ilhanan sa kalampusan sama sa mga maluhong sakyanan, mahalon nga relo, dagkong balay og bisan bakasyon sa nagkalain laing lugar.

Giklaro ni Binay nga ang kagustohang makab-ot kining mga butanga dili sayop apan may mga tawo nga aron matuman ang ilang kaugalingong kaayuhan buhaton ang tanan bisan pa gani ang pagpangamkam sa kwarta sa katawhan.

Misugilon si Binay nga ang unang gikinahanglan sa katawhan ilabi na ang mga trabahante sa gobyerno mao ang pag-usab sa kaugalingon sama sa pagdaginot  tungod kay kinahanglan kini aron hingpit nga mawagtang ang problema sa korapsyon nga nagresulta sa grabeng kakabos sa katawhan.

Niya pa, natural sa tawo ang pagdamgo ug hayahay nga kinabuhi alang sa kaugalingon ug sa pamilya busa kinahanglan nga paningkamotan aron makab-ot kini tungod kay ang dignidad sa taw dili masukob base sa mga kabtangang naangkon niini.

Sa tumoy nga bahin sa pamahayag ni Binay, iyang gitawag ang korapsyon isip pinakadakong problema nga atong giantos tungod kini nagkamkam sa kwarta sa mga kabos ug nagkinahanglan labaw sa tanan.

Isip panapos, si Binay miingon nga sugod sa sinugdanan sa administrasyong Aquino ilang gipaningkamotan nga hingpit nang matuman ang ilang saad nga pagwagtang sa korapsyon ug ang paggiya sa nasud padong sa hingpit nga kalambuan. (PIA-7/Maryknoll B. Lague, Intern-CTU)

============

Konseho sa Sugbo motuki sa pag dili na sa paggamit ug plastic bags

CEBU CITY, April 29 (PIA)---Isip kabahin sa pagprotekta sa kalikupan, gituki ang isyu kalabot sa sugyot ni Konsehal Edgardo Labella sa pag ‘ban’ na sa paggamit ug mga plastic bags, sa nahitabong public hearing sa Cebu City Hall karon’g bag-ohay pa lamang.  

Si Labella miingon nga usa sa pamaagi sa pagpangga ug pag-amuma sa kalikupan mao ang paglikay sa paggamit ug mga plastic bags ug misugyot nga mas maayong basket nalang ang dad-on sa higayon nga mangompra ang mga tawo sa merkado.

Matud niya nga ang plastic nga dugay kaayo malata maghatag ug kadaut sa kalikupan ug maoy hinungdan sa paglunop panahon sa ting-uwan tungod kay mobara kini sa mga kanal.

Naglaraw usab si Labella nga likayan ang paggamit ug styrofoam nga kasagaran maoy himuon nga disposable nga baso ug plato.

Nasayran nga aduna nay mga tindahan karon nga nigamit ug green bag nga maoy gamiton sa mga costumers sa higayon nga mopalit kini sa ilang mga baligya. (PIA-7/Angie P. Amodia, Intern-CTU)

============

Anti Drug Abuse Committee pagatukoron dinhi sa Sugbo

CEBU CITY, April 29 (PIA) ---Tungod sa nagpadayong krimen nga adunay kalabotan sa drugas, motukod ug grupo ang Police Coordinating Advisory Council (PCAC) aron motabang sa pagpakigbatok sa paggamit sa ginadiling drugas dinhi sa siyudad sa Sugbo.

Ang grupo tawgon nga Anti Drug Abuse Committee nga pangulohan ni S/Supt. Melvin Ramon Buenafe, director sa Cebu City Police Office.

Si Buenafe miingon nga ila pa kining iduso ngadto sa buhatan ni Cebu Mayor Michael Rama aron sa pormal nga paglusad niini.

Mao unya kini implementing arm sa PCAC alang sa pagpakigbatok ug pagpahingusog sa tanang matang sa ginadiling drugas dinhi sa Sugbo. (PIA-7/ Angie P. Amodia, Intern-CTU)

==========

31 ka OSYs ang nihuman sa e-Skwela bridge course dinhi sa Sugabo

CEBU CITY, April 29 (PIA) ---Mikabat sa 31 ka mga out-of-school youths (OSYs) o mga batan-ong wala nagtungha ang migradwar sa e-Skwela bridge course sa barangay Mabolo, siyudad sa Sugbo.

Gitawag kini nga “Ang Kwelang Eskwela”.  Ang e-Skwela gimugna sa barangay Mabolo alang sa mga kabatan-onan ug mga edad-edaran nga maka-angkon ug diploma bisan pa man sa ilang katiguwangon ug sa kalisod sa pinansyal nga kahimtang.

Usa sa 31 ka OSYs ang nihuman sa elementarya samtang ang nahibilin nigradwar sa sekondarya.

Aduna usa'y 38 nga nihuman sa Basic Computer Literacy Course (BCLC). Ang paghuman sa kurso motugbang ug regular nga elementarya, sekondarya o BCLC curriculum.

Ang mga nigradwar nidawat sa ilang mga diploma nga pinirmahan sa Education Secretary nga si Armin Luistro niadtong Abrill 11. (PIA-7/ Angie P. Amodia, Intern-CTU)

===========

Pilipinas nagtinguha sa pagdoble sa mga langyaw nga turista

MANILA, April 29 (PIA) --- Ang nasud nagtinguha sa pagdoble ngadto sa 6 milyones sa mga langyaw nga turista nga mobisita nga pumapalit ug gastador dinhi sa Pilipinas.

Si Tourism Secretary Alberto Lim nag-ingon nga dul-an sa 670,000 ka mga turista ang nibisita sa Habagatang-Sidlakan sa kapupud-an sa Asia sa niaging unang duha ka bulan sa tuig, adunay 18 ka porsyento nga pagsaka.

Bisan sa dul-an sa 4 ka milyones ka mga turista ang nibisita sa niaging tuig, ang Pilipinas uwahi gihapon sa mga silingang nasud.

Si Lim nagkanayon kagahapon nga ang bag-ong civil aviation liberalization nagdahum nga motaas ang tourism revenues ug trabaho  human tukuron  ang 9,500 ka bag-ong hotel sa sunod tulo ka tuig ug ang mga programa nga magtudlo sa mga gagmay'ng negosyo nga mokita gikan sa mga turista. (PIA-7/Angie P. Amodia, Intern-CTU)