Magpatigayon sa Siquijor nakadawat ug ayuda sa DOST  
by Rizalie Anding Calibo 

Siquijor Province, (PIA)-- Duha ka gagmayng magpatigayon sa lalawigan sa Siquijor bag-o pa lamang nakadawat sa ikaduhang higayon,  ug hinabang gikan sa Department of Science and Technology(DOST), pinaagi sa Small Enterprise Technology Upgrading Program (SETUP) niini.

Ang maong hinabang mikantidad ug P120,000 nga tseke ngadto sa Pajermo Furniture alang sa usa ka jointer plainer isip dugang ekipo sa maong patigayon ug laing P70,000-check alang sa dugang pagpalambo sa “packaging” sa Duran Banana Products. 

Sa pakighinabi sa Philippine Information Agency (PIA), si Provincial Science and Technology (PSTC) Provincial Director Mario de la Pena miingon nga ang maong suporta gilantaw sa DOST aron masiguro ang pag-uswag ug pagpadayon sa ilang proyekto sumala sa paningkamot sa pangagamhanan aron mouswag ang mga magpapatigayon sa nasud. 

Mapasalamaton usab ang duha ka magpapatigayon ngadto sa DOST sa pagpili   kanila nga pipila ka mga benepisyaryo sa programa.  

“Dako gyud kayo ang among pasalamat sa DOST,” sumala pa sa duruha nga si Butch Duran sa Duran Banana Products ug Roberto Pajermo sa Pajermo Furniture.

Sa kasamtangan, 15 na ka gagmayng magpapatigayon ang nahatagan ug ayuda sa DOST-SETUP nga mikantidad ug P7 ngadto sa P9 milyones ang nahatag sa lalawigan sa Siquijor. 

“Buot pa nako nga daghan pa ang makatagamtam sa maong ayuda busa akong giawhag ang uban pang mga magpapatigayon sa pagduol sa among buhatan ug mangayo ug katina-awan kabahin sa mga programa.  (RACalibo/PIA-7 Siquijor)

============

PDEA-7 nakadakop ug 64 nga may kalambigitan sa druga sulod sa Marso lamang

By Juju Manubag

 Cebu City, April 4 (PIA)--- Ang Philippine Drug Enforcement Agency (PDEA-7) sa pagtambabayong sa Police Regional Office (PRO)-7 nakadakop ug saysenta y kwatro (64) nga mga tawo nga may kalambigitan sa mga illegal nga druga nga midangat ug balor kapin kwatro siyentos setenta mil ka pesos (P470,000) sulod lamang sa bulan sa Marso.

Matod pa ni Atty. Mauro Licen ang legal officer sa PDEA-7 atol sa gihimong Talakayan sa Isyung Pulis (TSIP) ngagipahigayon sa Philippine Information Agency (PIA-7).  

Sa laing bahin, ang hepe sa Mandaue City Police Office (MCPO) nga si S/Supt. Noel Gillamac miangkon sa maong TSIP forum nga adunay pagsaka gamay sa problema sa ginadiling druga ang siyudad.

Bag-ohay lang ang MCPO mi-raid sa balay sa usa ka magtiayon nga inila nga big time pushers sa giingon nga dapit.

Mibalor sa uno punto dos milyones ka pesos (P1.2M) ang nasakmit nga shabu sa maong magtiayon ug napasakaan na kini ug kaso pagka-karon matod pa ni Gillamac.

Ang hepe sa MCPO mitaho usab nga sa niaging tulo ka bulan, singkwenta y otso (58) ka mga drug pushers ug laing trese (13) ka mga drug users ilang nadakop.

Sa siyudad sa Lapulapu, baynte y otso (28) ka mga tao ang nadakpan nga may kalambigitan sa ginadili nga druga matod pa sa hepe sa Lapulapu City Police Office (LLPO) nga si S/Supt. Anthony Obenza.

Dugang pa ni Obenza nga ang away batok sa ginadiling druga magpadayon gayud. Ug gani, niya pa, gipangtagaan niya ang iyang mga tawo ug quota nga mosakmit sa mga makalapas sa salaud sa ginadiling sugal ug druga matag semana.

Sa siyudad usab sa Sugbo, si Cebu City Police Officce (CCPO) P/Supt Armando Ragoc mipabalo sa TSIP forum, nga siyento traynta (130) na ang ilang nasikop kalabot sa ginadiling druga ug siyento dos (102) na ka mga kaso ang ilang napasaka  sa korte.

Si P/Supt Rodulfo Albotra sa Cebu Provincial Police Office (CPPO) mitaho pud nga may nuybenta y kwatro (94) na ka mga tawo nga may kalambigitan sa ginadiling druga ang ang ilang nasakmit.

Ang  abogado sa PDEA-7 nga si Atty. Mauro Licen mitataw nga bag-ohay lang nga ang nubain gi-classify na nga usa na kini ka prohibited drug.

Dugang ni Licen, ang masakpan niini dili na mag-atubang nga nakalapas sa ordinansa sa siyudad apan mapahamtangan na kini sa Acta Republika Numero 9165 diin dili na maka-piyansa ang dinakpan ug ngadto sa presohan magtingkagol. (PIA-Cebu/JSM)

PRO-7 misakmit ug dul-an P3M nga mga gidiling drugas dinhi sa CV  

By Juju S. Manubag

Cebu City, April 03 (PIA) – Sa unang tulo (3) ka bulan sa 2011, ang Police Regional Office (PRO)-7 nakasakmit ug dul-an P3M sa mga ginadiling druga dinhi sa rehiyon.

Sumala pa kini ni PRO-7 Regional Director C/Supt Ager Ontog Jr. sa Talakayan sa Isyung Pulis (TSIP) Forum nga gipahigayon karong bulana ug sa pakigtambayayong sa Philippine Information Agency-7.

Si Ontog miingon nga resulta kini sa kapin dos siyentos traynta (230) ka panagtambayayong nga operasyon tali sa kapolisan ug sa Philippine Drug Enforcement Agency (PDEA)-7 sa tinguha niini nga mapalapdan ang pagsumpo sa mga ginadiling druga sa Central Visayas .

Sa dos siyentos setenta y tres (273) ka operasyon sa PRO-7 ug PDEA-7, nakasakmit kini ug 70.23 ka gramo nga shabu, 377 ka mga marijuana seedlings, 628.54 ka gramo nga dahon sa marijuana, 17 ka sigarilyo mga marijuana ug 956 ka tanom sa marijuana nga gipangibot, si Ontog mitaho.

Si Ontog midugang sa pag-ingon nga ang problema sa drugas dili lamang diri sa Sugbo kung di usa kini ka nasudnong suliran bisan pa sa iyang pag-angkon nga ang Sugbo usa ka highly urbanized nga siyudad ug lucrative ang pag pang-negosyo sa ginadili nga druga alang sa mga mamaligyaay ug sa tighimo niining mga gidili nga mga druga.

Si Ontog nagkanayon nga daghan na kaayong kahigayonan nga naninguha sa pagsulay ang mga dagkong patigayong sindikato sa druga nga mitukod ug mga pagamaan diri sa Sugbo, sama sa shabu.

Alang nila masayon ang pagpayuhot tungod kay ang Sugbo usa sa mga siyudad sa Pilipnas nga nahimutang sa stratehiyang lugar.

Ang mga gikatahong datos sa sitwasyon sa mga ginadiling druga nahiapil sa major accomplishments sa unang tulo (3) ka bulan sa 2011 sa PRO-7.

Tungod niini mapasalamaton si Ontog nga  sa tanang kapulisan sa tibuok rehiyon sa mga lakang nabuhat niini sa tinguha nga masugpo ang ginadiling druga. (PIA-7/jsm)