Deputy Ombudsman sa Visayas gi-indurso alang sa Ombudsman nga posisyon

CEBU, May 13 (PIA) --- Si Pelagio Apostol ang Deputy Ombudsman for Visayas gi-indurso sa Council for the Restoration of Filipino Values (CRFV) ngadto sa Judicial and Bar Council-Office of Recruitment Selection and Nomination alang sa nabakanteng posisyon nga Ombudsman.

Ang CRFV deputy secretary general nga si Crisanta Gabriel mitu-o nga si Apostol adunay kaligdong ug katakus nga mamahimong sunod nga Ombudsman sa Pilipinas.

Sigun sa usa ka sulat nga ilang gipadala ngadto sa JBC, ang CRFV nagkanayon nga "among gi-indurso si Apostol nga maoy mosunod nga Ombudsman kay ang iyang rekord dinhi sa Visayas maoy mosulti sa iyang mga binuhatan."

Matud pa ni Gabriel nga adunay danghang panahon nga sila naka-trabaho ug nagka partners sa mga kausa sa pagsugpo sa korupsyon dinhi sa nasud,

Si Apostol sa laing bahin, miklaro nga andam siya sa hagit ug kwalipikado usab siya sa posisyon apan dili siya mo-indurso sa iyang kaugalingon.

Atong mahinumduman nga si Mercidita Gutierrez miluwat sa iyang katungdanan niadtong Mayo 6, 2011 tungod sa mga kontrobersiya.

Ang JBC mopagawas unya sa lista sa mga ngalan sa mga gipang-indurso sa nagkalain-laing mga institusyon aron ang publiko makahatag ug 'feedbacks' unya kabahin sa mga aplikante.

Aduna'y pagabuhaton nga tinagsa ka pag-interbiyu sa mga gipang-indurso ug ang JBC mohimo ug usa ka hamubo nga lista nga ilang iduso ngadto sa Presidente.

Si Presidente Aquino na mao'y motimbang-timbang kung kinsa gyud ang angayan nga itudlo nga Ombudsman. (PIA-7/Minerva BC Newman) 

============

Probinsyasa NegOr molusad ug usa ka sportsfest alang sa mga empleyado sa probinsya

DUMAGUETE CITY, May 13 (PIA) --- Mga 2,000 ka mga empleyeda sa probinsiyal nga pangagamhanan sa Negros Oriental  magpakita ug gilas sulod sa usa ka ipahigayon nga sports festival nga pagasubhan karong Mayo 16 pinaagi sa usa ka parada nga magsukad sa Rizal Boulevard ngadto sa Silliman Avenue hangtud sa Macias Sports Center kung diin pagahimuon ang tanan nga mga dula.

Kining gimugna nga sportsfest nga gitawag ug "MagDEGAMO Ta" Governor's Cup paga salmutan satulo ka mga dula sa bola sama sa basketball, volleyball (babaye ug lalaki) ug ang kickball (babaye ug lalaki).  

Ang gobernador sa Negros Oriental nga si Roel Degamo, misugo kang Engr. Dominador Dumalag, nga maoy nangulo sa Governor's United Assistance for Rural Development (GUARD) sa pagtalay sa mga aktibidades nga makapa-aghat sa kapiskay ug kabaskog sa panglawas sa tanang empleyado sa probinsiyal nga pangagamhanan. 

"Gusto sa gobernador nga ipa-uswag ang mga aktibidades nga makapa-usbaw sa maayong panglawas ug kanang makapalig-on sa panagsandurot sa mga empleyadong lokal sa probinsiya," matud pa ni Adrian Sedillo, ang information officer sa probinsiya sa Negros Oriental sa iyang pakighinabi ngadto sa Philippine Information Agency (PIA).

Si Sedillo mipahibalo nga adunay mga 12 ka mga teams nga naporma na ug nagpalista ngadto sa basketball.  

"Amo pang gi-agni ang uban sa pag-apil ngadto sa volleball ug kickball," agni pa ni Sedillo.(PIA-7/MBCN)

============ 

Binay giawhag ang mga kabatan-onan sa pagtabang pagluwas sa kalikopan

CEBU CITY, May 12 (PIA)--- Si Bise Presidente Jejomar C. Binay nipadayag sa iyang pagpangusog ug pakigbatok sa global warming buyon sa pag-awhag niya sa mga kabatan-onan sa paglihok sa pagpaminus sa mga danyos ngadto sa kalikopan.

Matod sa Bise Presidente atol sa iyang pamulong sa 9^th Youth for Environment Summer (YES) Camp sa Baguio City nga ang mga kabatan-onan adunay partisipasyon sa maong problema nga sila makahimo ug dakong kausaban sa giatubang nga problema sa nasud.

Giawhag usab ni Binay ang mga partisipante sa maong panagtigom nga mogamit sa mga social media sa pagpadala sa pahimatngon sa katawhan ug ang pag-update sa ilang mga komunidad.

Matod niya nga ang Facebook ug Twitter duha ka mga powerful tools nga magamit sa pag-organisa ug pagpadangat ngadto sa katawhan ug ang pagestablisar ug pakighinabi sa katawhan.

Siya nagkanayon nga gamiton ang maong mga pamaagi aron sa paglihok sa tagsa-tagsa ka mga responsibilidad alang sa maong katuyoan ug ang mga kabatan-onan mao ang manguna niini tungod sila ang mas nakamao paggamit niini.

Apan gipasidan-an usab ni Binay ang mga kabatan-onan nga sa pagpasaka sa awareness sa katawhan sa isyu, kini usa ka lakang sa saktong direksyon, ang tinod-anay nga hagit mao ang pagtranslate sa nagkataas nga awareness sa katawhan sa polisiya ug sa konkretong aksyon.

Sigon niya nga gikinahanglan magsugod sa personal nga lakang. Sa panimalay mag-una sa pakigbatok niini.

Kon modebelop kini sa kaugalingon, sa pamilya ug sa mga kahigalaan, ang dalan sa pagkaayo mahimong manageable ug magamit pa ang mga resources nga makabenepisyo ilabi na sa mga tawo nga labing nagkinahanglan niini.

Gipamatuod usab ni Bise Presidente Binay nga ang gobyerno ilabi na si Presidente Aquino niila sa seryosong problema sa kalikopan ug gisigurado nila nga ang mga programa sa kalamboan makaproteher sa kalikopan.

Matod niya ang adunay mga opurtunidad alang sa pagpausbaw ug pagproteher sa kalikopan ug ang katawhan kinahanglan nga awhagon sa pagtuman niini.

Ang YES CAMP ang labing dako nga panagtigom sa mga kabatan-onan alang sa environmental cause.

Usa kini ka hiniusang proyekto sa Department of Environment and National Resources-Special Concerns Officer-Youth Desk (DENR-SCO-Youth Desk), Kabataang Sama-Samang Maglilingkod, Inc. (KASAMA), Miriam Public Education and Awareness Campaign for the Environment (Miriam PEACE) and the Department of Education through the Center for Students and Co-Curricular Affairs (DepEd-CSCA). (PIA-7/Chrisley Ann C. Hinayas, Intern-CTU)

 ===========

P-noy dako ang pagsalig nga masulbad ra ang problema sa rebelyon

CEBU CITY, May 12 (PIA) --- Si Presidente Benigno C. Aquino III mipadangat nga dako kaayo siya ug salig nga masulbad kining dugay na nga rebelyon sa Pilipinas sa ensaktong resolusyon nga gamiton sa dili madugay.

Sigon sa report nga gipadala ngadto sa presidente gikan sa Presidential Adviser sa Peace Process Secretary Teresita “Ging” Deles, ang chief executive miingon nga ang plano niining nagpadayung peace negotiations kauban ang Communist Party of the Philippines- New People’s Army-national Democratic front (CCP-NPA-NDF) ug ang Moro Islamic Liberation Front (MILF) may posibilidad nga mahitabo.

Bisan tuod wala kaayo muhatag ug detalyadong report mahitungod niining buwag nga negosasyon sa komunista ug sesisyonis nga grupo, ang Presidente miingon sa party mates nga ang peace proposals nga gipakita sa mga kaatbang sa gobyerno kay “extremely doable” gayud. (PIA-7/Ailene G. Limutan, Intern-CTU)

===========

Kalinaw sa Isla sa Olango, Lapu-lapu City napadayon sa kapulisan bisan pa man sa kakuwang sa ginsakupan niini CEBU CITY, May 12 (PIA) --- Ang gobyerno sa siyudad sa Lapu-Lapu midayeg sa kapulisan sa isla sa Olango sa ilang gipakitang dedikasyon sa ilang trabaho bisan pa man sa kakuwang sa sakup niini. Ang Talima Police Station sa Olango adunay baynte (20) ka mga ginsakupan ug upat ka field training policemen. Ang populasyon sa maong isla mukabat sa 38,000. Si Mayor Paz Radaza midayig sa istasyon sa pulisya sa pagpadayung pagpatuman sa kalinaw sa maong isla sa nahitabong pagbisita bag-uhay pa lamang. Si Radaza maoy nangunay ug tan-aw sa maong istasyon sa pulisya ug mga sakup niini isip kalabot sa memorandum gikan sa Department of Interior and Local Government nga ang mga chief executives kinahanglang sila jud ang magtan-aw sa mga presinto sa pulisya. Sigon pa ni Radaza, ang trabaho sa istasyon sa pulisya sa Olango nga gipasiugdahan ni Insp. Damiano Montebon Jr. mas klaro ug mas maayo na. Dugang pa ni Radaza, ang binuhatan sa pulisya sa pagpanlimpyo ug pagmintina sa kahapsay sa opisina niini kinahanglang himuong sumbanan sa ubang presinto. Sa usa ka interbyew kang Montebon, miingon siya nga ang usa ka pulis giatbangan sa 2,000 ka populasyon. Layo ra kaayo sa insaktong police population ratio nga 1:500. Sigon pa ni Montebon, dili lang ang tawo ang kulangan nila, apil na usab niini ang patrol vehicles.  Sa nahitabong panagtigum, si Radaza misulti kang Montebon nga maghatag kini ug suwat ngadto sa City Hall aron makapangayo ug duha ka dugang nga motorcycles ug dugang nga 120 ka litro nga gasolina kada semana. (PIA-7/Ailene G. Limutan, Intern-CTU)

==========

Rama : Programa sa kalikupan ug kalinaw alang sa tibuok kabisay-an

CEBU CITY, May 12 (PIA) --- Human napili isip pangulo sa Regional Development Committee (RDCom) dinhi sa kabisay-an, gipasalig ni Mayor Rama ang pagpatuman ug patas ug rasonable nga nga mga proyekto alang sa lainlaing lokal nga kagamhanan sa Visayas.

Matud ni Rama, plano niya nga ipaila ang solid waste management ug peace and order program sa siyudad ngadto sa lain pang mga probinsya ug dakbayan sa tulo ka mga rehiyon sa kabisay-an.

Kini tungod kay nagtuo si Rama nga dako ug ikatabang sa ubang lugar kung ilang makita ang mga kaayuhan nga nahimo niining mga programa dinhi sa siyudad sa Sugbo.

Dugang ni Rama, uban sa mga mayor nagplano na sa pagpatuman niining mga programa sa ilang mga dakbayan.

Isip chairman sa RDCom-Visayas, si Rama ang molingkod isip representative sa Visayas ngadto sa National Economic and Development Authority(Neda) Board sa kauluhan.

Ang kasamtangang gobernador sa probinsya sa Sugbo Gwendolyn Garcia milingkod usab kaniadto sa RDCom Rep human kini gitudlo niadtong Abril 2008 ni kanhi president Gloria Macapagal Arroyo.

Kabahin sa pag-ila sa mga proyekto nga kinahanglang ipatuman ug pagpangita ug pondo alang niini, matud ni Rama ang iyang tahas mao ang pagkolekta sa mga gihangyo nga proyekto gikan sa tulo ka rehiyon ug iduso kini ngadto sa buhatan sa Neda.

Kahinumdoman nga si Rama bag-ohay lang gipili ni Presidente Benigno Aquino III isip Regional Development Council Chairman sa rehiyon 7.

Ang uban pang rehiyon nga ubos sa pagdumala ni Rama sa iyang bag-ong katungdanan mao ang Rehiyon VI, VII, VIII. (PIA-7/Maryknoll B. Lague Intern-CTU)

===========

P-Noy nisuporta sa kampanya kabahin sa road safety

CEBU CITY, May 12 (PIA)--- Si Presidente Benigno Aquino III nisuporta sa global campaign sa road safety sulod sa napulo ka tuig dihang ni-isyu kini sa Proclamation 159.

Ubos sa maong proklamasyon nga gipirmahan sa Presidente niadtong Abril 28, ang Malacanang mopagawas sa Philippine Road Safety Action Plan aron maminusan ang mga road crashes ug mga fatalities dinhi sa nasud.

Si Executive Secretary Paquito Ochoa miingon nga ang maong proklamasyon nagdeklara nga sa tuig 2011 ilunsad ang mga stratehiya sa nasud aron sa kaluwasan sa mga kadalanan alang sa mga motorista.

Si Ochoa nagkanayon nga ang administrasyon ni Aquino nasayod sa taas nga mga aksidente sa mga kadalanan sa nasud nga mao ang usa sa mga public health concerns sa pagkakaron.

Matod niya nga ang gobyerno niila nga gikinahanglang maghimo na ug mga lakang aron makigbatok sa mga aksidente sa kadalanan tungod kini anaay dako nga epekto sa sosyo-ekonomikal nga mahimong makaapekto sa sustainable development sa nasud. 

Tungod sa mga road crashes sa tibook kalibotan, gibanabana nga 1.3 ka milyon ka mga tawo ang nangamatay ug gikonsiderar kini sa mga eksperto nga mas makamatay pa sa malaria. 

Tungod nag-una kini sa hinungdan sa mga kamatayon, sa mga physical injuries ug grabe nga mga danyos sa tibook kalibutan.

Ang nakaalarma nga estatistika sa mga kamatayon tungod sa aksidente sa kadalanan maoy nakapadesisyon sa United Nations General Assembly (UNGA) sa pag-aproba sa resolusyon niadtong Marso 2010 nga nideklara nga ang tuig 2011-2010 usa ka Decade of Action for Road Safety.

Matod ni Ochoa nga ang action plan sa Pilipinas gi-mugna sa Department of Transportation and Communications (DOTC) sa pakig-uban sa mga pribadong sektor.(PIA-7/Chrisley Ann C. Hinayas, Intern-CTU)

==========

Pinas milusad sa usa ka dekada nga aksyon sa luwas nga kalsada

By: Juju S. Manubag

                  

CEBU CITY, May 12 (PIA) - - - Mga bus ug mga mini-bus drayber sa North ug South Bus Terminal dinhi sa siyudad sa Sugbo ang gipang-random drug tests kagahapon sa buntag isip usa ka lakang o pamaagi sa pagsiguro nga luwas ang mga pasaherong manakay ug mamiyahe sa paglunsad sa Pilipinas sa usa ka dekada nga aksiyon sa luwas nga karsada (2011-2020).

Sa Sugbo, mga tinugyanan sa Land Transportation Franchising and Regulatory Board (LTFRB), Land Transportation Office (LTO), City Traffic Operations Management (CITOM) ug Philippine Drug Enforcement Agency (PDEA) sa Central Visayas ang naglangkob sa gihimo nga random drug test sa mga draybers sa gikahisgutang mga terminal sa bus.

Ang maong operasyon miresulta sa usa ka buok drayber nga positibo nga migamit sa ginadili nga drugas.

Ang maong resulta ipahigayon pa sa ‘confirmatory test’ sa dili pa kini pahamtangan ug silot, sumala ni LTO Regional Director nga si Raul Aguilos.

Sa paglunsar sa usa ka dekada nga plano alang sa luwas nga karsada (2011-2020) kagahapong adlawa sa Kapihan sa PIA, si Aguilos mipadayag sa kabug-aton sa mga aksidente sa karsada nga mga insidente dinhi sa nasud ug sa tibuok kalibutan.

“Ang aksidente sa kadalanan ang ika-7 o ika-walo nga nag-unang hinungdan sa kamatayon sa tawo sa nasod ug hasta sa tibuok kalibutan”, ni Aguilos pa.

Tulo ka mga rason nganong mahitabo ang aksidente sa karsada.  Una, tungod sa drayber, ikaduha, ang sakyanan ug ang ikatulo mao ang katawhan, si Aguilos miingon.

“Mao ni ang hinungdan nga mipahigayon ug random drug testing sa mga drayber sa bus aron kaminusan ang aksidente sa mga kadalanan”, dugang pa sa opisyal sa LTO.

Ang LTO director mihatag ug kahinungdanon sa pagpahibalo ngadto sa mga drayber sa mga de pasahero nga mga sakyanan nga may dako silang tulubagon ug responsibilidad nga himoon gayud nga luwas ang ilang pagmaneho tungod kinabuhi sa uban ang ilang gigunitan.

Laing kalihukan alang sa paglunsad sa ‘Dekada sa Aksiyon Alang sa Luwas nga kadalan 2011-2020’ mao ang pagpahigayon ug ‘road worthiness test’ sa mga sakyanan kagahapong adlawa sa mga kadalananan sa team. Gisuta nila ang mga brakes, ligid ug suga ug uban pa.

Naghimo usab ug emission testing ang panon sa mga sakyanan nga kusog mobugwak ilang tambutso ug baga nga aso.

Ila kining gibuhat aron mapukaw ug mosaka ang kasayuran sa mga katawhan sa kamahinungdanon sa mga pamaagi nga maluwas ang kadalanan,matod pa.

Si LTFRB-7 Regional Director sa laing bahin miingon nga ilang tinguha nga makab-ot ang zero nga aksidente sa karsada sa tuig 2020 nga ingon pa ni Cuizon nga dili katuohan o imposible apan tinguhaon nila ga makunhuran ang gidaghanon sa aksidente sa karsada sa kinaubosan nga denominasyon nga ilang mabuhat.

Daghang mga  tao ang nangamatay o nakalasan sa ilang mga kinabuhi tungod sa mga aksidente sa karsada ug ikatandi sa nangamatay sa sakit nga kanser. Walay suwerte nga hunahunaon tungod kadaghanan  niining nabiktima kay nagkaubos ang edad ingon ni Cuizon.

Uno punto tres milyones (1.3M) ka mga tao ang nangamatay matag tuig sa tibuok kalibutan tungod sa aksidente sa kadalanan ug gilaraw kini nga mosaka pa ngadto sa 1.9 milyones sa tuig 2015 segun sa taho.

Usa gatos (100) ka mga nasod apil ang Pilipinas ang milunsar kagahapong adlawa sa ilang kaugalingong dekada sa plano nga mga aksiyon sa ilang saad sa United Nations nga ‘Dekada sa Aksiyon alang sa Luwas nga Dalan 2011-2020’. (PIA7-Cebu)

==========

LTO mipahinumdum sa mga PUV operators

sa ilang responsibilidad isip alagad sa katawhan
By Eli C. Dalumpines

CEBU CITY, May 12 (PIA) – Subling gipahinumduman sa taas nga opisyal saLand Transportation Office (LTO) dinhi sa Tunga-tungang Kabisay-an ang mga operators sa mga public utility vehicles (PUVs) sa ilang responsibilidad isip mga alagad sa katawhan.

Si LTO -7 Director Raul Aguiluz, atol sa gipahigayon nga forum mahitungod sa road safety o kasiguruhan sa kadalanan kagahapon, nagkanayon nga gihatagan ug mga prankisa ang mga PUV operators tungod kay mipadayag sila sa ilang tinguha pag-alagad sa publiko pinaagi sa pagsulod na natad sa pampublikong transportasyon.

Ug isip alagad sa katawhan angay nilang itino ang kamaayo sa kundisyon sa ilang mga sakyanan aron masiguro nga luwas sa kadaot ang ilang mga sumasakay, matud niya.

Suma pa kang Aguiluz, ang iyang buhatan nagpahigayon ug road worthiness tests sa mga pampublikong sakyanan kada-tuig apan ang pagsiguro nga maayo ang kundisyon sa ilang mga sakyanan sa tanang higayon anaa na sa abaga sa mga PUV operators.

Kasumpay niini, giaghat niya ang mga tag-iya ug mga pasahero-ang mga sakyanan nga di na maghuwat nga madakpan sa mga tigpatuman sa mga balaud sa trapiko usa pa nila ayuhon ang mga depekto sa ilang mga sakyanan.

Matud ni Aguiluz, di sila 24 oras nga mopatuman sa balaud sa trapiko mao nga gikinahanglan nila ang pakigtambayayong sa mga PUV operators aron maminusan ang aksidente sa kadalanan.

Ang aksidente sa kadalanan, suma pa niya, maoy ika-walo sa mga hinungdan sa kamatayon dinhi sa nasud.

Ang opisyal nag-ingon nga ang disiplina sa drayber, kundisyon sa sakyanan ug ang kahimtang sa kadalanan maoy hinungdan sa aksidente.

Apan kining ilang kampanya karon mo-punting sa drayber ug sa kundisyon sa sakyanan tungod kay mao man kini kalab-anang hinungdan nga mu-mugna ug aksidente.

Iya usab nga gi-klaro nga kanunay na nilang gipatuman ang uban pang mga lakang pagsiguro nga malikay sa aksidente ang katawhan sama sa roadside random drug test ug sa pagpangapud-apod ug mga basahon nga magpahimangno sa mga drayber nga maglikay sa disgrasya. (PIA-7/ECD)

===========

TESDA mohatag ug libreng pasulit alang sa mga tabahante sa konstruksyon
By Eli C. Dalumpines

CEBU CITY, May 12 (PIA) – Mohatag ug libreng pasulit ang Technical Education and Skills Development Authority (TESDA) alang niadtong anaa manrabaho sa industriya sa konstruksyon aron matabangan sila pagkuha ug National Certificates (NC).

Matud ni Jing Jaime, hepe sa Assessment and Certification Unit sa TESDA, nagkanayun nga kini kabahin sa ilang kampanya aron mabutang sa taas nga ang-ang ang kalidad sa mga trabahante sa vocational nga sektor pinaagi sa paghatag kanila ug sertipiko nga basi sa international nga sukdanan.

Iyang gipahibawo nga ang TESDA gikatakdang mopahigayon niining libre nga pasulit ug pagpang-isyu ug sertipiko karong Hunyo 27 hangtud Hulyo 1.

Kini, suma pa niya, maoy mokumpuner sa ika-duhang hugna sa maong kampanya paghatag ug libre nga sertipikasyon sa mga trabahante sa teknical nga sektor.

Ang unang hugna, matud niya, gipahigayon niadtong milabay nga Marso samtang ang ikatulo nga hugna ipahigayon karong moabot Agosto.

Iyang giklaro nga ang TESDA mipunting ug 5,000 ka mga trabahante alang sa maong programa. Diha sa gipahigayong unang hugna sila naka-alagad ug 1,776 ka mga aplikante, dugang pa niya.

Subay niini, ang nahisgutang opisyal nanawagan sa mga trabahante sa konstruksyon nga moadto sa ilang mga buhatan sa nagkalain-laing probinsya aron makatagamtam niining programaha.

Sa normal nga proseso, mogasto ang usa ka trabahante ug kapin kun kulang P500.00, suma pa niya.

“Apan kung moari sila karong Hunyo 27 ngadto sa Hulyo 1 makakuha sila’g libreng pasulit ug kung makapasa sila makuha nila ang ilang mga sertipiko nga wa’y bisan unsang bayranan,” matud ni Jaime. (PIA 7/ECD) 

===========

Dumaguete City magtukod ug modernong dumpsite pagkab-ot sa zero-waste

by: Jennifer Catan-Tilos

DUMAGUETE CITY, Mayo 12 (PIA)   Ang dakbayan sa Dumaguete mihimo na ug lakang sa pagtukod sa dumpsite sa barangay Candua-ay ngadto sa pag moderno sa mga pasilidad niini pinaagi sa pagkuha ug contractor aron ma convert ang basura ngadto sa kuryente.

Ang plano sa milabayng administrasyon sa pag pagpahimutang sa usa ka landfill pulihan kini ug usa ka biosphere ug gasification facility. 

Matud ni Mayor Manuel Sagarbarria bukas ang dakbayan alang sa mga modernong facilidad aron makab-ot ang zero waste sa dakbayan.

Busa ang True Green Energy Group (TGEG), usa ka contractor nga motokud  sa maong modernong facilidad, gitagaan sa syudad ug tulo ka bulan pagpatuman sa usa ka memorandum of agreement (MOA) alang maong facilidad. 

Basi sa kasabotan, ang TGEG maoy motukod sa facilidad nga mobalor og US $13 million diin pagabayran sa dakyan sulod sa 25 ka tuig, dayon ang dakbayan isip counter part molabay ug basura nga dili mominus 80 tolinada matag adlaw aron makaproduce og nine megawatts nga kuryente.

Sa bagohay pa lamang si Mayor Sagarbarria, ABC President Albert Aquino ug pipila ka opisyal sa dakbayan niadto sa San Fernando, Pangpanga aron pagsusi sa pilot project sa TGEG, diin ilang nakita ang facilidad nga puwede usab gamiton sa dumpsite sa dakbayan. 

Sa iyang bahin, ang presidente sa ABC miingon kon madayon ang proyekto makabenispyo usab niini ang mga basurero ug mga lumpoyo duol sa dumpsite sanglit makatrabaho unya sila. (PIA NegOr/JCT) 

===========

CITOM misuporta sa PInas nga plano alang sa luwas nga dalan sa tuig 2011 - 2020

By: Juju S. Manubag

CEBU CITY, May 12 (PIA) - - - Isip kabahin sa ilang panaad alang sa plano sa Pilipinas nga luwas ang mga  dalan sa tuig 2011-2020, ang City Traffic Operation Management (CITOM) ubos sa kagamhanan sa Sugbo nagsige sa pagpang-ilis sa sugang trapiko ngadto sa ekonomikanhong LED nga suga diha sa mga kadalanan sa siyudad aron sundon sa mga drayber.

Si Citom Executive Director Rafael Christopher Yap misulti nga ilang gipanghingusgan ang pagpatuman sa balaod ug ordinansa sa siyudad kabahin sa trapiko sama sa pagpangdakop sa sa mga sakyanan nga grabeng itoma ug baga sa aso nga ibugwak sa tambutso niini ilalom sa ‘anti-smoke belching campaign’.

Si Yap mitataw nga tibuok ang ilang pagsuporta alang sa luwas nga dalan aksiyon nga plano nga gi-pangunhan sa Land Transportation Office (LTO) uban sa nagkalain-laing stakeholders sa pagsiguro nga luwas ang kinabuhi ug mga kadaot sa kabtangan malikayan tungod sa aksidente sa dalan.

“Ug mahimo lang, buot namo nga ubsan ang gidaghanon sa mga aksidente sa karsada dili lang diri sa siyudad  hasta usab nga tibuok probinsiya tungod ang mga pasaherong publiko nga mga sakyanan moagi man ug ruta sa siyudad sama sa Cebu City Bus Terminal nga nia sa siyudad”, sumala ni Yap.

Ang Philiippine Road Action Plan 2011-2020 gilunsad sa Sugbo kagahapong adlawa sa Kapihan sa PIA nga gipahigayon didto sa Citom Conference Room nga gitambongan sa mga nagkahiusang ahensiya sa rehiyon alang sa mga sakyanan nga mao ang Land Transportation Office (LTO), Land Transportation Franchising and Regulatory Board (LTFRB) ug Philippine Drug Enforcement Agency (PDEA).

Ang paglunsad dili lamang kalihukan sa tibuok nasod sa Pilipinas apan kalihukan usab kini sa tanang nasod nga nahisakop sa United Nations sa tibuok kalibutan nga nagbuhat usab sa kaugalingon nilang ‘Decade of Action for Road Safety 2011-2020’. (PIA7-Cebu)