Kapin 24 porsiento na ang nabakunahan nga mga bata sa Probinsya sa Sugbo
By: Juju S. Manubag

CEBU CITY, April 12 (PIA) – Aduna na’y mga baynte kwatro punto onse porsiyento (24.11%) nga mga kabataan sa Probinsya sa Sugbo ang nabakunahan na lima ka adlaw gikan sa paglunsad sa “Iligtas sa Tigdas ang Pinas” sa tibuok Pilipinas.

Sumala pa ni Jane Ediza sa Department of Health (DOH)-7 Maternal and Child Health Section, nga ang probinsiya sa Sugbo ang may kinadaghanang nabakunahan sa Central Visayas , sa iyang pakighinabi sa PIA.

Gisigundahan kini sa Negros Oriental nga aduanay kinse punto dos porsiyento (15.02%) na ang naabot.   

Ang Siquijor, adunay Onse punto singkwentay siete porsiyento (11.57%) nga mga kabataan ang nabakunahan ug ang Bohol ang adunay pinaka-ubos nga tala sa tres punto nuybe porsiyento (3.9%), sumala pa ni Ediza.

Matod ni Ediza, ang probinsiya sa Sugbo adunay 446,375 nga gipunting nga mga kabataan nga nagpangedaron sa siyam (9) hangtod nuybentay singko (95) ka bulan nga pagabakunahan batok tipdas.

Ang Bohol adunay 251,889 ka mga kabataan nga pagabakunahan batok tipdas samtang ang Negros Oriental  adunay mga 179,600 nga  ka mga bata nga gipunting nga pagabakunahan pa.

Ang Siquijor ang adunay 17,600 nga mga kabataan nga pagabakunahan, labing kinagamyan nga mga gipunting sa proyekto.

Sumala pa ni Ediza nga ang vaccination team may ‘quota’ nga setenta’y singko (75) ka mga bata nga mabakunahan matag adlaw.

.

Gitinguha sa vaccination team nga wala silay bata nga sipyaton nga bakunahan tungod kay kada kabalayan ilang adtoan.

Aduna sila’y ipamutang nga ‘sticker’ sa pagtimaan nga nahuman na sila sa maong balay o kaha balikanan pa ang bakunahan sa mga bakunador, segun ni Ediza.

Buot ipahinumdom ni Ediza nga kutob na lang Mayo 4 ang pag-adto sa mga kabalayan sa mga bakundor sa pagpamakuna ug libre sa Measles and German Measles vaccines.

Gipanghinaot ni Ediza nga hangupon sa mga inahan ang pag-adto sa mga bakunador sa ilang mga kabalayan alang sa paghatag ug bakuna sa ilang kabataan.

Dili na kini hasol alang kanila tungod kay sila na ang duolon ug libre pa gayod ang pagpabakuna.

Ang labing mahinungdanon protektado ang mga kabataan sa tipdas nga sakit, panapos ni Ediza. (PIA7-Cebu/JSM)