Padayon nga kahapsay, resolba sa kawat gipanghingusgan sa PNP Siquijor

By: Rizalie Anding Calibo

Siquijor Province, April 1 (PIA7)— Gipanghingusgan sa bag-ong hepe sa kapulisan ang pagmentenar sa kahapsay ug  kalinaw ingon man ang hingpit nga pagpakgang sa kaso sa kawat ilabi na sa mga beach resorts sa lalawigan sa Siquijor.

Sa pakighinabi sa Philippine Information Agency (PIA) kang Siquijor Police Provincial Office (SPPO) Provincial Director Ernesto Agas, siya mipasigarbo nga walay nahitabong kawat sa mga beach resorts ug uban pang establisimento sa Siquijor sugod sa iyang pagtungtong sa lalawigan niadtong Febrero 23 hangtud karon, usa ka kasayuran nga makatabang sa pagpalambo sa turismo sa lalawigan, matud pa niya.

“Siquijor is a really good and peaceful place that tourist would love to visit but we cannot call it a paradise if robbery continues to exist,” matud pa ni Agas samtang misaad sa pagpahiluna gayud sa seguridad ilabi na sa ‘inhouse security force’ sa mga beach resorts ug uban pang establisimento, nga matud pa niya mao ang unang seguridad gawas sa kapulisan.

Atol sa Peace and Order Council Meeting, ang lokal nga  buhatan sa Philippine National Police (PNP) mipadayag nga adunay tulo ka panghitabong kawat sa bulan sa Enero hangtud Pebrero karong tuiga sahi sa usa lamang nga kaso niadtong miaging tuig sa samang higayon.

Tungod niini, misaad si Agas ug siyento porsyentong pagkunhod sa kaso karong tuiga.

Dihadiha, mipahigayon ug “dialogue” ang hepe uban sa mga tag-iya sa mga beach resorts ingon man ang tagsatagsa ka mga inhouse security uban sa pahimatngon sa pagkamabinantayon ug pagpalig-on sa seguridad niini.

Sumala pa sa hepe, kinahanglan ang lig-on nga pag-implementar sa mga lakang alang sa seguridad, usa niini ang pagtsek kon pagkuha sa lista sa mga kabtangan sa mga bisita nga iubos sa ilang proteksyon aron malikayan ang posibleng ‘dili tinuod’ nga report sa mga bisita.

Kini, sumala pa, tungod kay possible usab nga mahitabo ang “rob ko” nga paagi sa ubang bisita o turista kon taho nga sila “kunohay” gikawatan  aron malibre sa bayad sa ilang gipuy-an o makakuha ba nuon ug dako-dakong bayad gikan sa mga beach resorts.

Gipaningkamotan usab ni Agas ang pagpahimutang sa Provincial Tourist Police Office nga matud pa, kinahanglan gayud sa Siquijor aron padayong mouswag ang turismo niini.

Sa kasamtangan, gipasigarbo sa Hepe ang regular nga “foot and ronda” patrol sa iyang kapulisan ilabi na sa lungsod sa San Juan diin anaa ang daghang beach resorts uban sa kusganong supporta ni Provincial Governor Orlando A. Fua Jr., ug Mayor Edwin Quimno. Kini magpamatuod nga kami seryoso sa among serbisyo sa lalawigan, matud pa ni Agas. (RACalibo/PIA-Siquijor)