SO nagdasig sa mga patigayon sa CV paghatag ug sakto ug kompletong impormasyon

CEBU CITY, May 12 (PIA) --- Aron sa pag-update sa ilang listahan sa tanang mga establisyemento sa nasud, gidasig sa National Statistics Office (NSO) ang mga kompaniya, ilabi na kadtong mga bag-ong gipatukod ,sa paghatag ug kompleto ug saktong impormasyon kabahin sa ilang mga patigayon.

Kini tungod kay ang mga datos nga makuha niini dako ug epekto alang sa mga ipahigayong survey kabahin sa mga panghitabo sa ekonomiya sa nasud.

Sa Central Visayas, ang NSO 7 Information Officer Noel Rafols namahayag nga 20-25 ka mga empleyado ang gitahasang magpahigayon ug updating sa List of Establishments (ULE) lakip na ang mga probinsya sa Bohol, Cebu, Negros Oriental ug Siquijor.

Ang ULE usa ka regular nga kalihokan sa NSO Industry Trade and Statistics Department nga nagtinguha paghatag ug sakto ug masaligan nga listahan alang sa mga ipahigayon nga census ug survey kabahin sa mga kompanya sa nasud.

Lakip sa maong tinguha ang pag-apil sa mga bag-ong patigayon ug pagkuha sa ilang mga importanteng impormasyon, pag-update sa estado sa mga daan nang narehistro, ug pagpapa sa mga nasirado nga kompaniya nga dili na angayang maapil sa listahan.

Giklaro ni Rafols nga ang pag-update sa lista kinahanglang sakto ug masaligan tungod ug alang usab sa pag-angkon ug kasaligang resulta sa mga ipahigayong economic surveys, profiling ug uban pang kalihokan.(PIA-7/Maryknoll B. Lague Intern-CTU)

===========

Rama gihangyo sa paghatag una ug hinabang usa ang demolisyon

CEBU CITY, May 12 (PIA) --- Konsehal sa siyudad sa sugbo nga si Alvin Dizon mihangyo kang Mayor Michael Rama sa paghatag ug kabalhinan nga lugar ug hinabang nga kwarta sa pamilyang mapahawa atol sa demolisyon sa Mahiga Creek.

Si Dizon miingon nga samtang nituman ang siyudad sa gimando sa Urban Development and Housing Authority (UDHA) sa pagpahawa sa mga pamilya aron malikayan ang kuyaw nga lugar, ang balaod usab nagmando sa pagpahibawo sa lugar nga kabalhinan sa mga naapektuhang pamilya.

Ang mga tigpamuyo sa sitio Holy Name, Sindulan, New Frontier, San Isidro, ug San Vicente sa barangay Mabolo nangayo ug hinabang sa gobyerno sa siyudad sa Sugbo nga sila mahatagan ug lugar nga ilang kabalhinan.

Ang kini nga hangyo sa mga pamilya giduso ngadto sa committee sa housing nga gipanguluhan ni Dizon.

Sigon ni Dizon, tungod sa nagpadayong uwan karong panahuna, nabalaka siya sa siguridad niining mga residenteng naapektuhan ilabi na gayud ang mga kabataan.

Dugang usab ni Dizon nga kung puwede tan-awon ang posibilidad sa paggamit sa pundo sa National Housing Authority aron paghatag ug kabalhinan nga lugar niining mga naapektuhang pamilya.

Sa laing bahin, ang tubag ni Mayor Rama sa maong sukna, nag-ingon ang mayor nga ang mga naapektuhang mga pamilya nasultian na sa dili pa man ang pagpahawan niining Mahiga creek ug ang ilang mga pangutana mahitungod niining demolisyon gipadangup ngadto sa Department for the Welfare of the Urban Poor (DWUP). (PIA-7/Ailene G. Limutan, Intern-CTU)

===========

High School buksan sa Brgy. Dobdob

by: Jennifer Catan-Tilos

DUMAGUETE CITY, May 12 (PIA)  Ang lokal nga kagamhanan sa lungsod sa Valencia migahin dul-an sa P7-M ka pesos alang sa rehabilitasyon sa mga pasilidad sa mga tunghaan sa lungsod.  

Kini naglakip sa pag tukod ug mga comfort rooms sa mga tunghaan, improvement sa Gonzalez buildings, district office, alad ug gate sa Bongbong Elementary School, Balugo Elementary ug High Schools, Balabag Elementary School, ug pagpalambo sa Sagbang Elementary School diin usa ka dugang classroom ang tukuron.

Samtang, si Valencia Mayor Enrique Gonzalez, miaprobar sa pagbukas ug high school classess didto sa Brgy. Dobdob sugod karong bulan sa Hunyo.  Kini mauy tubag sa dugay nang hangyo sa mga residente didto tungod sa kalayo sa mga tunghaan.

Tungod niini, mokabat sa mga 50 ka mga estudyante nga mosulod sa high school ang gilaumang makabenepisyo niini.

Si Dobdob Brgy. Capt. Berto Darias ang mipadayag ug dakong kalipay sa pagbukas ug high school classess sa ilang barangay.

Subay niini, ang Local School Board sa Valencia migahin na ug P300 mil pundo alang sa sweldo sa duha ka mga magtutudlo nga ma assign sa maong dapit.

Ang Brgy. Dobdob mao ang pinakalayo nga barangay sa Valencia. (PIA NegOr/JCT)

============

Bonus alang sa empleyado sa City Hall

 

CEBU CITY, May 12 (PIA) ---Ang mga empleyado sa Cebu City Hall sayo nga makadawat sa ilang midyear bonus ug cash gift.

 

Kini human ang konseho sa siyudad sa Sugbo ni-aprobar sa resolusyon nga gimugna ni konsehal Joey Daluz III alang sa pagpagawas sa midyear bonus ug cash gift ugmang adlawa.

 

Ang kagamhanan sa siyudad nigahin ug P25 milyones alang sa cash gifts sa regular ug casual nga mga empleyado. Ang empleyado makadawat ug P5,000 isip cash gifts ug katunga sa ilang 13^th-month pay isip midyea pay.

 

Si Daluz nagkanayon nga ipanghatag gayud kini sa bulan sa Hunyo. Ang resolusyon nihangyo lamang sa konseho nga ipanghatag kini ug sayo aron magamit sa mga empleyado sa dili pa moabot ang ting-eskwela. (PIA-7/ Angie P. Amodia, Intern-CTU)

 

===========

Gobernador Garcia nanghinaut nga magkahiusa ang tanang rehiyon sa Kabisay-an

 

CEBU CITY, May 12 (PIA)---Si Gobernador Gwendolyn Garcia masaligon nga ang panag-uyon ug panagtambayayong sa tulo ka rehiyon sa Kabisay-an magpadayon ubos sa pamunoan ni Mayor Michael Rama, ang bag-ong gitudlo nga chairman sa Regional Development Council Committee (RDCom) sa Visayas. 

 

Si Garcia, kinsa gihulipan sa ni Rama, nagkanayon nga siya mapasigarbuhon nga lain sa usab nga Sugbuanon ang napili nga mangulo sa komitiba.

 

Ang pangulo sa RDCom awtomatik nga mamahimong miyembro sa National Economic Development Authority (NEDA) board.

 

Si Garcia malaumon nga sa liderato ni Rama, magpadayon ang kahiusa sa 16 ka probinsya sa Visayas nga iyang nakab-ot atol sa iyang pangatungdanan. (PIA-7/ Angie P. Amodia, Intern-CTU)

===========

OE: LPG dealers mamahimong magpatuman ug pagpausbaw sa presyo

CEBU CITY, May 12 (PIA) --- Human nagrollback ang presyo sa mga produkto sa LPG ug 50 centimos matag kilo, ang mga manindahay ug LPG mamahimong magpatuman sa ug dugang presyo sa mga mosunod nga mga adlaw, kini sigun sa pamahayag sa usa ka opisyal sa Department of Energy(DOE) atol sa interview kaniya sa dzBB.

Si DOE Undersecretary Jose Layug Jr. miingon nga ang mga LPG dealers nakighisgot kaniya bahin niini ug niingon nga ang dugang presyo magdepende lamang sa kalihokan sa presyo sa kalibutanong merkado.

Giangkon hinuon sa DOE nga ang ilang buhatan nahibalo nga sa matag buwan aduna gayud mamahimong omento sa presyo sa maong produkto.

Kahinumdoman nga niadtong Martes, ang mga miyembro sa LPG Marketers’ Association nipahigayon ug rollback samtang ang Shell mipasaka ug P1 matag kilo sa ilang LPG.

Sumala ni Layug, wala’y nakita ang DOE nga iregularidad sa gibuhat nga pagsaka sa presyo sa Shell tungod kay base sa ilang gibuhat nga kalkulasyon alang karon nga buwan, P4 kada kilo ang angay nga ipatuman nga umento apan gihangyo sa DOE nga dili tingubon ang pagpatuman sa pagpasaka alang usab sa paghatag konsedirasyon sa mga gagmay ug dagkong konsumidor sa LPG sa nasud.(PIA-7/Maryknoll B. Lague Intern-CTU)