Anaa na sa 17% ang nabakunahan sa tipdas sa CV

By: Juju S. Manubag

CEBU CITY, April 11 (PIA) – May disisyete porsiyento (17%) na sa Central Visayas ang nabakunahan sa tipdas.

Mao kini ang gipahibalo ni Dra. Nayda Bautista, ang Department of Health (DOH)-7 Measles-Rubella campaign point person sa pakighinabi sa PIA.

Matod ni Bautista nga wala pa maapil niini ang mga reports gikan sa tulo ka siyudad sa Mandaue, Bayawan ug Bais kay ang mga maong mga siyudad wala pa makadunol sa ilang tagsa-tagsa ka mga reports.

Uno punto tres milyones (1.3M) ang gipunting nila nga mga bata nga vacunan batok sa tipdas dinhi sa Central Visayas, si Bautista miingon.

Si Bautista nagkanayon usab nga otsentay sais mil (86,000) na ka mga ampulya ang niabot sa ilang buhatan.

Dugang sa doctor nga ang mga vials gitawag kini ug multi-dose vial tungod kay ang usa ka ampulya duna kiniy napulo (10) ka mga doses.

Nagpasabot nga ang usa ka ampulya makabakuna ug napulo ka mga bata, sumala ni Bautista.

Si Bautista mipahibalo usab nga mahimo rang mabakunahan ang bata bisan kinii adunay gipangbati sama sa hilanat, ubo, sipon, ug uban pa gawas lang kung kini gi-cancer kay dili gyod mabakunahan batok sa tipdas.

Ang tipdas nga bakuna nga ilang ipanghatag wala kiniy kontra nga timaan, matod ni Bautista.

Tinguha sa ilang buhatan nga mahuman sa pagbakuna ang gipunting nilang 1.3 milyones nga mga bata sa Central Visayas nga nagpangedaron ug siyam (9) ka bulan hangtod sa dili pa kini mo-otso (8) anyos karong tuiga.

Busa matag semana, ang ‘vaccination team’ mopunting ug baynte (20) nagdto sa baynte singko (25) porsiyento nga mga bata nga anaa sa ilang tala, sumala ni Bautista.

Gipakisayod usab ni Bautista sa publiko nga kini ilang pagbakuna sa mga kabalayan walay bayad.

Wala usab si kinsa ang gitugutan sa mga ‘vaccination team’ nga mangolekta ug donasyon o unsa nga matang nga pagpangwarta ngadto sa mga kabalayan, dugang pa ni Bautista.

Busa mga inahan ug mga amahan sa panimalay, ablihi ang inyong mga pwertahan ug panimalay alang sa mga bakunador aron mabakunahan ang inyong mga kabataan sa Measles ug German measles vaccines.   Libre kini alang kaninyo.

Likayan ta ang sakit nga tipdas nga mosangpot sa kamatayon ug sa mga kumplikasyon pa niini, panapos ni Bautista. (PIA-Cebu/JSM)

============

Mga serbisyo sa “medical mission” natagamtaman sa 300 ka mga lumulupyo
Ni Rizalie A. Calibo

DUMAGUETE CITY, Apr 11 (PIA)—Kapin sa tres siyentos ka mga lumulupyo apil na ang mga kabataan sa Barangay Talay nakatagamtam og mga serbisyong medical sa usa ka ‘humanitarian mission’ nga gihimo didto sa Casa Miani-Arvedi compound, niining siyudad niadong Abril 9. 

Ang maong medical mission gitambongan sa mga sibilyan ug sundalong doktor  ubos sa pagpasiugda sa 302 Infantry Brigade Medical ug Dental Team ug Casa Miani-Arvedi Somascan Fathers Foundation Incorporation, Casa Cittadini Home for the Girls and Friendship Home Foundation.

Sumala pa ni Civil Military Officer 1Lt Win Love Bag-ao, nga ang maong mga kasundaluhan kasagaran sakop sa 302nd Infantry Brigade, mihimo sa misyon aron sa pag-angkon sa kalinaw ug kalamboan sa mga lokal nga lumulupyo.

Dugang pa niya nga ang hiniusang misyon nakahatag ug serbisyo alang sa panglawas nga gitumong alang sa pagpauswag sa kahimtang sa mga kabos kinsa dili makahimo pagbayad sa pagpatambal.

Ang mga kasundaluhan uban sa mga lumilihok sa Dumaguete City Health Office mihatag ug libreng serbisyo medikal ug dental, pagpanuli, ingon man sa  pagpakaon sa mga batang kalye ug pamilyang walay panimalay sa maong barangay.

Mihatag usab sa ilang tabang ug suporta ang Lingkod ng Panginoon Dumaguete, Negros Oriental High School batch 1994 ug 1995, Eversure Company ug ang Association of Young Nurses Leaders and Advocates (AYNLA) sa maong kalihokan (RAC hinubad gikan sa taho ni JCT/PIA-7/Negros Oriental)