Cebu/JSM) Kaso sa dengue sa Sugbo mikunhod

By: Juju S. Manubag

CEBU CITY, April 7 (PIA) --- Ang kaso sa dengue sa Sugbo mikunhod ngadto sa trese punto singkwentay nuybe porsiyento (13.59%) kung ikatandi kini sa susamang panahon sa miaging tuig,

Kini sumala pa sa tala nga gihatag sa PIA sa City Asst Epidemiologist Durinda Macasocol sa buhatan sa City Epidemiology Statistics and Surveillance Unit (CESSU) sa City Health Department (CHD) sa Sugbo.

Ang Sugbo adunay kwatro sientos singkwentay sais (456) ka mga kaso sa dengue nga natala ug unom (6) nga gikatahong patay sa sakit nga dengue sa niaging tuig sa samang panahon.

Samtang karon, may tres siyentos nuybentay kwatro (394) na lang ka mga kaso sa dengue ang natala ug unom (6) ang patay sa mao nga sakit sukad Enero 1 hangtod sa Marso 26 rong tuiga.

Ang Basak San Nicolas maoy nag-una nga barangay sa Sugbo nga adunay kinatas-ang natala nga mga kaso sa dengue nga trayntay tres (33) ka buok.

Gisundan kini sa Kamputhaw nga may baynte dos (22) ka mga kaso.

Ang barangays sa Labangon, Lahug, Mambaling ug Punta Princesa parehong may tag-disiotso (18) ka mga kaso sa dengue.

Samtang ang Talamban adunay disisyete (17) ka mga kaso; Guadalupe ug Tisa parehong may kinse (15) ka mga kaso sa dengue gikan sa Enero 1 hangtod Marso 26.

Ang unom (6) ka mga barangays mao ang Kamputhaw, Labangon, Pasil, Talamban, Tisa ug Budlaan mao ang mga barangays nga gikatala nga namatayan sa unom (6) ka mga kaso sa dengue.  

Segun sa gikataho sa CESSU, ang pangedaron sa mga natala nga gi-dengue duha (2) ka bulan ngadto sa setentay nuybe (79) ka tuig ug kasagaran mga lalaki ang gintakboyan sa maong sakit sa dengue.

Ang porsiento sa hitabo sa sakit nga dengue ana asa punto kwarentay kwatro (.44) sa kada usa ka libo (1000) nga lumolopyo.

Ang barangay sa Sto.Niño sa Sugbo ang may kinatas-ang porsiento sa hitabo sa dengue diin aduna kiniy tres punto otso (3.8) sa mil kinyentos setentay singko (1,575) ka mga lumolupyo niini.

Gisegundahan sa Pahina Central diin may uno punto singkwentay singko (1.55), ang San Nicolas nga may uno punto disisais (1.16) ug San Roque nga may uno punto dies (1.10) porsintahe sa hitabo sa sakit nga dengue, sumala sa tala sa CESSU. (PIA-7)

Nadakpan na ang Numero Unong MWP sa Carmen, Cebu

By: Juju Manubag

Cebu City, April 7 (PIA) –-- Nadakpan na ang numero uno nga ‘Most Wanted Person’ sa Carmen, Cebu nga si Bernardo Buenafe Gibo, suspetsado sa pagpusil patay ni Corporal Eric Maningo Lucero sa 1st Scout Ranger Regimen, matod ni Police Regional Office (PRO)-7’s Regional Operations and Planning Division Chief nga si P/Supt.Petronelli Baldebrin.

Si Gibo nadakpan niadtong Marso 10 kapin alas sais sa buntag sa Sitio Puti, Barangay Hagnaya, Carmen, Cebu sa operatiba sa Regional Intelligence Division (RID)-7.

Usa si Gibo sa suspetsado sa panghitabo nga pagpamusil niadtong Mayo 3, 2006 sa Sitio Mang-Alio, Barangay Ipil, Carmen, Cebu nga miresulta sa diha-dihang kamatayon ni Corporal Eric Maningo Lucero sa 1^st Scout Ranger Regiment.

Si S/Insp. Reyman Tolentin sa Regional Intelligence Division (RID), sangay nga buhatan sa PRO-7 miingon nga ilang gipunting ang ilang operasyon sa pagsanta sa mga gipangitang kriminal sa rehiyon.

Sa pagka-karon, ang PRO-7 nakasanta na ug tres siyentos sais (306) ka mga gipangitang kriminal.

Gawas ni Gibo, ang uban pa nga mga mahinungdanong nasanta sa mga gipangitang kriminal mao sila Efren Patelan Lamberte alias Kalbo, Conrado Biragsong Almines ug Ricky Binondo Almines nga puro nakasalaud sa krimeng pagpatay.

Ang mga Almines walay piyansa nga gikarekomenda sa krimen ilang nabuhat sa pagpatay, matod pa ni Baldebrin. (PIA-Cebu/jsm)

===========

51 ka kahong nubain nasakmit sa pulis ug PDEA dinhi sa siyudad sa Sugbo

By: Juju Manubag

Cebu City, April 6 (PIA) –- Singkwentay uno (51) ka kahon nga may sulod ug usa ka gatos kada kahon nga mga ampulya sa Nalbuphine Hydrochloride nga inila sa ngalan nga nubain ang nasakmit sa mga pulis ug PDEA dinhi sa siyudad sa Sugbo.

Sumala sa hepe sa  Police Regional Office (PRO)-7’s Regional Operations and Planning Division nga si P/Supt.Petronelli Baldebrin nga nasakmit ang nubain sa pagtambayayong sa Investigation and Detective Management sa Cebu City Police Office (CCPO) ug sa Philippine Drug Enforcement Agency (PDEA)-7.

Nunot niini, nadakpan sa hinugpong pwersa sa CCPO ug PDEA-7 sila Joselito Dacalan Garcia aka Jojo nga matod pa nga tag-iya sa Botica Sugbuanon ug si Randy Wenceslao Torres nga nanag-iya sa lima ka libo usa ka gatos (5,100) nga ampulya nga nubain.

Nadakpan usab niadtong tungora sila Roel Dancalan Garcia ug Andrew Paul Jessup nga usa ka British nasyonal sa Capitol Site, dakbayan sa Sugbo niadtong Pebrero 24 karong tuiga.

Gawas sa nasakmit nga kapin lima ka libo (5,000) ka mga ampulya sa nubain, ila usab nga nadakpan si Joel Abapo Estor diin nakuhaan kini ug kinse (15) ka mga gagmay selyadong pakete nga plastic nga gisudlan sa gituhoang shab, dungang pa ni Baldebrin .

Gitataw ni S/Insp. Reyman Tolentin sa Regional Intelligence Division (RID), sangay nga buhatan sa PRO-7 nga bisan pa gihingusgan nila ang kampanya batok sa ginadiling druga walay dagkong mga sindikato ang nagpalakat sa ginadiling druga diri sa Tunga-tungang rehiyon sa Kabisay-an segun sa ilang pagtiktik.

Sumala pa ni Police Chief Supt. Ager Ontog Jr. nga ang pagsakmit sa nubain ug shabu nagmatood lang nga hugut ang tinguha sa kapulisan nga dugmokon ang tanang mamaligyaay sa ginadiling druga tungod ang pakigbugno batok niini magpadayon,.(PIA-Cebu/jsm)