MCWD hingusgan ang pagpang-rehistro sa mga atabay
by Eli C. Dalumpines

CEBU CITY, Apr. 26 (PIA) --- Hingusgan sa Metropolitan Cebu Water District (MCWD)ang pag-regulate sa pagkutkot ug atabay sa Metro Cebu aron malikayan unya ang posibleng krisis sa tubig.

Si MCWD General Manager Armando Paredes, sa forum nga gipahigayon karong buntag, namahayag nga taas kaayo ang mga kaso sa illegal nga pagpangutkot ug atabay dinhi sa Sugbo hinungdan nga nakahulga kini sa supply sa tubig sa dapit.

Matud ni Paredes, ang pagpanghimo ug atabay, labi na gyud dinhi sulod sa Metro Cebu, wala mabantayi, butang nga diin nakapahagit sa iyang buhatan nga makigtambayayong sa kagamhanang lokal sa Dakbayan sa Lapu-Lapu aron magpahigayon ug pagpangimbintaryo sa mga atabay sa syudad.

Kini, matud niya, subay sa ilang tinguha nga makapangalap ug mga datos nga ilang magamit pag-kumbinse sa gobyerno nga kinahanglang i-regulate ang pagpamuho.

Suma kang Paredes nga duna la’y mga 100 ka mga atabay ang na-rehistro kaniadtong 1992 apan sa ilang datos nga nakuha basi sa  padayon pa nilang gipahigayon nga imbintaryo sa Dakbayan sa Lapu-Lapu nagpakita nga duna na’y mga 10,000 ka mga atabay sulod lang mismo sa maong syudad.

Kung magpadayon kini, siguradong ma-apektuhan gyud ang supply sa tubig, pahayag ni Paredes.

Ang National Water Resources Board (NWRB) mao ang ahensyang gitahasan sa pag-monitor ug pag-regulate unta sa surface ug ground water apan tungod sa kakuwang niini sa tawo kinahanglan na gyung mosulod ang mga kagamhanang lokal, dugang pa niya.

Samtang, si Ma. Dianne B. Rallon, Senior Project Planning and Developmnent Officer sa Environment Division sa MCWD, mitaho nga mokabat sa usa ka kilometro kada-tuig ang pagsulod sa tubig-dagat ngadto sa groundwater tungod sa grabeng pagpamuho ug atabay dinhi sa Sugbo.

Gipahimangnu-an niya ang publiko nga posibleng makasinati kita ug kanihit sa tubig kung magpadayon pa kini. (PIA 7/ECD)

===========

Napu’g lima ka libong bakanteng trabaho hugopan karong Mayo 1

By: Juju S. Manubag

Cebu City, April 27 (PIA) --- Kapin sa napu’g lima ka libu ka mga trabahong lokal ug overseas ang gipaabot nga hugopan karong Mayo 1, adlaw sa pamuo nga ipahigayon nga jobs fair sa upat (4) ka nagkalain-laing lugar sa Central Visayas. Mao kini ang gipahibalo sa hepe sa Technical Support Services Division-Employment Welfare sa Department of Labor and Employment (DOLE)-7 nga si Nancy Abad sa pakighinabi niini sa Philippine Information Agency (PIA).  Ang upat (4) ka mga lugar nga gipahigayon sa mga jobs fair karong Mayo uno mao ang SM Cebu City, Cebu International Convention Center (CICC), Abellana Sports Complex ug Macias Sports Complex sa Dumaguete City, si Abad nagkanayon. Dugang pa ni Abad, ang gibanabana nga 15,500 ka mga trabaho nga pagapilian sa Mayo 1 mga 1,500 niini mga trabahong lokal nga itanyag sa mga Business Process Outsourcing (BPOs) ug mga tigpapatigayon sa SM Cebu City. Laing dos mil (2,000) usab nga mga trabahong lokal ang papilian ngadto sa CICC ug sa Abellana Sports Complex adunay 7,000 ka mga trabaho nga alang sa gawas sa nasod nga ipangpaskil. May singko mil (5,000) ka mga trabahong lokal ug alang sa gawas sa nasod ang ipangpaskil nga itanyag sa Macias Sports Complex sa Dumaguete City sa Mayo 1 nga jobs fair.  Si Abad mi-awhag sa mga moapil sa overseas job fair sa Mayo 1 nga moparehistro daan sa Department of Manpower Development and Placement (DMDP) nga anaa mahimutang sa 2nd floor, Ramos Pub Market ug adto sa Public Employment Service Office (PESO) sa Sugbo ug sa Capitol alang sa mangita ug trabahong lokal. Midugang usab si Abad pag-ingon nga kadtong anaa sa mga kalungsuran, dili na kinahanglan nga moari pa sa siyudad sa wala pa ang adlaw sa jobs fair aron magpa-rehistro. Mangadto lamang sila sa mga opisina sa PESO nga anaa mahimutang sa mga munisipyo kay ni Abad pa kada lungsod adunay mga opisina sa PESO.  Ang pagpa-rehistro daan gikinahanglan aron matagaan ug ‘registration slip’ ug madali ra unya sa adlaw sa jobs fair ang pagpamili ug mga trabaho.  Ang kadto usab nga naka-register pinaagi sa pagsulod sa www.phil-job.net, adunay tulo hangtod unom ka bulan nga bili ang registration slip niini basta wala ray kausaban ang biodata, si Abad nagkanayon. Ang pagparehistro daan sa Phil-Jobnet, DMDP ug PESO ug paghupot sa registration slip gikinahanglan matod pa ni Abad aron mahimong masayon ang proseso sa pagpamili sa ganahang trabaho ug pag-assess sa mga employers ug representante niini sa pagtakdo sa napilian nga trabaho ngadto sa abilidad, katakos ug kasinatian sa ni aplay. Si Abad midugang sa pagpahibalo nga ang SM Cebu City mipunting ug singkwenta (50) ka mga BPOs ug mga tigpatigayon nga anaa sa ilang gambalay. Sa pagkakaron, 12 na ka mga BPOs ug 25 na ka mga tigpatigayon nga anaa sa sulod sa SM Cebu City ang nakarehistro nga moapil sa jobs fair karong Mayo 1, sumala pa sa Supervising Labor and Employment Officer sa DOLE-7 nga si Jessica Uy. Si Uy mipahibalo usab sa PIA nga 52 na ka mga employers ang mirehistro alang sa lokal jobs fair nga ipahigayon sa CICC sa Mayo 1. Midugang sa pagpahibalo si Uy nga adunay 25 na ka mga ahensiya nga gipamatuoran ug gipasaligan sa Philippine Overseas Labor Office (POLO) ang mga bakanteng trabaho nila alang sa gawas nga pagahugopan karong Mayo 1 ngadto sa Abellana Sports Complex, siyudad sa Sugbo. Si Uy nagkanayon usab nga adunay 15 ka mga ahensiya nga moapil sa overseas job fair ug laing lima ka mga tigpapatigayon sa Dumaguete nga moapil sa lokal job fair didto sa Macias Sports Complex karong Adlaw sa Pamuo sa gikaingon nga lugar. Si Abad mipasidaan ngadto sa mga mo-apply alang gawas (overseas) gikinahanglan nga may duha kini ka tuig nga kasinatian sa trabaho nga gustong sudlan o pilion. (PIA-Cebu/ JSM)