Customs nagkinahanglan og 40 ka examiners

By: Hazel F. Gloria

Cebu City , Abril 5 (PIA)—Ang Bureau of Customs (BOC) nagkinahanglan og kwarenta (40) ka examiners alang sa Mactan Cebu International Airport .

BOC district collector Ronnie Silvestre mipadayag nga sa pagkakaron, walay examiners nga na destino sa airport aron pagtan-aw sa mga bagahe sa moabot nga mga torista.

Sa usa ka memorandum, gitahasan si BOC deputy collector for operations Francis Agustin Erpe nga mopahigayon og pagtoon kung unsay pamaagi og sistema sa Passenger Services Area diha sa Mactan airport. 

Matod ni Erpe nga adunay mga cargo examiners nga temporaryo lang gi-assign sa arrival area.

Usa sa iyang recommendations mao ang pagdawat og mga examiners aron mapalambo ang paghatag og serbisyo sa mga torista dinhi sa Sugbo.

Sa pagkakaron, adunay kinse (15) to baynte (20) ka mga international flight ang moabot sa Mactan airport og mokabat sa dos mil ka mga pasahero matag adlaw.

Gipadayag usab ni Erpe ang kanunay nga pagkaguba sa x-ray machine tungod sa kadan na niini. PIA-7/HFG)

===========

Krimen sa CV mikunhod sa unang 2 ka bulan ning tuiga

By: Juju S. Manubag

CEBU CITY, Apr 5 (PIA)- -- Ang ‘average monthly crime rate’ kon AVMCR sa Central Visayas miubos ug nuybe punto dose porsyento (9.12%) sulod sa mga bulan sa Enero ug Pebrero ning tuiga.

Kini segun sa taho sa hepe sa Police Regional Office (PRO)-7s Regional Operations and Planning Division nga si P/Supt.Petronelli Baldebrin sa gipahigayon nga Talakayan sa Isyung Pulis (TSIP) Forum bag-ohay lang.

Gikan sa bulan sa Enero hangtod Pebrero karong tuiga, ang AVMCR miabot ug traynta punto traynta y kwatro porsiyento (30.34%) kung itandi kini sa samang duha (2) ka bulan sa miaging tuig nga mikabat ug 39.46 porsento.

Matod pa ni Baldebrin, nagpasabot kini nga epektibo ang ilang mga programang gimugna batok sa kriminalidad sama sa checkpoints, beat ug foot patrols ug sa integrated patrol system kon IPS.

Sa mga krimeng index batok sa tawo (murder, rape, physical injuries, homicide) ug batok sa katigayonan o kabtangan (robbery, theft, carnapping ug cattle rustling), mitala kini ug tres mil otsenta y tres (3,083) sa unang duha ka bulan karong tuiga.

Samtang adunay tres mil nuybe siyentos traynta y tres (3933) ang natala sa samang mga bulan sa miaging tuig. 

Segun ni Baldebrin, baynte uno punto saysenta y uno porsiyento (21.61%) ang pagkunhod.

Sa mga krimeng non-index (violations against special laws; illegal fishing, illegal gambling, illegal logging, intellectual property rights violations ug uban pa) sulod sa duha ka bulan karong tuiga mitala kini ug mil siyento otsentay dos (1,182).

“Adunay pagkunhod nga baynte sais punto setentay siyente porsyento (26.77%) ikumpara sa parehong mga bulan sa imaging tuig nga adunay natala nga usa ka libo sais siyentos katorse (1,614) ka mga ‘non-index crimes’.

Si Baldebrin mitaho usab nga ang ‘crime solution efficiency rate’ karong tuiga baynte sais punto kwarenta porsiyento (26.40%) ikumpara sa disisyete punto setentay otso porsiyento (17.78%) sa miaging tuig.

“Adunay pag-usbaw sa ‘crime solution efficiency rate’ dinhi sa Central Visayas karong tuiga ngadto sa otso punto saysenta y tres porsiyento (8.63%)” matod pa ni Baldebrin.

Samtang adunay trayntay sais punto traynta kwatro porsiyento (36.34%) ang ‘crime clearance efficiency rate’ karong tuiga  ikumpara sa baynte kwatro punto nuybenta y uno porsiyento (24.91%) sa miaging tuig.

“Aduna usa’y pag-usbaw sa ‘crime clearance efficiency rate’ ngadto sa onse punto kwarentay tres porsiyento (11.43%),” ni Baldebrin pa.

  

Ang suporta ug kooperasyon sa tanang sectors sa katilingban maoy nakatabang ug dako sa pagsulbad sa kadaghanang kaso ug sa pagdakop sa mga nakalapas sa mga salaud sa rehiyon, panapos pa ni Baldebrin. (PIA-Cebu/JSM)

===========

Walay 'holiday economics' alang sa Araw ng Kagitingan karong Sabado—Malacañang

By: Juju Manubag

Cebu City. 5 April. (PIA) - - - Dili ipatuman ni Presidente Benigno S. Aquino III ang "holiday economics" alang sa ‘Araw ng Kagitingan’ bisan pa ug saulogon ni ug Sabado.

Mao ni ang pamahayag sa Malacañang niadtong Lunes pinaagi sa Twitter account sa Philippine Official Gazette, kabahin sa Proclamation No. 84 nga gipirmahan niadtong Disyembre 20, 2010.

"To those asking, Araw ng Kagitingan will be observed on April 9, a Saturday. Please refer to (Proclamation) 84," segun sa tweet niini. (Alang sa mga nangutana kung saulogon sa Abril 9, Sabado nga Araw ng Kagitingan. Palihug ug tan-aw sa Proclamation 84.)

Mahinumduman sa Araw ng Kagitingan ang kaisog sa mga sundalong Pilipino nga mitahan sa pwersang Hapon ug misinati sa siyento kwarenta (140) ka kilometro nga ‘Death March’.

Ilawom sa Proclamation 84, ang Araw ng Kagitingan nahiapil sa "regular holidays" sa 2011. Apil ani ang Bag-ong Tuig (Enero 1), Huwebes Santo (Abril 21 ug Biyernes Santo (Abril 22).

Apil usab sa mga regular holidays nga matunong ug mga adlaw nga Sabado ug Domingo ang Labor Day (Mayo 1, Domingo), Independence Day o Araw ng Kalayaan (Hunyo 12, Domingo), ug Christmas Day o Pasko (Disyembre 25, Domingo).

Ang mga regular holidays usab nga mitunong ug ordinaryo nga mga adlaw ang National Heroes' Day (Agosto 29, awahing Lunes sa Agosto); Bonifacio Day (Nobyembre 30, Miyerkules), ug Rizal Day (Disyembre 30, Biyernes).

Gawas niini, naapil sa mga "special non-working holidays" ang Ninoy Aquino Day (Agosto 21, Dominggo); All Saints' Day o Adlaw Minatay (Nobyembre 1, Martes); ug ang awahing adlaw sa tuig (Disyembre 31, Sabado). (PIA-Cebu/jsm)

============

96 ka gradwado sa hayskol sa CV mipasar sa DOST-SEI scholarship exam

by: Juju S. Manubag

Cebu City, April 5 (PIA --- Nuybentay sais (96) ka mga gradwado sa hayskol dinhi sa Central Visayas ang mipasar sa scholarship examination nga gipahigayon sa Department of Science and Technology--Science Education Institute (DOST-SEI) niadtong Nobyembre 21, 2010. 

DOST-7 Scholarship Project Assistant Ariadne Victoria Pada miingon nga dul-an tres mil (3,000) ang mikuha sa eksamen.

Segun ni Pada nga sa 96 nga mipasar, setentay nuybe (79) niini iskolar ubos sa RA 7687. Usa kini ka programa sa scholarship nga alang sa mga utokan nga nasakop sa ‘economically disadvantaged familias.’

Ang nahabilin nga disisyete (17) mipasar sulod sa DOST-SEI Merit scholarship program. 

Sa tala nga gipadala sa DOST-7 sa PIA-7, kwarentay otso (48) ka mga iskolars dinhi sa Sugbo maoy labing daghan nga mipasar sulod sa RA 7687 scholarship.

Gisundan kini sa taga-Bohol nga adunay baynte uno (21) ka buok, walo (8)  sa Negros Oriental ug duha (2) sa  Siquijor.

Ang mipasar sa DOST-SEI Merit scholarship, taga-Cebu lang gihapon ang adunay daghang mipasar nga siyam (9) ka buok. Samtang, ang taga-Bohol ug taga- Negros Oriental, aduna kiniy upat (4) ka mga iskolars kada usa nila.

Matod ni Pada, ang mga iskolar sa DOST-SEI ubos sa RA 7687 magdawat ug hinabang alang sa matrikula ug uban pang balayranan sa tunghaan nga ilang pasakupan, allowance sa libro, board ug lodging sulod sa napulo (10) ngadto sa onse (11) ka bulan o mo-sobra pa.

Sa laing bahin, ang mga iskolar sa DOST-SEI Merit makadawat ug samang benepisyo sa dawaton sa mga iskolar sa RA 7687 apan kini  ihatag nga binulan nga allowance depende sa istado sa pangitaan sa ilang pamilya sumala ni Pada.

Sa Sugbo, ang mga mipasarlar sa DOST-SEI ubos sa RA 7687 mahimong mopasakop sa mosunod nga tunghaan; University of San Jose-Recolletos (USJR), Cebu Normal University (CNU), Cebu Technical University (CTU), Cebu Institute of Technology(CIT), University of San Carlos (USC) and University of the Philippines (UP), Lahug Campus.

Samtang, ang mga DOST-SEI Merit scholars mahimong mopasakop nganha ra sa USC and UP, Lahug campus, si Pada nagkanayon.

Sa pagpanapos, si Pada nagpahibalo ug nag-awhag sa tanang DOST-SEI iskolar sa pagtambong sa pagahimoon nga orientation-seminar sa DOST didto sa Audio-Visual Room sa University of San Carlos (USC), Talamban campus karong Abril 13, sunod semana. (PIA-7/jsm)