Balaodnon'g MSME  mopalapad sa oportunidad sa panarbaho sa mga Pilipino

 

CENTRAL VISAYAS, May 25 (PIA)---Ang promosyon sa balaod nga micro, small and medium enterprise (MSME) lagmit makapalapad sa trabaho ug oportunidad sa panginabuhian sa daghang Pilipino.

 

Ang MSME Law o ang Republic Act-9501 kusganong giduso ngadto sa senado aron paghatag ug dugang tabang sa mga negosyante pinaagi sa pagmando sa mga lending institutions sa paggahin ug dili momenos walo ka porsyento sa ilang tibuok loan portfolio ngadto sa micro ug small businesses.

 

Ang balaod usab nihingalan sa mga ahensya sa kagamhanan nga adunay kalabotan niini sa paghatag ug akses sa bag-ong teknolohiya ug regolar nga entrepreneurship training programs alang sa mga mamumuo.

 

Gusto usab niini nga magtukod ug comprehensive development plan nga mosiguro sa paglambo sa MSMEs sa nasud.

 

Si Senador Loren Legarda, kinsa principal author ug sponsor sa Republic Act 9501 o ang MSME Law, nagkanayon nga ang self-employed nga mga trabahante naglangkob sa 40 porsyento o 14M sa 36M nga mga Pilipino nga kasamtangang nagtrabaho sa nasud karon.

 

Si Legarda nibutyag nga ang MSME nga balaod mamahimong maghatag ug employment alternatives sama sa self-employment partikular na kalihokan sa micro enterprise.

 

Siya nipatin-aw nga kini kusganong mokomplemento sa kinatibuk-ang probisyon sa trabaho alang sa mga nagkadaghan nga numero sa mga trabahante nga nagdepende sa wage employment.

Ang pagsaka sa oportunidad sa wage employment lisod gumikan sa daghang problema sa nasud ug ingon man tungod sa kinatibuk-ang suliran.

Si Legarda nihingalan sa konseho sa MSME, Department of Trade and Industry (DTI), Department of Labor and Employment (DOLE), Technical Education Skills and Development Authority (TESDA), labor organizations ug bisan sa mga employers sa pagduyog ug pagpromot sa self-employment alternatives aron magmalamposon sa pagahatag dili lamang trabaho kundi lakip na ang maayong kinitaan sa nagkadako nga tawhanong kusog. (PIA-7/mbcn/ Angie P. Amodia-CTU)

========== 

NFA: Dunay igong suplay sa bugas dinhi sa CV

CEBU CITY, May 25 (PIA) --- Ang National Food Authority-7 (NFA) dinhi mipasalig nga anaa'y  igong suplay sa bugas samtang gipasiugdahan kining I-Rice nga programa nga maoy himuong usa sa solusyon isip kontra sa nagkataas nga malnutrisyon sa nasud. NFA information officer Lucy Rosales miingon sa nahitabong panagtigum sa Association of Government Information Officers kagahapon nga sa pagkakaron ang Central Visayas anaay pundo nga 1.4M nga imbentaryo sa bugas nga  gibana-bana nga molungtad ug halos upat hangtud lima ka buwan. Matud ni Rosales nga ang maong kwenta walay labot sa commercial rice.  Siya midugang ang NFA nagplano ug rice importation sa dili pa mahurot ang maong pundo.    Sa pagkakaron hinuon, anaay igong suplay sa bugas busa walay kinahanglang ikaguol, kini matud pa ni Rosales. Ang I-Rice nga programa sa laing bahin, gilunsad sa NFA alang sa pagtubag niining problema sa malnutrisyon sa nasud ilabi na gayud ang iron-deficiency anemia pinaagi sa pagpaila niining iron-fortified rice. Kining pagpaimplementar niining I-Rice nga programa usa ka pagtuman sa Republic Act 8978 nga gikinahanglang sa pagmando niining fortification of staples susama sa bugas, harina, mantika ug asukar. (PIA-7/mbcn/Ailene G. Limutan, CTU)

 ==========

Mga LGU ug komunidad kinahanglang alerto sa pag-abot sa bagyong Chedeng

CEBU CITY, May 25 (PIA) --- Human misulod ang bagyong Chedeng sa Philippine Area of Responsibility, si Senador Loren Legarda mipahimangno sa mga lokal nga kagamhanan ug komunidad ilabi na kadtong mga gituohang maigo sa bagyo, nga kinahanglang ipatuman ang hugot nga pagpangandam.

Matud ni Legarda, isip nangulo sa komite sa senado sa climate change, kinahanglang andamon sa matag tagbalay ang mga pito, batingaw ug mga gagmayng bandera sa nasud nga mamahimong warawara atol sa panahon sa panginahanglan.

Gipasabot usab ni Legarda ang mga opisyal sa LGU sa pag-activate sa tanang early warning systems aron masigurado nga ang mga dagkong kanal ug drainage malimpyohan una aron malikayan ang dagkong pagbaha ug pagpatuman ug sayo nga evacuation ngadto sa mga pamilya nga nagpuyo sa daplin sa bukid nga humok mabiktima sa land slide.

Si Legarda hugot nga nagmando sa mga LGU sa pagplano ug pagpatuman ug mga climate action plan nga maglakip sa pagpa-usbaw sa disaster risk information pinaagi sa risk identification o assessment ug pagpahibaw sa katawhan kalabot sa mga gi-isyu nga disaster warnings sa gobyerno.

Dugang sa senadora, ang mga lokal nga kagamhanan kinahanglan usab magpatuman ug mga proyekto nga mopaubos sa disaster risk sama sa pagpalig-on sa mga kabalayan, pagpangandam sa mga relocation area ug pag-awhag sa katawhan sa pakigtambayayong sa kagamahanan. (PIA-7/mbcn/Maryknoll B. Lague CTU)

===========

Binay miabiso sa mga lisensyadong mga recruitment agencies batok sa pagsakmit sa mga pasaporte sa mga aplikante

CEBU CITY, May 25 (PIA)--- Si Presidente Jejomar C. Binay, nga maoy nangulo sa presidential task force batok sa illegal recruitment, miabiso sa mga lisensyadong mga recruitment agencies batok sa pagsakmit sa pasaporte sa mga aplikante nga gustong motrabaho gawas sa nasud aron pagpugong kanila sa pagbalhin sa laing ahensiya.

 Gi-isyu kini nga abiso human ang iyang opisina nakadawat ug mga reklamo gikan sa mga aplikante kabahin sa kinaiya sa pipila ka mga lisensyadong recruitment agencies sa pagbungat ug dakong kantidad aron ihatag ilang mga pasaporte.

Matod sa chief adviser sa OFW affairs nga kini usa ka klaro nga kalapasan sa Philippine Passport Act of 1996 kon diin nakapatik nga ang pasaporte sa Pilipinas magpabilin nga kabtangan sa gobyerno ug dili itugyan sa bisan kinsa gawas sa gobyerno o iyang representante.

Matod ni Binay nga kadtong mga aplikante nga padulong gawas sa nasud, kinsang mga pasaporte gitipigan sa mga lisensyadong mga ahensiya, kinahanglan mosang-at ug reklamo ngadto sa Philippine Overseas Employment Administration (POEA) aron matagaan kini ug aksyon.

Kini nga pamaagi sa mga lisensyadong ahensiya, magpugong sa mga aplikante aron dili makabawi sa ilang aplikasyon ug mobalhin sa laing ahensiya.

Dugang pa niya nga ang mga aplikante titulado sa pagkuha sa ilang pasaporte ug uban pang mga dokumento kon wala pa ang deployment.

Panapos pa ni Binay nga ang task force anaa na sa proseso sa pagsusi sa mga reklamo kabahin sa isyu sa mga lisensyadong mga recruitment agencies ug kadtong naningil ug dakong bayad, siguradohong mag-atubang ug dakong sangputanan sa ilang mga lihok. (PIA-7/mbcn/Chrisley Ann C. Hinayas, CTU)

==========

DBM mipasalig nga adunay dugang pondo nga gitagana ang gobyerno alang sa dugang magtutudlo ug lawak tunghaan sa nasud

CEBU CITY, May 24 (PIA) --- Adunay pondo nga gitagana ang gobyerno alang sa pagpanawat ug dugang 10,000 ka mga gikinahanglang pampubliko nga magtutudlo ug pagpatukod sa mga lawak tunghaan alang karong umaabot nga ting-abli sa klase, kini matud sa tigpamaba sa Department of Budget and Management (DBM).

Apan giklaro ni Budget Secrtary  Florencio Abad sa usa ka interbyu kagahapon atol sa paglunsad sa P26.2 ka bilyon nga proyekto sa Yokohama Tires Philippines Inc., nga ang maong pondo dili igo aron makasulbad sa kakuwang sa mga magtutudlo ug lawak tunghaan sa tibuok nasud.

Gipahibawo usab ni Abad nga ang pondo nga gitagana ngadto sa Department of Education karong tuiga mikabat sa P 207.3 ka bilyon kung diin misaka kini ug P32.3 ka bilyon kung ikompara sa pondo sa Dep-Ed niadtong niaging tuig. Gidugang ni Abad nga kini ang kinadak-ang pagsaka nga gipatuman kapin na sa usa ka dekada.

Wala maghisgot si Abad ug saktong kantidad nga gigahin alang sa lain pang dugang nga pondo apan base sa namantala sa website sa DBM adunay P7B nga kantidad alang sa pagpatukod ug 8,997 ka mga lawak tunghaan.

Kining maong kantidad gikuha gikan sa P11.29B nga “lump sum fund” nga gigahin alang sa mga nag-unang panginahanglan sa edukasyon dinhi sa nasud.

Ang maong 8,997 ka mga lawak tunghaan gituohang makapahiluna sa 404,000 ka mga tinun-an.

Sa kinatibuk-ang P7B nga dugang pondo, P432.3M niini ang ibubo ngadto sa Central Luzon kung diin 588 ka mga lawak ang ipatukod ug makabenipisyo sa 26, 469 ka mga tinun-an.

Ang dako nga bahin sa pondo nga mokabat ngadto sa usa ka bilyon gigahin alang sa National Capital Region (NCR) ug ang mga nahabiling kantidad ipang-apu-apud ngadto sa lain-laing rehiyon sa nasud.(PIA-7/mbcn/Maryknoll B. Lague CTU)

===========

PAG-IBIG Fund mas gipalapdan ang ilang membership coverage

CEBU CITY, May 25 (PIA) --- Alang sa mas halapad nga serbisyo nga ikahatag ngadto sa katawhan, ang PAG-IBIG mipalapad sa ilang membership coverage kung diin ang mga katabang, drayber, mananagat, mag-uuma ug uban pang mga trabahante nga adunay kinitaan nga di mominus sa P1,000 matag buwan mamahimo nang magpamiyembro ug makapahimulos sa ilang mga benepisyo.

Lakip usab sa bag-ong membership coverage nga gipatuman ang mga job-order employees, contractual ug news reporters.

Si Pag-IBIG-Cebu South Branch Officer In-Charge Rio Teves namahayag bag-ohay lang sa nahitabong pagpalapad sa coverage nga karon gihimo na nga mandatory pinaagi sa RA-9679 o Home Development Mutual Fund Law 2009.

Sigun ni Teves, alang niadtong mga bag-ohay lang nakapanarbaho ug kadtong bag-ohay lang mibalhin ug trabaho ang membership magsugod gayud atol sa unang adlaw sa pagpanarbaho.

Iya usab nga gi-awhag ang daan nang mga miyembro sa Pag-IBIGsa pagpahimulos sa ilang benepisyo pinaagi sa pag-aplay sa Multi-purpose ug housing loans nga programa sa ilang buhatan.

Gidasig usab matud pa ang mga miyembro sa pagbisita sa ilang buhatan nga nahimutang sa WT Corporate Tower, Cebu Business Park sa siyudad sa Sugbu o sa sa Dumaguete Extension Office nga nahimutang sa Philippine National Red Cross Building, Legaspi Street sa siyudad sa Dumaguete alang sa dugang nga mga impormasyon ug pangutana kabahin sa Pag-IBIG Fund.

Ang mga miyembro mamahimo usab nga mutawag niining mga mosunod nga mga numero: alang sa multi-purpose loan, 4158311/2342778; housing loan, 4155008/4155009;Membership Registration, 4155002/4155003 ug sa Dumaguete Ext Office, 2557713.(PIA-7/mbcn/Maryknoll B. Lague CTU)

============

Drainage ang plano nga i-prayoridad sa supplemental budget

CEBU CITY, May 25 (PIA) --- Usa ka drainage master plan ug pagpatarung sa Carbon Market ang himuong prayoridad ni Cebu City Mayor Michael Rama sa iyang pagsumiti sa iduso nga plano niining Supplemental Budget 2 karong tuiga, kini matud pa ni Councilor Joey Daluz, head sa City Council’s budget committee. Si Rama, Daluz, Cebu City Department of Budget head Nelfa Briones, City Treasurer Ofelia Oliva ug City Administrator Jose Mari Poblete mihisgot  sa supplemental budget samtang namahaw sa pinuy-anan ni Rama bag-ohay pa lamang. Si Daluz misulti nga ang gihisgutan sa maong panagtigum mahitungod sa kung unsa ang kinahanglang anaa sa badyet apan wala pa nahisgutan ang mga kantidad nga maglangkub niini. Ila usab gihisgutan ang mga posibleng gigikanan sa puhunan niini nga plano aron pag-abot sa maong supplemental budget. Si Daluz midugang nga ang mayor dili uyon sa pagpangutang ug basin ang siyudad mugamit sa surplus badyet sa miaging tuig. Lain usab nga mamahimong gigikanan ang wala nagamit nga kwarta nga mikantidad ug P1.6 billion nga gigahin alang sa tuig 2010-2011. Sigon usab niya nga ilang kolektahon ang mga consolidated request reports sa tanang departamento sa City Hall aron mafinalize na ang maong budget proposal. (PIA-7/mbcn/Ailene G. Limutan-CTU)

============

State university mopirma ug kasabotan kauban ang Army alang sa scholarship grant

  

DUMAGUETE CITY, May 25 (PIA) --- Ang Negros Oriental State University (NORSU) mopirma ug kasabotan kauban ang 11^th Infantry Battalion (11IB) sa Philippine Army aron pahalapdan ang ilang scholarship grants aron tabangan ang mga takos nga mga magtutungha sa NORSU Guihulngan Campus.

Ang pinirmahay sa memorandum of agreement alang sa hinabang sa edukasyon ipahigayon bag-ohay pa lamang diha sa NORSU Campus sa siyudad sa Guihulngan, kini matod ni 1Lt. Angelito Luna, ang 11IB Battalion Civil-Military Operations Officer pinaagi sa usa text message.

Ubos sa maong gikasabotan, ang 11IB, pinaagi sa Lapu-Lapu Educational Assistance Program (LEAP), mo-sponsor ug upat ka full-time scholars sa bisan unsa nga upat ka tuig nga kurso sa NORSU Guihulngan Campus.

Ang 11IB maoy moabaga sa laing mga balayranan ug mohatag ug kada buwan nga allowance nga P2,500 sa mga scholars niini.

Sa imbitasyon sa 11IB, si Board Member Jessica Villanueva ug ang Serge Remonde Scholarship Foundation, ang kada usa mo-sponsor ug usa ka full scholar sa maong unibersidad nga makadawat ug susama nga mga kahigayonan sa edukasyon nga gitagamtam sa mga LEAP scholars.

Ang battalion nga anaa nagestasyon sa Barangay McKinley sa siyudad sa Guihulngan, Negros Oriental maoy nanguna sa LEAP isip tipik sa ilang responsibilidad sa katilingban sa pagtabang sa pagpalambo sa kondisyon sa duol nga mga komunidad. (PIA-7/mbcn/Chrisley Ann C. Hinayas, CTU)

===========

NegOr  manguna sa pagpanglimpyo isip tipik sa pagselebrar sa Environment Month

DUMAGUETE CITY, May 25 (PIA) --- Ang Negros Oriental mosugod na sa ilang pagselebrar sa karong tuiga sa Environment Month nga adunay paglakaw,pagpanglimyo ug pagbisikleta alang sa kalikopan karong Hunyo 1.

Ang Environment and Natural Resources Division (ENRD) sa probinsiyal nga panggamhanan sa pakigtambayayong sa Metro Dumaguete Road Runners Club ug sa grupo sa mga magbibiseklitahay motino sa mga lugar sa Metro Dumaguete nga kinahanglan limpyohan. Ang mga magbibiselitahay, magdadagan ug kadtong ganahan molakaw gitagaan ug sa usa ka lugar nga adto mamunit o magtigom ug mga basura ilabi na ang mga plastik nga mga basura nga anaa sa mga kadalanan aron ipromot ang paggalam sa kalikopan ngadto sa publiko, kini matod ni Division chief Mercy Teves sa ENRD. Atol usab sa pag-abli sa klase karong Hunyo 6, ang mga pampublikong mga tunghaan gidahuman nga magpahigayon ug mga kalihokan sulod sa tunghaan sama sa “Oplan Linis” isip tipik sa ilang pagpanglimpyo sa nataran sa tunghaan. Laing gipasiugdahan sa Department of Education (DepEd) mao ang pagdasig sa mga tunghaan sa pagtanom ug mga liso sa prutas alang sa ilang pagpangandam sa sunod nga tingtanum. Sa pakigalayon sa Department of Environment and Natural Resources (DENR) ug ENRD , aduna usab mga naglinyang mga kalihokan kabahin sa kalikopan sama sa on the spot poster making ug indigay sa pagsuwat ug gumalaysay sa mga pampublikong elementarya ug mga tunghaan sa sekondarya; pagpanglimpyo sa baybayon ug  sapa kauban ang mga tunghaan sa kolehiyo ug  unibersidad sa siyudad nga gitagaan ug kaugalingon nga lugar kon asa manglimpyo. Kanayon ni Teves nga ang lokal nga kapolisan gikan sa mga nagkalain-laing estayon sa kapolisan sa siyudad ug munisipyo mopaubos ug pagbansaybansay ug  oryentasyon kabahin sa mga balaod sa kalikopan. Ang maong pagbansaybansay ug oryentasyon makabatang sa pagpalig-on sa ilang implementasyon sa kalinaw ug pagpatuman sa ilang mga responsibilidad pinaagi sa paghatag ug konkretong pagtabang sa kapolisan alang sa pagproteher sa kalikopan ug sa kinaiyanhong mga kabtangan sa probinsiya, kanayon pa ni Teves. Ang kapolisan dili lang makigabtok sa mga ordinaryong matang sa krimen apan apil usab ang paggukod sa mga kontra sa kalikopan aron pagpangusgan ang ilang pagpatuman sa Republic Act 9141 o mas nailhan nga Conservation and Protection of Wildlife Resources.  (PIA-7/mbcn/Chrisley Ann C. Hinayas, CTU)

=========== 

Grupo nihangyo ug us-os nga presyo sa pletehan 

CENTRAL VISAYAS, May 25 (PIA)---Kon ang presyo sa lana niubos, kinahanglan ang pletehan usab.

Tungod niini, ang National Council for Commuter Protection (NCCP) nag-andam na aron pagsumite ug pormal nga petisyon alang sa pagpaus-os sa pletehan sa jeepney ug bus ngadto sa Land Transportation Franchising and Regulatory Board (LTFRB) sulod niining semanahona.

Ang NCCP president nga si Elvira Medina nagkanayon nga gawas sa makanunayon nga pag-ubos sa presyo sa lana, adunay uban nga igong kapasigaran aron makumbinse ang LTFRB nga mopahamtang ug P0.50 nga us-os sa minimum nga pletehan sa jeep ug P1 alang sa mga bus.

Sa kahinumduman, ang LTFRB nitugot sa public utulity jeepeneys (PUJs) sa tibuok nasud nga magpasaka sa minimum nga pletehan gikan sa P7 ngadto sa P8 sukad nidtong Pebrero 2.

Sa mga ordinaryo ug air-conditioned public utility buses (PUBs) sa Metro Manila gitugotan sa pagpausbaw gikan sa P9 ngadto sa P10 sa ordinaryo nga bus ug P11 ngadto sa P12 sa air-conditioned nga bus sukad niadtong Marso 29. 

Ang LTFRB nihatag sa ilang pagtugot sa usbaw sa minimum nga pletehan tungod sa nagpadayong usbaw sa presyo sa lana tungod sa politikanhong kagubot sa mga Middle East nga mga nasud.

Si Medina nagkanayon nga aduna nay tukma nga dagan sa pag-ubos sa presyo sa lana. Ang kasamtangang presyo sa diesel nipasar sa P44 matag litro nga benchmark, diin ang minimum nga pletehan gitakda sa P7. Kini lamang makakubinse na sa LTFRB sa pag us-os sa pletehan.

Siya nidugang nga kon ang LTFRB nitugot sa usbaw sa pletehen sayo niining tuig isip konsiderasyon sa kalisod sa PUJ ug PUB nga mga operator, ang kagamhanan kinahanglan usab mokonsiderar sa kalisod sa mga sumasakay hilabi na sa pagsugod sa klase sa sunod bulan.

Iyang gipasabot nga kon ang pletehan moubos, ang presyo sa nag-unang palaliton ug serbisyo moubos usab. Ug sa panahon nga magsugod ang klase, ang us-os nga pletehan usa ka relibo ngadto sa mga sumasakay hilabi na sa mga tinun-an ug sa ilang mga ginikanan.

Sa parte sa kagamhanan, si LTFRB Board Member Manuel Iway nagkanayon nga sila mohinangop sa petisyon sa NCCP o sa kadtong gikan sa mga sumasakay, taxpayer o mga transport group nga moduso ug us-os sa pletehan.

Si Iway nibutyag nga kutob kagahapon, wala pa silay nadawat nga pormal nga petisyon alang sa us-os sa pletehan. Sila niawhag sa mga sumasakay, taxpayer o mga transport group nga himoong pormal ang ilang mga hangyo aron sa ingon ang LTFRB motakda ug usa ka pagdungog aron kini timbang-timbangon.

Siya nidugang nga ang padayong pag-ubos sa presyo sa lana usa ka importante nga katarungan nga ang LTFRB mokonsidera sa pagtimbang-timbang sa bisag unsang petisyon alang sa us-os sa pletehan. Apan siya usab niingon nga sila abli sa mga baruganan sa mga transport group nga sigurado nga mosupak niini.

Daghang mga transport groups ang nisupak sa gisugyot nga us-os sa suholan ug nagkanayon nga ang padayong pag-ubos sa presyo sa lana usa ka oportunidad nila aron pagbawi sa ilang alkansi sa mga bulan nga taas ang presyo sa lana.

Apan sa Iway niingon nga bisan ug walay petisyon sa us-os sa pletehan gikan sa mga sumasakay o transport groups, ang LTFRB adunay katungod sa pagbawi sa provisional fare increase nga ilang gihatag sa mga PUJs ug PUBs.

Sila mopabalik sa provisional fare increase sa higayon nga sila makadungog ug pormal nga petisyon sa usbaw sa pletehan nga gisang-at sa mga transport groups.

Si Iway nidugang nga ang pagdungog sa usbaw sa pletehan gikatakda nga mahitabo sa katapusan niining bulan. (PIA-7/ mbcn/Angie P. Amodia-CTU)

============

Pag-Ibig Fund - Cebu South Branch naggahin ug kapin sa P2.840B alang sa multi-purpose, housing loans

CEBU CITY, May 25 (PIA) --- Ang PAG-IBIG Fund- Cebu South branch naggahin karong tuiga ug kantidad nga P2.480B  nga naglangkob sa P1.543B alang sa multi-purpose loans ug P1.297B  alang usab sa housing loans, mga programa sa ilang buhatan.

Kining maong kantidad mamahimong mapahimuslan sa mga miyembro sa Pag-ibig Fund dinhi sa siyudad sa Sugbu, tanang siyudad ug municipyo sa Southern Cebu, probinsya sa Negros Oriental ug probinsya sa Siquijor.

Ang Multi-Purpose Loan (MPL) nga programa sa Pag-IBIG Fund nga maghatag ug dugang pondo sa lain-laing panginahanglan sa mga miyembro gikan sa pagpaayo sa pinuy-anan ngadto sa pagpamalit ug kabtangan; gikan sa panginahanglan sa bayronon sa pagtuon ngadto sa paghatag ug pohonan sa negosyo.

Ang mga miyembro nga aduna nay 24 ka buwan nga kontribyusyon ang mamahimong maka-aplay sa MPL kung diin kini pagabayran pinaagi sa salary deduction sulod sa duha ka tuig.

Buot sa Pag-IBIG Fund nga maoy manguna sa pagkab-ot sa maayong relasyon ngadto sa ilang mga miyembro pinaagi sa paghatag ug daling tubag panahon sa mga dinaliang panginahanglan.

Sa laing bahin,pangandaoy sa matag usa ka Pilipino ang makaangkon ug usa ka desente nga pinuy-anan nga nahimutang sa mga malinawong komunidad.

Pinaagi sa Housing Loan nga programa sa Pag-IBIG, mamahimo nang matuman ang damgo tungod kay ang mga miyembro sa Pag-IBIG mamahimo nang makaangkon ug ilang kaugalingong condominium ug house and lot unit.

Matud sa Pag-IBIG, ang housing loan mamahimong magamit human sa 24 ka buwan nga kontribyusyon.

Alang sa mga dugang pangutana ug impormasyon, ang mga miyembro sa Pag-ibig gi-awhag sa  pagbisita sa buhatan saPag-IBIG Cebu South Branch.(PIA-7/mbcn/Maryknoll B. Lague CTU)